• Home
• Canon Text
• 4 māndhātravadānam

4 māndhātravadānam

Technical Details

4 māndhātravadānam |



śobhante bhuvaneṣu bhavyamanasāṃ yannākakāntākara-

prauḍhodañcitacārucāmarasitacchatrasmitāḥ saṃpadaḥ |

yaccotsarpati tarpitaśruti yaśaḥ karpūrapūrojjvalaṃ

svalpaṃ dānakaṇasya tat phalamaho dānaṃ nidānaṃ śriyaḥ || 1 ||



abhūdupoṣadho nāma bhūbhṛdhyasya vibhāvataḥ |

vibudhābhimatā kīrtiḥ sudhā dugdhodadheriva || 2 ||



vasudhāmavato yasya vasudhāmavataḥ puraḥ |

nanāma praṇatau kasya na nāma nṛpateḥ śiraḥ || 3 ||



śuddhā dhīriva dharmeṇa dāneneva dayālutā |

vibhūtirvinayeneva bhūṣitā yena bhūrabhūt || 4 ||



guṇinaḥ prāṃśuvaṃśasya babhūvendudyuteḥ sthitiḥ |

yasya sarvātapatrasya mūrdhni sarvamahībhṛtām || 5 ||



yasyeśvaraśiraḥsthāyi śubhaṃ gaṅgājalojjvalam |

bhramatyadabhraṃ lokeṣu bhuvanābharaṇaṃ yaśaḥ || 6 ||



kartu kratusahasrāṇāṃ sahasrākṣādhikaśriyaḥ |

yasya ṣaṣṭisahasrāṇi kalatraṃ sudṛśāmabhūt || 7 ||



kadācinmunirakṣāyai rakṣaḥkṣayakṛtakṣaṇaḥ |

vicacārāśvamāruhya sa taponanabhūmiṣu || 8 ||



tatra rājarṣibhiḥ kaiścitputreṣṭikalaśaṃ dhṛtam |

dūrādhvaśramasaṃtaptaḥ sa payaḥpūrṇamāpapau || 9 ||



vijanāsāditaṃ pītvā sa mantrakalaśāt payaḥ |

rājadhānīṃ samāsādya garbhaṃ lebhe vibhurbhuvaḥ || 10 ||



svapnamāyendrajālādi yasyāḥ kautukavipraṣuḥ |

jayatyadbhutasaṃbhārabhūmiḥ sā bhavitavyatā || 11 ||



vidhervividhavaicitryacitrakarmavidhāyinaḥ |

āścaryarekhāvinyāsaṃ kaḥ paricchettumīśvaraḥ || 12 ||



kālena tasya mūrdhānaṃ bhittvā bāloṃ'śumāniva |

rūḍhavraṇasya sahasā divyadyutirajāyata || 13 ||



taṃ rājajāyā jagṛhurjagatsāmrājyalakṣaṇam |

vātsalyaprasrutakṣīrāḥ puṇyaṃmūrtimivāśritam || 14 ||



māṃ dhārayiṣyati śiśuḥ ślāghyo'yaṃ jananīpade |

iti tāsāṃ mitho vākyairmāndhātābhūnnṛpātmajaḥ || 15 ||



tasya pravardhamānasya bālakrīḍāvilāsinaḥ |

ṣaḍindraḥ prayayau kālaḥ puṇyakrīḍakṣayāyuṣaḥ || 16 ||



navayauvanamārūḍhaḥ sarvavidyāsu pāragaḥ |

sa yāte pitari svargaṃ bheje rājyaṃ kramāgatam || 17 ||



yakṣo divaukaso nāma sukṛterdāsatām gataḥ |

abhiṣekopakaraṇaṃ divyaṃ tasyopanītavān || 18 ||



sa svarṇairbaddhamukuṭaḥ kalpitoṣṇīṣaśekharaḥ |

śradabhrāvataṃsasya meroḥ śobhāmavāptavān || 19 ||



sapta ratnāni tasyātha prādurbhūtāni takṣaṇe |

cakrāśvamaṇihastiśrīgṛhasenāgragāṇyapi || 20 ||



babhuva cāsya putrāṇāṃ tulyarūpabalaujasām |

sahasraṃ vijitārāterbhujānāmiva bhūbhujaḥ || 21 ||



vasuṃdharāṃ samastābdhuivelākalitamekhalām |

nikhilāṃ vidadhe doṣṇi śeṣaviśrāntirnirvṛtām || 22 ||



bhuvanatrāṇasaṃsaddhah pratyagrakamalāśrayaḥ |

