• Home
• Canon Text
• 36 pūrṇāvadānam

36 pūrṇāvadānam

Technical Details

36 pūrṇāvadānam |



vibudhasarasiḥ padmaiḥ śobhite paṅkajinyā

śuciparisarajātaṃ spṛśyate na sthale'bjam (?) |

sahajaparicitānāṃ nityamantargatānām

bhavati sitaguṇānām kāraṇaṃ naiva jātiḥ || 1 ||



śrāvastyāṃ sarvasattvānāṃ svastidhyānaparāyaṇe |

jinakalpadrume jetavanārāmasthite purā ||2 ||



śūrpārakākhye nagare ratnasaṃcayasāgaraḥ |

bhavo nāmābhavatsārthaparirmatimatāṃ varaḥ || 3 ||



bhavilo bhavabhadraśca bhavanandī ca viśrutāḥ |

ketakyāṃ tasya jāyāyāṃ babhūvustanayāstrayaḥ || 4 ||



rogayogādupagaraḥ sa kadācinmumūrṣutām |

pāruṣyād bhṛśamudvignaiḥ patnīputrairupekṣitaḥ || 5 ||



bhaktyā dāsī tu tasyaikā paricaryāparā param |

mallikākhyābhavattasyāḥ sevayā svāsthyamāyayau || 6 ||



snehopakārapraṇataḥ kṛtajñaḥ sa tayānvitaḥ |

ṛtau saṃgamamabhyetya tasyāḥ putramajījanat || 7 ||



yadā tajjanmani pituḥ sarvārthāḥ pūrṇatām yayuḥ |

sa tadā pūrṇanāmābhūdbālaḥ pūrṇendusundaraḥ || 8 ||



jyeṣṭhāstrayaḥ kṛtidvāhā yayurabdhiṃ dhanārthinaḥ |

pūrṇastu bhāṇḍaśālāyāṃ pituścakre dhanārjanam || 9 ||



tataḥ pratinivṛttāste prāptārthaḥ sāgarātpunaḥ |

gaṇanāṃ hemalakṣāṇāṃ kṛtvā svamudire puram || 10 ||



samudragamane teṣām yāvānāsīddhanāgamaḥ |

pūrṇasya svagṛhe paṇyaurbabhūvābhyadhikastataḥ ||11 ||



taddṛṣṭvā janakasteṣāṃ vṛddhaḥ paryantavāsare |

tamūcehitamāyatyāṃ tṛṣṇā naikakṣayodayaḥ || 12 ||



dṛṣṭaṃ bhavadbhiḥ sāmudralābhe kṛtapariśramaiḥ |

pūrṇenoārjitaṃ vittamakleśena mahīyasā || 13 ||



śubhakarmavipākena bhavantyarthā dhanārthinām |

hastāt palāyate'nyasya prāpnoti patitaṃ paraḥ || 14 ||



sanmārgasyāparityāgād yuktāyuktavivecanāt |

deśakālaparijñānātsatāṃ sarvatra saṃpadaḥ || 15||



bhavanti svagṛhe śanyāḥ sudhiyo dharmabhāginaḥ |

gatvā ratnākaraṃ cānye labhante prāṇasaṃśayam ||16 ||



yatnena boddhavyā sadbhiḥ dhanasyopaniṣtparā |

adrohaśuddhabuddhīnāṃ svādhīnānāṃ dhanācchriyaḥ || 17 ||



rakṣaṇīyo bhavadbhiśca bhedaḥ satatasaṃhateḥ |

bhinnāt skhalati kalyāṇaṃ kulāt kumbhādivodakam || 18 ||



athābhinnendhanasyāgnernaśyante sadṛśāstviṣaḥ |

tathā vipulavaṃśasya bhinnajñātervibhūtayāḥ ||19 ||



bhrātṝṇāṃ saṃtato bhedaḥ kathaṃ nāma nivartate |

adhyāpitānāṃ patnībhirdveṣavidyāṃ sadā niśi || 20 ||



