• Home
• Canon Text
• 2 śrīsenāvadānam

2 śrīsenāvadānam

Technical Details

2 śrīsenāvadānam |



te jayanti jagatyasjin puṇyacandanapādapāḥ |

chedanirgharṣadāhe'pi ye parārtheṣu nirvyathāḥ || 1 ||



gaṇanīyā guṇagaṇairastyariṣṭābhidhā purī |

spardhayā śakranagarī yasyā na syādgarīyasī || 2 ||



tasyāṃ babhūva bhūpālaḥ śrīsena iti viśrutaḥ |

samagraguṇaratnānāṃ ratnākara ivākaraḥ || 3 ||



paropakāraśaktasya caturasya prabhāvataḥ |

anuraktā diśaḥ sarvāḥ sūryasyeva prabhāvataḥ || 4 ||



yaśobhi śobhitaṃ yena dhanadānasugandhibhiḥ |

gajaiśca bhūtidhavalairjagatkalpadrumairiva || 5 ||



kalālayo'pi saralaḥ saralo'pi mahāmatiḥ |

yo babhūva prajāpuṇyairmatimānapyavañcakaḥ || 6 ||



yāvattapati tigmāṃśuryāvadvahati mārutaḥ |

tāvadājñā ca kīrtiśca yasyāpratihatābhavat || 7 ||



śamavyāyāmaviduṣāṃ ṣasṅguṇajñānacakṣuṣām |

yaṃ dvādaśasahasrāṇi mantriṇāṃ paryupāsate || 8 ||



tasmindharmapare rājñi babhūva sukṛtī janaḥ |

bhartṛtulyā bhavantyeva guṇaiḥ striya iva prajāḥ || 9 ||



tasya puṇyādhivāsena janāstridivagāminah |

vimānaiḥ śakranagarīṃ niḥsaṃcārāḥ pravakrire || 10 ||



dṛṣṭvā manujalokena suralokasamāvṛtim |

jātavairaḥ kṣitiopatau śatakraturacintayat || 11 ||



seneva lakṣmī vasudheṣu cāra-

syāścaryakartavya ca dattanityam |

kalyāṇaśīlena ca sa rvaceta-

nyapravyahāsāmana asmakāśca (?) ||12||



tasyākhaṇḍitacetasaḥ daddhidvalyānubhāvapām (?) |

kartavyā dhairyājijñāsā mayā māyāvidhāyinā || 13 ||



iti saṃcintya suciraṃ sarvairanugataḥ suraiḥ |

rūpaṃ śakraḥ parāvartya martyalokamavātarat || 14 ||



atrāntare prajākāryaparyālocanatatparaḥ |

rājyarakṣāgururmantrī nṛpamūce mahāmatiḥ || 15 ||



rājan virajasā rājyarājamānena nirjitaḥ |

nirvyājadānairbhavatā lajjate tridaśeśvaraḥ || 16 ||



parasya pūrṇaguṇatāmātmanastadvihīnatām |

dṛṣṭvā ko nāma nāyāti mātsaryasya vidheyatām || 17 ||



īrṣyālavaḥ parotkarṣasaṃgharṣasya juṣo janāḥ |

prāyeṇodvegamāyānti mahatām sukṛteṣvapi || 18 ||



sarvasvadānamaryādādānavyasanino'stu te |

putradārātmadāne tu saṃkalpo hyatisāhasaḥ || 19 ||



dṛśyante dāruṇāste te svapnāḥ sādhvasahetavaḥ |

jagataḥ sūcyate tīvraṃ yaiścūḍāmaṇikhaṇḍanam || 20 ||



daivajñānāṃ pravādaśca śrūyate tattvavādinām |

śarīraṃ pṛthivīpālo dāsyatīti suduḥsahaḥ || 21 ||



śarīradānaṃ sarvārthisārthanaiṣphalyakāraṇam |

sarvaprado bhavatyeva tiṣṭhan kalpamahīruhaḥ || 22 ||



tasmādasmānmahīpāla virama tyāgasāhasāt |

