• Home
• Canon Text
• 35 ghoṣīlāvadānam

35 ghoṣīlāvadānam

Technical Details

35 ghoṣīlāvadānam |



phalaṃ samānaṃ labhate sa dātu-

ryāti kṣaṇaṃ dānasahāyatāṃ yaḥ |

paropakārapraṇayodyatānāṃ

nāpuṇyakarmā sacivatvameti ||1||



ramye purā bhagavati śrāvastyāṃ jetakānane |

anāthapiṇḍadārāmavihārādhirate jine || 2 ||



kauśāmbyāṃ vatsanṛpatirbabhūvodayanābhidhaḥ |

gāyatyadyāṣi yatkīrtirvidyādharavadhūjanaḥ || 3 ||



abhavadviṣaye tasya karmāntākarajīvanaḥ |

gṛhasthaḥ sudhano nāma dhanādhānavicakṣaṇaḥ || 4 ||



nṛpaḥ kadāciṃdāsthāne taṃ kāryārthinamāgatam |

vacasaiva parijñāya jagād vihitādaraḥ || 5 ||



jānāmyahaṃ gṛhapate hiraṇyopacitasvaram |

vipulaḥ saṃcayajñasya suvarṇanidhirasti te || 6 ||



ityuktaḥ sasmitaṃ rājñā sa tamūce kṛtāñjaliḥ |

satyamastyeva me rājan gṛhe kāñcanasaṃcayaḥ || 7 ||



sadvṛttacintānirate deve vātsalyapeśale |

kiṃ vā nāsti janāsyāsya pitari tvayi goptari || 8 ||



dhanino yāntyadhanatāṃ nidhanaṃ yānti cādhanāḥ |

vyāghratām yāti dedbhūbhṛdāmiṣāghrāṇanirghṛṇaḥ || 9 ||



niḥsaṅkairarjyate vittamarjitaṃ ca vibhajyate |

vibhaktaṃ bhujyate spaṣṭaṃ janairdharmadhane nṛpe || 10 ||



upapannaṃ vacaḥ śrutvā dhīmatastasya bhūpatiḥ |

tamūce daśanodyotaiḥ prasādaṃ darśayanniva || 11 ||



matimān kāryasacivastvaṃ me bhavitumarhasi |

dhīdhūryaistvadvidhaireva dhāryate dharaṇībharaḥ || 12 ||



iti rājavacaḥ śrutvā śudhanastamabhāṣata |

n avayaṃ rājasevāsu sabhāmaṇḍalapaṇḍitāḥ || 13 ||



svācchandyodyānavicchedaḥ sunidrāsukhavikrayaḥ |

sevā hi puṃsāṃ saṃsāraduḥkhadainyabhayaṃkaraḥ || 14 ||



īśvarairmastakanyastacaraṇaḥ kṛtakṛtyatām |

pādapīṭha ivāyāti sevako'haṃ sthitaḥ sadā || 15 ||



sevāyāsaprayāsena prāptānāmapi saṃpadām |

saṃbhogaḥ piśunāsaṅgī prabhubhrūbhangabhaṅguraḥ || 16 ||



etāśca nāvatiṣṭhante prayatnena dhṛtā api |

darpogradurgrahagrāhadurgrahā nṛpasaṃpadaḥ || 17 ||



kṣaṇaṃ navanavāśliṣaviśeṣapraṇayodyatāḥ |

avācavāraramaṇīramaṇīyā vibhūtayaḥ || 18 ||



ityuktapratiṣedho'pi sa rājñā sacivaḥ kṛtaḥ |

atikrāmati ko nāma prabhaviṣṇoḥ samīhitam || 19 ||



prāptaprauḍhapadaṃ rājñā nītaṃ sarvādhikāritām |

vidveṣadūṣitāḥ sarve mantriṇastaṃ na sehire || 20 ||



dharmajijñāsayā rājñā piśunapreritena saḥ |

naivākarodasatkāryaṃ niyukto'pi puna punaḥ || 21 ||



āghātaṃ prekṣitaḥ so'tha mithyākopena bhūbhujā |

