• Home
• Canon Text
• Romanized
• śāstrapiṭaka
• yogottaratantraṭīkā
• Kriyāsaṁgrahapañjikā

Kriyāsaṁgrahapañjikā

Technical Details

mahāpaṇḍitaniḥsaṁgācāryakuladattaviracitā kriyāsaṁgrahapañjikā

1-4 bhūmiparīkṣā

tatra śubhe divasavārādau pūjāpuraḥsaraṁ bhūmiparīkṣā kāryā

1-4-1 parityājyā bhūmiḥ

[1] yady aniṣṭavṛkṣādiyuktā bhūs tadā sā parityayājyā | tataś ca yasyāṁ bhuvi pūrvādidikṣv anukrameṇāśvatthārjunaplakṣapalāśanyadrodhaśālmalībakulodumbarasakaṇṭakavṛkṣāḥ putrastrīdhanaviyogaśatrubhayavittanāśastrīdurācāraparijanaparihaṇadhānyādivrīhivināśadoṣadā sā bhavatīti varjyā| tad uktaṁ 

aindryāṁ nyased vaṭam udumbaram eva yām yāṁ

kurvīta pippalam athāpi ca paścimena |

plakṣaṁ tathottaradiśāsu śubhāni kuryād

viparyayaṁ punar ime'pi viparyayasthāḥ ||

iti|

[2] yāś ca dharā daṇḍaśakaṭasūryapannagakūrmacāpabṛhanmukhamurajatrikoṇavyajanākārapaṅkagartaviṣamabahavas tāḥ khalu paśudhanadhānyakṣayacakṣūrogabandhanapīḍanacaurāgnibhayārthastrīnāśanṛpabhīvittanāśadāridryaśokadoṣadā bhavanti | 

[3] yā apy agniyamarakṣombuvāyudikplavās tā niyamena dāhamṛtyurogadaridratvaripuvardhanāni kurvanti bhūmayaḥ| 

[4] yā ca bhūḥ śvaśṛgāloṣṭrabhinnabhāṇḍasvanā sāśubhadā bhavati |

[5] vasātailakṣārapakṣigandhā ca many aniṣṭaphaladā |

[6] yajñasthānaśmaśānabahūragavivarā ca bhūr varjanīyā | nāgahradacaityādyāśramadevatāyatanāni ca yatra santi sā ca bhūr vigarhitā | 

[7] yatra cācalāyāṁ dikṣu vidikṣu ca yatra tatrāpi kaṇṭakavṛkṣalatāviṭapaśuṣkavṛkṣāḥ santi sā cāpraśastā iti | 

1-4-2 bhūśubhalakṣaṇāni

tataḥ śubhalakṣaṇāni |

[1] yā anantā bhadrāsanāyatavṛttacaturasrās tā akṛtārthasiddhipradabuddhivardhanadhanadhānyadāyinyo bhavanti |

[2] yāś ca pūrvottareśadikplavās tāḥ śrīmatyaḥ sukhakāriṇyo bhavanti | yatra ca rasāyām uttaradigbhāge sarovaraḥ sitaraktakusumitapadmaṣaṇḍamaṇḍitaḥ, abhipracuranīlotpalakumudasaugandhikādibhiḥ puṣpaiḥ saṁchāditaḥ, viṣeṣato nānāpakṣigaṇākīrṇo matsyakacchapādiparipūritaḥ sadāharitatṛṇasaṁyuktaś ceti; pūrvadigbhāga āmrajambukadambakāś ca vṛkṣāḥ santi, tatraivāntare javābandhūkāmilādayaḥ puṣpaviṭapā yāvanto raktapuṣpaviṭapāś ceti; evaṁ dakṣiṇasyāṁ diśi punnāganāgakesarapārijātakacampakāśokā viśeṣato bakulavṛkṣāḥ santi, tatrāntare jātīkundamallikāsugandhataravaḥ santi yāvantaḥ sitapuṣpaviṭapāś ceti; tathā paścimasyāṁ diśi pippalodumbaralakucapanasavṛkṣā santi, yāvantaḥ kṣīrataravas te sarve paścime praśastāḥ, tatrāntare kṛṣṇapuṣpaviṭapāḥ praśastāḥ |