rakṣāratnaṃ hi jagataḥ prajāyattaṃ vapustava || 23 ||



iti mantrireṇoktamākarṇya vasudhādhipaḥ |

tamūce sattvadhavalasmitaghautādharadyutiḥ || 24 ||



uktaṃ hitaṃ mhāmātya bhavatā sacivocitam |

kiṃ tvarthinavaimukhyasaṃtāpaṃ nāhamutsahe || 25 ||



dehīti vādiṣu giro niṣedhaparuṣākṣarāḥ |

sphuranti vadane yeṣāṃ sajīvāste gatāsavaḥ || 26 ||



idamasmādavāpsyāmītyādhāya hṛdi yācakaḥ |

prāpyaḥ prayāti vaimukhyaṃ yasmin kiṃ tena jīvatā || 27 ||



dhigjanma puṇyahīnasya tasya niṣkaruṇātmanaḥ |

yasyārtajanasaṃtāpaśravaṇe śītalaṃ manaḥ || 28 ||



etadarthamayaṃ kāyaḥ sāpāyo'pi satāṃ priyaḥ |

yatkasyacit kkacid yāti kadācidupakāritām || 29 ||



śrutveti nṛpatervākyamamātyaḥ sattvaśālinaḥ |

novāca kiṃcidacalāṃ vicintya bhavitasyatām || 30 ||



tataḥ kadācidbhūbhartustasya līlāvihāriṇaḥ |

jāyāṃ jayaprabhāṃ nāma ratiṃ ratipateriva || 31 ||



dūrād yadṛcchayāyātāṃ cittasāsaṅgavāgurām |

muniradhyāpakaḥ kāntām dadarśa vinimeṣadṛk || 32 ||



prāgjanmābhyāsasaṃbandhasnehātparicitāmiva |

tāṃ dṛṣṭvā sa dhṛteḥ prāpa dhairyarāśiranīśatām || 33 ||



tasya vītaspṛhasyāpi vāsanollasitaṃ manaḥ |

utsṛjya bhavavaimukhyamabhilāṣabhuvaṃ yayau || 34 ||



iyaṃ hi satatasyūtā saṃtataprītitantubhiḥ |

nāpaiti sarvajantūnāṃ prāgjanmābhyāsavāsanā || 35 ||



tadāśramapadaṃ prāptaḥ samāptādhyayanavrataḥ |

śiṣyo māṇavakaḥ prāha dakṣiṇā gṛhyatāmiti || 36 ||



sa tamūce na me vatsa vane vṛttiḥ prayojanam |

tathāpi yadi nirbandhaḥ śrūyatāṃ yadabhīpsitam || 37 ||



śrīsenasya kṣitipateyadi devī jayaprabhā |

labhyate bhavatā dātuṃ tadasau mama dakṣiṇā || 38 ||



ityuktaṃ guruṇā śrutvā śiṣyaḥ kampitamānasaḥ |

aśakyaprārthanālābhe saṃśayākulito'bhavat || 39 ||



sa gatvā satatasvecchāvivṛtadvāramarthinām |

viveśa svairaviśrambhabhavanaṃ bhūbhṛtāṃ prabhoḥ || 40 ||



alabhyārthārthanādainyacintātikliṣṭamānasaḥ |

namrānano'tivailakṣyād vīkṣamāṇa iva kṣitim || 41 ||



taṃ dṛṣṭvārthinamāyātaṃ prahṛṣṭo'bhūnmahīpatiḥ |

sudhāpradānasannaddhasamudbhūtirivāmbudhiḥ || 42 ||



kiṃ tavepsitamityuktvā pūjitaḥ sa mahībhujā |

uvācānucitākhyānavailajjaskhalitākṣaraḥ || 43 ||



anarthitaparaḥ pūrvamarthikalpatarostava |

garvarthamarthitāṃ yātaḥ sudurlabhapade'pyaham || 44 ||



mama vidyāvrate pūrṇe dakṣiṇābhimatā guroḥ |

rājan jayaprabhā devī dīyatā yadi śakyate || 45 ||



ityukre muniśiṣyeṇa sahasaiva mahīpateḥ |

snehadānasāviddhaṃ dvidhābhūtamabhūnmanaḥ || 46 ||



