• Home
• Canon Text
• 43 hiraṇyapāṇyavadānam

43 hiraṇyapāṇyavadānam

Technical Details

43. hiraṇyapāṇyavadānam |



sarvopakārapraṇayī prabhāvaḥ

sarvopajīvyā mahatī vibhūtiḥ |

puṇyāṅkurārhasya phalaṃ viśāla-

palārhametat prathamaṃ hi puṣpam ||1||



jine jetavanārāmavihārābhigate purā |

śrāvastyāṃ devasenākhyaḥ śrīmānāsīdgṛhādhipaḥ ||2||



hiraṇyapāṇistasyābhūtputraḥ satputramāninaḥ |

yasya hemamayaṃ jātaṃ pāṇidvitayamadbhutam ||3||



rūpyalakṣadvayaṃ tasya prātaḥ prātaḥ karadvaye |

prādurāsītsa tenābhūdarthināṃ kalpapādapaḥ ||4||



tasya vyaktavivekena paripākena bhūyasā |

kāle kuśalamūlānāṃ jine bhaktirajāyata ||5||



atha jetavana gatvā bahgavantaṃ tathāgatam |

sa dṛṣṭvā vidadhe tasya sānandaḥ pādavandanam ||6||



bhagavānapi saṃṣāratāpapraśamacandikām |

sudhāsakhīṃ dideśāsmai dṛśaṃ kuśalavṛtikām ||7 ||



sa śāsturdarśanenaiva saṃmohatimitojjhita |

babhāse suryakiraṇaprabuddhakamalopamaḥ ||8 ||



bhagavān vidadhe tasya tataḥ saddharmadeśanām |

yayā dharmamayaṃ cakṣurakṣuṇṇālokamudyayau ||9 ||



prākpuṇyapariṇāmena jātavairāgyavāsanaḥ |

praṇamya vimalaprajñaḥ sa sarvajñamabhāṣataḥ ||10||



śaraṇya śaraṇāptasya bhagavan bhavahāriṇī |

aśeṣakleśanāśāya pravrajyā me vidhīyatām ||11||



capalaṃ prāṇināmāyuṣtato'pi navayauvanam |

vidyudvilāsacapalāstato'pyetā vibhūtayaḥ ||12||



iti tasya bruvāṇasya sugatānugrahoditā |

papāta vitarajasaḥ pravrajyā vapuṣi svayam ||13||



raktacīvarasuvyaktāṃ bibhrāṇaḥ sa viraktatām |

pātragraheṇa tatyāja punaḥ saṃsārapātratām ||14||



tasya tāmadbhutāṃ siddhiṃ pratyakṣaṃ vīkṣyaṃ bhikṣavaḥ |

tatpūrvavṛttaṃ papracchurbhagavantaṃ sa cābravīt ||15 ||



vārāṇasyāṃ purā rājā kṛkirnāma tathāgate |

kāśyapākhye bhagavati prayāti parinirvṛtim ||16 ||



śarīramasya samkṛtya stūpaṃ ratnamayaṃ vyadhāt |

svargāvagāhanaprauḍhaṃ mūrtaṃ puṇyamivonnatam ||17 ||



tasminnāropyamāṇāyāṃ yaṣṭayāṃ pūjāparigrahe |

kitavaḥ kandalo nāma nidadhe rūpakadvayam ||18||



cittaprasādaśuddhena tena puṇyena bhūyasā |

hiraṇyapāṇiḥ prāpto'dya mahatāṃ spṝhaṇīyatām ||19 ||



bhavati vibhavastyāgodāraḥ samagraguṇo bhuvi

prasaratiḥ yaśaḥ śuklaṃ loke sudhāṃśusahodaram |

pariṇatipade puṇyaṃ dhatte yadalpamanalpatām

vimalamanasaḥ śraddhāśuddhaṃ tadeva vijṛmbhitam ||20 ||



iti prabhāvaṃ kathitaṃ jinena

puṇyānubhāvasya hiraṇyapāṇeḥ |

śrutvaiva harṣādaravismayānāṃ

sa bhikṣusaṃghaḥ praṇayī babhūva ||21||



iti kṣemandraviracitāyāṃ bodhisattvāvadānakalpalatāyāṃ

hiraṇyapāṇyavadānaṃ tricatvāriṃśaḥ pallavaḥ ||