• Home
• Canon Text
• 4 brāhmaṇadārikāvadānam

4 brāhmaṇadārikāvadānam

Technical Details

4 brāhmaṇadārikāvadānam |



bhagavān nyagrodhikāmanuprāptaḥ | atha bhagavān pūrvāhṇe nivāsya pātracīvaramādāya nyagrodhikāṃ piṇḍāya prāvikṣat | kapilavastuno brāhmaṇasya dārikā nyagrodhikāyāṃ niviṣṭā | adrākṣīt sā brāhmaṇadārikā bhagavantaṃ dvātriṃśatā mahāpuruṣalakṣaṇaiḥ samalaṃkṛtamaśītyānuvyañjanairvirājitagātraṃ vyāmaprabhālaṃkṛtaṃ sūryasahasrātirekaprabhaṃ jaṅgamamiva ratnaparvataṃ samantato bhadrakam | sahadarśanādasyā etadabhavat-ayaṃ sa bhagavān śākyakulanandanaścakravartikulād rājyamapahāya sphītamantaḥpuraṃ sphītāni ca kośakoṣṭhāgārāṇi pravrajita idānīṃ bhikṣāmaṭate | yadi mamāntikātsaktukabhikṣāṃ pratigṛhṇīyāt, ahamasmai dadyāmiti | tato bhagavatā tasyāścetasā cittamājñāya pātramupanāmitam- yadi te bhagini parityaktam, ākīryatāmasmin pātra iti | tato bhūyasyā mātrayā tasyāḥ prasāda utpannaḥ | jānāti me bhagavāṃścetasā cittamiti viditvā tīvreṇa prasādena bhagavate saktubhikṣāṃ dattavatī | tato bhagavatā smitamupadarśitam | dharmatā khalu yasmin samaye buddhā bhagavantaḥ smitaṃ prāviṣkurvanti, tasmin samaye nīlapītalohitāvadātāḥ puṣparāgapadmarāgavajravaiḍūryamusāragalvārkalohitakādakṣiṇāvartaśaṅkhaśilāpravālajātarūparajatavarṇā arciṣo mukhānniścārya kāścidadhastādgacchanti, kāścidupariṣṭādgacchanti | yā adhastādgacchanti, tāḥ saṃjīvaṃ kālasūtraṃ saṃghātaṃ rauravaṃ mahārauravaṃ tapanaṃ pratāpanamavīcimarbudaṃ nirarbudamaṭaṭaṃ hahavaṃ huhuvamutpalaṃ padmaṃ mahāpadmamavīciparyantān narakān gatvā ye uṣṇanarakāsteṣu śītībhūtvā nipatanti, ye śītanarakāsteṣūṣṇībhūtvā nipatanti | tenānugatāsteṣāṃ sattvānāṃ tasmin kṣaṇe kāraṇāviśeṣāḥ, te pratiprasrabhyante | teṣāmevaṃ bhavati-kiṃ nu vayaṃ bhavanta itaścyutā āhosvidanyatropapannā iti | teṣāṃ prasādasaṃjananārthaṃ bhagavānnirmitaṃ (darśanaṃ) visarjayati | teṣāṃ nirmitaṃ dṛṣṭvaivaṃ bhavati - na hyeva vayaṃ bhavanta itaścyutāḥ, nāpyanyatropapannā iti| api tvayamapūrvadarśanaḥ sattvaḥ, asyānubhāvenāsmākaṃ kāraṇāviśeṣāḥ pratiprasrabdhā iti| te nirmite cittamabhiprasādya tannarakavedanīyaṃ karma kṣapayitvā devamanuṣyeṣu pratisaṃdhiṃ gṛhṇanti, yatra satyānāṃ bhājanabhūtā bhavanti | yā upariṣṭādgacchanti, tāścāturmahārājikān devān gatvā trāyastriṃśān yāmāṃstuṣitān nirmāṇaratīn paranirmitavaśavartino devān brahmakāyikān brahmapurohitān mahābrahmaṇaḥ parīttābhānapramāṇābhānābhāsvarān parīttaśubhānapramāṇaśubhān śubhakṛtsnānanabhrakān puṇyaprasavān bṛhatphalānabṛhānatapān sudṛśān sudarśānakaniṣṭhaparyantān devān gatvā anityaṃ duḥkhaṃ śūnyamanātmetyuddhoṣayanti | gāthādvayaṃ ca bhāṣante-