sa jagād vijaṃ dantajyotiṣāgravisāriṇā |

gṛhyatāṃ dayitā svacchavāsasācchādayanniva || 47 ||



avicārya mayā deyamīpsitaṃ tava yadguroḥ |

viyogacakitaṃ cetaḥ satyaṃ na gaṇayāmyaham || 48 ||



ityuktvāhūya dayitām rājā rājīvalocanām |

sadā hṛdayasaṃsaktām jīvavṛttimivāparām || 49 ||



nivārito'pi guruṇā viyogavyasanāgninā |

niṣiddho'pyativṛddhena snehena smarabandhunā || 50 ||



pradadau muniśiṣyāya sahasā hariṇīmiva |

kimetaditi sāyāsasaṃtrāsataralekṣaṇām || 51 ||



dattāyāṃ tyāgaśīlena priyāyāṃ pṛthivībhujā |

cakampe tyāgabhīteva bhūmirlolābdhimekhalā || 52 ||



yatkṛte durdaśāṃ dehe sehire duḥsahāmapi |

indracandrādayo devāstāh priyāḥ kasya na priyāḥ || 53 ||



śīlaṃ keciddhanaṃ keciddharmaṃ kecittapaḥ pare |

lajjāṃ kecittanuṃ kecittyajanti yoṣitāṃ kṛte || 54 ||



yadeva rāgasarvasvaṃ puṃsāṃ jīvitajīvitam |

tadeva sphīṭasattvānām dāne tṛṇalavāyate || 55



tāmādāya gate tasmin virahākulito nṛpaḥ |

viraheṇa sukhadveṣī manobhava ivābhavat || 56 ||



śiṣyeṇa munirānītām dṛṣṭvā bhūpativallabhām |

rahitāṃ jīviteneva paralokabhuvaṃ gatām || 57 ||



gāḍhānuśayasaṃtaptaḥ paraṃ lajjānimīlitaḥ |

acintayadanaucityamātmanaḥ karmavuplavāt || 58 ||



aho nu bālakeneva mayā kevalacāpalāt |

niḥśankamayaśaḥpaṅke svayamātmā nipatitaḥ || 59 ||



iyaṃ prajānāṃ jananī bharmyāṇāṃ dharmakāriṇā |

varṇāśramagurorjāyām mayā duḥkhānale'rpitā || 60 ||



kiṃ tu nākalitaṃ śīlaṃ na smṛtaḥ saṃyamo mayā |

gaṇitaṃ naiva vairāgyaṃ viveko nāvalokitaḥ || 61 ||



aho|tra nirvicārāṇāṃ sanmārgavimukhaṃ manaḥ |

asaṃyamāsavakṣībamapatheṣveva dhāvati || 62 ||



iti saṃcitya sa munirvailakṣyakṣapitadyutiḥ |

abhyetya rājadayitāmuvāca vinatānanaḥ || 63 ||



samāśvasihi he mātarna śokaṃ kartukarhasi |

bhavitavyatayaivāyaṃ kleśaste durnayaśca me || 64 ||



tyaktvā hi śramasaṃtāpamasya tīrataroradhaḥ |

adhunaiva nijaṃ dhāma sahāsmābhirgamiṣyasi || 65 ||



ityukte muninā devī sīktevāmṛtavṛṣṭibhiḥ |

avāptajīvitadhṛtistatyāja bhayasaṃbhramam || 66 ||



śrutvaitat tridivavyāpi dātuścaritamadbhutam |

rājñaḥ sattvadayām jñātuṃ vāsavaḥ samupāyayau || 67 ||



bhakṣitādhaḥśarīrārdho vyāghreṇa vijane vane |

putraiścaturbhirākrandairgṛhīto brāḥmaṇākṛtiḥ || 68 ||



prasravadbhūrirūdhiro lambamānāntramaṇḍalah |

kṛccheṣvapagataprāṇaḥ pāpairiva dṛḍhīkṛtaḥ || 69 ||



pratyagrāmiṣyāgandhena kravyādairbhṛśamanvitaḥ |

lubdhapārthivacaurotthairanarthairarthavāniva || 70 ||



