• Home
• Canon Text
• 39 kapilāvadānam

39 kapilāvadānam

Technical Details

39. kapilāvadānam |



atyantamunnatimatāṃ mahatāṃ vināśa-

doṣasya durjanasamāgama eva hetuḥ |

kūladrumāḥ kila phalaprasavaiḥ sahaiva

sadyaḥ patanti jalasaṃgatibhinnamūlāḥ ||1 ||



rucirāgāraśālinyām vaiśālyāṃ bhagavān purā |

valgumatyāstaṭe nadyā vicacāra tathāgataḥ || 2 ||



tasyāḥ kaivartasarthena gambhīre'mbhasi dustare |

kadācid ghoramakaraḥ kṣiptvā jālaṃ samuddhṛtaḥ || 3 ||



aṣṭādaśaśirāḥ siḥsadviraprakharānanaḥ |

nṛṇāṃ sahasrairākṛṣṭaḥ parvatākāravigrahaḥ || 4 ||



taṃ dṛṣṭvā tatra vitrastāh srastākarṣaṇarajjavaḥ |

āścaryaniścaladṛśo na tasthurna yayuḥ kṣaṇam || 5 ||



gaṇanāṃ gahanāścaryaviśeṣaśataśālinām |

saṃsāre karmavaicitrye vikārāṇāṃ karoti kaḥ ||6 ||



atrāntare tamuddeśaṃ bhagavān bhūtabhāvanaḥ |

jinah samāyayau sarvajanatrāṇakṛtakṣaṇah || 7 ||



savṛddhabālalalanaṃ janaṃ kautukasaṃgatam |

dṛṣṭvā tatrākarottīre bhagavānāsanagraham ||8 ||



bhikṣusaṃghaiḥ parivṛtaṃ dṛṣṭvā tatra tathāgatam |

jano'bhūdunmukhaḥ sarvaḥ pratyāvṛttaḥ ivodadhiḥ || 9 ||



taṃ vilokyaiva vinatāḥ kaivartāḥ prāṇibandhanam |

viśālajālaṃ sahasā saṃsāramiva tatyajuḥ || 10 ||



matsyakumbhīnakrādisaṃsāraṃ tadgirāmbhasi |

tyaktvā te viratāṭopā babhūvuḥ kilbiṣadviṣaḥ || 11 ||



tairnyastaṃ bhagavān dṛṣṭvā mahākamaramagrataḥ |

taṃ jagāda sṛjan dantakāntyaiva karuṇānadīm || 12 ||



api tvaṃ kapilaḥ putra kiṃ n asmarasi duṣkṛtam |

vacoduścaritasyāyaṃ paripāko'nubhūyate || 13 ||



sāpyakalyāṇamitraṃ te jananī kkādya vartate |

sarvajñenetyabhihitaḥ smṛtvā jātimuvāca saḥ || 14 ||



vibho bhavāmi kapilaḥ smarāmi nijaduṣkṛtam |

vacoduścaritasyāyaṃ paripāko'nubhūyate ||15 ||



yātā me narakaṃ mātā narakādeśinī purā |

ityuktvā makarastatra ruroda paruṣasvaram || 16 ||



taṃ śokasāgare magnaṃ babhāṣe bhagavān punaḥ |

akāle kiṃ karomyadya tiryagyonigatasya te || 17 ||



apuṇyaprārambhe rabhasahasitollāsavihite

pramattānāṃ yāte narakaparipākapraṇayitām |

aśānteḥ saṃtāpaṃ ruditaśaraṇāni pratiniśaṃ

bhṛśaṃ kleśāveśairdiśati viṣatulyairanuśayaḥ || 18 ||



kṣaṇaṃ duḥkhakṣayāyaiva mayi cittaṃ prasādaya |

prasannamānasaḥ kāle yāsyasi tridaśālayam || 19 ||



śṛṇu vatsa hitaṃ cedaṃ vicārya kuru cetasi |

anityāḥ sarvasaṃskārāḥ śāntinirvāṇamakṣayam || 20 ||



ityājñayāḥ bhagavatastasmin yāte prasannatām |

janasaṃghaḥ sa suciraṃ babhūvāścaryaniścalaḥ || 21 ||