ārabhadhvaṃ niṣkrāmata yujyadhvaṃ buddhaśāsane |

dhunīta mṛtyunaḥ sainyaṃ naḍāgāramiva kuñjaraḥ ||1||



yo hyasmin dharmavinaye apramattaścariṣyati |

prahāya jātisaṃsāraṃ duḥkhasyāntaṃ kariṣyati ||2||



atha tā arciṣastrisāhasramahāsāhasraṃ lokadhātumanvāhiṇḍya bhagavantameva pṛṣṭhataḥ pṛṣṭhataḥ samanubaddhā gacchanti | tadyadi bhagavānatītaṃ vyākartukāmo bhavati, pṛṣṭhato'ntardhīyante | anāgataṃ vyākartukāmo bhavati, purastādantardhīyante | narakopapattiṃ vyākartukāmo bhavati, pādatale'ntardhīyante | tiryagupapattiṃ vyākartukāmo bhavati, pārṣṇyāmantardhīyante | pretopapattiṃ vyākartukāmo bhavati, pādāṅguṣṭhe'ntardhīyante | manuṣyopapattiṃ vyākartukāmo bhavati, jānunorantardhīyante | balacakravartirājyaṃ vyākartukāmo bhavati, vāme karatale'ntardhīyante | cakravartirājyaṃ vyākartukāmo bhavati, dakṣiṇe karatale'ntardhīyante | śrāvakabodhiṃ vyākartukāmo bhavati, āsye'ntardhīyante | pratyekabodhiṃ vyākartukāmo bhavati, ūrṇāyāmantardhīyante | yadi anuttarāṃ samyaksaṃbodhiṃ vyākartukāmo bhavati, uṣṇīṣe'ntardhīyante ||



atha tā arciṣo bhagavantaṃ triḥ pradakṣiṇīkṛtyorṇāyāmantarhitāḥ | athāyuṣmānānandaḥ kṛtakarapuṭo bhagavantaṃ papraccha -



