• Home
• Canon Text
• Romanized
• śāstrapiṭaka
• cikitsavidyā
• Yogaśatakam

Yogaśatakam

Technical Details

p.1

yogaśatakam

[ buddhāya bhaiṣajyaguruvaiḍūryaprabharājāya namaḥ ]

[ āryanāgārjunāya namaḥ ]

kṛtsnasya tantrasya gṛhītadhāmna -

ścikitsitā dviprasṛtasya dūram |

vidagdhavaidyapratipūjitasya

kariṣyate yogaśatasya bandhaḥ ||1||

parīkṣya hetvāmayalakṣaṇāni

cikitsitajñena cikitsakena |

nirāmadehasya hi bheṣajāni

bhavanti yuktā nyamṛtopamāni ||2||

chinnodbhavāmbudharadhanvayavāsaviśvai -

rduḥsparśaparpaṭakamegha kirātatiktaiḥ |

mustāṭarūṣakamahauṣadha dhanvayāsaiḥ

kvāthaṁ pibedanilapittakaphajvareṣu ||3||

kṣudrā mṛtānāgarapuṣkarāhvayaiḥ 

kṛtaḥ kaṣāyaḥ kaphamārutottare |

saśvāsakāsā rucipārśvarukkare

jvare tridoṣaprabhave praśasyate ||4||

p.2

āragvadhagranthika mustatiktā -

harītakībhi kvathitaḥ kaṣāyaḥ |

sāme saśūle kaphavātapitte

jvare hito dīpanapācanaśca ||5||

drākṣābhayā parpaṭakāmbutiktaiḥ

kvāthaṁ saśamyākaphalaṁ vidadyāt |

pralāpamurchābhramadāhaśoṣa -

tṛṣṇānvite pittabhave jvare tu ||6||

nidigdhikānāgarakāmṛtānāṁ

toyaṁ pibenmiśritapippalīkam |

jīrṇajvarārocakakāsaśūla -

śvāsāgnimāndyārditapīnaseṣu ||7||

durālabhāparpaṭakapriyaṅgu -

bhūnimba vāsākaṭurohiṇīnām |

kvāthaṁ pibeccharkarayāvagāḍhāṁ

tṛṣṇāsrapittajvaradāha yuktaḥ ||8||

[ jvaracikitsā ]

