• Home
• Canon Text
• 41 kapilāvadānam

41 kapilāvadānam

Technical Details

41. kapilāvadānam |



yadbhūpālaviśāladānabibhavaprodbhūtapuṇyādhikaṃ

dānasyātikṛśasya satphalabharamapnotyalaṃ durgataḥ |

śuddhasyaiva vivṛddhadharmadhavalaśraddhāsamṛdhyānvitaṃ

niḥsaṃsāravijṛmbhitaṃ taducitaṃ cittasya vittasya ca || 1||



jine jetavanārāmavihāriṇi mahādhanah |

dhīrābhidhānaḥ śrāvastyāmabhūd gṛhapatiḥ purāḥ || 2 ||



tasya paṇḍitanāmabhūt putraḥ sukṛtapaṇḍitaḥ |

akhaṇḍitayaśaḥpuṇyadānālaṃkāramaṇḍitaḥ ||3||



sa bāla eva bhikṣūṇām rājārhairvastrabhojanaiḥ |

śāriputrapradhānānāṃ cakārātithisatkriyām ||4||



tataḥ kadācidakṣīṇādurbhikṣakṣayite jane |

yācyayācakatulyatve piṇḍicchedo'thināmabhūt || 5||



bhikṣūṇāṃ saṃkaṭe tasmin kāle paramadāruṇe |

paṇḍitaḥ sugatāhūtaḥ pratasthe jetakānanam || 6 ||



taṃ vrajantaṃ turaṅgeṇa kāñcanādāmaśobhinam |

ūcurviṭāḥ samabhyetya guṇotsāhāsahiṣṇavaḥ || 7 ||



arthisārthārthanākalpavṛkṣastvaṃ dikṣu viśrutaḥ |

śatāni pañca saṃprāptāstvāmuddiśyāśayā vayam || 8 ||



alaṃkārāṃśukayugaṃ pratyekaṃ naḥ samīhitam |

adhunaivāvilambena dīyatām yadi śakyate || 9 ||



ityuktastaiḥ sadācāraḥ so'vatīrya turaṅgamāt |

sādhu pūjāṃ vidhāyaiṣāṃ dhīmān kṣaṇamacintayat || 10 ||



bhagavantamadṛṣṭvaiva gacchāmi svagṛhaṃ yadi |

āsannāmṛtapānasya taṃ vighnaṃ kathamutaśe || 11 ||



adatvā priyamarthibhyo vrajāmi yadi nistrapah |

kathaṃ karomi dānasya tāṃ svayaṃ vratakhaṇḍanām || 12||



iti cintayatastasya bhittvā bhūmiṃ samudgataḥ |

nāgarājaḥ svayaṃ śeṣaḥ prādādarthisamīhitam || 13||



dattāni nāgarājena vastrāṇyābharaṇāni ca |

sa tebhyaḥ pratipādyāśu yayau niḥśalyatāmiva ||14||



te'pi dṛṣṭvā tadāścaryaṃ puṇyāṃ sugatabhāvanām |

sarvārthasaṃpatsiddhīnāṃ jananīmeva menire || 15 ||



jātacittaprasādāste tenaiva sahitāstataḥ |

bhagavantaṃ yayurdraṣṭuṃ vinaṣṭadveṣakalmaṣāḥ || 16 ||



bhagavantamathālokya kumāraḥ praṇatānanaḥ |

tatpādapadmarajasā dhanyaścakre lalāṭikām || 17 ||



hāraṃ punaścaraṇayoḥ śāstuḥ śaśikarojjvalam |

vinyasya praṇatānagre sa tānasmai nyavedayat ||18 ||



dharmadeśanayā teṣāṃ bhagavān jñānavajrabhṛt |

bhittvā satkāyadṛṣṭyadriṃ srotaḥprāptiphalaṃ vyadhāt ||19 ||



dṛṣṭasatyeṣu yāteṣu tatasteṣu praṇamya tam |

kumāraṃpaṇḍitaṃ prītyā bhagavān svayamabhyadhāt ||20 ||



vatsa puṇyairavāpto'si paryāptiṃ sukṛtaśriyām |

durbhikṣesvapi bhikṣūṇāṃ kuru bhojyādhivāsanām || 21 ||



parigraho me bhikṣūṇāṃ śatānyarhatrayodaśa |

anye cānviṣya kṛcchrārtāḥ saṃvibhajyāstvayā pure || 22 ||



iti śrutvā bhagavataḥ paṇḍitaḥ pramadākulaḥ |

