• Home
• Canon Text
• Romanized
• śāstrapiṭaka
• sveṣṭadevatā
• Buddhādipūjāvidhiḥ

Buddhādipūjāvidhiḥ

Technical Details

p.1

buddhādipūjāvidhiḥ 

oṁ namo buddhāya |

buddhaṁ praṇamya lokeśaṁ vāgīśaṁ tāriṇīmapi |

teṣāṁ pūjākramaṁ brūmo yathāmnāyaṁ samāsataḥ ||1||

iha khalu kathitakramāt | kṛtatriśaraṇagamanena labdhopāsakasamvareṇa | kṛtasaṁbodhi-sādhanapraṇidhinā'tiśraddhānena nipuṇataramatinā | gurucaraṇaśaraṇagatena sattvahitaiṣiṇā | sambuddhabodhisattvārādhanaṁ vidhivatkaraṇīyam | tatpūrvakatvādabhyudayaniḥśreyasphalaprāpteḥ | "buddhapūjāya geyastu samārairnābhibhūyata" iti pravacanāt sarvavidhnopaśamanāya saṁbuddhabhaṭṭārakaṁ tāvadanena krameṇa pūjayet | tatrāyaṁ kramaḥ -

samādhiṁ mantrajāpañca niśānte svādhimokṣataḥ |

buddhādyanusmṛtiṁ kuryāt śayyāsthaḥ susamāhitaḥ ||2||

mukhaśaucaṁ tataḥ kṛtvā snānaṁ hastādidhāvanam |

ācamanaṁ yathāmantraiḥ sabāhyaṁ svānyatuṣṭaye ||3||

p.2

tatrāyaṁ snānamantraḥ | oṁ āḥ sarvatathāgatābhiṣekasamayaśriye hū | pratimāderapyayaṁ snānamantraḥ | oṁ āḥ hū iti sthānātmayogarakṣāmantraḥ | oṁ hrīḥ svāheti hastapādaprakṣā-lanācamanamantraḥ | oṁ hū ityāsanādhiṣṭhānamantraḥ | caityādikaraṇakāle'pyayaṁ vidhiḥ |

oṁ rakṣa 2 hū 2 phaṭ svāheti bhūmiśodhana mantreṇa bhūmeḥ prokṣaṇaṁ kṛtvā | oṁ vajrabhūme hū ityanena bhūmiparigrahaṁ kuryāt | oṁ sarvavidhnānutsāraya hū svāhetyanena gomayādipānīyagrahaṇaṁ kṛtvā | śucau bhūmipradeśe maṇḍalakamārabhet | oṁ āḥ vajrarekhe hū iti maṇḍa[la]kamantraḥ | sāmmārjanakāle -

dānaṁ gomayamambunā ca sahitaṁ śīlaṁ ca sammārjanaṁ

kṣāntiḥ kuntapipī likāpanayanaṁ vīryaṁ kriyotthāpanam |

dhyānaṁ tatkṣaṇamekacittakaraṇaṁ prajñā sva(su)rekhojjvalā

etāḥ pāramitāḥ ṣaḍeva labhate kṛtvā munermaṇḍalam ||4||

bhavati kanakavarṇaḥ sarvarogairvimuktaḥ

suramanujaviśiṣṭaścandravandī(vaddī)ptakāntiḥ |

dhanakanakasamṛddho jāyate rājavaṁśe

sugatavaragṛhe'smin kāyakarmāṇi kṛtvā || iti || 5||

p.3

maṇḍalakānuśaṁsāñca paṭhet | tataḥ sammārjane niṣpanne | oṁ sva(su)rekhe sarvatathāgatā adhitiṣṭhantu svāheti paṭhitvā vāmahastena puṣpamekaṁ gṛhītvā dakṣiṇahastapṛṣṭhopari dattvā maṇḍalake nikṣipya hastaṁ prakṣālayet |

oṁ maṇidhari vajriṇi mahāpratisare rakṣa 2 māṁ hū hū phaṭ phaṭ svāheti mantreṇa svaśirodeśe puṣpaṁ kṣipannātmarakṣāṁ kuryāt | tadevaṁ maṇḍalakama bhinirvartya tanmaṇḍalamudayāruṇacandramaṇḍalādirūpeṇālambya | oṁ candrārkavimale svāhetyanena mantreṇādhiṣṭhāya |

