• Home
• Canon Text
• 5 candraprabhāvadānam

5 candraprabhāvadānam

Technical Details

5 candraprabhāvadānam |



dugdhābdhirvibudhārthanātividhuraḥ kṣubdhaścakampe ciraṃ

kampante ca nisargataḥ kila phalotsargeṣu kalpadrumāḥ |

ekaḥ ko'pi sa jāyate tanuśatairabhyastadānasthiti-

rniṣkampaḥ pulalotkaraṃ vahati yaḥ kāyaṃ pradāneṣvati || 1 ||



asti kaulāsahāsinyāmuttarasyāmanuttarā |

diśi bhadraśilā nāma bhuvanābharaṇaṃ purī || 2 ||



yasyāṃ sitayaśaḥpuṣpāḥ saphalāḥ sarvasaṃpadaḥ |

dānodyānalatāḥ prītyai babhūvuḥ puravāsinām || 3 ||



yatra tripurajinnetraśikhitrasto manobhavaḥ |

abalābhiścalakrīḍabhrūbhaṅgaireva rakṣyate || 4 ||



muktājālojjvalā yatr abhāti hemagṛhāvalī |

meroḥ śikharamāleva visphutatsphītatārakā || 5 ||



tasyāṃ candraprabhaḥ śrīmānabhūd bhūmibhṛtāṃ varaḥ |

kaulāsa iva yaḥ kāntyā cakāra dinacandrikām || 6 ||



yasya dehaprabhāpūraiḥ pūrṇindudyutihāribhiḥ |

niśāsu dīpakābhāsu nābhūtu snehaguṇakṣayaḥ || 7 ||



smarajvaraṃ bhajante'sya darśanenaiva tārakāḥ |

iti cchatrachalādasya chāditaṃ khamivendunā || 8 ||



pradiśatyeṣa satataṃ śriyaṃ satkośasaṃśrayām |

iti taddarśanenaiva saṃkocaṃ prāpa padminī || 9 ||



senāhaṃkāramutsṛjya tyāgaśubhraśriyā śriyaḥ |

nirdiṣṭāśchatramukuṭaprakaṭāḥ puravṣinām || 10 ||



śuśubhe vibhavastasya puṇyālaṃkāraṇonnateḥ |

ārohati parām koṭīṃ namrasya dhanuṣo guṇaḥ || 11 ||



catvāriṃśatsahasrāṇi vatsarāṇāṃ śatāṇi ca |

babhūva dehināmāyustasya kāle kalidviṣaḥ || 12 ||



tasya ṣaṣṭisahasrāṇi purīṇāṃ pūrṇasaṃpadām |

babhūvurlokapālasya lokapālādhkāśriyaḥ || 13 ||



yajvānaḥ kīrtitilakāstasya puṇyavibhūṣaṇāḥ |

yajñadhūmalatābhaṅgairbabhurlolālakāḥ śriyaḥ || 14 ||



tasya saṃpatkumudinīvikāsena sadoditaḥ |

abhūnmantrī mahācandraścadraloka ivojjvalaḥ || 15 ||



yena niścalalakṣyeṇa prabhoḥ prajñāpatākayā |

rājyābdhikarṇadhāreṇa pāramuttaritaṃ yaśaḥ || 16 ||



mahīdharābhidhaścāsau babhūvāmātyakuñjaraḥ |

bhūmibhārasahastasya diṅgāga iva pañcamah || 17 ||



mantraṇābhinnamantrasya yasya nītibṛhaspateḥ |

tyājitāḥ pratisāmantāḥ śauryaṃ viṣamivāhayaḥ || 18 ||



tenāmātyena sa nṛpaḥ sa ca rājñā vibhūṣitaḥ |

guṇaḥ satpuruṣeṇeva guṇeneva ca sajjanaḥ || 19 ||



kṛtajñaḥ saralaḥ svāmī sadbhṛtyo bhaktinirbharaḥ |

sukṛtaprabhaveṇaiva bhāgyayogena labhyate || 20 ||



iyameva cirabhrāntiviśrāntiḥ sarvasaṃpadām |

yadguṇajñatayā vetti svāmisatpuruṣāntaram || 21 ||



tau kadaciddadṛśatuḥ svapnamanye ca mantriṇah |

kṣayo yasya phalaṃ dānavyasanena mahīpateḥ || 22 ||



tau dṛṣṭvā durnimittāni prādurbhūtāni śaṅkitau |

vyagrao babhūvaturnityaṃ śāntisvastikakarmasu || 23 ||



nimittadarśanodvignāstapivanagatā api |

viśvāmitraprabhṛtayaḥ svāmītyūcurmaharṣayaḥ || 24 ||



atrāṇtare brahmabandhuḥ prāgjanmabrahmarākṣasaḥ |