āryānandaḥ praṇayinā janenābhyarthitastataḥ |

tatpūrvavṛttaṃ papraccha bhagavantaṃ kṛtāñjaliḥ || 22 ||



sa tena pṛṣṭaḥ provāca vimapajñānalocanaḥ |

asyākuśalaśīlasya vṛttāntaḥ śrūyatāmayam || 23 ||



bhadrakākhye purā kalpe varṣāyutayugāyuṣi |

jane babhūva bhagavān kalpaśāla ivārthinām |

abhavat samaye tasmin vārāṇasyāṃ bahupradaḥ || 25 ||



kadācidvibudhāsthāne sahasrākṣamivāparam |

āsīnaṃ vādisiṃhākhyastaṃ vidvānāyayau dvijaḥ || 26 ||



avilambitasaṃprāptadarśanāsanasatkṛtiḥ |

sa dattāśīrnarapatiṃ śiṣyaśreṇivṛto'bhyadhāt || 27 ||



svasti svastimate budhādhipasabhāsīnāya tubhyaṃ vibho

lubdhāḥ saccaritāmṛte tava paraṃ saṃdarśane rāgiṇaḥ |

sadveṣāḥ parabhūpanāmni mukharāste sudguṇodīraṇe

kasmātsarvaguṇāśrayeṇa bhavatā duṣairvayaṃ yojitāḥ || 28 ||



yadyācakā api nirantararatnavarṣe

nānārthisārthaparipūrakatām prayānti |

sarvaṃ bhavānupamapuṇyanidhe vadānya

nirdainyadānavibhavasya vijṛmbhitaṃ te || 29 ||



rājan kiṃcitparicitaguṇaiḥ sevayā sadgurubhyaḥ

prāpto'smābhirvibudhavijayī ko'pi vidyāṃśaleśaḥ |

asyāṃ vidvatkamalabharasaumyaprabhāyāṃ sabhāyāṃ

tasyotkarṣaṃ katipayapadaṃ pratyayaṃ darśayāmaḥ || 30 ||



nijaguṇagaṇane dhīrlajjate sajjanānāṃ

mukharayati tathāpi prauḍhavādābhilāṣaḥ |

iyati jagati rājan kṣipramānviṣyatām me

prativacanaruciśedasti kaścidvipaścit || 31 ||



saṃdarbhagarbhagambhīramiti tasyotkaṭaṃ vacaḥ |

śrutvā kṣitipatiḥ kṣipraṃ vilakṣaḥ samacintayat || 32 ||



aprāptapratimallo'yaṃ yadi yāyānmadoddhataḥ |

tadeṣa mam adeśasya yaśaḥkhaṇḍanadiṇḍimaḥ || 33 ||



guṇāpamānakṛd yatra mūrkho bhavati bhūpatiḥ |

na karoti janastatra vidyārjanapariśramam || 34 ||



vivekavimalāloke dharmārāme mahīpatau |

loke vidyāḥ pravartante sadācārakriyā iva || 35 ||



tasmādasya prayatnena kartavyo madanigraha |

vidyādaridratā deśe doṣa eva viśāṃpateḥ || 36 ||



iti saṃcintya nṛpatirvipraṃ karvaṭavāsinam |

ānināya mahāmatyairanviṣaya viduṣāṃ gurum || 37 ||



abhūbhṛtsabhāmupādhyāya pretya taṃ tarkakarkaśam |

cakāra vādisiṃhasya darpakesarakartanam || 38 ||



tasya tena jitasyāśu vijitāśeṣavādinaḥ |

maunasūtraṃ samāpede lajjiteva sarasvatī || 39 ||



ārūḍhāḥ śubhramahasaṃ nakṣatrāṇāmivodayāḥ |

uparyupari dṛśyante guṇotkarṣā manīṣiṇām || 40 ||



vādisiṃhaṃ visṛjyātha datvā bhūri dhanaṃ nṛpaḥ |

dadau dvijāya jayine karvaṭaṃ nagaropamam || 41 ||



labdharājagajāśvo'tha carukeyūrakaṅkaṇaḥ |

upādhyāyaḥ svabhavanaṃ praviveśa saha śriyā ||42 ||



