• Home
• Canon Text
• 37 mūkapaṅgvavadānam

37 mūkapaṅgvavadānam

Technical Details

37 mūkapaṅgvavadānam |



ākiṃcanyasukhāya niḥspṛhatayā vairāgyalakṣmījuṣaḥ

sarvaṃ yānti vihāya kāyasacivāḥ santaḥ praśāntyai vanam |

tatrāpi vrataḍambare parikarārambhāya cet saṃcaya -

statkaḥ kośaparicchadopakaraṇairgehe'parādhaḥ kṛtaḥ || 1 ||



jine jetavanārāmavihārābhirate purā |

śākyarājakumārāṇāṃ pravrajyāsaṃjuṣāṃ puraḥ || 2 ||



citracīvarasatpātrayogapaṭṭādisaṃcayam |

prabhūtataramālokya bhagavān samacintayat || 3 ||



aho bataiṣāṃ nādyāpi bandhaheturnivartate |

abhimānamayaḥ kāye priyaḥ parikaragrahaḥ || 4 ||



kāye kāyapariṣkārastasyopakaraṇāvalī |

tasyāḥ parikarādānamaho nu bandhaśṛnkhalā || 5 ||



iti saṃcintya bhagavān naikāntavihitasthitiḥ |

kāruṇyādupasannānāṃ kuśalāya samudyataḥ || 6 ||



māsatrayamupasthānaṃ kartavyaṃ yena kenacit |

adarśanāya bhikṣūṇāmakaroditi saṃvidam || 7 ||



pravṛtte niyame tasmin bhikṣurāraṇyakavrataḥ |

āyayāvupasenākhyaḥ kāryārthaṃ tanucīvaraḥ || 8 ||



pravāritaḥ sa saṃprāpya dhanyaḥ sugatadarśanam |

kṛtakṛtyaḥ kṣasṇaṃ sthitvā pratasthe praṇipatya tam || 9 ||



vrajantametya papracchurbhikṣavaḥ parivārya tam |

tavārya darśanamaho dattaṃ bhagavatā katham || 10 ||



māsatrayaṃ darśane'sya niyamaḥ śāsanena yaḥ |

sa kathaṃ bhavatā bhagnaḥ saṃghasyonmārgagāminā || 11 ||



śrutvā tadvacanaṃ teṣāmupasenaḥ smitottaram |

tānuce n amayā kaścit kṛtaḥ samayaviplavaḥ || 12 ||



ahamukto bhagavatā darśanāvasare svayam |

āraṇyakasya me bhikṣorniṣedho nāsti darśane || 13 ||



paricchadopakaraṇatyāganirmuktabandhanāḥ |

avāryadarśanā vṛkṣamūlikāḥ pāṃśukūlikāḥ || 14 ||



idamadya paraṃ prātariti ye saṃcaye ratāḥ |

pātravīcaravargeṣu teṣāṃ nāstīha darśanam || 15 ||



pāthobhiḥ prasarattuṣāraśiśiraistṛṣṇāturāste paraṃ

te nityaṃ ca nidhānadhāmni vivṛte'pyanyādalaṃ durgatāḥ |

teṣāṃ candanapādapādupanataḥ saṃtāpakaḥ pāvako

yaireṣa praśamavratopakaraṇe baddho'bhimānagrahaḥ || 16 ||



ityuktamupasenena śrutvā te śākyabhikṣavaḥ |

vailakṣyakṣayitotsāhāḥ sahasaiva vyacintayan || 17 ||



etadbhagavatādiṣṭamasmānuddhiśya nāparān |

vicitracīvaracayaprāvārā vayameva yat || 18 ||



viratecchāḥ priyāh śāsturmahecchā vayamapriyāḥ |

tasmādicchāṃ parityajya bhavāmastasya saṃmatāḥ || 19 ||



iti saṃcintya te sarve cārucīvarasaṃcayam |

prāvṛtyābhyadhikaṃ tyaktvā yayurbhagavato'ntikam || 20 ||



icchāvirāme bhagavān vyadhātteṣāmanugraham |

jñānavajreṇa satkāyadṛṣṭiśailaṃ bibheda yaḥ || 21 ||



śākyarājakumārāṇāṃ śrotaḥprāptiphalaspṛśām |

bhikṣubhiḥ pūrvavṛttāntaṃ pṛṣṭaḥ prāha tathāgataḥ || 22 ||



vārāṇasyāmabhūtpūrvaṃ brahmadatto mahīpatiḥ |

dānārdrahasto yadbāhuḥ kṣmāmadhāddigdvipopamaḥ || 23 ||



tasya brahmāvatī muktālateva guṇaśālinī |

kīrtiḥ satpuruṣasyeva viśrutā vanitābhavat || 24 ||



pratibimbopamaṃ patyuḥ sā sutaṃ vimalāśayā |