tatra maṇḍalamadhye tu dhyāte dvīpānvite girau |

kṛtvā devī jinanyāsaṁ tanmantraṁ cātha pūjayet ||6||

tatra pūrva[vi]dehe tu śuklo vairocano muniḥ |

oṁkāra-bījasaṁbhūto bodhyaṁgrīmudrayā yutaḥ ||7||

jambūstho varadaḥ pītastrā-bījo ratnasambhavaḥ |

godānīye samādhistho hrīrjjo rakto'mito jinaḥ ||8||

haritobhayapāṇi kha-bījo'moghaḥ sthitaḥ kurau |

hūjo'kṣobhyaḥ sumerustho nīlo bhūsparśamudritaḥ ||9||

vairocanā'tra candrasthaḥ śeṣāstu [sū]ryasaṁsthitāḥ |

pañcajñānatrikāyātmasoṣṇīṣāści(ścī)varānvitāḥ ||10||

devyaḥ somāsanāḥ sarvāḥ koṇabhāge vyavasthitāḥ |

āgneyyāṁ locanā śuklā lā-jā cakrayutā sthirā ||11||

nairṛtye māmakī nīlā mā-jā ra(va)jrānvitā drutā |

vāyavyāṁ pāṇḍarā raktā pā-joṣṇā raktapadminī ||12||

p.4

aiśānyāṁ tāriṇī śyāmā tā-jā nīlotpaleriṇī |

vajradhātvīśvarī devī savartra(rvatra) sarvadā sthitā ||13||

tasyāstenātra nirdeśaḥ pṛthaktvena na darśitaḥ |

athavāḥ kārasaṁbhūte tatra mārtaṇḍamaṇḍale ||14||

ya-bhavaṁ viśvavarṇañca padmamaṣṭadalaṁ bhavet |

pūrvavadvījasaṁsthānairdīptaṁ saṁsphāryamaṇḍalam ||15||

pūjayedvidhinā sarvaṁ tritattvātmakamaṇḍalam |

jñānasattvaṁ samākṛṣya jaḥ hū va hora(ri)tikramaiḥ |

ākṛṣyāveśya baddhvā ca toṣayedbhaktimānnaraḥ ||16||

athavā pratyekanāmagrahaṇapūrvakam | oṁ āgaccha 2 bhagavannakṣobhyavajra āḥ ityāvāhayet |

bāhyāṁ puṣpādibhiḥ kṛtvā pūjāṁ kuryānmanomayīm |

niryātanādikaṁ kṛtvā kuryāt stutyādimādarāt ||17||

tatra bāhyaṁ -

tryakṣareṇāditaḥ puṣpaṁ dadyānmaṇḍalanāyake |

paścāt svakasvakairmantraiḥ sarveṣāṁ vinivedayet ||18||

oṁ vajraṁ prathamaṁ kṛtvā puṣpe ityādimadhyataḥ |

āḥ hū svāhāntamantreṇa devatābhyo nivedayet ||19||

athavā'nena krameṇa oṁ namo'kṣobhyāya hū | oṁ vajrapuṣpe hū svāhā | pratyekaṁ vāratrayaṁ dadyāt | oṁ namo vairocanāya oṁ oṁ vajrapuṣpe hū svāhā | [oṁ] namo ratnasambhavāya trā oṁ vajrapuṣpe hū svāhā | oṁ namo'mitābhāya hrīḥ oṁ vajrapuṣpe hū svāhā | oṁ namo'moghasiddhaye kha oṁ vajrapuṣpe hū svāhā | oṁ namo locanāyai lā oṁ vajrapuṣpe hū svāhā | oṁ namo māmakyai mā oṁ vajrapuṣpe hū svāhā | oṁ namaḥ pāṇḍarāyai pā oṁ vajrapuṣpe hū [svāhā] | oṁ namastārāyai tā oṁ vajrapuṣpe hū svāhā | punarapya'kṣobhyāya prabhūtataraṁ puṣpaṁ dadyāt anenaiva krameṇa oṁ vajradhūpe hū svāhā |