bhujairjitā bhūmibhujāṃ vaṇijāṃ sāgarārjitāḥ |

vidyāvatāṃ virājante guṇotkarṣarjitāḥ śriyaḥ || 43 ||



kāḻena śrīmatastasya putrajanmotsavo'bhavat |

sukhe'pi sukhasaṃpattirlakṣaṇaṃ puṇyakarmaṇām || 44||



kapilo nāma sa śiśustejaḥpiṅgaśiroruhaḥ |

vardhamānamatirvidvān piturabhyadhiko'bhavat || 45 ||



kule mahati vaiduṣyaṃ vibhavodbhavaḥ |

vibhave satsutotkarṣaḥ phalaṃ sukṛtaśākhinaḥ || 46 ||



kadācidvyādhisaṃyogātpratyāsannatanukṣayaḥ |

vijane putramāhūya so'vadat putravatsalaḥ || 47 ||



bālye guṇārjanaṃ putra paralokasukhārjanam || 48 ||



uttamarṇa iva prāpte kāle sugaṇitāvadhau |

adhunā vivaśaḥ kkāhaṃ kka sā vidyā kka taddhanam || 49 ||



guṇapuṣpe sukhaphale baddhamūle dhanairjane |

vane vajra ivākālakālaḥ patatiḥ duḥsahaḥ || 50 ||



kṣapayati sakalābhirjanma vidyākalābhiḥ

kṣaṇikasukhanimittaṃ saṃnidhatte ca vittam |

paśuśiśuṣu manuṣyaḥ prīyate mohaśiṣyaḥ

tanuvirahamūrhūrte sarvamanyat sa cānyaḥ || 51 ||



idaṃ tu te hitaṃ vacmi snehamohavaśīkṛtaḥ |

saṃsārasāraśaraṇaṃ vatsa vetsi bahuśrutaḥ || 52 ||



santaḥ praṇamyāḥ paruṣaṇ na vācyaṃ

kāryaḥ prayatnena paropakāraḥ |

pāpāvapāte satataṃ hi puṃsā-

metāni puṇyānyavalambanāni || 53 ||



alobhaśobhābharaṇā vibhūti-

radveṣasaktiḥ svasukheṣvamohaḥ |

mūlatraye'smin kuśaladrumasya

vasatyaśeṣākhilasatphataśrīḥ || 54 ||



yāvattapati tīkṣṇāṃśurasmin bhuvanamaṇḍale |

tāvattvatsadṛśaḥ putra vidvān vādī na vidyate || 55 ||



bhikṣubhistu na kartavyastvayā vādaḥ kadācanah |

gambhīrajñānadurbodhaprabuddhā bauddhabuddhayaḥ || 56 ||



purā bhikṣurmayā pṛṣṭaḥ padasyārthaṃ jahāsa mām |

praśnaṃ kartuṃ na jānīṣe vidvāniti jagāda ca || 57 ||



tasmād bhikṣuvivādaste paraṃ pāṇḍityapīḍanam |

balaprabhāvakāmo hi giriṃ mūrdhnāṃ na tāḍayet || 58 ||



ityuktvā tanayaṃ vipraḥ paralokabhuvaṃ yayau |

kāyāvasathapānthānāṃ dehinām na cirasthitiḥ || 59 ||



vāgmī kālena kapilaḥ khaṇḍitākhilapaṇḍitaḥ |

nṛpādbahugrṇaṃ prāpa dhanamānamahodayam || 60 ||



tataḥ kadācidekānte kapilaṃ kācarābhidhā |

saṃprāptaṃ vādisāmrājyaṃ jagāda jananī śanaiḥ || 61 ||



vādidarpacchidā putra digdvīpajayinā tvayā |

durjanāḥ śramaṇāḥ kasmāddarpāndhāḥ parivarjitāḥ || 62 ||



parotkarṣādhirūḍhasya pratipakṣe kṣamārateḥ |

akṣamo'yamiti vyaktaṃ kṣaṇena kṣīyate yaśaḥ || 63 ||



iti māturvacaḥ śrutvā so'vadad biduṣo vacaḥ |

na vādaḥ śramaṇaiḥ kāryaḥ pitrāhamiti vāritaḥ || 64 ||