phalatrikaṁ dāruniśāṁ viśālāṁ

mustāṁ ca niṣkvāthya niśāṁśakalkam |

pibetkaṣāyaṁ madhusaṁprayuktaṁ

sarvaprameheṣu samutthiteṣu ||9||

p.3

savatsakaḥ sātiviṣaḥ savilvaḥ

sodīcyamustaiśca kṛtaḥ kaṣāyaḥ |

sāme saśūle ca saśoṇite ca 

cirapravṛtte vihito'tisāre ||10||

śuṇṭhīṁ samustātiviṣāguḍūcīṁ

pibejjalena kvathitāṁ samāṁśām |

mandānalatve satatāmaye ca 

jvarānusakte grahaṇīgade ca ||11||

punarnavā dārvyabhayāgudūcīṁ

pibet samūtrāṁ mahiṣākṣayuktām |

tvagdiṣaśophodarapāṇḍuroga -

sthaulyaprase kordhvakaphāmayeṣu ||12||

mustākhuparṇī phaladāruśigru -

kvāthaḥ sakṛṣṇākrimiśatrukalkaḥ |

mārgadvayenāpi cirapravṛttān 

krimin nihanti krimijāṁśca rogān ||13||

elopakulyāmadhukāśmabheda -

kauntī śvadaṁṣṭrāvṛṣa korubūkaiḥ |

śṛta vibedaśmajatupradhānaṁ

saśarkare sāśmarimūtrakṛcchre ||14||

4

elāśmabhedakaśilājatupippalīnāṁ

cūrṇāni taṇḍulajalālulitāni pītvā |

tāvadguḍena sahitānyapi saṁlihāna

āsannamṛtyurapi jīvati mūtrakṛcchre ||15||

harītakīgokṣurarājavṛkṣa -

pāṣāṇa bhiddhanvayavāsakānām |

kvāthaṁ pibenmākṣika saṁprayuktaṁ

kṛcchre sadāhe saruje vibandhe ||16||

vāsāguḍūcīcaturaṅgulānā -

meraṇḍatailena pibetkaṣāyam |

krameṇa sarvāṅgajamapyaśeṣaṁ

jayedasṛgvātabhavaṁ vikāram ||17||

rasāñjanaṁ taṇḍulīyasya mūlaṁ

kṣudrānvitaṁ taṇḍulatoyapītam |

asṛgdaraṁ sarvabhavaṁ nihanti 

śvāsaṁ ca bhārgī saha nāgareṇa ||18||

eraṇḍavilva bṛhatīdvaya mātuluṅga -

pāṣāṇa bhittrikṛta mūlakṛtaḥ kaṣāyaḥ |

sakṣārahiṅgulavaṇorubutailamiśraḥ

śroṇyaṁsa meḍhhṛdayastanarukṣu peyaḥ ||19||

p.5

hiṅgūgragandhāviḍa śuṇṭhayajājī -

harītakīpuṣkaramūlakuṣṭham |

bhāgottaraṁ cūrṇitametadiṣṭaṁ

gulmodarā jīrṇaviṣūcikāsu ||20||

cūrṇa samaṁ rucaka hiṅgumahauṣadhānāṁ

śuṇṭhayambunā kaphasamīraṇasaṁbhavāsu |

hṛtpārśvapṛṣṭha jaṭharārtivisūcikāsu

peyaṁ tathā yavarasena va viḍvibandhe ||21||

pūtīka patragajacirbhiṭaca vyavanhi -

vyoṣaṁ ca saṁstaracitaṁ lavaṇopadhānam |

dagdhvā vicūrṇya dadhimastuyutaṁ prayojyaṁ

gulmodaraśvayathu pāṇḍugudodbhaveṣu ||22||

dviruttarā hiṅguvacā sakuṣṭhā

suvarcikā caiva viḍaṅgacūrṇam |

uṣṇāmbunānāha visūcikārti -

hṛdrogagulmordhvasamīraṇadhnam ||23||

śṛṅgīkaṭutrikaphalatraya kaṇṭakārī

bhārgī sapuṣkarajaṭā lavaṇani pañca |

cūrṇa pibedaśiśireṇa jalena hikkā -

śvāsordhvavātakasanārucipīnaseṣu ||24||

p.6

nādeyīkuṭajārkaśigrubṛhatīsnugvilvabhallātaka -

vyāghrīkiṁśu kapāribhadrakajaṭā pāmārganīpāgnikān |

vāsāmuṣkakapāṭalān salavaṇān dagdhvā rasaṁ pācitaṁ 

hiṅgvādiprativāpametaduditaṁ gulmodaraplīhiṣu ||25||

cavyāmlave tasakaṭutrika tintiḍīka -

tālīśajīrakatugādahanaiḥ samāṁśaiḥ |

cūrṇaṁ guḍapramuditaṁ trisugandhiyuktaṁ 

vaisvarya pīnasakaphāruciṣu praśastam ||26||

tālīśacavyamaricaṁ sadṛśaṁ dviraṁśaṁ

mūlaṁ tugāmagadhajaṁ triguṇāṁ ca śuṣṭhīm |

kṛtvā guḍatriguṇitāṁ guṭikāṁ sugandhāṁ

