• Home
• Canon Text
• 34 gṛhapatisudattāvadānam

34 gṛhapatisudattāvadānam

Technical Details

34 gṛhapatisudattāvadānam |



dattaḥ parahitabhāvanayā yadu tanudhanakaṇaśeṣaḥ |

aparikṣayaguṇakalpanayā bhavati supuṇyaviśeṣaḥ || 1 ||



atha vyatīte kasmiṃścit kāle bhagavato'ntike |

nandopanandayordharmadeśanāṃ śrotumāyayau || 2 ||



rājā prasenajiddraṣṭuṃ bhagavantamupāgataḥ |

tābhyāmakṛtasatkārapraṇāmaḥ komapāyayau || 3||



sa praṇamya jinaṃ gatvā pradadhyau nigrahaṃ tayoḥ |

śastravṛṣṭiṃ saṃsṛjantau tau ca vyomnā samāgatau || 4 ||



sarvajñapreṣitastūraṇaṃ maudgalyāyana etya tām |

śastravṛṣṭiṃ narapateścakre padmotpalāvalim || 5 ||



punargatvā bhagavataḥ samīpaṃ pṛthivīpatiḥ |

saṃprāptau kṣamayāmāsa tasyādeśāt phaṇīśvarau || 6 ||



athārthitaḥ pārthivena bhagavān rājamandiram |

bhaktipūtaṃ yayau bhoktuṃ bhaktaṃ bhikṣugaṇaiḥ saha || 7 ||



bhakṣyeṣu pacyamāneṣu rātrau tatrāgnivilpavaḥ |

jāto jinaprabhāveṇa sahasā śāntimāyayau || 8 ||



bhuktvā gate bhagavati kṣitipaḥ svapure'bhyadhāt |

jvalanajvālanaṃ rātrau vārayan daṇḍasaṃvidā || 9 ||



atrāṇtare gṛhapatiḥ sudattasyātmaji yuvā |

mithyādoṣadṛddhibalo nāma rājñābhighātitaḥ || 10 ||



pūrvaṃ bhagavataḥ śāstuḥ śāsanānugraheṇa saḥ |

labdhajñānadhṛtiḥ putraduḥkhe'pyāsīdaduḥkhitaḥ || 11 ||



aputraḥ svadhanaṃ bhūri dīnebhyaḥ pratipādya saḥ |

cakārātirasādekapaṇaśeṣaṃ śanaiḥ śriyaḥ || 12 ||



paṇalābhakṛtāśeṣadharmaḥ svalpaprado'tha saḥ |

abhūd gṛhī sudattākhyo gṛhaṃ hi svaplamucyate || 13 ||



kadāciddarśanāyātaṃ bhagavān purataḥ sthitam |

taṃ svalpadānanāmnaiva lajjitaṃ dayayāvadat || 14 ||



alpadānaṃ gṛhapaterna lajjāṃ kartumarhasi |

yāti śraddhārpito dānakaṇaḥ kanakaśailatām || 15 ||



purā bahutaraṃ dattaṃ velamena dvijanmanā |

śraddhāvirahasāmānyānna tathā vṛddhimāyayau || 16 ||



yaḥ sarvaṃ bhojayedbhaktyā jambudvīpagataṃ janam |

yaścaikaṃ bodhisaṃyuktaṃ tasya puṇyaṃ tato'dhikam || 17 ||



iti vākyaṃ bhagavatastathyaṃ śrutvābhinandya ca |

nijagehaṃ gṛhapatiḥ prayayau praṇipatya tam || 18 ||



dīpaṃ datvā paṭhan rātrau tatar buddhānuśāsanam |

daṇḍāya rājapuruṣaiḥ sa nīto'gnipravartanāt || 19 ||



daṇḍasya saṃbhavādbaddhaṃ bandhanāgāravartinam |

taṃ draṣṭumāyayurdevā rātrau śakrabrahmādayaḥ || 20 ||



sa tairdhanaṃ gṝhāṇeti prārthito nāgrahīdyadā |

tadā dharmopadeśo'yaṃ pravṛttastsya mandire || 21 ||



rājāpi tatprabhāveṇa dṛṣṭvā prajvālitaṃ puram |

muktvā taṃ bandhanāgārānna dadarśa jalaṃ kkacit || 22 ||



sa gataḥ sugataṃ draṣṭuṃ kadācittatpuraḥ sthitaḥ |

nṛpaṃ jinapraṇāmāya prāptaṃ paścād vyalokayat || 23 ||



agre bhagavataścakre praṇayaṃ na sa bhūpateḥ |

jagatpūjyasya purataḥ pūjāmarhati nāparaḥ || 24 ||



jinamāmantrya nṛpatiḥ praṇataḥ svapuraṃ gataḥ |

vivāsanaṃ gṛhapaterādideśa nijāt purāt || 25 ||



prasādinī sudattasya devatā nṛpatiṃ tataḥ |

kṣudrajantubhirutsṛṣṭaiścakre daṃśaviṣākulam || 26 ||



sa trastastairnṛpaḥ prāptaḥ sāmātyāntaḥ purānugaḥ |

gatvā prasādayāmāsa sudattam jinaśāsanāt || 27 ||



iti sa satatapratyāsattyā parāmṛtanirbharaṃ

bhagavaduditaṃ śāntiṃ bheje sudattagṛhādhipaḥ |

svamiva labhate vighnayāsapravāsavivarjitaṃ

vimalamanasāmantevāsī vivekamahānidhim || 28 ||



iti kṣemendravicaritāyāṃ bodhisattvāvadānakalpalatāyāṃ

gṛhapatisudattāvadānaṃ caturstriśaḥ pallavaḥ ||