• Home
• Canon Text
• Romanized
• śāstrapiṭaka
• yoginītantraṭīkā
• Śrīhevajrasya Guṇasragdharanāmastutiḥ

Śrīhevajrasya Guṇasragdharanāmastutiḥ

Technical Details

p.1

mahāpaṇḍitaśrīśūnyasamādhivajrapādānāṁ

bhagavataḥ śrīhevajrasya guṇasragdharānāmastutiḥ

namaḥ śrīhevajrāya |

svarge svargeśamantrī-samamativibhavo'pi kṣamatvānna notuṁ

pātāle pannagendro na hi bahurasano vaktumīśa[s]stutinte |

martye martyaḥ sudhīḥ sat(d)guṇamabhigadituṁ sakṣamo na kṣamo'laṁ

vakṣye'hante tathāpi stutimativikalāṁ bhakti yuktiprayuktām ||1||

buddhāḥ saṁbuddhaputrā varakuliśakarāḥ śrāvakāḥ khaḍgabuddhā

devā gandharvasiddhoragamayumunayo yakṣarakṣo'surāśca |

stutvā samyaksvaśaktyā daśabalabalinaṁ tvāṁ samabhyarcayanti

śrīma(mā)npūjo(jyo) guṇī syājjagati hi kimuta tvādṛśaḥ sarvaśāstā ||2||

bramhādyā ye madāndhā vigatanijabalā vīkṣitatvatprabhāvā

hūrāvāpūrṇakarṇāḥ kalamalitamanovṛttayaḥ sādhvasārtta(rttāḥ)