kāsāgnimāndyagudajajvararukṣu dadyāt ||27||

śuṇṭhīkaṇāmaricanāgadalatvagelā -

cūrṇīkṛtaṁ kramavivardhitamūrdhvamantyāt |

khādedidaṁ samasitaṁ gudajāgnimāndya -

gulmā ruciśvasanakaṇṭhahṛdāmayeṣu ||28||

sindhūttha hiṅgutriphalāyavānī -

vyoṣairguḍāṁśairguṭikāṁ prakuryāt |

tairbhakṣitaistṛptimavāpnuvannā

bhuñjīta mandāgnirapi prabhūtam ||29||

p.7

ayastilatryūṣaṇakolabhāgaiḥ

sarvaiḥ samaṁ mākṣikadhātucūrṇam |

tairmodakaḥ kṣaudrayuto 'nutakraḥ 

pāṇḍvāmaye dūragate'pi śastaḥ ||30||

guḍena śuṇṭhīmathavopakulyāṁ

payyāṁ tṛtīyāmatha dāḍimāṁ vā |

āmeṣvajīrṇeṣu gudamayeṣu

varco vibandheṣu ca nityamadyāt ||31||

harītakīnāgaramustacurṇe

guḍena baddhā guṭikā vidheyā |

nivārayedā syavidhāriteyaṁ 

śvāsaṁ pravṛddhaṁ prabalaṁ ca kāsam ||32||

vaṭaprarohaṁ madhu kuṣṭha mutpalaṁ

salājacūrṇaṁ guṭikāṁ prakalpayet |

susaṁhitā sā vadanena dhāritā

tṛṣaṁ pravṛddhāmapi hanti satvaram ||33||

manaḥśilāmāgadhikoṣaṇānāṁ

cūrṇaṁ kapitthāmlarasena yuktam |

lājaiḥ samāṁśairmadhunāvalīḍhaṁ

chardi prasaktāmasakṛ nnihanti ||34||

p.8

dūrvāraso dāḍimapuṣpajo vā 

ghrāṇapravṛtte'sṛji nasyamiṣṭam |

stanyena vālaktarasena vāpi

viṇmā kṣikānāṁ ca nihanti hikkām ||35||

dhātrīrasaḥ sarjarasaḥ sapākyaḥ

sauvīrapiṣṭaśca tadā yutaśca |

bhavanti sidhmāni yathā na bhūya -

stathaivamudvartanakaṁ karoti ||36||

dūrvābhayāsaindhavacakramarda -

kuṭherikāḥ kāñjikatakrapiṣṭāḥ |

tribhiḥ pralepairapi baddhamūlān

dadrūśca kaṇḍūśca vināśayanti ||37||

gāṇḍīrikā citrakamārkavārka -

kuṣṭhadrumatvaglavaṇaiḥ samūtraiḥ |

tailaṁ pacenmaṇḍaladadru kuṣṭha -

duṣṭavraṇānāṁ kiṭimāpahāri ||38||

sindūra guggulurasāñjanasikthatutthai -

stulyāṁśakaiḥ kaṭukatailamidaṁ vipakvam |

kacchuṁ sravatpiṭakitā mathavāpi śuṣkā -

mabhyañjanena sakṛduddharati prasahya ||39||

p.9

suvarcikā nāgarakuṣṭhamūrvā -

lākṣāniśālohitayaṣṭikābhiḥ |

tailaṁ jvare ṣaḍguṇatakrasiddha -

mabhyañjanaṁ śītavidāhanut syāt ||40||

sarpirguḍūcīvṛṣakaṇṭakāri -

kvāthena kalkena ca siddhametat |

peyaṁ purāṇa jvarakāsaśūla -

śvāsāgnimāndyagrahaṇīgadeṣu ||41||

vṛṣakhadira paṭolapatra nimba -

tvagamṛtamāmalakīkaṣāyakalkaiḥ |

ghṛtamabhinavametadāśu siddhaṁ

jayati visarpamadāsrakuṣṭhagulmān ||42||

amṛtāpaṭolapicumarda dhāvanī -

triphalākarañjavṛṣakalkavāribhiḥ |

ghṛtamuttamaṁ vidhivipakvamādṛtaḥ

prapibannidaṁ jayati kuṣṭhamāturaḥ ||43||

p.10

khaṇḍāṅkūṣmāṇḍakānāmatha pacanavidhiḥ svinnaśuṣkājyabhṛṣṭān

nyasyetkhaṇḍe vipakve samaricamagadhāśuṇṭhayajājītrigandhān |

leho'yaṁ bālavṛddhānilarudhirakṛśastrīprasakta kṣatānāṁ

tṛṣṇākāsāsrapitta śvasanagudarujāccharditānāṁ ca śastaḥ ||44||

vipācya mūtrāmlamadhūni dantī -

piṇḍītakṛṣṇāviḍa dhūmakuṣṭhaiḥ |

varti karāṅguṣṭhanibhāṁ ghṛtāktāṁ

gude rujānāharhāriṁ vidadhyāt ||45||

[ iti kāyacikitsā ]