p.5

 oṁ vajradīpe hū svāhā | oṁ vajragandhe hū svāhā | oṁ vajranaivedye hū svāhā | iti pañcopacārānupaḍhaukayet | tatra vairocanasya dīpādirupam | ratnasambhavasya candanādigandham | amitābhasya dugdhādirasaṁ | [amoghasi]ddheḥ sparśanīyaṁ vastrādi | akṣobhyasya manojñavīṇādiśabdam | tadeteṣāṁ mukhyatayā pañcakāmaguṇānupanāmya oṁ sarvatathāgatapūjāmeghaprasarasamūhe sphurahi(di)maṁ gaganakaṁ hū iti pūjāmadhitiṣṭheta | aśaktau mānasīmapi mahatīṁ pūjāṁ vidadhīta | tadyathā vastradhvajamaṇimuktāhārādaya ābharaṇaviśeṣāḥ | padmotpalādayaḥ [kusumavi]śeṣāḥ | kāyabandhanapātracīvarakhikkhirikādayaḥ pariṣkāraviśeṣāḥ | catvāro dvīpā upadvīpāśca saptaratnādiparipūrṇā upanāmyāḥ |

buddhādhiṣṭhānasāmarthyān mantravidyābalena ca |

mama praṇidhisaṁbhūteḥ samyaksaṁbuddhaparṣadi ||20||

pūjāmeghāḥ pravarttantāṁ sarvato bhadraniṣṭhitāḥ |

vicintyaivaṁ prayatnena [niścale]naiva cetasā ||21||

tata imāṁ pūjābhinirhārakartrī mahāvidyārājñīmaṣṭau vārānāvarttayet | namaḥ sarvabuddhabodhisattvānāṁ sarvathā udgate sphurihi(radi)maṁ gaganakaṁ samantataḥ svāheti | tato'vitathāḥ pūjāmeghāḥ pūjyeṣu buddhabodhisattveṣu yathābhinirhatāḥ saṁtiṣṭhante pratimāpūjāyāṁ tu | oṁ āḥ sarvatathāgatā[bhiṣekasa]mayaśriye hū iti snānaṁ kārayitvā pūrvavat pūjādikaṁ vidadhīta |

tataḥ ahamamukanāmā dharmadhātugatānāṁ sarvabuddhabodhisattvānāṁ saparivārāṇāmātmānaṁ niryātayāmi sarvathā sarvakālam | te ca māṁ mahākāruṇikā adhitiṣṭhantu paritrāyantu siddhiṁ varaṁ ca me prayacchantviti ātmaniryātanā ||

tataḥ sarvapāpān rāgadveṣamohajān [sārvakā]likān pratideśayāmi | yaiścittotpādai-rbuddhabodhisattvairdeśitam | taiścittotpādairdeśayāmi | yathā te buddhā bhagavanto jānantīti pāpadeśanā ||

p.6

tataḥ tryadhvagatānāṁ sarvabuddhabodhisattvānāṁ sarvaśrāvakapratyekabuddhānāṁ sarvasattvānāñca ye puṇyajñānasaṁbhārāḥ sattvadhātuviśodhakāḥ sattvadhātuparitrāyakā laukikalokottarāstān sarvānanumode'nuttarāyā anumodanayā yathā buddhā bodhisattvāśca jānantīti puṇyānumodanā ca kāryā | tato -