iyaṃ durjīvikāsmākam patrālambanavādinām |

kriyate guṇamānyānāṃ mānamlānirmukhe yayā ||65 ||



dhigetaccaṇḍapāṇḍityaṃ guruvidveṣaduḥsaham |

mahatāṃ sukhabhaṅgāya sadā tasmin samudyamaḥ || 66 ||



yasyāṃ na mayā sā buddhiḥ sā śrīrlobhaṃ nihanti yā |

darpo na yasya vidyā sā śaktiryā ca kṣamāvatī || 67 ||



evameva na kartavyaḥ parairvidveṣavigrahaḥ |

kiṃ mātarjagatām pūjyabhikṣubhiḥ khyātalakṣmabhiḥ || 68 ||



vijetuṃ na ca te śakyāḥ praṃānapariniṣṭhitāḥ |

pratipakṣairavikṣiptaṃ yeṣāṃ nairātmyaśāsanam || 69 ||



iti putravacaḥ śrutvā kupitā tamuvāca sā |

abhūttava pitā nūnaṃ pāpaśramaṇacetakaḥ || 70 ||



mahati brāhmaṇakule jātaḥ prājño bahuśrutaḥ |

bhikṣapakṣe nipatitaḥ kathaṃ tvamapi tādṛśaḥ || 71 ||



pṛthupramāṇakhaṅgena kuru śramaṇanigraham |

avidāryābhrasaṃghātaṃ tīrkṣṇāṃśurna virājate || 72 ||



it sa prerito māturgirā tadbhaktiyantritaḥ |

bhikṣūṇāmāśramapadaṃ śanairgantuṃ samudyayau || 73 ||



vrajan sa saṃmukhāyātaṃ bhikṣuṃ jijñāsayā pathi |

granthasāraṃ pramāṇaṃ ca papraccha samayocitam || 74 ||



sa tena pṛṣṭaḥ provāca gāḍhaśabdārthanirṇayam |

lakṣatrayapramāṇaṃ na śastraṃ tīrthikadurlabham || 75 ||



kutaḥ pāre'tivartante kka ca vartmātivartate |

sukhaduḥkhe ca lokasya kkacit samabhibandhataḥ || 76 ||



iti gambhīraśabdārthaṃ śāsturbhagavato vacaḥ |

anupāsitasarvajñairjñāyate na yathā tathā || 77 ||



etadākarṇya kapilaḥ ślokagāmbhīryavismitaḥ |

yayau bhagavataḥ puṇyaṃ kāśyapasya tapovanam || 78 ||



tathā bhikṣugaṇaṃ dṛṣṭvā prasannahṛdayānanaḥ |

acintayat tadaśraddhāṃ vihāya gatamatsaraḥ || 79 ||



eteṣāṃ dveṣakāluṣyāt krauryaṃ kaḥ kartumarhati |

yeṣāṃ saṃdarśanenaiva vaimalyaṃ labhate manaḥ || 80 ||



iti saṃcintya sa ciraṃ tadvivādaparāṅmukhaḥ |

dūrādhvakhinnaḥ svagṛhaṃ gatvā provāca mātaram || 81 ||



mithyaivāhaṃ tvayā mātaḥ preritaḥ kalikarmaṇi |

ajayāḥ śramaṇā loke gūḍhārthagranthavādinaḥ || 82 ||



ślokamātraṃ mayā śrutvā bhikṣorekasya vartmani |

ajñātārthena vailakṣyāt suciraṃ vīkṣitāṃ kṣitiḥ || 83 ||



tadgrantheṣvakṝtābhyāsastān vaktuṃ kah pragalbhate |

kathayanti svaśastraṃ te na hi pravrajitādṛte || 84 ||



iti tenoditaṃ śrutvā jananī tamabhāṣata |

āyāsitāhaṃ bhavatā garbhabhāreṇa kevalam || 85 ||



saṃgharṣamarṣaśūnyena dainyāt sarvapraṇāminā |

dharṣaṇānirvimarṣeṇa kriyate puruṣeṇa kim || 86 ||



loke sakalaratnānāṃ tejasaiva mahārghatā |

ko hyarthaḥ puruṣaprāṇaistejojīvanavarjitaiḥ || 87 ||