mugdhāste pādamūle navabhirapi rasairnṛtyataste patanti

na syuḥ ke sā(śā)ntacintā mahāti paribhavasthānamajñāya nātha ||3||

muktvā mūrttimmahārhāñjananayanaharā(rāṁ) lakṣaṇairlakṣitāṅga-

duṣṭānāṁ trāsahetorbhayada bhayaṁkaraṁ raudrarūpaṁ bibharṣi |

prajñopāyaikarūpaṁ prakaṭayitumidaṁ maṇḍale brahmacaryaṁ

caryācaryeṇa vajrinnanu citamapi sandarśyate drāktayāryā ||4||

p.2

jñāna(nā)darśena dharmān vyavahitapihito dūragān paśyasi tvaṁ

so'yaṁ vairoca[na]ste svaparahitarato buddharūpaḥ(pa)svarūpaḥ |

sāmyajñānena buddhān diśi diśi viditānvīkṣase'bhinnarūpā(pā)-

staṁ te śrīratnarājatanuvacanahṛdāste dadvavā(?)rirūpaḥ ||5||

yāvantaḥ santi dharmmā matiparamayathāskandhadhātvādirūpāḥ 

śaśvattāṁstāvato'pi kṣaṇamasamatayā tena sanniścinomi |

jñānaṁ yatsattṛtīyaṁ jinahitajananaṁ pratyavekṣābhidhānaṁ

śrīmadvāgīśarūpa(paṁ) guṇagaṇasadanaṁ mohajālairvimuktam ||6||

sarvā sākāśasaṁstha(sthā)ṛtuṁ(tu)gatiṣu gatā ye caturyonijātāḥ

kliṣṭa(ṣṭāḥ) satvāḥ samastāḥ samasukhaviratāstīvraduḥkhagnidagdhā(:) |

teṣāmarthaṅkaroṣi pratidinamanulambhena hekāravajraṁ

jñānaṁ  yat kṛtyakāri tribhavajanahitaṁ karmavajrasvabhāvam | ||7||

avyāghātaṁ viśuddhaṁ sakalamalavikalpāpahaṁ svārthakāri

bhāsvadbhāsvatprabhāvaṁ ghanatimiraharaṁ jātyasaṁhāri hṛṣṭam |

jñāna(naṁ) pratyātmavedyaṁ śivamasamasukhaṁ vyāpi citteśarūpaṁ

yatte tenāpi nātha praviśasi satataṁ dharmadhātuṁ viśuddham ||8||

ekānekādyavācyo gaganamiva sadā śūnyatātmā prapañco

bhāvābhāvavyatīto vyapagatavikṛtirvyāpako buddhagamyaḥ |

satsampaddhetubhūtaḥ śubhaśatajanakaḥ sundarānandarūpaḥ

kāya[s]svābhāvāvikaste svaparahitakṛtī sarvathā saṁnidhatte ||9||

buddhakṣetre viśuddhe vividhamaṇimaye kūṭarohe vitatvaṁ

citraṁ lokottaraṁ sannijakuśalabalotpannamaiśvaryamagram |

nityo dharmmādhirājo nikhilaguṇanidhiḥ sarvavitsarvaśāstā

kāyaḥ sāmbhogikaste sukhayati sakalā[n] dharmmavarṣeṇa buddhān ||10||

jātiñcāryāṁ subodhiṁ kvacidativimalatvadhacakrasmṛtiṁ(?) vā

kurvansattvārthahetoḥ kvacidapi ca punardarśayannātmabhāvam |

p.3

vyāpī sanviśvarūpatribhuvanahitakṛtsādhu dedīpyamānaḥ

kāyo nairmāṇikaste dava iva kurute sarvasattvārthameva ||11||

buddha(ddhaḥ) pāśaiḥ pragāḍhaṁ gaja(?)nigaḍayutaiḥ sarppapāśaprakāśaiḥ

samyaksaṅkuñcitāṅgaṁḥ[su?]kamaṭha iva suślīta(śliṣṭa)saṁsaktadantaḥ 

bhūyaḥ svedorddhvadehaḥ khararavikiraṇaiḥ supratapto yathā te

nāmodgrāheṇa bhaktyā bhavati sukhayutaḥ pāṇimukto mahātman ||12||

sphurtvā roddhāntavahneḥ sphuṭavikaṭaphaṇāṭopabhīṣmādvayaste

ānākatā(kāl)lolalolādviṣamaviṣabhṛto bhāsvato bhīmabhogāt |

sandhyāntā raktavaktrādativipulacaladvṛttaraktojjvalākṣāt

sarppātsaṁsarppato'ṅge bhavati gata[su?] yastvāmanusmṛtya bhaktaḥ ||13||

sphūrjjajvālākarālaiḥ kanaḥ(phaṇa)nikaraka raprasphuliṅgaprakīrṇai-

ruddāmoddhūmadhūmraiḥ paramabalabalaṅgarjjadandāndighoṣaiḥ |

dāvādau dīnacetā daha[na?]samudaya(yair)dahyamāno'pi dīptai-

rdhyāyaṁstvāṁ śraddadhāno bhavati guṇanidhe vakti mukto'kṣatāṅgaḥ ||14||

duvvari dūrapāre kharalavaṇajala(le) lolakallolamāle

vyālolavyālakīrṇe varamakarakarāghātacañcātu(ñcatta)raṅge |