[3] api ca sāmānyena vīṇāveṇuvṛṣabhadundubhisvanā vibhūtikāriṇī bhūḥ syāt |

[4] viśeṣataḥ kulānurūpato viśvaṁbharā grāhyā | tadyathā sitavarṇā dadhidugdhaghṛtādigandhā madhurarasā brāhmaṇānāṁ yogyā | raktavarṇā mallikākamalotpalacampakanāgakesarādigandhā kaṣāyarasā kṣatriyāṇāṁ | pītavarṇā madyagajamadagandhā āmlarasā vaiśyānām | śyāmavarṇā nirgandhā kaṭutiktarasā śūdrāṇām | 

hastamātraṁ khanitvā tayaiva mṛdā gartam āpūrya nyūnādhikasamā yāḥ sthitās tā adhomottamamadhyamāḥ | 

athavā caturasraṁ dvihastapramāṇaṁ gartaṁ nikhanya tanmadhye maṇḍalakaṁ kṛtvā pūrvasyāṁ diśi sitavarṇakusumaṁ sthāpayet | evaṁ paścimottarayamadikṣu raktapītanīlāni kusumāni sthāpayet | yaiṣāṁ na mlāyate sā tadyogyā bhavati |

tatraiva garte pūrvādidikṣv āmakumbhopari pakvaśarāvakeṣu sitādivartibhir gavyājyaiḥ pradīpam ujjvālya parikṣayet | tatra yadi sitavartiḥ prajvalati tadā sā bhūr brāhmaṇānāṁ yogyā | evaṁ raktapītakṛṣṇānāṁ yathāsaṁkhyaṁ kṣatriyavaiśyaśūdrāṇāṁ bhavati sā bhūḥ |

evaṁ kuśaśarośīradūrvābahulā dharā anukrameṇa brāhmaṇādīnāṁ yogyāḥ | 

[5] keṣāñcin mate mahānadīnām uttarakūle, keṣāñcin māte dakṣiṇakūle nagarādyavadhāraṇam |

1-4-3 (the case that a suitable ground is not found)

evaṁ yathoktalakṣaṇānāṁ dharaṇīnām abhāve yathāprāptāyā viśuddhāyāḥ kṣoṇyāḥ svajātisaṁpādanaṁ kṛtvā parigrahaḥ kartavyaḥ | 

3-3 kalaśasthādhivāsanā

parikramānantaraṁ yathāvidhivartitamaṇḍale pañcopacārapūjābhiḥ paripūjite kalaśān adhivāsayet |

3-3-1 pakṣatrayam

tatra tripañcāśad ekādaśa pañca vā |

3-3-1-1 tripañcāśatpakṣaḥ

tripañcāśatpakṣe sarvamāṇḍaleyānāṁ pratyekaṁ sārvakarmikakalaśena catuḥpañcāśat |

3-3-1-2 ekādaśapakṣaḥ

ekādaśapakṣe mahāvairocanasattvavajryādipañcānām ekaḥ | akṣobhyādipañcānām ekaḥ | ratnasaṁbhavādipañcānām ekaḥ | amitābhādipañcānām ekaḥ | amoghasiddhyādipañcānām ekaḥ | lāsyādicatuṣṭayānām ekaḥ | dhūpādicatuṣṭayānām ekaḥ | vajrāṅkuśamaitreyādipañcānām ekaḥ | vajrapāśagandhahastyādipañcānām ekaḥ | vajrasphoṭāmitaprabhādipañcānām ekaḥ | vajrāveśavajragarbhādipañcānām ekaḥ | sārvakarmikakalaśena saha dvādaśa | 

3-3-1-3 pañcapakṣaḥ

pañcapakṣe vairocanādipañcatathāgatasattvavajryādicaturdevatīnavānām ekaḥ | lāsyādyaṣṭadevatīnām ekaḥ | vajrasattvādiṣoḍaśabodhisattvānām ekaḥ | maitreyādiṣoḍaśabodhisattvānām ekaḥ | vajrāṅkuśādicatuḥkrodhānām ekaḥ | sārvakarmikakalaśena saha ṣaṭ |

3-3-2 sārvakarmikakalaśalakṣaṇam

tatra sārvakarmikakalaśasya lakṣaṇam | garbho vṛttenonapañcāśanmātrikaḥ | oṣṭhāntaṁ yāvad ucchrāya ekaviṁśatimātrikaḥ | tadadho lambamāna oṣṭho dvimātrikaḥ | trayodaśamātrayā mukharandhram | adhaḥkaṇṭharandhraṁ sārdhapañcamātrikam | pādādhikāṣṭamātrikā grīvoccaṁ tiryak | adhoṣṭhaḥ sapādaṣoḍaśamātrikaḥ |