namo buddhāya guruve namo dharmāya tāyine |

namaḥ saṁghāya mahate tribhyo'pi satataṁ namaḥ ||22||

ratnatrayaṁ me śaraṇaṁ sarvaṁ pratidiśāmyagham |

anumode jagatpuṇyaṁ buddhabodhau dadhe manaḥ ||23||

ābodheḥ śaraṇaṁ yāmi buddhaṁ dharmaṁ gaṇottamam |

bodhau cittaṁ karomyeṣa svaparārthaprasiddhaye ||24||

utpādayāmī varabodhicittaṁ

nimantrayāmī ahu sarvasattvān |

iṣṭāñcariṣye varabodhicārikāṁ

buddho bhaveyaṁ jagato hitāya || iti | 25 ||

triśaraṇagāthāmāvarttayet | tataḥ stutiṁ kuryāt -

yo buddhatvamanādimadhyanidhanaṁ śāntaṁ vibuddhaṁ svayaṁ

buddhvā cābudhabodhanārthamabhayaṁ mārgaṁ dideśa dhruvam |

tasmai jñānakṛpāsi vajradharadhṛgduṣkhā(duḥkhā)ṅkuraikacchide

nānā dṛggahanopagūḍhavimatiprākārabhet te namaḥ ||26||

tata imāṁ buddhabodhisattveṣvavitathastotropahārakatrīṁ vidyārājñīmaṣṭau vārānāvarttayet | namaḥ sarvabuddhabodhisattvānāṁ sarvatra saṁkusumitābhijñārāśini namo'stu te svāhā iti |

p.7

buddhe bhaktiḥ prakṛtiraśaṭhā sarvasattveṣu maitrī

yoge'bhyāsaḥ phalavimukhatāsaṅgamo bodhisattvaiḥ |

prajñā tīkṣṇā samuhatikule janmakāntaṁ vapurme

jātau jātau sugatakavitā cāstvalaṁ vistareṇa ||27||

ityādipraṇidhiṁ vidhāya | imaṁ mahānuśaṁsaṁ sarvatathāgatahṛdayaṁ sarvabuddhādhiṣṭhitaṁ śatākṣaramantrarājaṁ japet |

namaḥ traiyadhvikānāṁ tathāgatānāṁ sarvatrāpratihatāvāptidharmatā-balinām | a asamasamasamantato'nantatāvāptiśāsanī(ni) hara 2 smara smaraṇa vigatarāgabuddhadharmate sara sara samabalā hasa hasa traya traya gaganamahāvaralakṣaṇe jvalajvalanasāgare svāhā iti | tataḥ -

sarvāsu dikṣu yāvantaḥ kāyacittavyathāturāḥ |

te prāpnuvantu matpuṇyaiḥ sukhaprāmodyasāgarān ||28||

devo varṣatu kālena śasyasampattirastu ca |

sphīto bhavatu lokaśca rājā bhavatu [dhā]rmikaḥ ||29||

abhuktvākā(pā)yikaṁ duḥkhaṁ vinā duṣkaracaryā(rya)yā |

divyenaikaina kāyena jagadbuddhatvamāpnuyāt ||30||

iti paṭhitvā puṇyaṁ pariṇāmayet | anayā prajñāpāramitānumodanāpariṇāmanāhārayā |

tadyathā - yathā te tathāgatā arhantaḥ samyaksaṁbuddhā buddhajñānena buddhacakṣuṣā jānanti paśyanti | tatkuśalamūlaṁ yajjātikaṁ yannikāyaṁ yādṛśaṁ yatsvabhāvaṁ yallakṣaṇaṁ yayā dharmatayā saṁvidyate tathā anumode tatkuśalamūlam | yathā ca te tathāgatā arhantaḥ 

p.8

samyaksambuddhā abhyanujānanti pariṇāmyamānam | tatkuśalamūlamanuttarāyāṁ samyak sambodhau tathā pariṇāmayāmīti ||

tadanu oṁ sarvatathāgata sulalitanamitairnamāmi bhagavantamamukanāthaṁ vā | jaḥ hū va hoḥ pratīcchemaṁ kusumāñjaliṁ nātha horiti paṭhitvā nameta | tataḥ -

kṛto vaḥ sarvasattvārthaḥ siddhirdattā yathānugā |

gacchadhvaṁ buddhaviṣayaṁ punarāgamā(ma)nāya ca ||31||

oṁ muḥ svāheti visarjayet | tato maṇḍalakarekhāṁ lopayet | pūjā'nuśaṁsā ca bhagavatā śraddhābalādhāna mudrāvatārasūtre abhihitā |