saśarkaraṁ kuṅkumamājyabhṛṣṭaṁ

nasyaṁ vidheyaṁ pavanāsṛgutthe |

bhūkarṇaśaṅkhākṣi śiro'rdhaśūle

dinābhivṛddhiprabhave ca roge ||46||

pathyākṣadhātrīphalamadhyabījai -

stridvayekabhāgairvidadhīta vartim |

tayāñjayet tatsapadi pravṛddha -

makṣṇorharet duṣṭamapi prakopam ||47||

p.11

harītakīsaindhavatārkṣyaśailaiḥ

sagairikaiḥ svacchajalaprapiṣṭaiḥ |

bahiḥ pralepaṁ nayanasya kuryāt

sarvākṣirogopaśamārthametat ||48||

sasaindhavaṁ lodhramathājyabhṛṣṭaṁ

sauvīrapiṣṭaṁ sitavastrabaddham |

āścyotanaṁ tannayanasya kuryāt

kaṇḍūṁ ca dāhaṁ ca rujaṁ ca hanyāt ||49||

hantyarjunaṁ śarkarayābdhiphenaṁ 

naktānghatāṁ gośakṛtā ca kṛṣṇā |

rasāñjanaṁ vyoṣayutaṁ ca pillaṁ

tāpīsamutthaṁ madhunā ca śukram ||50||

puṣpākhyatārkṣyaja sitodadhiphenaśaṅkha -

sindhūtthagairi kaśilāmaricaiḥ samāṁśaiḥ |

piṣṭaistu mākṣikarasena rasakriyeyaṁ

hantyarmakāca timirārjunavartmarogān ||51||

mustośīrarajoyavāḥ samaricāḥ sindhūdbhavaṁ kaṭphalaṁ

dārvītutthakaśaṅkhaphenanaladaṁ kālānusāryañjanam |

tulyaṁ cūrṇita māyase vinihitaṁ kṣaudrānvitaṁ śasyate

kaṇḍvarmāmaya raktarā jitimirapillopadeheṣu ca ||52||

p.12

mañjiṣṭhāmadhukotpalodadhibhavatvaksevyagorocanā -

māṁsīcandanaśaṅkhapatragirimṛttālīśapuṣpāñjanaiḥ |

sarvaireva samāṁśamañjanamidaṁ śastaṁ sadā cakṣuṣaḥ

kaṇḍūkledamalā śruśoṇitarujāpillārmaśuklāpaham ||53||

[ netracikitsā samāptā ]

