• Home
• Canon Text
• 29 aśokāvadānam

29 aśokāvadānam

Technical Details

29 aśokāvadānam|



yadā rājñā aśokena ardhāmalakadānena bhagavacchāsane śraddhā pratilabdhā, sa bhikṣūnuvāca- kena bhagavacchāsane prabhūtaṃ dānaṃ dattam ? bhikṣava ūcuḥ-anāthapiṇḍadena gṛhapatinā| rājā āha- kiyattena bhagavacchāsane dānaṃ dattam ? bhikṣava ūcuḥ koṭiśataṃ tena bhagavacchāsane dānaṃ dattam| śrutvā ca rājā aśokaścintayati-tena gṛhapatinā bhūtvā koṭiśataṃ bhagavacchāsane dānaṃ dattam| tenābhihitam - ahamapi koṭiśataṃ bhagavacchāsane dānaṃ dāsyāmi| tena yāvaccaturaśītiadharmarājikāsahasraṃ pratiṣṭhāpitam, sarvatra ca śatasahasrāṇi dattāni- jātau, bodhau, dharmacakre, parinirvāṇe ca, sarvatra śatasahasraṃ dattam| pañcavārṣikaṃ kṛtam| tatra ca catvāri śatasahasrāṇi dattāni, trīṇi śatasahasrāṇi bhikṣūṇāṃ bhojitāni yatraikarmahatāṃ dvau śaikṣāṇāṃ pṛthagjanakalyāṇakānāṃ ca| kośaṃ sthāpayitvā mahāpṛthivīmantaḥ- purāmātyagaṇamātmānaṃ kuṇālaṃ ca āryasaṃghe niryātayitvā catyāri śatasahasrāṇi dattvā niṣkrītavān| ṣaṇṇavatikoṭyo bhagavacchāsane dānaṃ dattam| sa yāvad glānībhūtaḥ| atha rājā idānīṃ na bhaviṣyāmīti viklavībhūtaḥ| tasya rādhagupto nāmāmātyo yena saha pāṃśudānaṃ dattam| tadā sa rājānamaśokaṃ viklavībhūtamavekṣya pādayornipatya kṛtāñjaliruvāca-



yacchatrusaṃghaiḥ prabalaiḥ sametya

nodvīkṣitaṃ caṇḍadivākarābham|

padmānanaśrīśatasaṃprapītaṃ

kasmāt sabāṣpaṃ tava deva vaktram|| 1||



rājā āha- rādhagupta, nāhaṃ dravyavināśaṃ na rājyanāśanaṃ na cāśrayaviyogaṃ śocāmi, kiṃ tu śocāmi- āryairyadviprayukṣyāmi|



nāhaṃ punaḥ sarvaguṇopapannaṃ

saṃghaṃ samakṣaṃ naradevapūjitam|

saṃpūjayiṣyāmi varānnapānai-

retaṃ vicintyāśruvimokṣaṇaṃ me||2||



api ca rādhagupta, ayaṃ me manoratho babhūva-koṭiśataṃ bhagavacchāsane dānaṃ dāsyāmīti, sa ca me'bhiprāyo na paripūrṇaḥ| tato rājñā aśokena catvāraḥ koṭyaḥ paripūrayiṣyāmīti hiraṇyasuvarṇaṃ kurkuṭārāmaṃ preṣayitumārabdhaḥ||



tasmiṃśca samaye kuṇālasya saṃpadirnāma putro yuvarājye pravartate| tasyāmātyairabhihitam- kumāra, aśoko rājā svalpakālāvasthāyī| idaṃ ca dravyaṃ kurkuṭārāmaṃ preṣayate| kośabalinaśca rājānaḥ| nivārayitavyaḥ| āvat kumāreṇa bhāṇḍāgārikaḥ pratiṣiddhaḥ| yadā rājño'śokasyāpratiṣiddhā (tasya) suvarṇabhājane āhāramupanāmyate| bhuktvā tāni suvarṇabhājanāni kurkuṭārāmaṃ preṣayati| tasya suvarṇabhājanaṃ pratiṣiddham| rūpyabhājane āharaṃmupanāmyate, tāṇyapi kurkuṭārāmaṃ preṣayati| tato rūpyabhājanamapi pratiṣiddham, yāvallohabhājana āhāra-mupanāmyate| tānyapi rājā aśokaḥ kurkuṭārāmaṃ preṣayati| tasya yāvanmṛdbhājana āhāramupanāmyate| tasmiṃśa samaye rājño'śokasya ardhāmalakaṃ karāntaragatam| atha rājā aśokaḥ saṃvigno'mātyān paurāṃśca saṃnipātya kathayati- kaḥ sāṃprataṃ pṛthivyāmīśvaraḥ ? tato'mātya utthāyāsanādyena rājā aśokastenāñjaliṃ praṇamyovāca- devaḥ pṛthivyāmīśvaraḥ| atha rājā aśokaḥ sāśrudurdinanayanavadano'mātyānuvāca-