unnatānāṃ svavaśānāṃ dvaidhaṃ tāvanna jāyate |

yāvatkuṭhāradhāreva yoṣidviśati nāntaram || 21 ||



bhrāturarthānuvādena guruṃ pāruṣyakutsayā |

mitramekābhilāṣeṇa nayanti dvaidhatāṃ striyaḥ || 22 ||



tadvadanti hasantyo'pi bhrūvilāsena yoṣitaḥ |

yatprayāti suhṛtsnehamūlonmūlanahetutām || 23 ||



hitamuktveti putrāṇāṃ bhūtaye'bhimataṃ bhavaḥ |

anityatāpariyuktaḥ kāle nidhanamāyayau || 24 ||



avibhakte dhane śaktā deśāntaradhanārjane |

jyeṣṭhā babhūvuḥ pūrṇastu gṛhe vittamacintayat || 25 ||



kālena gṛhamāptānām vastrāśanavivādinām |

strīmantradattakarṇānāṃ bhedasteṣāmajāyata || 26 ||



vitte vibhajyamāne'th atairvidveṣavaśīkṛteḥ |

dāsīsuto'yamtyuktvā nītaḥ pūrṇo niraṃśatām || 27 ||



so'pi pūrṇaśanaḥ kāle śītasaṃkucitaṃ pathi |

dadarśa grīṣmatāpr'pi vivaśaṃ dārubhārakam || 28 ||



ādāya dārumūlyena sa tasmāddārubhārakam |

divyacandanamadrākṣīddahanasyāpi śītadam || 29 ||



sukṛtenaiva mahatā tena labdhamahādhanaḥ |

sa sevyaḥ sārthavāhānāṃ pūjyo'bhūtpṛthivīpateḥ || 30 ||



ratnākaraṃ sa ṣaṭkṛtvaḥ prayātaḥ sarvado'rthinām |

cakāra sarvavaṇījāṃ taraśulkādyanugraham || 31 ||



srhāvastīvāsibhiḥ sārthavaṇigbhiḥ punararthitaḥ |

yayau pravahaṇārūḍhaḥ samudradvīpamāśu saḥ || 32 ||



pratyāvṛtte pravahaṇe so'tha śuśrāva gāyatām |

vaṇijāṃ sthāvirāḥ śailagāthāḥ sugatasaṃśrayāḥ || 33 ||



kasyaitā iti te tena pṛṣṭāḥ sarve babhāṣire |

etā bhagavatā gītā gāthā buddhena dhīmatā || 34 ||



iti buddhābhidhāmeva śrutvā harṣamavāpa saḥ |

puṃsāṃ svavāsanārūḍhaṃ vyaktimāyātyudīritam || 35 ||



tairvistareṇa kathitāmākarṇya bhagavatkathām |

so'bhavattadgatamanāstaddarśanasamutsukaḥ || 36 ||



sa śanairgṛhamāgatya tyaktvā sarvaparicchadam |

anāthapiṇḍadaṃ draṣṭuṃ śrāvastyāṃ suhṛdaṃ yayau || 37 ||



abhilāṣaṃ nivedyāsmai pravrajyāyāṃ jitendriyaḥ |

jagāma sahitastena bhaktyā bhagavato'ntikam || 38 ||



dṛṣṭvaiva tatra sarvajñaṃ mohadhvāntadivākaram |

tatpādadarśanenaiva mene sa kṛtakṛtyatām || 39 ||



vijñāya tasya bhagavān saṃkalpaṃ tamabhāṣata |

daśanajyotsnayā kurvan vivekavimalā diśaḥ || 40 ||



ehi bhikṣi nirāśaṅke nirvipakṣe kṣayojjhite |

ākhyāte dharmavinaye brahmacaryāṃ carepsitam || 41 ||



iti prasādaśīlena jinenodīrite purah |