kvāthaḥ samustātiviṣendu dāru -

kāliṅga pāṭhākaṭurohiṇīnām |

gomūtrasiddho madhunā ca yuktaḥ

peyo galavyādhiṣu sarvajeṣu ||54||

yavāgrajaṁ tejavatī sapāṭhā

rasāñjanaṁ dāruniśā sakṛṣṇā |

kṣaudreṇa kuryādguṭikāṁ mukhena

tāṁ dhārayet sarvagalāmayeṣu ||55||

dārvīguḍūcīsumanapravāla -

drākṣāyavānītriphalākaṣāyaḥ |

kṣaudreṇa yuktaḥ kavalagraho'yaṁ

mukhasya pākaṁ śamayatyudīrṇam ||56||

kuṣṭhaṁ dārvī lodhramabdaṁ samaṅgā

pāṭhā tiktā tejinī pītikā ca |

cūrṇa śastaṁ gharṣaṇaṁ tadvijānāṁ

raktasrāvaṁ hanti kaṇḍūrujaṁ ca ||57||

p.13

sauvīraśuktā rdrakamātuluṅga -

māṁsī rasairguggulusaindhavaiśca |

pakvaṁ tu tailaṁ kaṭukaṁ niṣiñcet

tatkarṇayoḥ karṇarujopaśāntyai ||58||

vāsānimbapaṭolaparpaṭaphalaśrīcavyadārvyambubhi -

stiktośīradurālabhātrikaṭukātrāyantikācandanaiḥ |

sarpiḥ siddhamayordhvajatru vikṛti ghrāṇākṣiśūlādiṣu

tvagdoṣajvara vidradhivraṇarujāśukreṣuṁ caiveṣyate ||59||

dārvīparpaṭanimbavatsakakaṇāduḥsparśayaṣṭīvṛṣā -

strāyantī triphalāpaṭolakaṭukābhūnimbaraktāmbudāḥ |

eṣāṁ kalkakaṣāyasādhitamidaṁ sarpiḥ praśastaṁ dṛśaḥ

pittāsṛkprabhaveṣu śukra timireṣūrdhveṣu ca vyādhiṣu ||60||

śuklairaṇḍānmūlamathogrā śatapuṣpā

puṣpodbhūtaṁ yacca bṛhatyā stagaraṁ ca |

pakvaṁ tailaṁ tat sapayaskaistimiradhnaṁ 

nasyaṁ śreṣṭhaṁ vyādhiṣu cordhveṣvapareṣu ||61||

[ iti śālākyatantram ]

p.14

kvāthe muṣkakabhasmano 'nalaśikhā dagdhaṁ kṣipecchaṅkhakaṁ

tattenaiva punarjalena vipacetkṣāraṁ satailaṁ vidhiḥ |

yojyaṁ tadvraṇaduṣṭiṣu vraṇarujāvarśaḥsu nāḍīṣu ca

tvagdoṣeṣu bhagandareṣu vividhe kaṇṭhāmaye ca sthire ||62||

niśā sayaṣṭī madhupadmakotpalaiḥ 

priyaṅgukāśābara lodhra candanaiḥ |

vipacya tailaṁ payasā prayojayet

kṣateṣu saṁropaṇadāhanāśanam ||63||

jātīnimbapaṭolapatrakaṭukadārvīniśāśārivā -

mañjiṣṭhābhaya śikthatuttha madhukairnaktāhvabījaiḥ samaiḥ |

sarpiḥ siddhamanena sūkṣmavadanā marmāśritāḥ srāviṇo

gambhīrāḥ sarujā vraṇāḥ sagatikāḥ śudhyanti rohanti ca ||64||

[ iti śalyatantraṁ samāptam ]

p.15

śirīṣapuṣpasvarasena bhāvitaṁ

sahasrakṛtvo maricaṁ sitāhvayam |

prayojayedañjanapānanāvanai -

rvimohitānāmapi sarpadaṁśinām ||65||

mayūrapittena ca taṇḍulīyakaṁ

kākāṇḍayuktaṁ prapibedanalpam |

viṣāṇi saṁsthāvarajaṅgamāni

sopadravāṇyapyacireṇa hanti ||66||

tailaṁ tilānāṁ palalaṁ guḍaṁ ca

kṣīraṁ tathārkaṁ samameva pītam |

ālarkamugraṁ viṣamāśu hanti

sadyodbhavaṁ vāyurivābhravṛndam ||67||

āgāradhūmo mahiṣākṣayuktaḥ

savājigandhāghṛtataṇḍulīyakaḥ |

gomūtrapiṣṭo hṛdgadāni hanti

viṣāṇi saṁsthāvarajaṅgamāni ||68||

māṁsīsevyālakauntījalajaladaśilārocanāpadmakeśī -

spṛkkācaṇḍā haridrāgadasitapalitāsṛgla tāpadmakīlāḥ |

tulyā gauraṣṭabhāgāścaturibhakusumā vartayaḥ sarvabhogyāḥ ||

p.16

kṛtvā lakṣmī piśācajvaraviṣajagadā dhnanti candrodayākhyaḥ ||69||

[ iti viṣatantraṁ samāptam ]