jalakrīḍāgatā kāle suṣuve divyalakṣaṇam || 25 ||



udakākhyaḥ sa bālo'bhūt saṃjātaḥ salilāntare |

vardhamānaḥ pitustulyaṃ yauvarājyānorathaiḥ || 26 ||



śatāni pañcāmātyānāṃ tasya janmadinaṃ samam |

avāpustulyarūpāṇāṃ putrāṇām śatapañcakam || 27 ||



nijaṃ jātismaraḥ smṛtvā prāgvṛttaṃ sa śiśuḥ śanaiḥ |

acintayat prāptakālaṃ hitaṃ sukṛtamātmanaḥ ||28 ||



ṣaṣṭivarṣāṇi kṛtvā tu yauvarājyamahaṃ purā |

abhavaṃ kṛcchrasaṃtaptaściraṃ narakasaṃkaṭe || 29 ||



janmanyasminnapi punaryauvarājyamupasthitam |

sarvathā prārthyamāno'pi na kariṣyāmi pātakam || 30 ||



iti saṃcintya sa ciraṃ rājabhogaparāṅmukhaḥ |

piturudvegajananīmagrahīt paṅgumūkatām || 31 ||



sarvalakṣaṇayukto'pi rājavṛtterabhājanam |

sa mūkapaṅgurnāmābhūd bandhūnāṃ duḥkhavardhanaḥ || 32 ||



prāpteṣu mantriputreṣu śastraśāstrabalodayam |

rājaputraḥ pravṛddho'pi nodatiṣṭhanna cāvadat || 33 ||



pṛṣṭastataḥ kṣitīśena vaidyāstaddoṣabheṣajam |

avadan vaikalyaṃ rājan rājasūnorna dṛśyate || 34 ||



abhyāsādyadi jāto'sya doṣo'pi sukhasevinaḥ |

tadeṣa bhayasaṃvegāduttiṣṭhati ca vakti ca || 35 ||



iti vaidyairabhihitaṃ tathetyuktvā kṣitīśvaraḥ |

mithyaiva vadhyavasudhāṃ bhayāya vyasṛjatsutam || 36 ||



sa bhartsyamānah puruṣaistamuvāca rathasthitam |

api kaścidvasatyasyāṃ vārāṇasyāṃ na vā janaḥ || 37 ||



iti tadvacanaṃ śrutvā tairnītaḥ sa nṛpāntikam |

tatra pitrārthyamāno'pi mūka evābhavat punaḥ || 38 ||



punarvadhyabhuvaṃ nītaḥ śavaṃ dṛṣṭvā jagād saḥ |

astyeṣa jīvati śavaḥ kiṃ vā sarvātmanā mṛtaḥ || 39 ||



śrutvaitat taiḥ pituḥ pārśve nyasto maunaṃ vyadhātpunaḥ |

punarvadhabhayāccaiva nītaḥ provāca tān pathi || 40 ||



rāśirya eṣa dhānyasya sa hi bhukto'nubhujyate |

ityuktavākyo'pi punarnoce kiṃcit pitu paraḥ || 41 ||



tataḥ khyātapratikṣepe tasyādiṣṭe mahībhujā |

so'vadadvaradānena vacmi pradbhyāṃ vrajāmi ca || 42 ||



athāsya rājñā hṛṣṭena varadāne pratiśrute |

sa padbhyāṃ svayamabhyetya spaṣṭaṃ pitaramabravīt || 43 ||



nāhaṃ paṅgurna mūko'haṃ naiva cāhaṃ jaḍāśayaḥ |

kiṃtu janmāntarakleśaṃ smṛtvā vaihvalyamāśritaḥ || 44 ||



yauvarājyasukhaṃ bhuktvā ṣaṣṭivarṣāṇyahaṃ purā |

ṣaṣṭivarṣasahasrāṇi nyavasaṃ narakodare || 45 ||



rājabhītyā mayā tasmāt kṛteyaṃ mūkapaṅgutā |

pravrajyayā brahmacaryaṃ carāmyeṣa varo mama || 46 ||



iti tenoktamākarṇya tamuvāca mahīpatiḥ |

amūka ityāptadhṛtirvirakta iti duḥkhitaḥ || 47 ||



dharmamūlamidaṃ rājyaṃ putra na tyaktumarhasi |

yajñadānaprajātrāṇaiḥ puṇyapūrṇā nṝpaśriyaḥ || 48 ||



ekaputrastvayā putra parityāgarasādaham |

nidrādaridratām nītaḥ śokaśayyāsamāśrayaḥ || 49 ||



saṃpūrṇacandrarucirāṃ vyaktamauktikahāsinīm |

kathaṃ saṃpadamutsṛjya pravrajyābhimatā tava || 50 ||



kathaṃ śayyāḥ parityajya prājyarājyasukhocitāḥ |

vanāntavāsavyasanī sevase pāṃśulāḥ sthalīḥ || 51 ||



kāntālīlāmukuramaṇimanmandirīṃ rājadhānī-

metāṃ tyaktvānanu vanabhuvaḥ saṃpatadvyāghraghorāḥ |