cakravartī sa sukṛterviṣṇoḥ kara ivābabhau || 23 ||



trijagajjāhnavī kīrtiḥ prabhāvābharaṇāḥ śriyaḥ |

so'yaṃ sukṝtavallīnāṃ prathamaṃ kusumodgamaḥ || 24 ||



sa kadāciddvanānteṣu vikāśikusumaśriyaḥ |

ruciraṃ sacivaiḥ sārdhaṃ vicacāra vilokayan || 25 ||



dadarśa tatra niṣpakṣān vihagān pādacāriṇaḥ |

vyomamārgagatiṃ smṛtvā prayātān kṛśatāmiva || 26 ||



pakṣahīnānagatikān vṛttikṣīṇānnirambarān |

daridrāniva tān vīkṣya provāca kṛpayā nṛpaḥ || 27 ||



aho varākaurvihagaiḥ kimetaiḥ kukṛtaṃ kṛtam |

yadete pakṣavikalāḥ kṛcchracaraṇacāriṇaḥ || 28 ||



ityukte bhūmipatinā karuṇākulitātmanā |

puraḥsthito mahāmātyaḥ satyasenastamabravīt || 29 ||



śrutametanmayā deva kathyamānaṃ vanecaraiḥ |

kāraṇaṃ pakṣapatane yadabhūt pakṣiṇāmiha || 30 ||



santi pañca śatānyatra puṇyadhāmni tapovane |

tapaḥsvādhyāyasaktānāṃ munīnāṃ dīptatejasām || 31 ||



teṣāmadyayanadhyānajapavighnavidhāyinaḥ |

ete lokāhalaṃ cakruḥ khagāstarūvane sadā || 32 ||



tasmai vihagasaṃghāya karṇāpāyakṛte param |

atisaṃvardhamānāya cukopa munimaṇḍalam || 33 ||



tadurbhūtamahāśāpatāpalpoṣeṇa sarvataḥ |

kṣaṇena pakṣiṇāṃ pakṣā vyaśīryanta kṛtāgasām || 34 ||



ta ete vihagāḥ pakṣarahitāḥ kṛcchravartinaḥ |

tvadvipakṣā iva vane śrāntāśracaraṇacāriṇaḥ || 35 ||



mahāmātyena kathitaṃ niśmaitanmahīpatiḥ |

uvāca karuṇākrāntastaptaḥ śāpena pakṣiṇām || 36 ||



aho tejaḥ pariṇataṃ śāntānāmapi kānane |

aṅgārāṇāṃ munīnāṃ ca dahatyevānivāritam || 37 ||



mithyātapasvibhiḥ kiṃ taiḥ svasukhāya na yaiḥ kṛtaḥ |

manasaḥ kopataptasya pariṣekaḥ kṣamāmbubhiḥ || 38 ||



prasannā dhīrmaṇo maitraṃ dayā dānaṃ damah kṣamā |

yeṣāṃ teṣāṃ tapaḥ ślādhyaṃ śeṣāṇāṃ kāyaśoṣaṇam || 39 ||



kiṃ tapobhiḥ sakopānāṃ vilputānāṃ vanena kim |

vibhavaiḥ kiṃ salobhānāṃ durvṛttānāṃ śrutena kim || 40 ||



evaṃ kaluṣacittāste tībramanyuparāyaṇāḥ |

duḥsahā eva munayaḥ prayāntu viṣayānmama || 41 ||



ityuktvā prāḥiṇottebhyaḥ saṃdeśaṃ puruṣairnṛpaḥ |

yāvatī madvaśā bhūmistāvatī tyajyatāmiti || 42 ||



vihaṃgapakṣapātena kupitasya mahīpateḥ |

saṃdeśaṃ munayaḥ śrutvā vilakṣāḥ samacintayan || 43 ||



catuḥsamudraparikhāmekhalāyāḥ kṣiteḥ patiḥ |

narendro'yaṃ kkva gacchāmaḥ ko deśo'sya vaśe na yaḥ || 44 ||



iti saṃcintyaṃ munayaḥ pārśvaṃ kanakabhūbhṛtaḥ |

surasiddhasamākīrṇaṃ jambūkhaṇḍāntikaṃ yayuḥ || 45 ||



atha tasya mahībhartuḥ prabḥāveṇa mahīyasā |

abhūdadṛṣṭaśasyā bhūdyāśca ratnāmbaraprasūḥ || 46 ||



pākaśāsanavailakṣyakaraṇāstasya śāsanāt |

saptāhaṃ hema vavṛṣurmeghāḥ saṃgḥātavarṣiṇaḥ || 47 ||



sa prabhāveṇa mahatā saha sainyairnabhogatiḥ |