raudrākṣo nāma mātsaryakrauryadaurjanyaduḥsahaḥ || 25 ||



śrutvā dānodbhavām kīrtiṃ rāġyaḥ sarvaguṇojjvalām |

nirguṇaḥ sa guṇadveṣi saṃtaptaḥ samacintayat || 26 ||



aho batāsya nṛpatergīyate gagane yaśaḥ |

aniśaṃ siddhagandharvagīrvāṇalalanāgaṇaiḥ || 27 ||



sadā viśanti me karṇe tadguṇastutisūcayaḥ |

kiṃ karomi prakṛtyaiva sahe nānyaguṇonnatim || 28 ||



tadgatvā dānaśīlasya tasya dānārjitaṃ yaśaḥ |

karomyeṣa śiroyācñāpratiṣedhena khaṇḍitam || 29 ||



yaśastyājyate dānotthaṃ śiraścenna pradāsyati |

atha dāsyati vidveṣapraśāntirme bahviṣyati || 30 ||



iti saṃcintya suciraṃ sa kauryakaṭhinaḥ śaṭhaḥ |

gandhamādanapādāṇtavāsī bhadraśilāṃ yayau || 31 ||



indrajālaprayogajñaḥ sa kṛtvā praśamocitam |

veṣaṃ kaluṣasaṃkalpaḥ purīṃ prāpa mahīpateḥ || 32 ||



asmin bhavavane nityaṃ guṇadoṣasamākule |

kalpavṛkṣāḥ prajāyante jāyante ca viṣadrumāḥ || 33 ||



aśeṣanāśapiśunairghorasaṃtrāsakāribhiḥ |

durnimittairiva khalaiḥ khedaḥ kasya na dīyate || 34 ||



guṇidveṣaḥ prakṛtyaiva prakāśaparipanthinaḥ |

doṣaāśrayasya ko bhedaḥ khalasya timirasya ca || 35 ||



svacchandaghātī sādhūnāṃ vidveṣaviṣaduḥsahaḥ |

dīrghapakṣaḥ khalavyālakarālaḥ kena nirmitaḥ || 36 ||



tasmin praviṣṭe nagaraṃ rūpiṇī puradevatā |

uvācābhyetya bhūpālaṃ saṃtrāsataralekṣaṇā || 37 ||



śiroyācaka eṣa tvāṃ brahmabandhurupāgataḥ |

vadhyo'sau jīvitocchedī jagato jīvitasya te || 38 ||



niruddho nagaradvāri sa mayā malināśayaḥ |

mama taddarśanatrastaṃ dhṛtiṃ na labhate manaḥ || 39 ||



iti bruvāṇāṃ bhūpālaḥ provāca puradevatām |

arthisaṃrodhasaṃjātalajjayā namitānanaḥ || 40 ||



devi yācñābhiyāto'sau praviśatvanivāritaḥ |

dirghocchvāsaṃ sahe nāhamāśāvaiphalyamarthinaḥ || 41 ||



yācñā praṇayināmarthe puṇyaprāptastanuvyayaḥ |

yugasaṃkhyāmapi sthitvā vipadyante hi dehinaḥ || 42 ||



etadeva sujātānāṃ pūjyaṃ jagati jīvitam |

yadeṣāmagrato yāti nārthī bhagnamanorathah || 43 ||



kriyatāmānukūlyaṃ me bhavatyā kuśalocitam |

āśāvighāte saṃtāpastasya tūrṇaṃ nivāratām || 44 ||



iti bhūmibhṛtaḥ śrutvā vaco niścalaniścayam |

jagāmādarśanaṃ devī cintāsaṃtāpamānasā || 45 ||



athāyayau sa kuṭilaḥ khalaḥ krakacaceṣṭitaḥ |

dāruṇaḥ saralasyaiva cchedāya svayamudyataḥ || 46 ||



tasminnṛpagṛhaṃ prāpte vivṛtadvāramarthinām |

bhūrbhūpatikṣayabhayāccakampe sadharādharā || 47 ||



narendracandramāsādya sa rāhurica durmukhaḥ |

samabhyadhādvidhāya prāgaśivārthāmivāśiṣam || 48 ||



svasti rājan dvijanmā hi vijane siddhisādhakaḥ |

prātastvāmīpsitaprāptyai sarvārthisurapādapam || 49 ||



dṛṣṭirvṛṣṭirivāmṛtasya mahatī saujanyamitraṃ manaḥ

kṣāntiḥ krodharajaḥpramārjanadī duḥkhārtamātā matiḥ |

lakṣmīrdānajalābhiṣekavimalā satyopayujktaṃ vacaḥ

nityaṃ yasya sa eka eva hi bhavān jāto jagadbāndhavaḥ || 50 ||



siddhaye kathitaṃ kaiściccakravartiśiro mama |

