• Home
• Canon Text
• 42 kanakavarṇāvadānam

42 kanakavarṇāvadānam

Technical Details

42 kanakavarṇāvadānam |



sattvena sūryarucayastamasi sphuranti

dharmeṇa ratnanicayā nabhasaḥ tapanti |

dhairyeṇa sarvavipadaḥ praśamaṃ vrajanti

dānena bhogasubhagāḥ kakubho bhavanti ||1 ||



bhagavān sugataḥ pūrvaṃ śrāvastyāṃ jetakānane |

kuśalānāṃ prapānnānāṃ vidadhe dharmadeśanām ||2||



pūrvakalpāntarajane vatsarāṣṭāyutāyuṣi |

śrīmān kanakavarṇākhyo babhūva pṛthivīpatiḥ ||3||



kanakākhyā purī tasya śakrasyevāmarāvatī |

sarvalokeśvarasyāpi vasatirvallabhābhavat ||4||



nāyakārhaṃ yaśaḥśubhraṃ cāruvṛttaguṇocitam |

hṝdaye yaḥ prajākāryaṃ muktāhāramivāvahat ||5||



prajākarmavipākena pure paramadāruṇā |

avṛṣṭirabhavat tatra sarvabhūtabhayapradā || 6||



sā dhairyahāriṇī sarvalokasaṃtāpakāriṇī |

avṛṣṭiḥ prayayau bhūbhṛnmānasāyāsahetutām ||7 ||



kuṇṭhasarvapratīkāraḥ sa cintāstimitaṃ puraḥ |

uvāca suciraṃ dhyātvā pradhānāmātyamaṇḍalam ||8||



avarṣopanipāto'yaṃ prajānāṃ niṣpratikriyaḥ |

karoti me yatnakṛtaṃ niṣphalaṃ paripālanam ||9 ||



nivṛttavarṣāḥ kakubho bhavantyabhrāśca svacchakāḥ |

pravṛttabāṣpavarṣāśca prajāḥ pāpena bhūbhujām ||10 ||



trāṇaṃ mahābhayādrājā prajānāṃ na karoti yaḥ |

tasya spaṣṭaṃ naṭasyeva kirīṭamukuṭagrahaḥ ||11||



tadā kṝtayugaṃ loke yadā rājā prajāhitaḥ ||12 ||



durbhikṣakṣayitāḥ pṛthutarakleśāvalīvihvalāḥ |

hāhākāraviśṛṅkhalāḥ khalatarairatyarditā vallabhaiḥ

śocantyaḥ pralayaṃ prayāntaśaraṇāḥ pāpairnṛpāṇāṃ prajāḥ ||13||



tasmātsamastakoṣeṇa rakṣaṇīyā mayā prajāḥ |

rājñāṃ prajāparitrāṇapuṇyaṃ ratnamayo nidhiḥ ||14||



ityuktvā sarvalokasya saṃcintya koṣṭhakoṣayoḥ |

sa nināya nijaṃ sarvaṃ sadā bhogyopabhogyatām ||15 ||



tataḥ kālena tasyogradurbhikṣeṇānnasaṃcayaḥ |

yayau mahāvyayādekapuruṣāśanaśeṣatām ||16 ||



tasminnavasare vyomnā samabhyetya raviprabhaḥ |

pratyekabuddhastasyātha vidadhe bhojanārthanām ||17||



niyame saṃśaye tasminnātmanaḥ prāṇadhāraṇe |

nirvikalpya sa tatasrvaṃ dadau tasmai prasannadhīḥ ||18 ||



svaprāṇavṛttiṃ tenāsau kṛtvātithyaprasādinā |

prayayau nabahsā tasya prasaṃśan sattvaśīaltām ||19 ||



athodyayau vyaomamahādvipasya

nīlālimāleva sadambulekhā |

meghāvalī paścimadikpralambā

kapolakālāgurumañjarīva || 20 ||



tataḥ samastaṃ gaganāntarāla-

mutphullanīlotpalakānanābham |

ācchādyamānaṃ sarasairbabhāse

bhṛṅgapravandhauriva meghasaṃghaiḥ ||21||



tataḥ papātākhilabhojyavṛṣṭi-

riṣṭā prajānāṃ bhuvi sapta rātrīḥ |

dhānyādivṛṣṭistadanantaraṃ ca

ratnadivṛṣṭiśca tataḥ krameṇa ||22 ||



iti sa kanakavarṇaḥ kṣmāpatirbhūpatīnāṃ

mukuṭamaṇirivoccairbhrājamānaḥ prajānām |

akṛta sukitasaṃpatprīṇitah prāṇarakṣāṃ

prabhavati hi parārthe sajjanānāṃ prabhāvaḥ ||23||



bhūpatiḥ kanakavarṇa eṣa yaḥ

so'hameva vapuṣātmanādhunā |

ityudīrya bhagavān jinaḥ satāṃ

dhīmatāṃ vyadhita dharmadeśanām ||24 ||



iti kṣemendraviracitāyāṃ bodhisattvāvadānakalpalatāyāṃ

kanakavarṇāvadānaṃ nāma dvicatvāriṃśaḥ pallavaḥ ||