siddhārtha triphalāśirīṣakaṭabhī śvetākarañjāmṛtā

mañjiṣṭhārajanīdvayatrikaṭukā śyāmā vacā hiṅgu ca |

śastaṁ chāgala mūtrapiṣṭamagadaṁ sarpagrahoccāṭanaṁ

kṛtvonmādapiśācarākṣasaharaṁ pānādibhiḥ sevitam ||70||

karpāsāsthi mayūrapattra bṛhatīnirmālyapiṇḍītaka -

tvaṅmāṁsī vṛṣadaṁśaviṭtuṣavacākeśāhinirmocakaiḥ |

nāgendradvijaśṛṅgahiṅgu maricaistulyaiḥ kṛtaṁ dhūpanaṁ

skandonmādapiśācarākṣasasurāveśajvaradhnaṁ smṛtam ||71||

trikaṭukadala kuṅkumagranthikakṣāra siṁhīniśākuṣṭha siddhārthayugsamāmbu śakrāhvayaiḥ

sitalaśunaphalatrikośīratiktāvacātuttha yaṣṭībalālohitākhyā śilāpadmakaiḥ |

dadhitagaramadhūkasārapriyāhvāviṣākhyāviṣā tārkṣyaśailaiḥ sacavyāmaraiḥ kalkitai

p.17

rghṛtamabhinavaśeṣa mūtrāmbu siddhaṁ smṛtaṁ bhūtarāvaṁ tu pānena nasyād grahadhnaṁ param ||72||

natamadhukakarañjalākṣāpaṭolā samaṅgā vacāpāṭalī

hiṅgusiddhārthasiṁhīniśāyuglatārohiṇī -

madanaphalakaṭutrikākāṇḍa dāru krimidhnājagandhāmarā -

ṅkola kośātakīśigrunimbāmbudendrāhvayaiḥ |

gadaśuka tarupuṣpabījāmbuyaṣṭayadri karṇīnikumbhāgni -

bilvaiḥ samaiḥ kalkitairmūtravargeṇa siddhaṁ ghṛtaṁ

ciravinihitamāśu sarvaiḥ kramairyojitaṁ hanti sarva -

grahonmādakuṣṭhajvarāṁsta nmahābhūtarāvaṁ smṛtam ||73||

[ iti bhūtavidyā samāptā ]

dārvī haridrā kuṭajasya bījaṁ

siṁhī ca yaṣṭīmadhukā ca tulyam |

kvāthaḥ śiśoḥ stanyakṛte ca doṣe 

p.18

sarvātisāreṣu ca sarvatheṣṭam ||74||

vilvaṁ ca puṣpāṇi ca dhātakīnāṁ

jalaṁ salodhraṁ gajapippalī ca |

kvāthāvalehau madhunā vimiśrau

bāleṣu yojyāvatisāriteṣu ||75||

śṛṅgā sakṛṣṇātiviṣāṁ vicūrṇya

lehaṁ vidadhyānmadhunā śiśūnām |

kāsajvarachardibhirarditānāṁ

samākṣikāṁ cātiviṣāmathaikām ||76||

[ iti bālatantram ]

dhātrīcūrṇasya kaṁsaṁ svarasaparigataṁ kṣaudrasarpiḥ samāṁśaṁ

kṛṣṇā mānī sitāṣṭaprasṛtayutamidaṁ sthāpitaṁ bhasmarāśau |

varṣānte tatsamaśnan bhavati vipalito rūpavarṇaprabhāvī

nirvyādhirbuddhi meghāsmṛtivacanabala sthairyasattvairupetaḥ ||77||

gokṣurakaḥ kṣarakaḥ śatamūlī

vānari nāgabalātibalā ca |

cūrṇamidaṁ payasā niśi peyaṁ 

yasya gṛhe pramadāśatamasti ||77 ā ||

p.19

madhukaṁ madhunā dhṛtena ca

pralihan kṣīramanuprayojayet |

labhate ca na dhātusaṁkṣayaṁ

pramadānāṁ ca mataṁ ca gacchati ||78||

[ iti vājīkaraṇam ]

yaṣṭītugā saindhavapippalībhiḥ

saśarkarābhistriphalā prayuktā |

āyuḥpradā vṛṣyatamātimedhyā

bhavejjarāvyādhivināśanī ca ||79||

nimbasya tailaṁ prakṛtistha meva

nasye niṣiktaṁ vidhinā yathāvat |

māsena tatkṣīraghṛtopayojyāṁ

jarāprabhūtaṁ palitaṁ nihanti ||80||

curṇaṁ śvadaṁṣṭrāmalakāmṛtānāṁ

lihet sasarpirmadhubhāgayuktam |

vṛṣyaḥ sthiraḥ śāntavikāraduḥkhaḥ

samāśataṁ jīvati kṛṣṇakeśaḥ ||81||

[ iti rasāyanam ]