pravrajyā sahasaivāsya papātālakṣitā tanau || 42 ||



tataḥ sa śatrau mitre ca praśamāt samatāṃ śritaḥ |

śāstuḥ śāsanamādāya praṇipatya jagāma tam || 43 ||



śroṇāparāntakaṃ nāma deśaṃ śrūrajanāśrayam |

svayaṃ parīkṣituṃ kṣāntiṃ janena sa samāyayau || 44||



tato dṛṣṭvā tamāyāntaṃ mṛgayāyāmamaṅgalam |

lubdhakaścāpamākṛṣya hantuṃ kridhāt samādravat || 45||



nirvikāraṃ nirudvegaṃ sa taṃ vigatasādhvasam |

prahareti bruvāṇaṃ ca dṛṣṭvaiva śamamāptavān || 46 ||



śāmyatastasya sahasā prasādī lubdhakasya saḥ |

dharmaṃ dideśa yenāsau bodhiṃ prāpa sahānugaiḥ || 47 ||



sa tatra sugatārhāṇāṃ sarvopaskarasaṃpadām |

śatāni paznca ramyāṇāṃ vihārāṇāmakārayat || 48 ||



pūrṇo'pi jñānasaṃpūrṇaḥ prāptistridaśapūjyatām |

vairāgyalakṣmyā yukto'bhūnmunīnāṃ spṛhaṇīyayā || 49 ||



atha tasyāgrajo bhrātā bhavilaḥ kṣīṇavittatām |

kālenopagataḥ prāyāt samduraṃ draviṇāśayā || 50 ||



tataḥ pravahaṇārūḍhaḥ so'nukūlaiḥ samīraṇaiḥ |

gośīrṣacandanavanaṃ prāpitaḥ svalpavāsaraiḥ || 51 ||



kuṭhārikaśataistasmin pañcabhiśchettumudyate |

taccandanavanaṃ divyaṃ bhujaṅgagaṇāsaṃkulam || 52 ||



tatsvāmī yakṣasenānāṃ maheśvaraṃ iti śrutaḥ |

kopādudasṛjad ghoraṃ kālikākhyaṃ mahānilam || 53 ||



marutā mahatā tena prāpitāḥ prāṇasaṃśayam |

cakrandurvaṇijaḥ sarve śarvaśakramukhān surān || 54 ||



tānārtarāvamukharān bhavilaḥ sārthanāyakaḥ |

uvāca saṃcintya ciraṃ paścāttāpasamākulaḥ || 55 ||



pūrṇaḥ kanīyān bhrātā sa hitaiṣī māṃ purāvadat |

bahukleśo hyalpasukhaḥ kka gantavyastvayāmbudhiḥ || 56 ||



akṛtvā dhīmatastasya vacanaṃ satyadarśinaḥ |

cyuto'haṃ dhanalobhena ghore'smin vyasanārṇave || 57 ||



śrutvaitadvaṇijaḥ sarve prabhāvaṃ lokaviśrutam |

pūrṇasya manasā dhyātvā tameva śaraṇaṃ yayuḥ || 58 ||



namastubhyaṃ jagatkleśaviṣadhoṣāpahāriṇe |

pūrṇayodīrṇakaruṇāsudhāsaṃpūrṇacetase || 59 ||



ityekasvararāveṇa teṣāṃ saṃpūrite'mbare |

kṣaṇena gatvā tadvṛttaṃ pūrṇaḥ prāha svadevatāḥ || 60 ||



śroṇāparāntakagataḥ śrutvā teṣāṃ sa viplavam |

vyomnā samādhisaṃnaddhaḥ prāpa pravahaṇaṃ kṣaṇāt || 61 ||



tasmin paryaṅkabandhanena sthito merurivācalah |

pralayottālavegasya gatiṃ vāhorjahāra sah || 62 ||



pūrṇena pavanaṃ ruddhaṃ jñātvā yakṣagaṇāgraṇīḥ |

taṃ prasādya yayau tyaktvā tebhyaścandanakānanam || 63 ||