dākṣiṇyādanṛtaṃ hi kiṃ kathayata bhraṣṭādhirājyā vayaṃ

śeṣaṃ tvāmalakārdhamityavasitaṃ yatra prabhutvaṃ mama|

aiśvaryaṃ dhiganāryamuddhatanadītoyapraveśopamaṃ

martyendrasya mamāpi yatpratibhayaṃ dāridryamabhyāgatam||3||



athavā ko bhagavato vākyamanyathā kariṣyati ? saṃpattayo hi sarvā vipattinidhanā iti pratijñātaṃ yadavitathavādinā gautamena, na hi tadvisaṃvadati||



pratiśiṣyate'smanne cirādājñā mama yāvatī yathā manasā|

sādyaiva mahādriśilātalavihatanadīvat pratinivṛttā||4|



ājñāpya vyavadhūtaḍimbaḍamarāmekātapatrāṃ mahī-

mutpāṭya pratigarvitānarigaṇānāśvāsya dīnāturān|

bhraṣṭasvāyatano na bhāti kṛpaṇaḥ saṃpratyaśoko nṛpaḥ

chinnāmlānaviśīrṇapatrakusumaḥ śuṣyatyaśoko yathā|| 5||



tato rājā aśokaḥ samīpaṃ gataṃ puruṣamāhūyovāca- bhadramukha, pūrvaguṇānurāgādbhraṣṭaiśvaryasyāpi mama imaṃ tāvadapaścimaṃ vyāpāraṃ kuru| idaṃ mamārdhāmalakaṃ grahāya kurkuṭārāmaṃ gatvā saṃghe niryātaya| madvacanācca saṃghasya pādābhivandanaṃ kṛtvā vaktavyam- jambudvīpaiśvaryasya rājña eṣa sāṃprataṃ vibhava iti| idaṃ tāvadapaścimaṃ dānaṃ tathā paribhoktavyaṃ yathā me saṃghagatā dakṣiṇā vistīrṇā syāditi| āha ca-



idaṃ pradānaṃ caramaṃ mamādya

rājyaṃ ca taṃ caiva gataṃ svabhāvam|

ārogyavaidyoṣadhivarjitasya

trātā na me'styāryagaṇādbahirdhā||6||



tattathā bhujyatāṃ tenā pradānaṃ mam paścimam|

yathā saṃghagatā me'dya vistīrṇā dakṣiṇā bhavet||7||



evaṃ deveti sa puruṣo rājño'śokasya pratiśrutya tadardhāmalakaṃ gṛhya kurkuṭārāmaṃ gatvā vṛddhānte sthitvā kṛtāñjalistadardhāmalakaṃ saṃghe niryātayannuvāca-



ekacchatrasamucchrayāṃ vasumatīmājñāpayan yaḥ purā

lokaṃ tāpayati sma madhyadivasaprāpto divā bhāskaraḥ|

bhāgyacchidramavekṣya so'dya nṛpatiḥ svaiḥ karmabhiorvañcitaḥ

saṃprāpte divasakṣaye raviriva bhraṣṭaprabhāvaḥ sthitaḥ||8||



bhaktyavanatena śirasā praṇamya saṃghāya tena khalu dattamidamāmalakasyārdhaṃ lakṣmīcāpalyacihnitam| tataḥ saṃghasthaviro bhikṣūnuvāca- bhadantā bhavantaḥ, śakyamidānīṃ saṃvegamutpādayitum| kutaḥ ? evaṃ hyuktaṃ bhagavatā-paravipattiḥ saṃvejanīyaṃ sthānamiti| kasyedānīṃ sahṛdayasya saṃvego notpadyate ? kutaḥ ?



tyāgaśūro narendro'sāvaśoko mauryakuñjaraḥ|

jambudvīpeśvaro bhūtvā jāto'rdhāmalakeśvaraḥ||9||



bhṛtyaiḥ sa bhūmiparitadya hṛtādhikāro

dānaṃ prayacchati kilāmalakārdhametat|

śrībhogāvistaramadairatigarvitānāṃ

pratyādiśanniva manāṃsi pṛthagjanānām||10||



yāvattadardhāmalakaṃ cūrṇayitvā yūṣe prakṣipya saṃġhe cāritam| tato rājā aśoko rādhaguptamuvāca- kathaya rādhagupta, kaḥ sāṃprataṃ pṛthivyāmīśvaraḥ ? atha rādhagupto'śokasya pādayornipatya kṛtāñjaliruvāca-d evaḥ pṛthivyāmīśvaraḥ| atha rājā aśokaḥ kathaṃcidutthāya caturdiśamavalokya saṃghāya añjaliṃ kṛtvovāca- eṣa idānīṃ mahatkośaṃ sthāpayitvā imāṃ samudraparyantāṃ mahāpṛthivīṃ bhagavacchrāvakasaṃghe niryātayāmi| āha ca-