bhaktyā saṃghasya vidadhe yāvajjīvaṃ nimantraṇam ||23||



tataḥ svagṛhamabhyetya rājārhaibhikṣusaṃmataiḥ |

saṃbuddhapramukhaṃ saṃghaṃ sadā bhojyairapūjayat ||24||



daridrānadaridrāṃśca yācyānapi ca yācakān |

anukampyān sa vidadhe dānenānyānukampinah || 25 ||



śeṣān kṛpaṇasaṃghātān so'nviṣya karuṇāmbudhiḥ |

ratnarāśiṃ dadau tebhyo daurgatyatimirāpaham ||26 ||



sa ratnanikarasteṣāṃ jagāmāṅgārarāśitām |

nṛṇāṃ bhāgyāni ratnāni maṇayaḥ prasthajātayaḥ || 27 ||



te tamūcuḥ samabhyetya svapnadṛṣṭadhanā iva |

ratnanāmnā tvayāsmākaṃ sa datto'ṅgārasaṃcayaḥ || 28 ||



dhanalābhena mahatā sadyaḥ prāptonnatirjanah |

tatsaṃkṣayāt kṣaṇenaiva paribhraṣṭo na jīvati || 29 ||



iti teṣāṃ vacaḥ śrutvā paṇḍitaḥ karuṇānidhiḥ |

tānūce puṇyadīnānāṃ ratnānyāyāntyaratnatām || 30 ||



yuṣmābhirna kṛtaḥ pūrvaṃ mohāt sukṛtasaṃcayaḥ |

tenāyaṃ ratnarāśirvaḥ prayāto'ṅgārasāratām ||31||



ratnāni yatnanihitānyapi yānti dūraṃ

puṇyakṣayādupanayanti ca bhāgyayogāt |

vittārjanaṃ patitaśokanimittameva

vittaṃ hi cittamucitaṃ sukṛtapravṛttam || 32 ||



tasmād bhavadbhirbhojyāya bhikṣusaṃgho'dhivāsyatām |

bhogasaṃbhārasaṃpattimahaṃ saṃpādayāmi vaḥ || 33 ||



ityuktāstena taddattavittabhojanasaṃpadā |

te buddhapramukhaṃ saṃghaṃ dinamekamapūjayan || 34||



saṃghaṃ yathāvadabhyarcya praṇīdhānamakāri taiḥ |

m ākadācana dāridyraṃ syādasmākamiti kṣaṇam ||35||



tataste paṇḍitagirā gatvā dadṝśuragrataḥ |

tamevāṅgāranikaraṃ prayātaṃ ratnarāśitām || 36 ||



bhavane paṇḍitasyātha kumārasya prabhavataḥ |

vivṛtānāṃ nidhānānāṃ nirvighnaṃ śatamudyayau || 37 ||



sa prasenajite rāġye dharmajñaḥ sthitirakṣaṇāt |

dadau nidhānaṣaḍbhāgaṃ sa cāsyāṅgāratāmagāt ||38 ||



kumārasyaiva sukṛtairbhogyo'yaṃ nidhisaṃcayaḥ |

ityantarīkṣādvacanaṃ tataḥ śuśrāva bhūpatiḥ || 39 ||



kumārasyaiva vacasā tānnidhīnnirdhitāṃ punaḥ |

prāptāṃ vilokya sāścaryaḥ prahiṇottadgṛhaṃ nṛpaḥ ||40 ||



tatastadakhilaṃ vittaṃ vitīrya vipulāśayaḥ |

kumāraḥ saṃpadāṃ cakre sthitiṃ durgataveśmasu ||41 ||



atha niḥsārasaṃsāravicāravirataspṛhaḥ |

anityatāṃ sa saṃcintyaḥ dīraḥ pitarabravīt ||42||



anujānīhi māṃ tāvat gantuṃ tāta patovanam |

imā janmaśatocchiṣṭāḥ kliṣṭā mama vibhūtayaḥ ||43 ||



trailokyasaṃpatsaṃprāptiryasmin vrajati bhogyatām |

tadidaṃ sarvabhūtānāmāyurbhājanamalpakam ||44 ||



śīte yasya karomi saṃtatamṛdusparśāṃśukaurgūhanaṃ

saṃtāpe racayāmi yasya śiśiraśrīkhaṇḍacarcārcanam |

yasyārthe viṣaśastravahnibhujagavrātātparaṃ me bhayaṃ

prāptaḥ so'pyamapāyataḥ parihṛte'pyāyāti kāyaḥ kṣayam ||45 ||



bhogādviraktaḥ pravrajyāmādāya dayitāṃ vane |