cakre pūrvavidehākhyaṃ dvīpaṃ divyajanaṃ vaśe || 48 ||



babhūvuragre saunyāni sphīṭaśauryabalaujasāṃ |

bhaṭānāṃ vyomagamane tasyāṣṭādaśakoṭayaḥ || 49 ||



godānīyaṃ tato dvīpamathottarakurūnapi |

pārśvāni sa sumerośca śaśāsāsataśāsanaḥ || 50 ||



sukhaṃ viharatastasya meroḥ kanakasānuṣu |

bahuśakro yayau kālaścaturdvīpamahīpateḥ || 51 ||



sa kadācit surān draṣṭuṃ vyāmnā gaccan suropamaḥ |

cakāra nīlajaladairvyāptā iva gajairdiśaḥ || 52 ||



atha teṣāṃ nirastānāṃ merupārśve tapasyatām |

munīnāmapatan mūrdhni tadgajāśvaśakṛddivaḥ || 53 ||



tataste krodhasaṃtaptadṛśā vyomāvalokinaḥ |

cakruḥ piṅgaparbhāvallikalāpakapilā diśaḥ || 54 ||



kopātkimetadityuktvā śāpāgnivisisṛkṣatā |

abhyetya devadūtastān praharṣākulito'vadat || 55 ||



eṣā niḥśeṣabhūpālamauliviśrāntaśāsanaḥ |

pākaśāsanatulyaśrīrmāndhātā pṛthivīpatiḥ || 56 ||



nabhasā naradevi'yaṃ saha sainyaiḥ prasarpati |

yasya kīrtanadhanyeyaṃ vāṇī puṇyābhimāninī || 57 ||



na dṛṣṭo yasya nirdiṣṭasarvalokasukhaśriyaḥ |

mohaḥ saṃbinmayasyeva vibhavaprabhavo madaḥ || 58 ||



kauberaṃ dhanadavyaktyā kaumāraṃ śaktimattayā |

aiśvaraṃ vṛṣasaṃyogādvaiṣṇavaṃ śrīsamāgamāt || 59 ||



pratāpaprasarāt sauramaindavaṃ jananandanāt |

aindraṃ dṛptabalacchadāddivyaṃ rūpaṃ bibhartyayam || 60 ||



baliḥ prayātaḥ pātālaṃ dadhīco'pyasthiśeṣatām |

asya tyāgena jaladhiḥ kṣobhamadyāpi nojjhati || 61 ||



śrutveti devadūtasya vacanaṃ munimadhyagaḥ |

sasarja durmukho nāma muniḥ śāpajalaṃ divi || 62 ||



prahasannatha taṃ prāha senānāṃ pariṇāyakaḥ |

maharṣe saṃhara rūṣaṃ mā kṛthāstapasaḥ kṣayam || 63 ||



vaiphalyalajjāṃ śāpo'thaṃ yāsyatyagre mahīpateḥ |

naite bata khagā yeṣāṃ yūyaṃ pakṣakṣayakṣamāḥ || 64 ||



ityukte sauntyapatinā śāpastabdhāmanīkinīm |

dṛṣṭvāgre vismayādūce kimetaditi bhūpatiḥ || 65 ||



saṃrabdho'tha samabhyetya senāpatiruvāca tam |

teṣāṃ deva maharṣīṇāṃ śāpāt saimyaṃ na sarpati || 66 ||



idaṃ ca cakraratnaṃ te vyomni śāpavighūrṇitam |

dhatte jaladasaṃruddhatigmadīdhititulyatām || 67 ||



etadākarṇya nṛpatirdṛṣṭā cāgre tathaiva tat |

dṛśaiva divadhe śāpaṃ viphaloccaṇḍavilpavam || 68 ||



dehakṣayaṃ maharṣīṇāṃ parirakṣan kṛpākulaḥ |

jaṭā nyapātayad bhūmau sa līlālasaśāsanaḥ || 69 ||



ajitakrodhamohānāṃ bhārabhūtā vṛthā vayam |

itīva lajjayā teṣāṃ līnāḥ kṣititale jaṭāh || 70 ||



atha meruśiraḥ prāpya nṛpaḥ suraniketanam |

puraṃ sudarśanaṃ nāma dardarśa priyadarśanam || 71 ||



nāgāstatra kṛtārakṣāḥ prakhyātodakaniḥsṛtāḥ |

karoṭapāṇayo yakṣāḥ surā mālādharābhidhāḥ || 72 ||