yaṣṭīkaṣāyaṁ lavaṇāgrayuktaṁ

kaliṅga kṛṣṇāphala kalka miśram |

sakṣaudrametadvamane prayojyaṁ

p.20

ghrāṇāsyakaṇṭhaśravaṇāmayeṣu ||82||

harītakībhiḥ kvathitaṁ suvīraṁ

dantyaṅghrikṛṣṇāviḍacūrṇayuktam |

virecanaṁ sorubutailameta -

nniratyayaṁ yojyamathāmayadhnam ||83||

rāsnārāṭha phalatrayāmṛtalatāyukpañcamūlībalā -

māṁsa kvāthayutaḥ satailalavaṇa kṣaudrāṁśa sarpirguḍaḥ |

puṣpāhvā dhanakuṣṭhavilvaphalinī kṛṣṇā vacākalkito

vastiḥ kāñjikadugdhamūtrasahito vātāmayebhyo hitaḥ ||84||

tailaṁ balākvathi takalkasugandhigarbha

siddhaṁ payodadhituṣodakamastucukraiḥ |

tadvat sahācarasaraṇyamṛtāvarībhiḥ

pratyekapakva manuvāsanamīraṇadhnam ||85||

nasyaṁ vidadhyād guḍanāgaraṁ vā 

sasaindhavāṁ māgadhikāmatho vā |

ghrāṇāsyamanyāhanubāhupṛṣṭha -

śirokṣikaṇṭha śravaṇāmayeṣu ||86||

[ iti pañcakarmādhyāyaḥ samāptaḥ ]

śreṣthaḥ parpaṭako jvareṣu vihitastṛṣṇāsu pañcāmlako 

p.21

lājāśchardiṣu vastijeṣu girijaṁ meheṣu dhātrīrasaḥ |

rāsnā vātagadeṣu mūtramudare plīhāmaye pippalī

sandhāne krimihā viṣe śukataruḥ śophe tathā gugguluḥ ||87||

vṛṣo'srapitte kuṭajo'tisāre

bhallātako'rśaḥsu gareṣu hemaḥ |

syaulyeṣu dāruḥ krimiṣu krimidhna

harītakī pāṇḍugadeṣu śastā ||88||

akṣyāmayeṣu triphalāṁ vadanti

sarveṣu śūleṣu tathā rasonam |

kuṣṭheṣu nityaṁ khadirasya sāraṁ

sarveṣu kāseṣu nidigdhikāṁ ca ||89||

śaṁsanti vājīkaraṇe śvadaṁṣṭrā -

muraḥkṣate nāgabalāṁ balāṁ vā |

rasāyaneṣvāmalakaṁ sadeva

sarveṣu rāgeṣu śilāhvayaṁ ca ||90||

[ ityuttaratantram ]

