• Home
• Canon Text
• 30 suvarṇapārśvāvadānam

30 suvarṇapārśvāvadānam

Technical Details

30 suvarṇapārśvāvadānam |



ślāṣyaḥ ko'pi sa sattvasārasaralaḥ saujanyapuṇyasthiti-

rnindya ko'pi sa dharmamārgagamane vighnaḥ kṛtaghnaḥ param |

citraṃ yaccaritaṃ vicārya suciraṃ romāñcacarcācita-

stulyaṃ yāti janaḥ sabāṣpanayanastadvarpane mūkatām ||1 ||



devadattaprasaṅgena bhikṣubhirbhagavān purā |

pṛṣṭaḥ kathāmakathayat pūrvavṛttāntasaṃśrayām ||2 ||



mahendrasenanāmābhūd vārāṇasyāṃ nareśvaraḥ |

yayuḥ kṣitīśvarāḥ sarve yasya lakṣmyā vilakṣatām || 3 ||



candraprabhābhavattasya divyakīrtiriva priyā |

yasyāḥ patyuḥ prabhāveṇa svapnāḥ satyatvamāyayuḥ || 4 ||



babhūva samaye tasmin mṛtayūthapatirvane |

suvarṇapārśva ityāptanāmā hemamayacchaviḥ || 5 ||



nīlaratnodarāspharamuktāhāranibhaprabhā |

abhūddṛṣṭicchaṭā yasya bhūṣaṇaṃ kānanaśriyaḥ || 6 ||



pravālavalliśṛṅgasya citraratnacitatvacaḥ |

tasyāścaryasudhāmbhodhilaharī ruruce ruciḥ || 7 ||



bodhisattvāvatārasya tasya kāntamabhūdvapuḥ |

pūrvaṃ sukṛtacitrasya lakṣaṇaṃ hi surūpatā || 8 ||



dīrghadṛṣṭirbabhūvāsya vayasyo vṛddhavāyasaḥ |

labdhakānveṣaṇatrāse digvilokanatatparaḥ || 9 ||



tau kathābhirmithaḥ prītyā vivikteṣu vijasratuḥ |

prākpuṇyairjāyate vāṇī tiraścāmapi māṇuṣī || 10 ||



sa kadācijjalānveṣī yathūnāthaḥ sahānugaiḥ |

taṭinyā veṇumālinyāḥ pulinaṃ samupāyayau || 11 ||



tasya tārataraṃ śrutvā dīghamākrandaniśvanam |

hariṇā dudruvuḥ sarve grīvāvalanavibhramaiḥ || 12 ||



suvarṇapārśvastu t adā kṛpāpāśavaśīkṛtaḥ |

tatraiva niścalastasthau marmaviddha iveṣuṇā || 13 ||



taduddharaṇasaṃnaddhaṃ dīghadṛṣṭiṃ vilokya tam |

kākaḥ provāca na sakhe yukto'taṃ te samudyamaḥ || 14 ||



puṣpopamā vipatkāle kṛtārthāḥ kuliśopamāḥ |

kṛtamete na manyante svakāyasuhṛdaḥ khalāḥ || 15 ||



ityasau vāryamāṇo'pi kākena karuṇākulaḥ |

avatīryāśu saritaṃ saralastamatārata(?) || 16 ||



vimucya bandhanānyasya sa śṛṅgābhyāmaśaṅkitaḥ |

taṃ pādapatitaṃ dīnamavadadgantumudyatam || 17 ||



na tvayā kathanīyo'hamatrasthaḥ kasyacitsakhe |

prārthayante suvarṇaṃ māṃ carmalubdhā hi lubdhakāḥ || 18 ||



ityuktastena vinayāt tattathetyabhidhāya saḥ |

yayau kuṭilakākhyastaṃ praṇamya prastutastutiḥ || 19 ||



atrāntare narapateḥ patnī candraprabhā niśi |

svapne dadarśāsanasthaṃ mṛgaṃ saddharmavādinam || 20 ||



satysvapnātha sā devī prabuddhā nṛpamabravīt |

suvarṇahariṇaḥ svapne deva dṛṣṭo mayādbhutaḥ ||21 ||



tamahaṃ draṣṭumicchāmi sākṣādupagataṃ mṛgam |

aṅkādiva mṛgāṅkasya nirgataṃ rāhuśaṅkayā || 22 ||



ityuktaḥ praṇayātprīto devyā ca pṛthivīpatiḥ |

mṛgagrahāya vyasṛjat lubdhakān draviṇapradaḥ || 23 ||



tataḥ pratinivṛttāste vanamanviṣya lubdhakāḥ |

niṣphalāgamanakruddhaṃ sakampā jagadurnṛpam || 24||



iyatīṃ jagatī deva vicitā nicitācalaiḥ |

bhrāntā vayamaviśrāntā na labhyastadvidho mṛgaḥ || 25 ||