tathāpyadharmasaṃyuktaṃ na śāsanamatanyata || 22 ||



ekajanmasukhāyaiva bahujanmaśatārditam |

na sādhuninditaṃ karma karomīti jagāda saḥ || 23||



bhayadharmopadhāśuddhaḥ pratimuktaḥ sa bhūbhujā |

dānasatramavicchinnamakarodakhilārthinām || 24 ||



sarvatra viśrute tasya dānasatre yaśasvinah |

kalpavṛkṣādaraḥ puṃsāṃ paraṃ pratanutāṃ yayau || 25 ||



atrāntare munigaṇāstīrthārthā dakṣiṇāpathāt |

āgatā kṛcchrakāntāramaviśan nirjanaṃ vanam || 26 ||



tatra tṛṣṇāturāḥ sarve mūcchitāḥ śayanāśritāḥ |

ayācanta jalaṃ mohāduccaidyo'tra dayāmbudhiḥ |

sthitaḥ prayacchatu jalaṃ so'smākamiti te'bruvan || 28 ||



tataḥ sa ratnakeyūrakkanatkaṅkaṇasaddhvaniḥ |

bhujasthamemabhṛṅgārastarumadhyādviniryayau || 29 ||



te tasmādamṛtāsvādaṃ pāṇipadmāvanāmitāt |

ākaṇṭhaṃ salilaṃ pītvā jahṛṣurlabdhajīvitāḥ || 30 ||



prārthitaḥ punarabhyetya papracchuste savismayāḥ |

adṛśyavṛkṣanilayādudbhūtaṃ ko bhavāniti || 31 ||



so'bravīdviśrutayaśāḥ śrāvastyāmāśayaḥ śriyaḥ |

anāthapiṇḍado nāma sarvado'sti gṛhādhipaḥ ||32 ||



saucikena mayā pūrvaṃ tadgṛhāntikavāsinā |

bhujamudyabhya tadveśma darśitaṃ nityamarthinām || 33 ||



tena puṇyena devatvaṃ prāpto'tra viharāmyaham |

bāhurmam vibhātyeṣa dakṣiṇaḥ so'rthidakṣiṇaḥ || 34 ||



te tamāmantrya munayaḥ punaḥ saṃprasthitā vane |

kṣudhitāḥ snigdhasacchāyaṃ dadṛśuḥ pādapaṃ param || 35 ||



tamapyuccairayācanta bhojanaṃ tadvadeva te |

uccacāra ca gambhīrā vāṇī vismayakāriṇī || 36 ||



atra puṣkariṇītīre droṇyāṃ divyānnabhojanam |

saṃpūrṇamasti tadgatvā bhujyatāṃ yadabhīpsitam || 37 ||



iti tena samādiṣṭaṃ bhuktvā te divyabhojanam |

ko bhavaniti papracchustaṃ divyatarusaṃśrayam || 38 ||



so'pyācacakṣe śrāvastyāṃ gṛhastho'nāthapiṇḍadaḥ |

asti tasyāhamabhavaṃ brāhmaṇaḥ saṃghahojane || 39 ||



caturaḥ paricaryāyāṃ dadhikumbhapracārakaḥ |

tadbhojanānte saṃprāpte svalpaśeṣānnabhojanaḥ || 40 ||



bhikṣuṇāṃ gauraveccāraṃ dṛṣṭvāhaṃ rājabhojanam |

ātmanaścānnamakṣāramabhavaṃ khinnamānasaḥ || 41 ||



anāthapiṇḍadagirā bhojane gauravāśayā |

tato mayāṣṭāṅgayuktaṃ gṛhītaṃ poṣadhaṃ vratam || 42 ||



asamāptavratenātha bhuktaṃ laulyānmayā niśi |

tenāhamabhavaṃ loke vijñātaḥ khaṇḍapoṣadhaḥ || 43 ||



khaṇḍenāpi vratenāhaṃ devaputratvamāgataḥ |

iti te tadvacaḥ śrutvā munayo vismitā yayuḥ || 44 ||