nagarāntaramāsādya sa yayau puravāsinām |

kāruṇyadainyaduḥkhārto smayāvismayahetutām || 71 ||



sa śoka iva sākāraḥ sa trāsa iva duḥsahaḥ |

vidadhe sādhvasāyāsaṃ sahasā paurayoṣitām || 72 ||



so'rthisaṃdarśanasthānasthitasyātha mahīpateḥ |

putrarūpaiścaturbhistairnyasto'gre mañcikārpitah || 73 ||



taṃ dṛṣṭvā vaiśasāveśaviṣamakleśavihvalam |

niṣkūṇitānanavano jano'bhūnmīlitekṣaṇah ||74 ||



sa kampavihvalaṃ vakṣo muktamudyamya dakṣiṇam |

bhujaṃ jagāda bhūpālaṃ vyathāśithilitākṣaraḥ || 75 ||



svasti tubhyaṃ mahīpate brāhmaṇo'hamimāṃ daśām |

tīvrapāpa iva prātaḥ paśya māṃ karuṇānidhe || 76 ||



saṃsāreghoragahane vane vyāghreṇa bhakṣitaḥ |

jīvāmyavaśyabhogyatvādduḥkhasyāsya garīyasaḥ || 77 ||



asminnapi vipattāpe tīvrakleśasahiṣṇavaḥ |

vimuñcanti na māṃ prāṇāḥ sahṛdaḥ sajjanā iva || 78 ||



dadāti yadi te kaścit chittvā dehārdhamātmanaḥ |

tatte jīvitamastīti māmūce vyomadevatā ||| 79 ||



ko dadāti jagatyasmin jīvitaṃ karuṇānidhe |

prāyeṇa svasukhānveṣī parārthavimukho janaḥ || 80 ||



sarvadā sarvadātāraṃ dīnavyasanabāndhavam |

dehadāne'pyavimukhaṃ tvāmasmi śaraṇaṃ gataḥ || 81 ||



ekastvameva loke'smin jātaḥ sukṛtapādapaḥ |

nirvyājamādarodāraṃ dānaṃ yasya phalodgatiḥ || 82 ||



kimanyairvā vadānyasya kīrtitairbhavato guṇaiḥ |

dānamevāhato yasya loke sukṛtaḍiṇḍimaḥ || 83 ||



āpannārtiparitrāṇapavitracaritavratāḥ |

prāyante puṇyapaṇyena vipatkāle bhavadvidhāḥ || 84 ||



amandānandasuhṛdo haricandanaśītalāḥ |

haranti santaḥ saṃtāpaṃ dakṣiṇāḥ pavanā iva || 85 ||



pūrṇendusundarādasmāduditā vadanāttava |

jyoptsneva jīvayatyeva vāṇī pīyūṣavarṣiṇī || 86 ||



ityuktastena sahasā hṛdi saṃkrāntatadvyathaḥ |

saṃmohamūrcchitaṃ rājā tamūce vācamākulam || 87 ||



samāśvasihi muñca tvaṃ bahyaṃ prāṇaviyogajam |

prayacchāmi śarīrārdhamavicāryaiva te dvija || 88 ||



dhanyasy ayātyayaṃ kāyaḥ paropakṛtaye kṣatim |

kṣaṇakṣayī hi deho'yaṃ rakṣyamāṇo'pi nākṣayaḥ || 89 ||



ityuktavati bhūpāle samutkampitamānasaḥ |

vajrāhata ivovāca mahāmātyo mahāmatiḥ || 90 ||



aho nu sāhasābhyāsādāyāsavyasanī prabhuḥ |

hitaṃ na gaṇayatyeva prajāpuṇyaparikṣayāt || 91 ||



prajānāṃ bhūtaye śaktaḥ ko'nyastvatsadṛśo guṇī |

yadbhaktimukharo bhṛtyaḥ śrotā kartā ca bhūpatiḥ || 92 ||



na karoti hitaṃ svāmī gajalīlānimīlitaḥ |

gaṇanīyāḥ subhṛtyānāmiyatyo bhogasaṃpadaḥ || 93 |



bhānti t e suciraṃ karṇe yaiḥ kṛtā madhumañjarī |

kalyāṇakarṇikākīrṇā vāṇī vinayavādinām || 94 ||