sarvaprītyai jaradajagarāśvāsavipluṣṭapatrāḥ

kliṣṭacchāyāh praviralalatāstāḥ kathaṃ te bhavanti || 52 ||



pituḥ śrutveti vacanaṃ rājaputrastamabravīt |

dantakāntādhararuciṃ vairāgyaṃ grāhayanniva || 53 ||



śītalā nirmalajalāh saṃtoṣaśaśiśītalāḥ |

vane vairāgyasubhagā bhuvaḥ kasya na vallabhāḥ || 54 ||



paradārā iva kṣiprasukhāvarjitadurjanāḥ |

narakapratyayāyāme sāpāyā na priyāḥ priyāḥ || 55 ||



dhyānaṃ mantraḥ parijñānamindriyāṇāṃ canirjayaḥ |

rājñāṃ hiṃsāprayatnena yogo'yaṃ narakapradaḥ || 56 ||



hasantyaḥ saṃsāraṃ kusumakalilāḥ kānanabhuvaḥ

svabhāvena prītiṃ vidadhati budhānāṃ śamamayīm |

dṛḍhaṃ cintāśrāṇtā vyajanapavanocchvāsabahulā

vibhūtirbhūpānāṃ śiraḥsaktāmanityatām || 57 ||



anujānīhi māṃ tāta vrajāmyeṣa tapovanam |

jānīhi sarvabhāvānāṃ śiraḥsaktāmanityatām || 58 ||



iti putravacaḥ śrutvā tattatheti vicintayan |

uvācopacitāścaryastaṃ manīṣī mahīpatiḥ || 59 ||



vivekavimalaṃ putra tvamicchāsi sa cedvanam |

hitvāme saṃśayaṃ tāvat paścādyuktiṃ kariṣyasi || 60 ||



vrajatā badhyavaśudhāṃ tiryaguktaṃ tvayā vacaḥ |

pracuraṃ tadabhiprāyaṃ vaktumarhasi tattvataḥ || 61 ||



iti kṣitibhujā pṛṣṭaḥ so'bravīttanmayoditam |

vasatyatra na kaścit tvā madvadhādyo nivartayet || 62 ||



sukṛtī jīvati śavaḥ sa pāpastu mṛto'mṛtaḥ |

prāk puṇyaṃ bhakṣyate mūlāt sadhanairdhānyarāśivat || 63 ||



ityāśayānmayā tāta taduktaṃ vacanaṃ priyam |

------------- - - - -- - - -- - - - - - - - - - - -- - - -- - - -- - - - || 64 ||



iti śrutvā kṣitipatistaṃ pariṣvajya sādaraḥ |

ucitaṃ kriyatām putra kuśalāyetyabhāṣataḥ || 65 ||



tataḥ sa pitrānujñātaḥ sāśrunetreṇa kānanam |

prayayau mantriputrāṇāṃ sahitaḥ pañcabhiḥ śataiḥ || 66 ||



maharṣerantike tatra pravrajyāṃ prāpya sānugah |

teṣāṃ kālena so'paśyat kuṇḍavalkalasaṃcayam || 67 ||



tataḥsa saṃcayadveṣī tadadarśanasaṃvidā |

ekākī vijane tasthau kaṃcit kālaṃmahāmatiḥ || 68 ||



darśanābhāṣaṇe baddhaniyamo'pi yadṛcchayā |

prāptaṃ svāgatamityuktvā papraccha kuśalaṃ mṛgam || 69 ||



punaśca pūjitaṃ dṛṣṭvā muniṃ tena mṛgavratam |

amātyatanayāḥ sarve vilakṣāḥ samacintayan || 70 ||



mṛgo mṛgavrataścāyaṃ pūjitau niṣparigrahau |

etāvanajinau daṇḍasaṃbḥārāḍambarojjhitau || 71 ||



etadarthamanenāsmaddarśane niyamaḥ kṛtaḥ |

vratopakaraṇavyagrānnūnamasyāpi vārayet || 72 ||



iti saṃcintya sarvaṃ te vratopacārasaṃcayam |

nadyāṃ prakṣipya vārāyāṃ yayuḥ śuddhāstadantikam || 73 ||



tyaktvā gṛhabhūvaṃ teṣāmāśayānuśayocitām |

sa dhātuṃ prakṛtiṃ jñātvā vidadhe dharmadeśanām || 74 ||



rājaputraḥ sa evāhaṃ śākyāste mantrisūnavaḥ |

punastyāgopadeśo'yamadyāpyeṣāṃ mayā kṛtaḥ || 75 ||



iti śāyakumāravṛttametat

kathitaṃ bhikṣugaṇaḥ svayaṃ jinena |

avadhārya parāmapūjayat tāṃ

karuṇāmāśritavatsalasya tasya || 76 ||



iti kṣemendraviracitāyāṃ bodhisattvāvadānakalpalatāyāṃ

mūkapaṅgvavadānaṃ nāma saptatriṃśaḥ pallavaḥ ||