"yaḥ kaścin mañjuśrīḥ kulaputro vā kuladuhitā vā sarvalokadhāturajopamānāṁ pratyekabuddhānāṁ divase divase śatarasamāhāraṁ dadyāt | divyāni ca vastrāṇi | evaṁ daśagaṁgānadībālukopamān kalpān dadyāt | yaścānyo mañjuśrīḥ kulaputro vā kuladuhitā vā citrakarma likhitaṁ pustakaṁ patraṁ vā buddhaṁ paśyedayaṁ tato'saṁkhyeyataraṁ puṇyaṁ prasavati | kaḥ punarvā doṣo'ñjalipragrahaṁ vā kuryāt | puṣpaṁ vā dadyāt | dhūpaṁ vā | dīpaṁ vā | ayameva tato'saṁkhyeyataraṁ puṇyaṁ prasavatīti" |

śrīsamāje ca -

pañcakāmaguṇairbuddhān pūjayet vidhinā sadā |

pañcopacārapūjābhirlaghubuddhatvamāpnuyāditi ||32||

anyatra ca -

tiṣṭhantaṁ pūjayedyaśca yaścāpi parinivṛ(rvṛ)tam |

samaṁ cittaṁ prasādena nāsti puṇyaṁ viśeṣateti ||33||

p.9

vakṣyamāṇa-śrīmadvajrāsanalokeśvarādi-samastapūjāvidhāne'pi prāyeṇaiṣa eva sakalo vidhiravatāraṇīyaḥ | sarvavyāpakatvena sarvatra samānatvāt | nāyakatatparivārabījabhujavarṇacihnādīnāmeva tu bhedaḥ |oṁ ||

atha vajrāsanabhaṭṭārakaṁ pūjayitumicchati tadā bhagavato'kṣyobhyasya sthāne sumerūpari pītahūkārabījanairyāt tadbījādhiṣṭhitamadhyapītavajrapariṇataṁ śrīmadvajrāsanarūpaṁ suvarṇavarṇaṁ gaurarakta-kṛṣṇaśyāmaskandhakleśamṛtyudevaputracaturmāraparighaṭitasiṁhāsanopari viśvapadmavajrāvasthitaṁ dvibhujamekamukhaṁ vajraparyaṅkaniṣaṇṇaṁ bhūsparśamudrānvitadakṣiṇakaram | utsaṅgasthitottānavāmahastam, kāṣāyavastrācchāditavigraham | vyāmaprabhaṁ śāntaṁ samastamahāpuruṣalakṣaṇānuvyañjane tha(vi)rājamānaṁ vinyasya | tasya bhagavato dakṣiṇe maitreyaṁ bodhisattvaṁ gauravarṇaṁ dvibhujaṁ sitacaityāliṅga(ṅgi)tajaṭāmukuṭadhāriṇam | savyena gṛhītacāmararatnam | ava(pa)savyena kamaṇḍaluvirājitanāga kesarapuṣpachaṭādhāriṇam | tathā vāme lokeśvaraṁ bodhisattvaṁ śuklavarṇaṁ amitābhasanāthajaṭāmukuṭadharam | dakṣiṇena gṛhītacāmararatnam | vāmena parimalamilitālivikacakamaladhāriṇam | etau ca bhagavanmukhamavalokayantau cintayet | pūrvavidehādiṣu pūrvavad vairocanādikaṁ vibhāvya prāgvat pūjādikaṁ vidadhyāditi śrīvajrāsana pūjāvidhiḥ ||

atha sāmānyena yadi manaḥ sugatapūjane | tanmaṇḍalaṁ tadā | candramaṇḍalākṛtiṁ cintayet |

pūjyaṁ sarvaṁ nabho deśe [abja]maṇḍalamānayet |

datvā svamantramudrābhyāmarghaṁ pādyañca sādaram ||34||

oṁ āgaccha 2 buddhabhaṭṭāraka āḥ | ityāhvānamantro munīndrasya | anyāsāmapi sveṣṭadevatānāmayameva svasvanāmagarbha āhvānamantraḥ | praṇavaṁ prathamaṁ madhye buddhāyetyādi śeṣataḥ svāhā | maṇḍalamadhye tu pūrvādidikṣu buddhādipūjyamantreṣu |

