• Home
• Canon Text
• Romanized
• śāstrapiṭaka
• stotra
• śākyamuni
• Suprabhātastava

Suprabhātastava

Technical Details

suprabhātastava

oṁ namo buddhāya||

stutam api surasaṁghaiḥ siddhagandharvamukhyair

divi bhuvi ca viśiṣṭaiḥ stotravāgbhir yatīśaiḥ|

aham api kṛśaśaktiḥ staumi saṁbuddham āryaṁ

nabhasi garuḍayāte kiṁ na yānti dvirephāḥ|| 1 [1] ||

sakalaghanavitānakleśarātryandhakāre

jina jagati vibuddhaṁ tatkṣaṇajñānalābhāt|

kamalam iva niśānte tvāṁ tathā suprabuddhaṁ

stutikusumakalāpair arthayiṣyāmi bhaktyā||2||

kṣapitaduritapakṣaḥ kṣīṇaniḥśeṣadoṣo

dravitakanakavarṇaḥ phullapadmāyatākṣaḥ|

surucirapariveṣaḥ suprabhāmaṇḍalaśrīr

daśabala tava nityaṁ suprabhātaṁ prabhātam|| 3[2] ||

madanabalavijetuḥ kāpothocchedakartus

tribhuvanahitakartuḥ strīlatājālahartuḥ|

śamasukharamavettur bhettur ajñānaśailaṁ

daśabala tava nityaṁ suprabhātaṁ prabhātam|| 4 [3]||

asurasuranarāṇāṁ yo 'grajanmāgradevaḥ

sakalabhuvanadhātā lokasṛṣṭyaikaśabdaḥ|

svapiti jagati buddhaḥ padmapattrāyatākṣo

daśabala tava nityaṁ suprabhātaṁ prabhātam|| 5 [4]||

udayagiritaṭastho vidrumacchedatāmras

timiranikarahantā cakṣur ekaṁ janānām|

ravir api madalolaḥ sarvathā so 'pi supto

daśabala tava nityaṁ suprabhātaṁ prabhātam|| 6 [5]||

(1)

dviradadaśanapāṇḍuḥ śītaraśmiḥ śaśāṅkas

tilaka iva rajanyāḥ śarvacūḍāmaṇir yaḥ|

avigatamadarāgaś candramāḥ so 'pi supto

daśabala tava nityaṁ suprabhātaṁ prabhātam|| 7 [6]||

pravarabhujacatuṣkaḥ ṣoḍaśārdhārdhavaktro

japaniyamavidhijñaḥ sāmavedapravaktā|

amalakamalayoniḥ so 'pi supto vidhātā

daśabala tava nityaṁ suprabhātaṁ prabhātam|| 8 [7]||

kuvalayadalanīlaḥ puṇḍarīkāyatākṣaḥ

suraripubalahantā viśvakṛd viśvarūpī|

harir api cirasupto garbhavāsair amukto

daśabala tava nityaṁ suprabhātaṁ prabhātam|| 9 [10]||

himagiriśikharābhaḥ sarpayajñopavītī

tripuradahanadakṣo vyāghracarmottarīyaḥ|

saha girivaraputryā nityasuptas triśūlī

daśabala tava nityaṁ suprabhātaṁ prabhātam|| 10 [8]||

kapilajaṭakalāpo raktatāmrāruṇākṣaḥ

paśupatiratikāle saṅgabhaṅgaikadakṣaḥ|

smaraśaradalitāṅgaḥ so 'pi supto hutāśo

daśabala tava nityaṁ suprabhātaṁ prabhātam|| 11 [11]||

jvalitakuliśapāṇir durjayo dānavānāṁ

surapatir api śacyā vibhramair mūḍhacetāḥ|

aniśi niśi ca suptaḥ kāmapaṅke nimagno

daśabala tava nityaṁ suprabhātaṁ prabhātam|| 12 [9]||

himaśaśikumudābho madyapānāruṇākṣo

dṛḍhakaṭhinabhujāṅgo lāṅgalāsaktahastaḥ|

bala iha cirasupto revatīkaṇṭhalagno

daśabala tava nityaṁ suprabhātaṁ prabhātam|| 13 [12]||

(2)