durgrāhagrāhagupte śiśukamataśite cakranakrorage'dhvā -

majjatsatpotapannastava guṇagaṇanānnirvyathaḥ pāremeti ||15||

babhrubhruśmaśrupakṣmabhrukuṭila[mani?]śaṁ khe laladraktanetro

vyāttāsyo lolajihvājvaladanalakaco duṣṭadaṁṣṭrākarālaḥ |

muṇḍālī-maṇḍitā-saṁmukhakuharagalallohito'ṭṭa(ṭṭā)ṭṭahāsaḥ

kravyādāyānapi drākpratimukhamapayātyeva lipyānataste ||16||

nānānārācavarṣairviśikhahatahaye dattakuntaprahāre

saṁnāhodgīrṇasaptārcciṣi kanaya(ka)kaṣāt khaḍgakṛttottamāṅge |

cakracchinnebhakumbhakṣatajakṛta saritsrotasi kruddhayuddhe-

dvicchiḥ samveṣṭito yaḥ stutiparipaṭhanānnātha te mucyate'sau ||17||

p.4

vātālī pūtavallīdalitaśikhidalā pādapa(pā)nnāmayantī

kṣodakṣobhātiruddhā kharaparuṣaśilāsaṅkarāsārakartrī |

pāthaḥ prollāsayantī dharaṇidharaśiraḥ pātayantī prayāti

svāminśāntintavoktātpraṇa vapadanamaskārayuktasya nāmnā ||18||

kāntāre kaṇṭakāṅke viṣamakharaśilākarkkaśe durggamārgge

caṇḍāccañcacchaṭāgrāt madhuramṛgapalagrāṣa(sa)puṣṭāṅgayaṣṭeḥ |

vīrād vyāntānanāntadrutamabhirasa(bhisara)to dāruṇādugradaṁṣṭro-

nna(rna)syāttvāṁ dhyāyato bhīrbhavabhayaśamanaḥ kastvadanyo'sti loke ||19||

kāmye kāmye kaḍārairbalibhirati varairarccayitvopahārai -

rarccānte pustakaṁ vā vidhilikhitapadaṁ ye namasyanti nityam |

te svarge sundarībhiḥ surasariti sukhaṁ nardda(rtta)ne vā [ra?]mante

pūjye pūjāḥ prayukta(ktāḥ) vidhivadanudinannātha nūnaṁ phalanti ||20||

devendro devavṛndasphuṭamaṇimukuṭotghṛṣṭapādāravindaḥ

prāsāde vaijayante sphuru(ra)durukiraṇā(ṇo) ratnabhāraṅjitāṅgaḥ |

paśyanśacyāsyacandrantatavita[ta]yutāṁ gītikāṁ sādhu śṛṇvan

bhaktyā tvatpādapaṅkeruha-nuti-karaṇānnātha ke [?] sadāste ||21||

māndhātā dharmadhātā surabhujaganṛṇāṁ sammataḥ sammato'pi

kṣmāpālau lokapālapratimatanubalau varṇṇibhirveṣṭitau tau |

sūtaiḥ saṁvarṇṇitau sadyuvatikaradhutairvījitau cāmarāgre

nāthārccāyogataste bahalavararatau rejatullatvarājyau(?) ||22||

balyāgāroragāgrāgrimamaṇikiraṇālaktakāraktapādau

niśvāsodvāntavahniḥ phaṇamaṇikiraṇadyotitāśāvikāśaḥ |

śeṣo'śeṣoragendraḥ sajalajaladharavyomanīlābjavarṇṇaḥ

pṛthvīmpṛthi(th)vīṁ sapāthoni dhisi(su)rasaritaṁ tvatprabhāvādbabhartti ||23||

ye tvā nindanti mūḍhā aviditaparamārthāstavāryasya śāstu [:]

duḥkhante saṁsahante dahanapacanabhedādijaṁ yattadante |

p.5

gāhante'vīcikaṣṭaṁ jvalitaravirasāpūrṇapātra(traṁ) mahormī

carmmādīnsaptadhātūna svaragatajananānadrutaṁ drāvayantīm ||24||

labdhā tvannāsanaṁ sacchivamamṛtaṁ(ta)padaṁ duḥkhasaṁghātaghāti

śreyaḥ sattvārthakāri prakṛtisuviṣa(śa)daṁ durlabhaṁ vandanīyam |

mohādyairlānti tairthammatamatimalinaṁ laukikaṁ duḥkhadāyi

kṣiprante yānti nūnaṁ vimalaguṇatiraścāṅgatir(tiṁ) nindanīyām ||25||

ghorāṁ(raṁ) tīkṣṇaṁ vipāke viṣamiva viṣamantīvrasantāpakāri

stokaṁ yadvā prabhūtaṁ tava gha(dha)namatilubdhāḥ pramuhyantiye te |

pretāḥ syuḥ sūcikāsyāḥ salilanidhisamānodarā dīnarephāḥ 

kṣutkṣāmā nimnanetrā galamalinatarāstarṣaśuṣko'sya kaṇṭhāḥ(ṭhaḥ) ||26||

yastvanmantraṁ sabījañjapati jayakaraṁ vajravārāvivikte

so'yaṁ gadyaiḥ sapadyaiḥ lalitapadayutairvakti vācaṁ vicitrām |

dṛśyadvādīndravādaṁ śamayati śamavān keśarīve bhadarppa(rpaṁ)