viharāmi haran cintāṃ cintātaptasya cetasaḥ ||46 ||



ityuktvā sa parityajya viṣayasnehabandhanam |

kṛtābhyuopagamaḥ pitrā śāriputrāśamaṃ yayau ||47 ||



tatra pravrajitastena pātrapāṇiḥ sacīvaraḥ |

tasyaivānucaro bhūtvā vicacāra yatavfataḥ || 48 ||



sa dṛṣṭvā karṣakairdhārāṃ kṣetrāt kṣetrapravartitām |

nirdiṣṭena pathā yāntīṃ vismayādityacintayat ||49 ||



aho vihitamārgeṇa gacchatāmapyacetasām |

jalānāṃ karmasaṃsiddhardṛśyate natu dehinām ||50||



saṃcintyeti vrajannagre dṛṣṭvā yaṣṭīkṛtaṃ śaram |

prataptamiṣukāreṇa pradadhyau dhīmatāṃ varaḥ ||51 ||



tāpāt praguṇatāmete yānti niścetanāḥ śarāḥ |

na tu saṃsārasaṃtaptā api vakrāḥ śarīriṇaḥ ||52||



iti dhyāyan vilokyāgre takṣṇā śakaṭacakratām |

nītāni dṛḍharūpāṇi punaścintāṃ samāyayau ||53 ||



aho nu ghaṭanāyogād yānti karmaṇyatāṃ kṣaṇāt |

niścetanānid ārūṇi na cittāni śarīriṇām ||54 ||



it caṃcintya saṃyātaḥ sudharmaniyamādaraḥ |

vatsalaṃ pitaraṃ putra ivācāryamuvāca saḥ || 55 ||



ārya eva prayātvadya piṇḍapātāya matkṛte |

ahaṃ tu bhavatādiṣṭaṃ cintayāmi nijavratam ||56||



ityupādhyāyamabhyarthya bhaktakṛtyāya paṇḍitaḥ |

tasmin yāte tadādiṣṭaṃ vihārāgāramāviśat ||57 ||



tatra yaṣṭīkṛtatanuḥ kṛtvā pratimukhīṃ smṛtim |

sa pradadhyau nijaṃ dharmaṃ baddhaparyaṅkaniścalaḥ ||58 ||



tasmin samādhisaṃnaddhe vasudhā sadharādharā |

vicacālākhilāmbhodhijalaloladukūlinī ||59 ||



śakrastaṃ dhyānanirataṃ jñātvā nirvighnasiddhaye |

dideśa dikṣu rakṣāyai dikpālān sendubhāskarān ||60 ||



bhagavānatha sarvajñastasya siddhimupasthitām |

pākāt kuśalamūlānāṃ jñātvā kṣaṇamacintayat ||61 ||



āsannārhatpadasyāsya śāriputraḥ sametya cet |

dvāramuddhāṭayenmadhye vighna eṣa na saṃśayaḥ || 62 ||



tasmādāgacchatastasya gatvā svayamahaṃ puraḥ |

karomi kālahārāya nānāpraśnāśrayāḥ kathāḥ ||63 ||



iti saṃcintya bhagavān svayaṃ taddiśamāgataḥ |

bhikṣorāgacchatasyasya vjlambaṃ kathayākarot ||64 ||



suraprabhāvānniḥśabde nabhogatavihaṃgame |

loke nirvātadīpasya tulyatāṃ prāpa paṇḍitaḥ ||65 ||



srotaḥ prāptiphalādūrdhvaṃ sakṛdāgāmyavāpya saḥ |

anāgāmiphalaṃ prāpya tato'rhatphalamāptavān ||66 ||



tataḥ kathānte sugate prayāte nijamāśramam |

śāriputraḥ praviśyarkamiva śiṣyaṃ vyalokayat ||67 ||



taṃ dṛṣṭvā sahasottīrṇaṃ viśīrṇabhavabandhanam |

siddhiṃ yugaśataprāpyāṃ tasya tām praśaśaṃsa saḥ ||68 ||



tāṃ tasyārhatpadaprāptiṃ śrutvā jagati viśrutām |

bhikṣubhirbhagavāṇ pṛṣṭastatkathāmabravījjinah ||69 ||



bhagavān kāśyapaḥ pūrvaṃ vārāṇasyāṃ tathāgataḥ |

saha bhikṣūsahasrāṇāṃ viṃśatyā puravāsibhiḥ ||70 ||