3-3-4 (Meditation)

tad anu tīrthāmbupañcaratnauṣadhīvrīhigandhagarbhān vilasatpallavānanān samālyavastrāmbarakandharān dhvajātapatrasuvarṇatilakadvinetrālaktakayajñopavītair upaśobhitān lājākṣata kusumbhaphalinīpūgaparipūritodarān navīnadarbhakṛtakuṇḍalāsanasthān sārvakarmikamantrādhiṣṭhitadūrvākundāpatitagomayasitasarṣapaiḥ kṛtarakṣān <>|

tatra samāhitaḥ sann ācāryo jhaṭiti vaṁkārapariṇatanānāratnamayaṁ kalaśam ākārajaśukladharmodayāntarasthaṁ vibhāvya, tad anu svasvabījacihnapariṇāmena svasvadevatāṁ vicintya svahṛdbījamayūkhāṅkuśair jñānasattvam ānīya purato dṛṣṭvā pādyācamanādikaṁ ca dadyāt | tac ca samayasattve praveśya mahārāgeṇa dravībhūya bodhicittarūpāmṛtībhūtaṁ cintayet | cihne ca samayadevatāṁ jñānadevatayaikībhūtāṁ cintayet | tato vajrāsaktapuṣpamālāntaṁ pañcasūtraṁ vajraghaṇṭāsahitavāmamuṣṭyā gṛhītvā 

oṁ sarvatathāgatamahāyogīśvara hūṁ

iti cakreśasya hṛdayamantreṇa saptadhābhimantrya,

oṁ vajrayakṣa hūṁ

iti sārvakarmikamantreṇa ca tridhābhimantrya punar vajrayakṣamantreṇaivābhimantritapuṣpatrayaṁ nikṣipya, svasvamantreṇāṣṭottaraśataṁ japet | 

tad anu vijayādighaṭān puṣpādibhiḥ saṁpūjya sārvakarmikakalaśavāriṇābhyukṣya baliṁ ca dattvā'sarvavyāpi'tyādistutipuraḥsaraṁ ghaṇṭāṁ vādayet |

sarvavyāpi bhavāgrāgrya sugatādhipate jina |

traidhātukamahārāja vairocana namo'stu te || [1]

namas te vajrasattvāya vajraratnāya te namaḥ |

namas te vajradharmāya namas te vajrakarmaṇe || [2]

tatas tebhyaḥ kalaśebhyaḥ stokastokam udakam ādāya sārvakarmikakalaśe prakṣipet|

yasyācāryasya vajradhātau nādhimokṣas tasya sveṣṭadevatādhimokṣeṇa bhūśodhanapratiṣṭhāparyanteṣu sarvakriyākaraṇam aviruddham |

3-3-5 kalaśasthāpanam

idānīṁ kalaśasthāpanam abhidhīyate |

tatra maṇḍalasya pūrvadvāram ārabhya dakṣiṇāvartena vijayakalaśādīn akṣobhyakalaśaparyantān nyaset |

pūrvadvāre cakreśasya vijayakalaśaṁ tadanukrameṇa vajrāṅkuśavajrarāgavajrasādhusarvāpāyañjahasarvaśokatamonirghāṅgkuśavajrarāgavajrasādhusarvāpāyañjahasarvaśokatamonirghātanamativajralāsyāsattvavajrīvajradhūpāgandhahastiśūraṅgamavajratejavajraratnānāṁ trayodaśa kalaśāni |

evaṁ dakṣiṇadvāram ārabhya ratnasaṁbhavavajrapāśavajraketuvajrahāsagaganagañjajñānaketuvajramālāratnavajrīvajrapuṣpāmitaprabhacandraprabhavajratīkṣṇavajradharmāṇāṁ trayodaśa kalaśāni | 

tathā paścimadvāram ārabhyāmitābhavajrasphoṭavajrahetuvajrabhāṣabhadrapālajālinīprabhavajragītādharmavajrīvajradīpāvajragarbhākṣayamativajrarakṣavajrakarmaṇāṁ trayodaśa kalaśāni |

tathaivottaradvāram ārabhyāmoghasiddhivajrāveśavajrayakṣavajrasaṁdhipratibhānakūṭasamantabhadravajranṛtyākarmavajrīvajragandhāmaitreyāmoghadarṣivajrarājavajrasattvākṣobhyāṇṁ caturdaśa kalaśāni |

sārvakarmikakalaśaṁ tu bāhyadigapekṣayeśānakoṇe kalaśapaṅkter abhyantare sthāpanīyam |

iti prāgadhivāsitakalaśānāṁ maṇḍalacakram ekaikaṁ pradakṣiṇaṁ kārayitvā maṇḍalacakrasya cakravāḍajvālāvalībhūmer bahiḥ kalaśānāṁ sthāpanam |

kalaśanyāsakāle'pi prajñāpāramitādimahāyānasūtrāṇi pāṭhayitavyāni | karpūrāguruturuṣkādidhūpaghaṭikāpradīpādibhir api maṇḍalaṁ pūjayet |