rākṣaso'yaṃ piśāco ca chadmanā brāhmaṇākṛtiḥ |

rakṣāratnasya jagatāṃ śarīrairarthitām gatah || 95 ||



yadi nāma na māyeyaṃ kṛtā tena mahīyasī |

tatkathaṃ kṛttadehasya kṣaṇamapyasti jīvitam || 96 ||



avicāryaiva sukṛtaṃ kriyate durgraheṇa yat |

tadātmapīḍāoparuṣaṃ paraloke'pi niḥsukham || 97 ||



śakyameva sadā dadyādaśakyaṃ dīyate katham |

sarvasvadehadānādipravāda eva śobhanaḥ || 98 ||



karṇāmṛtamidaṃ dūrādyanmahārthimaṇipradaḥ |

saṃprāptānāṃ punastatra pānamasyānyato'rthinām || 99 ||



rakṣyaḥ sarvaprayatnena pareṣāmapi jīvitaiḥ |

prajānāṃ jīvitaṃ rājannarthicintāmaṇirbhavān || 100 ||



prasīda dayasvāsmāsu deva mā sāhasaṃ kṛthāḥ |

n akācaśakalasyārthe kriyate cātmavikrayaḥ || 101 ||



ityuktvā pādayoḥ patyuḥ papātāmātyapuṃgavaḥ |

śarīradānasaṃkalpānnoccacāla ca bhūpatiḥ || 102 ||



so'vadat praṇayasmeracikasaddaśanadyutiḥ |

jīvitasnehasaṃmohatamah pariharanniva || 103 ||



kevalaṃ bhaktisaṃyuktamuktaṃ vyaktamidaṃ tvayā |

na sahe'haṃ mahāmātya viprasya prāṇasaṃśayam || 104 ||



hāraistuṣāraiḥ kamalairmṛṇālairinducandanaiḥ |

nivartate'ntaḥsaṃtāpo nārthivaimukhyaduḥkhajaḥ || 105 ||



sarvathā sarvaduḥkhārtiharaṇodyatacetasaḥ |

na bodherantarāyaṃ me sumate kartumarhasi || 106 ||



janmāntare'pi dadato dehaṃ me na vyathābhavat |

smarāmyatītavṛttasya samyaksaṃbodhicetasā || 107 ||



purā dṛṣṭvodyatām vyāghrīṃ kṣutkṣāmāṃ potabhakṣaṇe |

tadrakṣāyai mayā dattaṃ śarīramavikṣariṇā || 108 ||



śibijanmani cāndhāya dattaṃ netrayugaṃ mayā |

rakṣitaśca svadehena kapotaḥ śyenakādbhayāt || 109 ||



candraprabhāvatāre ca raudrākṣāyārpitaṃ śiraḥ |

sarvasvaputradārādi dattaṃ cānyeṣu janmasu || 110||



ityukte bodhisattven abhūbhujāmātyapuṃgavaḥ |

na sajīvo n anirjīva ivābhūdvyathitendriyaḥ || 111 ||



alaṅghyaśāsanenātha rājñā krakacadhārayā |

niyuktau palagaṇḍākhyau śarīracchedakarmaṇi || 112 ||



tau tīvraśokavivaśau śakramāyāvimohitau |

kathaṃcidiva bhūbharturdehacchede samudyatau || 113 ||



nṛpaternirvikārasya krūrakrakacadhārayā |

vidāryamāṇe dehārdhe pṛthivī samakampata || 114 ||



bhraṣṭolkā raktavasanā virghātacyutatārakā |

dyauḥ saśabdaṃ rurodeva kīṇāśrukaṇasaṃtatiḥ || 115 ||



vaiśasālokanedbhūtatḻvraduḥkhāsahiṣṇunā |

tūrṇaṃ rajaḥpaṭeneva raviṇā pihitaṃ mukham || 116 ||



tasmin prajāh prajānāthe krakacākrāntavigrahe |

cakranduḥ pūritākrandā digvadhūmiḥ pratisvanaiḥ || 117 ||