dīyatāṃ ta tvadanyo vā dātuṃ śaknoti kaḥ parah || 51 ||



santi spaṣṭārthadāścintāmaṇikalpadrumādayaḥ |

durlabhārthapradātāro viralāstu bhavadvidhāḥ || 52 ||



ityukte tena nṛpatirniṣkampavipulāśayaḥ |

arthisaṃdarśanānandanirbharastamabhāṣata | 53 ||



dhanyo'haṃ yasya me brahmannarthināmarthasiddhaye |

nirvikalpopakaraṇaṃ vyayaṃ yāti sujīvitam || 54 ||



kadā prāṇāḥ parārthe me prayāntīti manorathaḥ |

kimetāni na puṇyāni prārthyante te yadi tvayā || 55 ||



āhopakaraṇasiddhyai ślāghyaṃ me gṛhyatāṃ śiraḥ |

tattadeva sthiraṃ loke yadyadarthisamarpitam || 56 ||



ityukte harṣayuktena bhūbhujā sattvaśālinā |

tamūcaturmahāmātyau mahācandramahīdharau || 57 ||



nijajīvitarakṣaiva dharmaste prathamaḥ prabho |

tvayi jīvati jīvanti sarve jagati jantavaḥ || 58 ||



na dātumarhasi śiraḥ sarvādhāraṃ hi te vapuḥ |

dīyatāṃ brāhmaṇāyāsmai hemaratnamayaṃ śiraḥ || 59 ||



sarvārthairarthisārthānāṃ pūryante yairmanorathāḥ |

teṣāṃ saṃrakṣaṇenaiva sarvaṃ bhavati rakṣitam || 60 ||



saṃkalpo'yaṃ dvijasyāsya krūraḥ kaluṣacetasaḥ |

mūlacchedopajīvyo hi na kalpatarurarthinām || 61 ||



hemaratnaśiraḥ prāpya yātveṣa śirasāsya kim |

cintāmaṇirviniṣprekṣyo bhujyate na bubhukṣitaiḥ || 62 ||



ityukte mantrimukhyābhyām hemaratnamayaṃ śiraḥ |

siddho naivopayogyaṃ tanmameti brāhmaṇo'bravīt || 63 ||



athonmumoca nṛpatirmukuṭaṃ mauktikāṃṣubhiḥ |

śrirovirahaduḥkhena sāśrudhāramivābhitaḥ || 64 ||



mukuṭāni kṣaṇe tasminnipetuḥ puravāsinām |

digdāhonmukhatulyābhirulkābhiḥ saha bhūtale || 65 ||



rājñā pradāne śirasaḥ sarvathā parikalpite |

tau cakratustanutyāgaṃ mantriṇau draṣṭumakṣamau || 66 ||



ratnagarbhamathodyānaṃ praviśya pṛthivīpatiḥ |

utphullacampakasyādhaḥ śiraśchettuṃ samudyayau || 67 ||



udyānadevatā dṛṣṭvā taṃ śiraśchettumudyatam |

mā kṛthāḥ sāhasaṃ rājannityuvāca śucākulā || 68 ||



kampamānāḥ pralāpinyastaṃ mattālukulasvanaiḥ |

nyavārayannavalatā lolapallavapāṇibhiḥ || 69 ||



so'pi niścalasaṃkalpaḥ prasādyodyānadevatām |

vimalāṃ bodhimālambya babhūva praṇidhānavān || 70 ||



asmin ratnamayodyāne puṇyarāśisamunnatam |

stūpamastu praśāstustu sattvasaṃtāraṇocitam || 71 ||



yatkiṃcidarjitaṃ puṇyaṃ saṃkalpena mayāmunā |

bhavantu tena saṃsāre niḥsaṃsārāḥ śarīriṇaḥ || 72 ||



dhyātveti campakataroḥ śākhāyāṃ nṛpatiḥ śiraḥ |

baddhvā kacakalāpena chittvā prādāddvijanmane || 73 ||



atha narapate sattvotsāhasphuṭapraṇidhānataḥ

kimapi vimalaiḥ puṇyālokairdigantavisāribhiḥ |

vigalitamahāmohaughāntaḥ śritaḥ parinirvṛtiṃ

praviratabhavābhyāsāyāsaḥ kṣaṇādabahvajjanah || 74 ||



iti prāgjanmavṛttāntakathayā bhagavān jinaḥ |

bhikṣūṇām vidadhe śuddhadānasaddharmadeśanām || 75 ||



iti kṣemendraviracitāyāṃ bodhisattvāvadānakalpalatāyāṃ

candraprabhāvadānaṃ nāma pañcamaḥ pallavaḥ ||