ityete vidhivihitāḥ prasiddhayogāḥ

siddhayartha vinigaditā bhiṣagvarāṇām |

dṛṣṭvā tān katha macikitsako'pi yuñjyā -

dityarthaḥ punarapi vakṣyate'tra kiñcit ||91||

sandhāraṇānaśanajāgaraṇoccabhāṣā -

p.22

vyāyāmayānakaṭutiktakaṣāyarūkṣaiḥ |

cintāvyavāyabhayalaṅghanaśokaśītai -

rvāyuḥ prakopa mupayāti ghanāgame ca ||92||

kaṭvamla madya lavaṇoṣṇa vidāhitīkṣṇaiḥ

krodhānalātapa pariśramaśuṣkaśākaiḥ |

kṣārādyajīrṇaviṣamāśanasevanaiśca

pittaṁ prakopamupayāti ghanātyaye ca ||93||

svapnaṁ divā madhuraśītalamatsyamāṁsai -

gurvamlapicchalatilekṣu payovikāraiḥ |

snigdhātitṛpti lavaṇodakapānabhakṣaiḥ

śleṣmā prakopamupayāti tathā vasante ||94||

ityevamete kramaśo dviśo vā

doṣāḥ pravṛddhā yugapat trayo vā |

kurvanti rogān vividhān śarīre

saṁkhyātasaṁjñāvigatānanekān ||95||

pāruṣyasaṁkocanatodaśūlā -

ñchyāmatvamaṅgavyathabhaṅgaceṣṭān |

suptatva śītatvakharatvaśoṣān

karmāṇi vāyoḥ pravadanti tajjñāḥ ||96||

p.23

parisravasvedavidāharāga -

daurgandhya saṁkledavipākakopān |

pralāpamūrchābhramapītabhāvān

pittasya karmāṇi vadanti tajjñāḥ ||97||

śvetatvaśītatvagurutvakaṇḍū -

snehopadehastimitatvalepān |

utseka saṁghātacirakriyāśca

kaphasya karmāṇi vadanti tajjñāḥ ||98||

etāni liṅgāni ca tatkṛtāni

sarvāmayānāmapi naikanāmnām |

kaścidbhavet prāptiviśeṣa eṣāṁ

saṁjñāntaraṁ yena tu saṁprayānti ||99||

ālasyatandrā hṛdayā viśuddhi -

doṣapravṛtti kṣudabhāvamūtraiḥ |

gurūdaratvārucisuptatābhi -

rāmānvitaṁ tadviduṣā vadanti ||100||

snigdhoṣṇa sthiravṛṣyabalya lavaṇāsvādvamlatailā tapa -

snānābhyañjanavastimāṁsamadirāsaṁvāhanonmardanaiḥ |

snehasvedanirūhanasyaśamanasnehopanāhādikaṁ

p.24

pānāhāravihārabheṣajamidaṁ vātapraśāntiṁ nayet ||101||

tiktasvādukaṣāyaśītapavanachāyāniśāvījanaṁ

jyotsnābhūgṛha yantravāri jalada strīgātrasaṁsparśanam |

sarpiḥkṣīravirekasekarudhirasrāvapradehādikaṁ

pānāhāravihārabheṣajamidaṁ pitta praśāntiṁ nayet ||102||

rūkṣakṣārakaṣāyatiktakaṭukavyāyāmaniṣṭhīvanaṁ

strīsevādhvaniyuddhajāgarajalakrīḍāpadāghātanam |

dhūmātyuṣṇa śirovirekavamanasvedopavāsādikaṁ

pānāhāravihārabheṣajamidaṁ śleṣmāṇamugraṁ jayet ||103||

āmaṁ jayellaṅghanakolapeyā -

ladhvannasūpodaka tiktayūṣaiḥ |

virūkṣaṇa svedanapācanaiśca 

p.25

saṁśodhanai rūrdhvamadhastathā ca ||104||

hemantavarṣāśiśireṣu vāyoḥ

pittasya toyāntanidāghayośca |

kaphasya kopaḥ kusumāgame ca

kurvīta yadyadvihitaṁ yathaiṣām ||105||

kaphasya kope vamanaṁ sanasyaṁ

virecanaṁ pittabhave vikāre |

vātātmake vastimudāharanti

saṁsargaje'pi vyamiti śrametat ||106||

vāto'mla tailalavaṇairmadhurānnapānaiḥ

pittaṁ tathā madhuratiktakaṣāya śītaiḥ |

śleṣmāpi tiktakaṭurūkṣakaṣāyatīkṣṇai -

rāmaḥ praśānti mupayātya patarpaṇena ||107||

budhvaita danyadapi yadyadanuktamatra

yuñjyā tsvayaṁ samadhigamya yathānurūpam |

rogeṣu bheṣajamanalpamati rvidadhyā -

cchāstraṁ hi kiṁcidupadeśalavaṁ karoti ||108||

p.26

guṇadhikaṁ yogaśataṁ nibadhya

prāptameṣāṁ puṇyamanuttaraṁ yat |

nānāprakārāmayanīḍa bhūtaṁ

kṛtsnaṁ jagattena bhavatvarogam ||iti || ||109||

kṛtirācāryaśrīnāgārjunapādānām iti ||