sa syādviśvasya vettā janayati janatāmātmasāccārucaryām ||27||

kalpadrumaḥ kāmadugdhorggaganagatirasirjjāyurārjjaganto

dṛgbhūṣā bhadrakumbho rasanidhiguḍikā ratnayāmmepacāruḥ |

ṣāṇmaunīndrā abhijñā baligṛhagamane sadguṇākhyā(?)nimādyā

anyāścāpi prayatnāsta(t) tava [sa]paricarātsiddhayo yānti siddhim ||28||

kalyayāpālo(kalyālāpo)paśāntammadhuramadhunimittaṁ(nibhaṁ)

viśvarūpābhidhāno

yogī yogaprabhāvād gaganatalagataṁ saptasaptimnavatvam |

godāvaryāḥ samīpe muhurabalagaṇāt sphoṭamāyāsabhīmaṁ

yacchrīrtrailokyagāmiṁ vilasitamidamebha(bhā)ntaveśasya sarvam ||29||

ḍombīvajrābjavajrādibhirurumatibhiryogibhiryoganiṣṭhaiḥ

prāptā mudrātibhadrā [ta]va śamaśamanī heruka tvatprasādāt

caṇḍālī-caṇḍacittā akuśalaniratā māraṇe samprasaktā-

stvāmāsādya prayānti praśamapadamala(laṁ) laṁghitācāracaryāḥ ||30||

p.6

dhāraṇyo bhūmayo'rkkā daśadaśavaśitājñaptayaḥ pāragāśca

varddhante te nṛpasya prakṛtaya iva tā dharmmarājasya satvāḥ |

santiṣṭhante'nuraktāḥ striya iva ca sadā nirvikārā guṇāḍhyāḥ

śrīman(t) saṅkalpavṛkṣe parahitanirate sampadaḥ saṁviśanti ||31||

maitryādyairapramāṇairjagadidamakhilamvīkṣyase nātha nityaṁ

tāni tvattacca naivopalabhasa urusatvo'vikalyāṁśi śaśvat |

sattvebhyo dharmavarṣañjanayasi na ca tān paśyasi tvaṁ kadāci -

ccintāratnāṁ(tnaṁ) jagadbhyaḥ pradiśativasu tannirvikalpaṁ yadiṣṭam ||32||

tvamme mātā pitā tvaṁ śaraṇamapi mahat tvaṁ prabhu[s]tvaṁ hi śāstā

cchettā tvaṁ sarvadoṣāṁstaruṇakaruṇayā nātha viśvasya jantoḥ |

saṁsāre saṁsarantaṁ vyasanaśataśarairbhidyamānaṁ vimānaṁ

māsaṁ puṇyaṁ pavitraṁ paramasukhakaraṁ prāpayājñāya mokṣam ||33||

kṛtvā nātha stutinte sakalakalimalakṣālanaikakṣamāntāṁ

yanme puṇyaṁ prasūtaṁ harahasanahasaṁ kundacandrāṁśuśubhram |

bhūyāttenāśu nāthastribhavabhavajano herukaḥ śrīnivāsaḥ

samyaksattvārthakārī guruguṇadhanadhāmā mahādharmmarājaḥ ||34||

samāpteyambhagavataḥ śrīhevajrasya guṇasragdharānāmastutiḥ |

kṛtiriyaṁ mahāpaṇḍitaśrīśūnyasamādhivajrapādānāmiti ||