gajamukhadaśanaikaḥ sarvato vighnakarttā

vigalitamadavāriḥ ṣaṭpadodgītagaṇḍaḥ|

gaṇapatir api supto vāruṇīpānamatto

daśabala tava nityaṁ suprabhātaṁ prabhātam|| 14 [13]||

atasikusumanīlā yasya śaktiḥ karāgre

navakanakavapuṣmān ṣaṇmukhaḥ krauñcabhettā|

trinayanatanayo 'sau so 'pi suptaḥ kumāro

daśabala tava nityaṁ suprabhātaṁ prabhātam|| 15 [14]||

yamavaruṇakuberā yakṣadaityoragendrā

divi bhuvi gaganasthā lokapālās tathānye|

yuvatimadakaṭākṣair īkṣitās te 'pi suptā

daśabala tava nityaṁ suprabhātaṁ prabhātam|| 16 [17]||

ṛṣaya iha mahānto vatsabhṛgvaṅgiro

'drikratupulahavasiṣṭhavyāsavālmīkigārgyāḥ|

yuvatijaghanasaktās te 'pi nityaṁ prasuptā

daśabala tava nityaṁ suprabhātaṁ prabhātam|| 17 [16]||

aśānavasanahīnā mṛtyuyogānuraktā

bahuvividhavighātāḥ pretavad dagdhadehāḥ|

ubhayagativihīnās te 'pi nagnāḥ prasuptā

daśabala tava nityaṁ suprabhātaṁ prabhātam|| 18 [15]||

yad api guṇalavaṁ te nātha saṁkīrtya bhaktyā

mama śubham upajātaṁ bhāvaśobhāvadātam|

tad iha jagati śīghraṁ dhvastasarvānukāraṁ

daśabala tava nityaṁ suprabhātaṁ prabhātam ||19||

suprabhātaṁ tavaikasya

jñānonmīlitacakṣuṣaḥ|

ajñānatimirāndhānāṁ

nityam astamito raviḥ|| 20 [21]||

(3)

punaḥ prabhātaṁ punar udgato raviḥ

punaḥ śaśāṅkaḥ punar eva śarvarī|

mṛtyur jarā janma tathaiva bhūyaśo

gatāgataṁ mūḍhadhiyā na budhyate|| 21 [22]||

ajñānanidrarajanītamasi prasupte

tṛṣṇāviśalaśayane viṣayopadhāne|

loke śubhāśubhaphalaiḥ parivartamāne

jāgarti yaḥ satatam eva namo 'stu tasmai||22 [19]||

suprabhātaṁ sunakṣatraṁ

śriyā pratyabhinanditam|

buddhaṁ dharmaṁ ca saṁghaṁ ca

praṇamāni dine dine|| 23 [23]||

tīrtheṣu gokulaśatāni pibanti toyaṁ

tṛptiṁ vrajanti na ca tat kṣayam abhyupaiti|

tadvan muneḥ kavivarair api saṁstutasya

na kṣīyate guṇanidhir guṇasāgarasya|| 24 [20]||

stutvā lokaguruṁ mahāmunivaraṁ

saddharmapuṇyodadhiṁ

nirdvandvaṁ hatarāgadoṣatimiraṁ

śāntendriyaṁ nispṛham|

yat puṇyaṁ samupārjitaṁ pṛthu mayā

tenāśu loko 'khilaḥ

pratyūṣastutiharṣite daśabale

śraddhāṁ parāṁ vindatām|| 25 [24]||

suprabhātastavaḥ samāptaḥ||  ||

kṛtir iyaṁ rājñaḥ śrīharṣasya|| |||

(4)