nānāvidho raṅgasahasracitro

vaktrāntarānniṣkramitaḥ kalāpaḥ |

avabhāsitā yena diśaḥ samantāt

divākareṇodayatā yathaiva ||3||



gāthādvayaṃ ca bhāṣate -

vigatodbhavā dainyamadaprahīṇā

buddhā jagatyuttamahetubhūtāḥ |

nākāraṇaṃ śaṅkhamṛṇālagauraṃ

smitamupadarśayanti jinā jitārayaḥ ||4||



tatkālaṃ svayamadhigamya dhīra buddhyā

śrotṝṇāṃ śramaṇa jinendra kāṅkṣitānām |

dhīrābhirmunivṛṣa vāgbhiruttamābhi-

rutpannaṃ vyapanaya saṃśayaṃ śubhābhiḥ ||5||



nākasmāllavaṇajalādrirājadhairyāḥ

saṃbuddhāḥ smitamupadarśayanti nāthāḥ |

yasyārthe smitamupadarśayanti dhīrā-

staṃ śrotuṃ samabhilaṣanti te janaughāḥ || 6|| iti ||



bhagavānāha-evametadānanda, evametat | nāhetupratyayamānanda tathāgatā arhantaḥ samyaksaṃbuddhāḥ smitaṃ prāviṣkurvanti | dṛṣṭvā tavaiṣā sā ānanda brāhmaṇadārikā, yayā prasādajātayā mahyaṃ saktubhikṣānupradattā ? dṛṣṭā bhadanta | asāvānanda brāhmaṇadārikā anena kuśalamūlena trayodaśa kalpān vinipātaṃ na gamiṣyati | kiṃ tarhi devāṃśva manuṣyāṃśca saṃvācya saṃsṛtya paścime bhave paścime nikete paścime samucchraye paścima ātmabhāvapratilambhe suparṇihito nāma pratyekabuddho bhaviṣyati | sāmantakena śabdo visṛtaḥ - amukayā brāhmaṇadārikayā prasādajātayā bhagavate saktubhikṣā pratipāditā, sā bhagavatā pratyekāyāṃ bodhau vyākṛteti | tasyāśca svāmī puṣpasamidhāmarthāyāraṇyaṃ gataḥ | tena śrutaṃ mama patnyā śramaṇāya gautamāya saktubhikṣā pratipāditā, sā ca śramaṇena gautamena pratyekāyāṃ bodhau vyākṛtā iti | śrutvā punaḥ saṃjātāmarṣo yena bhagavāṃstenopasaṃkrāntaḥ | bhagavatā sārdhaṃ saṃmukhaṃ saṃmodanīṃ saṃrañjanīṃ vividhāṃ kathāṃ vyatisārya bhagavantamidamavocat- agamadbhavān gautamo'smākaṃ niveśanam ? agamaṃ brāhmaṇa | satyaṃ bhavate tayā mama patnyā saktubhikṣā pratipāditā, sā ca tvayā pratyekāyāṃ bodhau vyākṛtā iti ? satyaṃ brāhmaṇa | tvaṃ gautama cakravartirājyamapahāya pravrajitaḥ | kathaṃ nāma tvametarhi saktubhikṣāhetoḥ saṃprajānan mṛṣāvādaṃ saṃbhāṣase, kaste śraddhāsyati iyatpramāṇasya bījasyeyat phalamiti ? tena hi brāhmaṇa tvāmeva prakṣyāmi, yathā te kṣamate tathainaṃ vyākuru | kiṃ manyase brāhmaṇa asti kaścittvayā āścaryādbhuto dharmo dṛṣṭaḥ ? tiṣṭhantu tāvat bho gautama anye āścaryādbhutā dharmāḥ | yo mayā asyāmeva nyagrodhikāyāmāścaryādbhuto dharmo dṛṣṭaḥ, sa tāvacchrūyatām | asyāṃ bho gautama nyagrodhikāyāṃ pūrveṇa nyagrodho vṛkṣo yasya nāmneyaṃ nyagrodhikā, tasyādhastāt pañca śakaṭaśatāni asaṃsaktāni tiṣṭhanti anyonyāsaṃbādhamānāni | kiyatpramāṇaṃ tasya nyagrodhasya phalam ? kiyat tāvat? kedāramātram | no bho gautama kiliñjamātram | tailikacakramātram | śakaṭacakramātram | gopiṭakamātram | bilvamātram | kapitthamātram ? no bho gautama sarṣapacatuṣṭayabhāgamātram | kaste śraddhāsyati iyatpramāṇasya bījasyāyaṃ mahāvṛkṣo nirvṛtta iti ? śraddadhātu me bhavān gautamaḥ mā vā | naitat pratyakṣaṃ kṣetram | tāvadbho gautama nirupahataṃ snigdhamadhuramṛttikāpradeśaṃ bījaṃ ca navasāraṃ sukhāropitam | kālena ca kālaṃ devo vṛṣyate, tenāyaṃ mahānyagrodhavṛkṣo'bhinirvṛttaḥ | atha bhagavānasminnutpanne gāthāṃ bhāṣate -



yathā kṣetre ca bījena pratyakṣastvamiha dvija |

evaṃ karmavipākeṣu pratyakṣā hi tathāgatāḥ ||7 ||



yathā tvayā brāhmaṇa dṛṣṭameta-

dalpaṃ ca bījaṃ sumahāṃśca vṛkṣaḥ |

evaṃ mayā brāhmaṇa dṛṣṭametat

alpaṃ ca bījaṃ mahatī ca saṃpat || 8 || iti ||



tato bhagavatā mukhāt jihvāṃ nirnamayya sarvaṃ mukhamaṇḍalamācchāditaṃ yāvat keśaparyantamupādāya, sa ca brāhmaṇo'bhihitaḥ-kiṃ manyase brāhmaṇa yasya mukhāt jihvāṃ niścārya sarvaṃ mukhamaṇḍalamācchādayati, api tvasau cakravartirājyaśatasahasrahetorapi saṃprajānan mṛṣāvadāṃ bhāṣeta ? no bho gautama | tato'nveva gāthāṃ bhāṣate-



apyeva hi syādanṛtābhidhāyinī

mameha jihvārjavasatyavāditā |

tadevametanna yathā hi brāhmaṇa

tathāgato'smītyavagantumarhasi || 9 ||



atha sa brāhmaṇo'bhiprasannaḥ | tato'sya bhagavatā āśayānuśayaṃ dhātuṃ prakṛtiṃ ca jñātvā tādṛśī caturāryasatyasaṃprativedhikī dharmadeśanā kṛtā, yāṃ śrutvā brāhmaṇena viṃśatiśikharasamudgataṃ satkāyadṛṣṭiśailaṃ jñānavajreṇa bhittvā srotaāpattiphalaṃ sākṣātkṛtam - atikrānto'haṃ bhadanta atikrāntaḥ | eṣo'haṃ bhagavantaṃ śaraṇaṃ gacchāmi dharmaṃ ca bhikṣusaṃghaṃ ca | upāsakaṃ ca māṃ dhāraya adyāgreṇa yāvajjīvaṃ prāṇopetaṃ śaraṇaṃ gatamabhiprasannam | atha sa brāhmaṇo bhagavato bhāṣitamabhinandyānumodya bhagavataḥ pādau śirasā vanditvā utthāyāsanāt prakrāntaḥ ||



idamavocadbhagavān | āttamanasaste bhikṣavo bhagavato bhāṣitamabhyanandan ||

iti śrīdivyāvadāne brāhmaṇadārikāvadānaṃ caturtham ||