āścaryacaranākṛṣṭalocanarulocanaḥ |

svapnasaṃpannarūpo'sau hiraṇyahariṇaḥ kutaḥ || 26 ||



mano vinodane tasmin yadi deva prasīdati |

kurvantu kāñcanamṛgaṃ kuśalāḥ ke'pi śilpinaḥ || 27 ||



iti śrutvā sa nṛpatirdadadbahutaraṃ dhanam |

mṛgānveṣaṇasaṃkalpe babhūvābhiniveśavān || 28 ||



tataḥ kuṭilako'bhyetya nṛpaṃ śrutvā bahupradam |

uvāca draviṇādāne lubdhakebhyo'pi lubdhadhīḥ || 29 ||



prasādaḥ kriyatāṃ deva mṛgaṃ saṃdarśayāmyamah |

dṛṣṭaḥ kanakasārāṅga sāraṅgaḥ samayā vane || 30 ||



ityākarṇya kṣitipatiḥ praharṣitphullalocanaḥ |

bhadra saṃdarśaya kkāsau kkāsāvityavadanmuhuḥ || 31 ||



tamevāgresaraṃ kṛtvā mṛgamārgapradarśakam |

sasainyaḥ sa yayau svacchacchatracandrodayācalaḥ || 32 ||



dīrghadṛṣṭirdadarśātha kākastaruśiraḥsthitaḥ |

gajavājivrajodīrṇareṇupravāraṇaṃ vanam || 33 ||



suvarṇapārśvamabhyetya jagāda mṛyayūthapam |

hitamuktaṃ mayā pūrvaṃ na śrutaṃ na kṛtaṃ tvayā || 34 ||



sa eṣa puruṣaḥ prāptaḥ saṃnaddhaiḥ saha dhanvibhiḥ |

mayā nivāritenāpi saṃhāreṇa na tṛpyate || 35 ||



adhunā kka nu gantavyaṃ kiṃ kartavyaṃ bhayodbhave |

hitaṃ kimanuvartavyaṃ tulyaṃ martavyameva vā || 36 ||



kṛtaghnaḥ krūracaritaḥ kṣudro'yaṃ saṃghapātakah |

tvayaivātmavināśāya rakṣito viṣapādapaḥ || 37 ||



svaśarīrapradasyāpi saṃhāreṇa na tṛpyate |

sasattvasāgaragrāsī kṛtaghno vāḍavānalaḥ || 38 ||



upakāraḥ kṛtaghneṣu viśvāsaḥ kuṭulātmasu |

upadeśaśca mūrkheṣu karturdoṣāya kevalam || 39 ||



iti kākena kathite pratyāsanne ca pārthive |

acintayat prāptakālaṃ hitaṃ yūthasya yūthapah || 40 ||



subhaṭānāmiyaṃ senā vigāhedgahanaṃ mahat |

karoti matprasaṅgena muhūrtenaiva nirmṛgam || 41 ||



tasmātsainyapradhānasya gacchāmi svayamantikam |

ekasyaiva vadho me'stu sarve jīvantvamī mṛgāḥ || 42 ||



iti niścitya sa yayau samīpaṃ bhūpatermigaḥ |

paraprāṇaparitrāṇe tṛṇaṃ prāṇāṃ mahātmanām || 43 ||



tamāyāntaṃ drutaṃ dṛṣṭvā hṛṣṭaḥ kuṭulakah puraḥ |

so'yamityāśu pāṇibhyām rājñe dūre vyadarśayat || 44 ||



tatkṣaṇe droṇaśāpena vajreṇeva nipātinā |

karu paricyutau tasya pāpapādapapallavau || 45 ||



tadvṛttaṃ vismitaḥ śrutvā mṛgeṇa kathitaṃ nṛpaḥ |

abhūtkṛtaghnacarite dhikkāramukharānanaḥ || 46 ||



tataḥ kṣitipatiḥ prītyā parayā mṛgam |

tam nināya svanagarīṃ gauraveṇa garīyasā || 47 ||



rājadhānīmathāsādya tasmai ratnāsanaṃ nṛpaḥ |

datvā sāntaḥpurāmātyastasyāgre samupāviśat || 48 ||



sa bodhisattvo hariṇastasyāṃ parṣadi divyadhīḥ |

dharmaṃ dideśa yenābhūjjanaḥ śikṣāpadānvitaḥ || 49 ||



suvarṇapārśvaḥ sāraṅgaḥ so'yamevābhavaṃ purā |

yo'bhavat kuṭilaḥ krūro devadattaḥ sa cādhunā || 50 ||



iti sukṛtacitaṃ bhagavatā bhavabhītibhidā

kathitamudārasattvarucirasya tataścaritam |

praśamamayaṃ niśamya kuśalāya sa bhikṣugaṇaḥ

kimapi babhūva puṇyaparipākavivekaruciraḥ || 51 ||



iti kṣemendraviracitāyāṃ bodhisattvāvadānakalpalatāyāṃ

suvarṇapārśvāvadānaṃ triṃśaḥ pallavaḥ ||