mithyā tadgranthalābḥāya pravrajyā gṛhyate na kim |

mūrdhni kṛtteṣu jāyante kiṃ keśeṣu kuśaḥ punaḥ || 88 ||



iti māturgirā tasya manaḥ kaluṣatāṃ yayau |

sahasā kālavātālīrajoruddhamivāmbaram || 89 ||



tataḥ sa kūṭapraśamapraṇayī bhikṣukānanam |

gatvā gṛhītvā pravrajyāṃ śāstraṃ saugatamāptavān || 90 ||



kālena dharmakathakaḥ sa vidvān guṇagauravāt |

siṃhāsanaṃ samāruhya vidadhe dharmadeśanām || 91 ||



jananyā preritastasyāṃ deśanāyāṃ krameṇa saḥ |

bhikṣudharmaviruddhārthaṃ avktuṃ samupacakrame || 92 ||



dharmaprahāravyathitairbhikṣubhiḥ sa pade pade |

nivāryamāṇastānūce kṛtvā vikṛtamānanam || 93 ||



ajñātvā darpamukharairayathā bahuvādibhiḥ |

bhavadbhiḥ sthūladantoṣṭhairvyākhyā mama visūditā || 94 ||



yūyaṃ gardabhamarkaṭoṣṭravadanā dvīpyāsyapaśvānanā

mārjāraiṇavarāhakukkuramukhā durdarśavakrkraḥ param |

sahyā maunajuṣo'pi naiva vikaṭāṭopaṃ raṭantaḥ kimu

bhrūbhaṅgairiti bhikṣusaṃghamasakṛnnirbhartsayan so'bhyadhāt || 95 ||



tasya vākyaśaraistīkṣṇairvikṛttā iva bhikṣavaḥ |

anuktvaiva prativacastyaktvā taṃ yayuranyataḥ || 96 ||



tena vākpātakenātha paścāttāpamupāgataḥ |

tatyāja jananīmeva pravrajyām na tu tāṃ dvijaḥ || 97 ||



śramaṇairme hṛtaḥ putra iti sā vipralāpinī |

unmādinī tanuṃ tyaktvā prapede narakasthitim || 98 ||



tataḥ kālena kapilaḥ svayaṃ kalitakilbiṣaḥ |

dehānte vākyapāruṣyādimāṃ makaratāṃ gataḥ || 99 ||



tānyetāni mukhānyasya yānyūce bhikṣubhartsane |

phalaṃ sadṛśarūpaṃ hi karmabījāt prajāyate || 100 ||



ityuktvā tatra bhagavān dharmamādiśya śāśvatam |

janasyānugrahaṃ cakre nānābodhividhāyakam || 101 ||



tataḥ prayāte svapadaṃ jine tanmayamānasaḥ |

kamaraḥ projjhitāhārastyaktvā dehaṃ divaṃ yayau || 102 ||



cāturmahārājikeṣu deveṣu viśadadyutiḥ |

śrīmān sa jātaḥ sugate kṣaṇaṃ cittaprasādanāt || 103 ||



tataḥ pūrṇenduvadanaḥ sragvī rucirakuṇḍalah |

sa sākāra ivānandaḥ sugataṃ draṣṭumāyayau || 104 ||



prakīrṇadivyakusumaḥ kirīṭaspṛṣṭabhūtalaḥ |

prabhāpūritadikcakrastaṃ bhaktyā praṇanāma saḥ || 105 ||



cakre tasyopaviṣṭasya bhagavān dharmadeśanām |

yayā srotaḥphalaṃ prāpya satyadarśī jagāma saḥ || 106 ||



tṛṇamiva gurukāyo'pyuddhṛtaḥ pāpapaṅkā-

diti sa jananikāyaḥ so'pi duḥkhājjinena |

vyasananipatitānāṃ līlayā puṇyaśīlā

nikhilamatulamūlaṃ kleśamunmūlayanti || 107 ||



iti kṣemendraviracitāyāṃ bodhisattvāvadānakalpalatāyāṃ

kapilavadānaṃ nāma ekonacatvāriṃśaḥ pallavaḥ ||