sadāmattāstathā devāḥ krodhottambhitasainikāḥ |

mahārājakāyikākhyāstridaśā balavattarāḥ || 73 ||



mahārājāśca catvāraḥ saṃnaddhakavacāyudhāḥ |

jitvā rājñā prabhāveṇa nijasenāgragāh kṛtāḥ || 74 ||



tataḥ kalpadrumodārakocidāramanoharam |

dadarśa pārijātākhyaṃ saṃśrayaṃ tridivaukasām || 75 ||



merormūrdhni tataḥ śubhraprabhāṃ mālāmivāmalām |

sudharmākhyāṃ sabhāṃ prāpa svabhāsodbhāsitāmbarām || 76 ||



hemavidramavaidūryastambhasaṃbḥārabhāsvaraḥ |

prāsādo vaijayāntākhyaḥ prakhyāto yatra rājate || 77 ||



yatrābjervadanairbhṛṅgairalakaistulyatāṃ gatāḥ |

padminyaḥ suranārīṇāṃ padminīnāṃ surāṅganāḥ || 78 ||



bimbataistridaśairyatra maṇibhūstambhabhittiṣu |

suraloko bibhartyeko'pyanekasuralokatām || 79 ||



ratnatoraṇaharmyāṃnivahairyatra citritāḥ |

vyāptā vibhānti kakubhaḥ śakrāyudhaśatairiva || 80 ||



yatra bālānilālolakalpapādapapallavaiḥ |

nṛtyaddhastā ivābhānti nandinyo nandanaśriyaḥ || 81 ||



yatra caitrarathaṃ nāma devodyānaṃ manoramam |

dhatte nityotsavaṃ premikāmaṃ kāmavasantayoḥ || 82 ||



sarvakāmaṃ sarvasukhaṃ sarvartukusumojjvalam |

sarvātiśayitaṃ dṛṣṭvā devānām sadanaṃ nṛpaḥ || 83 ||



muhūrtavisamyāspandasānandasnigdhalocanaḥ |

acnitayat sukṛtināmimāstāh phalabhūmayaḥ || 84 ||



airāvaṇaṃ surapaterlolāliovalayākulam |

dadarśa tatra sāmodaṃ sākāramiva nandanam || 85 ||



puraṃdarastato jñātvā prāptaṃ bhūmipuraṃdaram |

pratyudyayau pramuditaḥ saha sarvairmarudgaṇaiḥ || 86 ||



pūjitaḥ surarājena ratnarājivirājitāṃ |

rājarājah sabhābhūmiṃ bheje virajasāṃ varah || 87 ||



tridaśeṣūpaviṣṭeṣu ratnaparyaṅkapaṅktiṣu |

upāviśannṛpaḥ śrīmānāsanārdhe śatakratoḥ || 88 ||



ekāsanajuṣostatra surendramanujendrayoḥ |

rūpaṃ guṇagaṇodāram nirviśeṣamadṛśyata || 89 ||



tatah sarvasurotsṛṣṭaspaṣṭalocanaṣaṭpadaiḥ |

pīyamānamukhāmbhojaṃ vyājahāra harirnṛpam || 90 ||



aho udayaḥ ślādhyaste tejasā tejasāṃ nidhe |

bhavatā bhūṣitā bhūmirdyauśca devena bhāsvatā || 91 ||



abhyunnataprabhāvo'yaṃ lasatsitayaśoṃśukaḥ |

bhrājate te tribhuvane sāmrājyavijayadhvajaḥ || 92 ||



tvatkathāmṛtapānasya tvaddarśanarasasya ca |

preryate śrotranetreṇa sukhākhyāne sarasvatī || 93 ||



sthirīkṛtastvayaivāyaṃ sukṛtāptavibhūtinā |

karmaṇāṃ phalavādasya niścaraśchinnasaṃśayaḥ || 94 ||



ata evendriyagrāme cakṣureva spṛhāspadam |

puṇyaiḥ puṇyocitācārā dṛśyante yadbhavadvidhāḥ || 95 ||



ityukte tridaśendreṇa māndhātā yaśasāṃ nidhiḥ |

tvatprasādaprabhāvo'yamityuvāca natānanaḥ || 96 ||



ityevaṃ pūjyamānasya tasya nityādaraiḥ suraiḥ |

ṣaḍindraḥ praṇayau kālastridive vasataḥ sataḥ || 97 ||