śraddhāpraṇītaiḥ śucibhiḥ sarvabhogyairmanonugaiḥ |

uvāsa pūjitah kaṃcit kālaṃ sattvahitodyataḥ ||71 ||



bhikṣupūjāpare tatra vartamāne gṛhe gṛhe |

acintyayadviniḥśvasya durgato nāma durgataḥ ||72 ||



dhiṅ māmatīva dāridyrāt nīcaṃ niṣkuśalakriyam |

naiko'pi mandabhāgyena yena bhikṣurnimantritaḥ ||73 ||



tyājyā janasya sakalavyavahārabāhyāḥ

vākyapramāṇapadasaṃdhiṣu naiva yogyāḥ |

naṣṭakriyā vigatakārakatarkahīnāḥ

śabdā ivārtharahitāḥ puruṣā bhavanti || 74 ||



iti cintānalākrāntaṃ ninditaṃ dhanahīnataḥ |

taṃ samāhūya ko'pyetya sukṛtaprerako'bhyadhāt ||75 ||



kṣīṇārthenāpi bhavatā janmāntaraśubhāptaye |

yathākathaṃcideko'pi bhikṣuḥ kiṃ na nimantritaḥ ||76 ||



ityuktastena saṃsaktaśalyaḥ punarivāhataḥ |

bhiokṣubhojanavaikalyāt sa bhṛdhaṃ vyathito'bhavat ||77 ||



kathaṃcitkṣḥutparikṣāmaḥ sa gatvā śreṣṭhimandiram |

yatnena prāpa mūlyāṃśaṃ dārupāṭanakarmaṇā ||78 ||



kṛtvā tatraiva tadbhāryā śuddhataṇḍulakhaṇḍanam |

tadaṃśabhṛtimūlyāptaṃ bhaktyā bhartre nyavedayat || 79 ||



samudyatasya tasyātha bhikṣubhojanasiddhaye |

śuddhaye śuddhasattvasya śakro'bhūdanusādhakah ||80 ||



divyavarṇarasāmode bhojye śakreṇa sādhite |

prītyā pracchannarūpeṇa bhikṣuṃ lekhe na durgataḥ ||81 ||



vibhūtimohitairgūḍhaiḥ pūrvaṃ puranivāsibhiḥ |

saṃghe nimantrite duḥkhāt durgato martumudyayau ||82 ||



kṛpayā tasya bhagavān svayamabhyetya kāśyapaḥ |

śuddhisiddhiṃ parijñāya cakre bhojyapratigraham ||83 ||



aho'haṃ bhavato bhojyaṃ prayacchāmīti bhūbhujā |

prayatnāt prārtito'pyarthaṃ naivāmanyata durgataḥ ||84 ||



guṇadraviṇasaṃpūrṇaḥ syāṃ daridraprasādanaḥ |

bhagavantamathābhyarcya praṇīdhānaṃ cakāra saḥ ||85 ||



svāśramaṃ kāśyape yāte surendre ca divaṃ gate |

durgatasya gṛhaṃ sarvaṃ divyaratnaipūrayat ||86 ||



viśvakarmā tatastasya vidadhe śakraśāsanāt |

bhavanaṃ rucirodyānaṃ ratnastambhavibhūṣitam ||87 ||



saṃprāptavimalaiśvaryaḥ sahitaṃ sarvabhikṣubhiḥ |

saptāhaṃ vibhavairbhogaiḥ sa kāśyapamapūjayat ||88 ||



kṣutkṣāmāṅganamarthibhiḥ parihṛtadvāraṃ rudaddārakaṃ

gehaṃ niścalakajjalānyapi sthalīkoṇasvananmakṣikam (?)|

cullīsuptabiḍālabālamaparaṃ yasyābhavadrauravaṃ

śrīstasyaiva nṛpaspṛhāspadatayāścaryaṃ na kasya svayam ||89 ||



tena dānaprabhāveṇa sudhāśuddhena durgataḥ |

janmāntare paṇḍitatāmavāpyārhattvamāgataḥ ||90 ||



iti paṇḍitapūrvajanmavṛttaṃ

kathitaṃ sarvavidā guṇādareṇa |

avadhārya viśuddhadānapuṇyaṃ

kuśalārhaṃ praśaśaṃsa bhikṣusaṃghaḥ ||91 ||



iti kṣemendraviracitāyāṃ bodhisattvāvadānakalpalatāyāṃ

kapilāvadānaṃ nāmaikacatvāriṃśaḥ pallavaḥ ||