akṣubdhasattvamālokya nṛpaṃ śakro dvihākṛtiḥ |

vismayānuśayākrāntacittaściramacintayat || 118 ||



aho mahāmaterasya karuṇākomalaṃ manaḥ |

prāptaṃ parārthapīḍāsu vajrādapi kaṭhoratām || 119 ||



sāgarādapi gambhīraṃ merorapi samunnatam |

tridivādapi sāścaryamaho vṛttaṃ mahātmanām || 120 ||



ahi prāṇapravāse'pi sattvaṃ sattvamahodadheḥ |

sādhoriva vipatpāte mahattvaṃ nāvahīyate || 121 ||



iti cintayati kṣipraṃ sahasrākṣe kṣitiprabhoḥ |

nābheradhaḥśarīrārdhaṃ nikṛttamapatat kṣitau || 122 ||



sa dvidhābhūtadehoapi harṣotsāhamayo'bhavat |

sarvabhūtaparitrāṇasattvena dhṛtajīvitaḥ || 123 ||



tadājñayā śarīrārdhe śleṣṭe saṃpūṇavigrahaḥ |

svasthakṣatiḥ samutthāya brāḥmaṇastamabhāṣata || 124 ||



aho virājase rājan pūnjaṃ virajasastava |

nirvyājadehadānena viśeṣaṃ tu bnhavadyaśaḥ || 125 ||



tvanmanomaṇivaimalyatulyaṃ kiṃcidakurvataḥ |

upamānena dāridyramaho mugdhasya vedhasaḥ || 126 ||



kṛttaḥ suvṛttaḥ saralaḥ parārthe madhurāśayaḥ |

sahase duḥsahāṃ pīḍāmikṣukāṇḍa ivonnataḥ || 127 ||



ityuktvā brāhmaṇākāraḥ śakrasta smṛtijanmabhiḥ |

saṃjīvanaiṣadhijātaiḥ sudhāsyandairapūrayat || 128 ||



tataḥ prakaṭitākāraḥ paritoṣātpuraṃdaraḥ |

suśliṣṭanijadehārdhaṃ praśaśaṃsa mahīpatim || 129 ||



athābmarānnipatitaḥ sitakusumasaṃcayaḥ |

tatkālollāsitakṣoṇīharṣahāsa ivābabhau || 130 ||



atrāntare munistasmau priyāṃ jāyāṃ jayaprabhām |

ādāyābhyetya tadvṛttaṃ jātāścaryo nyavedayat || 131 ||



pūtayā saṃgataḥ patnayā svakīrtyeva viśuddhayā |

uvāca pṛṣṭaḥ śakreṇa nikāre nirvikāritah || 132 ||



tataḥ siṃhāsane divyae viśvakarmavinirmite |

ratnavarṣasamākīrṇe jambudvīpe sa bhūpatiḥ || 133 ||



abhiṣiktaḥ surendreṇa prasādya dayitāsakhaḥ |

dānapuṇyaprabhāvotthakuśalavyāpitaprajaḥ || 134 ||



samāptasattvasaṃsārasaṃtāraṇakṛtavratah |

samyaksaṃbodhisaṃbuddhamanāḥ pramudito'bhavat || 135 ||



maitraṃ cetastaruṇakaruṇaṃ sattvasiddhaṃ viśuddhaṃ

āpannārtipraśamanaphalasphūītamātmapradānam |

dṛṣṭvā rājñah pramudasalilakṣālitākṣo vilakṣaḥ

śakraḥ prāyādamaranagarīṃ pūritāṃ tadyaśobhiḥ || 136 ||



iti sa vibudhavṛndaiḥ siddhayakṣoragendraiḥ pulakaruciravarcairarcyamānaprabhāvaḥ |

avanimavanaśaktaḥ kalpayannākakalpā-

mabahvavibhavaśobhāmāptavān bodhisattvaḥ || 137 |||



pūrvāvatārasaṃvāde dānotkarṣamudāharan |

upadeśāya bhikṣūṇāmityāha bhagavān jinah || 138 ||



iti kṣemendraviracitāyām bodhisattvāvadānakalpalatāyāṃ

śrīsenāvadānaṃ nāma dvitīyaḥ pallavaḥ ||