tatra maṇḍalamadhye oṁ buddhāya svāhā | pūrvādidikṣuḥ | oṁ kamalapāṇaye svāhā | oṁ maitreyāya svāhā | oṁ gaganagañjāya svāhā | oṁ samantabhadrāya svāhā | oṁ yakṣādhipataye svāhā | oṁ mañjuśriye svāhā | oṁ viṣkambhiṇe svāhā | oṁ kṣitigarbhāya svāhā | anyeṣāmapyevameva pūjyānāṁ svasvanāmamadhyeṣu oṁkṛtirādāvante svāhā | iti pūjāmantraḥ ||

p.10

buddhaṁ namāti satataṁ varapadmapāṇiṁ

maitryātmakaṁ gaganagañjasamantabhadram |

yakṣādhipaṁ parahitodyatamañjughoṣaṁ

viṣkambhiṇaṁ kṣititanuñca namāmi bhaktyā ||35||

prātarutthāya yaḥ paṭhedetāni nāmāsi sa dvāṣāṣṭigaṅgānadībālukopamān kalpānavīciṁ na praviśati | buddhamaṇḍalaṁ samāptam ||

śaṁkhākṛtikṛtakaradvayasaṁyojanenārghamudrāṁ vidhāya | oṁ āḥ hīḥ pravarasatkāraṁ pratīccha hū iti mantraṁ paṭhitvā'grataścintayan pratīcchakapātre tridhārghaṁ dadyāt | dakṣiṇakaratarjanyaṅguṣṭhābhyāmekaṁ sajalapuṣpaṁ pādyabhājanādādāya oṁ āḥ hīḥ pādyaṁ pratīccha hū iti mantreṇa kaniṣṭhikādyaṅgurīḥ(lī) salīlaṁ prasārayan pādayordhyāyan dvitīyapratīcchakapātre pādyaṁ dadyāt | āryāvalokiteśvaro vāmahastena sitasarojadharo'mitābhasanāthajaṭāmukuṭaḥ | maitreyanātho'śokaśākhālaṁkṛtavāmahastaḥ | sitacaityaranālaṁkṛtajaṭājūṭaḥ | āryagaganagañjo haritavarṇo rantakukuṭadhārī | vāmahastena sitapadmopari meghāt gaganasthitaratnakalaśaṁ dadhānaḥ | āryasamantabhadra uttaptatapanīyavarṇo vajrasattvasanātharatnamukuṭālaṁkṛto ratnachaṭāvibhūṣitavāmapāṇiḥ | āryavajrapāṇi[r]yakṣādhipaḥ śyāmavarṇo maṇimayamukuṭavān vāmahastena nīlotpalasthitavajradhārī | mañjughoṣo vāmapāṇinā nīlotpalasthitaprajñāpāramitāpustakaṁ dadhāno ratnamukuṭaḥ | āryasarvani(nī)varaṇaviṣkambhī haritavarṇo ratnamukuṭo vāmahastena sitapadmasthitaharitakhaḍgadhārī | kṣitigarbho hi makaragauro ratnamukuṭadhārī sitakamalopari pītāṣṭāracakraṁ dadhānaḥ | sarve'mī padmacandrāsane'rddhaparyaṅkaniṣaṇṇāḥ | dakṣiṇahastena varadāḥ ||

atha śrīmatkhasarpaṇabhaṭṭārakapūjā namanaḥ | tadā pūrvavanniṣpannamaṇḍalamadhye sumerucaturdvīpādikaṁ vibhāvya madhye sumerūpari sitahrīḥkārabījasaṁbhūtaṁ śuklavarṇaṁ amitābhavirājitajaṭāmukuṭadharam | dakṣiṇahastena varadam | taditareṇa sitapadmadhāriṇaṁ sarvālaṅkārabhūṣitam | dvātriṁśallakṣaṇāśītyanuvyañjanavirājitavigraham, vicitraratnasiṁhāsanasthaviśvadalakamalacandrāsane | arddhaparyaṅkaṁ niṣaṇṇaṁ candraprabhaṁ śrīkhasarpaṇabhaṭṭārakamavalokya | tasya dakṣiṇe tārāsudhanau | vāme bhṛkuṭī-hayagrīvau ca vibhāvya | pūrve pūrvavidehe vairocanam | dakṣiṇe