imāṃ samudrottamanīlakañcukā-

manekaratnakarabhūṣitānanām|

dadāmyahaṃ bhūtadharāṃ samandarāṃ

saṃghāyaṃ tasminnupabhujyate phalam||11||



api ca|



dānenāhamanena nendrabhavanaṃ na brahmaloke phalaṃ

kāṅkṣāmi drutavārivegacapalāṃ prāgeva rājaśriyam|

dānasyāsya phalaṃ tu bhaktimahato yanme'sti tenāpnuyāṃ

cittaiśvaryamahāryamāryamahitaṃ nāyāti yadvikriyām||12||



yāvat patrābhilikhitaṃ kṛtvā dantamudrayā mudritam| tato rājā mahāpṛthivīṃ saṃghe datvā kālagataḥ| yāvadamātyairnīlapītābhiḥ śibikābhirnirharitvā śarīrapūjāṃ kṛtvā rājānaṃ pratiṣṭhāpayiṣyāma iti , yāvadrādhaguptenābhihitam| rājñā aśokena mahāpṛthivī saṃghe niryātitā iti| tato'mātyairabhihitam- kimarthamiti ? rādhagupta uvāca - eṣa rājño'śokasya manoratho babhūva- koṭiśataṃ bhagavacchāsane dānaṃ dāsyāmiti| tena ṣaṇṇavatikoṭyo dattā yāvadrāśyā pratiṣiddhā| tadabhiprāyeṇa rājñā mahāpṛthivī saṃghe dattā| yāvadamātyaiścatasraḥ koṭyo bhagavacchāsne dattvā pṛthivīṃ niṣkrīya saṃpadiḥ rājye pratiṣṭhāpitaḥ| saṃpadervṛhaspatiḥ putraḥ, bṛhaspatervṛṣasenaḥ, vṛṣasenasya puṣyadharmā, puṣyadharmaṇaḥ puṣyamitraḥ| so'mātyānāmantrayate-ka upāyaḥ syādyadasmākaṃ nāma ciraṃ tiṣṭhet ? tairabhihitam-devasya ca vaṃśādaśoko nāmnā rājā babhūveti| tena caturaśītirdhamarājikāsahasraṃ pratiṣṭhāpitam| yāvadbhagavacchāsanaṃ prāpyate, tāvattasya yaśaḥ sthāsyati| devo'pi caturaśītidharmarājikāsahasraṃ pratiṣṭhāpayatu| rājā āha-maheśākhyo rājā aśoko babhūva| anyaḥ kaścidupāya īti ? tasya brāhmaṇapurohitaḥ pṛthagjano'śrāddhaḥ| tenābhihitam-deva, dvābhyāṃ kāraṇābhyāṃ nāma ciraṃ sthāsyati| yāvadrājā puṣyamitraścaturaṅgabalakāyaṃ saṃnāhayitvā bhagavacchāsanaṃ vināśayiṣyāmīti kukkuṭārāmaṃ nirgataḥ| dvāre ca siṃhanādo muktaḥ| yāvatsa rājā bhītaḥ pāṭaliputraṃ praviṣṭaḥ| evaṃ dvirapi trirapi| yāvadbhikṣūṃśca saṃghamāhūya kathayati- bhagavacchāsanaṃ nāśayiṣyāmīti| kimicchatha stūpaṃ saṃghārāmān vā ? bhikṣubhiḥ parigṛhītāḥ| yāvatpuṣyamitro yāvat saṃghārāmaṃ bhikṣūṃśca praghātayan prasthitaḥ| sa yāvacchākalamanuprāptaḥ| tenābhihitam-yo me śramaṇaśiro dāsyati, tasyāhaṃ dīnāraśataṃ dāsyāmi| dharmarājikāvārhadbuddhyā (?) śiro dātumārabdham| śrutvā ca rājā arhatpraghātayitumārabdhaḥ| sa ca nirodhaṃ samāpannaḥ| tasya paropakarmo na kramate| sa yatnamutsṛjya yāvatkoṣṭhakaṃ gataḥ| daṃṣṭranivāsī yakṣaścintayati-idaṃ bhagavacchāsanaṃ vinaśyati| ahaṃ ca śikṣāṃ dhārayāmi| na mayā śakyaṃ kasyacidapriyaṃ kartum| tasya duhitā kṛmiśena yakṣeṇa yācyate, na cānuprayacchati-tvaṃ pāpakarmakārīti| yāvatsā duhitā tena kṛmiśasya dattā bhagavacchāsanaparitrāṇārthaṃ parigrahaparipālanārthaṃ ca| puṣyamitrasya rājñaḥ pṛṣṭhataḥ yakṣo mahān pramāṇe yūyam (?)| tasyānubhāvātsa rājā na pratihanyate| yāvaddaṃṣṭrānivāsī yakṣastaṃ puṣyamitrānubandhayakṣaṃ grahāya parvatacarye'carat| yāvaddakṣiṇā mahāsamudraṃ gataḥ| kṛmiśena ca yakṣeṇa mahāntaṃ parvatamānayitvā puṣyamitro rājā sabalavāhano'vaṣṭabdhaḥ| tasya munihata iti saṃjñā vyavasthāpitā| yadā puṣyamitro rājā praghātitastadā mauryavaṃśaḥ samucchinnaḥ||



iti śrīdivyāvadāne aśokāvadānaṃ samāptam||