acintayan vrajantaste tīvreṇa tapasā vayam |

suciraṃ kevalaṃ kliṣṭāṃ nādyāpi kuśalaspṛśaḥ || 45 ||



adhunā poṣadhaṃ prāptuṃ vratameva yatāmahe |

nirapāyasukhopāye svahite kasya nādaraḥ || 46 ||



iti saṃcintayantaste kauśāmbīmabhito gatāḥ |

sudhanasya gṛhaṃ prāpurviśrutaṃ gṛhamedhinaḥ || 47 ||



tatra tena kṛtātithyā nivedyāsmai tadadbhutam |

anāthapiṇḍadaṃ draṣṭuṃ tenaiva sahitā yayuḥ || 48 ||



śrāvastyām te samāsādya pūjitāstena sādaram |

asmai nyavedayan sarvaṃ yathādṛṣṭaṃ yathāśrutam || 49 ||



sa tān vratārthina sarvān suhṛdaṃ sudhanaṃ ca tam |

nināya dharmasacivaḥ prīto bhagavato'ntikam || 50 ||



bhagavānapi tadvākyāccakre teṣāmanugraham |

satyadarśanasaṃbuddhā yena te sugatiṃ yayuḥ || 51 ||



teṣu yāteṣu sudhanaṃ pakṣapātādrayā dṛśā |

vilokya bhagavān samyag vidadhe jñānabhājanam || 52 ||



satyasaṃdarśanāvāptaviśeṣakuśalodayaḥ |

gatvā jināya kauśāmbyām sa vihāramakārayat || 53 ||



yasmādbhagavatādiṣṭastasmin yātaḥ sahāyatām |

bhikṣuścundābhidhastasmāt so'bhūccundavihārabhūḥ || 54 ||



rādhābhidhā tadā dāsī vihāraparicārikā |

dayayā bhagavānasyāḥ śīrṇavastraṃ samagrahīt ||55 ||



adāsī syāmiti śraddhāpraṇidhānārpitastayā |

sa cīvaro bhagavataḥ prayayāvekavarṇatām || 56 ||



sudhanasyojjvalaṃ dṛṣṭvāṃpuṇyasaṃbhāramadbhutam |

bhikṣubhirbhagavān pṛṣṭastatpūrvodayamabhyadhāt || 57 ||



sundhānākhyo gṛhapatirvārāṇasyāmabhūtpurā |

nodārakuznjarasyābhūd yasya dānaparikṣayaḥ || 58 ||



anāvṛṣṭihate kāḻe tasya dvādaśavārṣike |

avāritamabhūcchatramavicchinnānnamarthinām || 59 ||



tasya padmākaro nāma koṣāgārapatirgṛhe |

dānasāhāyyakaṃ cakre sahasthā hi samṛddhayaḥ || 60 ||



pratyekabuddhasaṃghasya bhaktakālanivedakah |

dharmadūtābhidhastasya mantrī dhīmānapasthitaḥ || 61 ||



karmavyākṣepatastasya jāte kālavyatikrame |

kadācit kukurasteṣāṃ kālasaṃjñāṃ vyadhātpuraḥ || 62 ||



sundhāno'dya sa evāhaṃ koṣṭhiko'nāthapiṇḍadaḥ |

saṃghasya dharmadūto yaḥ sa evodayano nṛpaḥ || 63 ||



saṃjñānideśako yaśca kukuraḥ sudhano'pi saḥ |

rājñā ghoṣeṇa vijñāto ghoṣilāparanāmabhṛt || 64 ||



caritamityucitaṃ bhavabhedinā

bhagavatā kathitaṃ kila bhikṣavaḥ |

sukṛtasaurabhasārasudhārasaṃ

sumanasā śravaṇāñjalibhiḥ papuḥ || 65 ||



iti kṣemendraviracitāyāṃ bodhisattvāvadānakalpalatāyāṃ

ghoṣilāvadānaṃ pañcatriṃśaḥ pallavaḥ ||