tatparākramavidhvastasamastāsuramaṇḍalaḥ |

babhūva surarājasya nirapāyodayo jayaḥ || 98 ||



dīptadānavasaṃgrāme tasya śauryamahātaroḥ |

viśrāntiṃ bhejire devā bhujacchāyopajīvinaḥ || 99 ||



tasya puṇyapaṇakrītaṃ bhiñjānasyākṣayaṃ sukham |

kālapravāhe mahati prayayuḥ ṣaṭ puraṃdarāḥ || 100 ||



satkarmaphalabhogasya lāñchanaṃ vimalaṃ manaḥ |

kāluṣyājjāyate tasya pratyāsannaḥ parikṣayaḥ || 101 ||



atha kālena kāluṣyakalitasya manorathaḥ |

abhūllobhābhibhūtasya bhūtaperabhimāninaḥ | 102 ||



tridaśānāmiyaṃ lakṣmīrmadbāhubalapālitā |

tadimāṃ na sahe tāvadardhāsanaviḍambanām || 103 ||



ahamekaḥ surapatiḥ prabhāvānna bhavāmi kim |

ayaṃ mama bhujaḥ sarvajagadbhārabharakṣamaḥ || 104 ||



cyāvayitvā surāśīśaṃ svargasāmrājyasaṃpadam |

ekātapatratilakāṃ svayaṃgrāhocitāṃ bahje || 105 ||



iti cintayatastasya śakradrohābhilāṣiṇaḥ |

śubhraprabhā prabhāvaśrīrmāleva mlānatām yayau || 106 ||



ghanodayasamutsiktā saujanyataṭapātinī |

lolaṃ kaluṣayatyeva mānasaṃ śrītaraṅgiṇī || 107 ||



pramādo vipadāṃ dūto duḥsaho mahatāmapi |

kuśalonmūlanāyaiva kilbiṣākulitā matiḥ || 108 ||



pāpasaṃkalpamātreṇa kṣitau kṣitipatiḥ kṣaṇāt |

papāta visrastaphalaśchinnamūla iva drumaḥ || 109 ||



hanti vidyāmanabhyāsaḥ śriyaṃ hanti madodayaḥ |

vidveṣaḥ sādhutām hanti lobhaḥ samunnatim || 110 ||



aho bata mahotkarṣaśṛṅgāroho mahodayaḥ |

vibhavodbhavamattānāṃ sahasaiva patatyadhaḥ || 111 ||



tena sarvavibhurnāma pūjitaḥ pūrvajanmani |

tatphalādāptavān rājyaṃ spṛhaṇīyaṃ marūtpateḥ || 112 ||



surādhipādhikaḥ ko'pi prabhāvo vismayāvahaḥ |

analpapiṇḍastasyābhut pātradānāṃśasaṃbhavah || 113 ||



dbandhumatyabhidhānāyāṃ nagaryāmuṣitaḥ śuciḥ |

vaṇigutkariko nāma so'bhavat pūrvajanmani || 114 ||



vipaśyī nāma bhikṣāyai samyaksaṃbuddhāṃ gataḥ |

viveśa ta dgṛhaṃ sarvasattvasaṃtāraṇodyataḥ || 115 ||



pātre tasya ca cikṣepa mudgamuṣṭiṃ prasannadhīḥ |

phalāni tatra catvāri petuḥ śeṣāṇī bhūtale || 116 ||



tena dānaprabhāveṇa māndhātā pṛthivīpatiḥ |

sarvadvīpapatirbhūtvā śakrārdhāsanamāptavān || 117 ||



mudgaśeṣaścyuto yasmād bhūtau tasyānyacetasaḥ |

tadasau phalaparyante patitastridaśālayāt || 118 ||



luṭhati vikalakalpā yatra saṃkalpamālā

sphuranti na ca kadācit svapnamāyāntare yā |

bhavati vibhavabhogābhoginī bhāgyabhājā-

matulaphalatatiḥ sā dānakalpadrumāṇām || 119 ||



ityāha bhagavān buddhaḥ prītyā dānaphalaśriyam |

nijajanmāntarākhyāne bhikṣūṇāmanuśāsane || 120 ||



iti kṣemendraviracitāyām bodhisattvāvadānakalpalatāyāṃ

māndhātravadānaṃ nāma caturthaḥ pallavaḥ ||