pūrṇaprasādādādāya bhavilaścandanadrumān |

hṛṣṭastenaiva sahitaḥ śūrpāraṃ svapuraṃ yayau || 64 ||



pūrṇo'th saṃmate bhrātustatra gośīrṣacandanaiḥ |

cakre candanamālākhyaṃ prāsādaṃ sugato'citam || 65 ||



tatra pūrṇena bhagavān dhyātastūrṇaṃ vihāysā |

samāyayau jetavanādullaṅghya śatayojanīm || 66 ||



āgacchato bhagavataḥ puraḥprasṛtayā jagat |

dehakāntyā kapiśitaṃ sarvaṃ himamivābhavat || 67 ||



purohvilokya gṛhāṅganāḥ |

tīvracittaprasādena praśamonmukhatāṃ yayuḥ || 68 ||



kuśalopacitāṃ tāsāṃ bhagavān satyadeśanām|

cakre bhavādṛtāṃ kāntāstāh prāpuḥ kuśalaṃ yayuḥ || 69 ||



ṛddhyā bhagavatastatra caityaṃ paurāṅganābhidham |

tābhirvihitamadyāpi vandante caityavandakāḥ || 70 ||



munīnāṃ bhagavān kṛtvā tathā valkalino muneḥ |

pravrajyānugrahaṃ śuddhāṃ vidadhe dharmadeśanām || 71 ||



tataścandanamālākhyaṃ prāsādaṃ bhagavān jinaḥ |

praviśya sphāṭikaṃ cakre janasaṃghabharakṣamam || 72 ||



atha ratnāsanāsīnaḥ sa tatra karuṇānidhiḥ |

vidadhe sarvasattvānāṃ śāntyai nirvāṇadeśanām || 73 ||



atrāntare sānucarau munīndrau kṛṣṇāgautamau |

abhyetya dharmaśravaṇeśāstuḥ śāsanamāpatuḥ || 74 ||



tatra kṛtvātha bhagavān prāsādasya pratigraham |

punarjetavanaṃ gacchannudyayau saha bhikṣubhiḥ || 75 ||



vrahan mārīcilokasthām maudgalyāyanamātaram |

sagdirā cāryasatye tāṃ dharmamārge nyaveśayat || 76 ||



atha jetavanaṃ prāptaṃ bhagavantaṃ savismayāḥ |

pūrṇasya puṇyaṃ papracchurbhikṣavaḥ so'pyabhāṣata || 77 ||



kāśyapasya purā samyaksaṃbuddhasyānyajanmani |

vihārādhikṛtaḥ pūrṇaḥ saṃghopasthāyako'bhavat || 78 ||



sa kadācidasaṃmṛṣṭāṃ dṛṣṭvā vaihārikīṃ bhuvam |

prāha pravrajitaṃ tīvraṃ krodhādupadhivārikam || 79 ||



dṛptasyopadhivāro'dya vihāro'sminnamārjitaḥ |

kasya dāsīsutasyeti bruvāṇastamabhartsayat || 80 ||



tena pāruṣyapāpena bhuktvā narakadurgatim |

dāsīsuto'bhavat pūrṇaḥ pañca janmaśatāni saḥ || 81 ||



saṃghopāsanamevāsya puṇyāyābhūnmahīyasā |

arhattvaṃ yena niḥśeṣabhavakleśojjhitaḥ śritaḥ || 82 ||



iti prabhāvaṃ kathitaṃ jinena

pūrṇasya puṇyopacayapraṇitam |

śrutvādbhutaṃ saṃsadi bhikṣusaṃghaḥ

puṇyaprasaṃśābhirato babhūva || 83 ||



iti kṣemendraviracitāyām bodhisattvāvadānakalpalatāyām

pūrṇāvadānaṃ ṣaṭtriṃśaḥ pallavaḥ ||