• Home
• Canon Text
• 28 dhanapālāvadānam

28 dhanapālāvadānam

Technical Details

28 dhanapālāvadānam |



daurjanyaduḥsahaviśālakhalāpakārai-

rnaivāśaye vikṛtirasti mahāśayānām |

vyālolvaṇakṣitibhṛdākulito'pi sindhu-

rnaivotsasarja hṛdayādamṛtasvabhāvam || 1 ||



pure purā rājagṛhe bahgavān veṇukānane |

kalandakanivāsākhye vijahāra manohare ||2 ||



tatra vitrāsitānekaśatrinistriṃśabāndhavaḥ |

ajātaśatrunāmābhūd bimbisārasuto nṛpaḥ || 3 ||



śākyavaṃśyaḥ suhṛttasya devadattābhidho'bhavat |

kṣudramantreṇa yasyāsīt sa vetāla ivotkaṭaḥ || 4 ||



sa kadācitsukhāsīnaṃ rahaḥ prāha mahīpatim |

na rājan phalito'dyāpi mamāpi tvatsamāśrayaḥ || 5 ||



nithopacārarahitaḥ sukhaniryantratantrayoḥ |

mitho manorathatrāṇānmitraśabdaḥ pravartate || 6 ||



ya eṣa śākyaśramaṇaḥ sukhe veṇuvane sthitaḥ |

taṃ hatvā prāptumicchāmi tatpadaṃ devavanditam || 7 ||



kṣīyate na yayā śatrurlabhyate na yayā yaśaḥ |

vardhate na yayā mānaḥ kiṃ tayā mitrasaṃpadā || 8 ||



mahādhanābhidhānena tatpaureṇa nimantritaḥ |

sa puraṃ prātarāgantā dāmbhikaḥ saha bhikṣubhiḥ || 9 ||



rājamārgaṃ praviśataḥ sa tasya vyālakuñjaraḥ |

utsṛjyatāmabhimukhaḥ krodhāndho dhanapālakaḥ || 10 ||



ityukte devadattena nṛpatirmitravatsalaḥ |

buddhaprabhāvaṃ saṃcintya nāha kiṃcidavāṅbhukhaḥ || 11 ||



devadatto'pi nirgatya rājasauhārdadurmadaḥ |

prāha hastimahāmātraṃ hāraṃ datvāsya toṣaṇam ||12 ||



śramaṇaḥ prātarāgantā puraṃ bhikṣuśatairvṛtaḥ |

preraṇīyastvayā tasmai gaja ityāha bhūpatiḥ || 13 ||



devadattavacaḥ śrutvā tathetyuce dvipādhipaḥ |

śreṇī hi meṣamūrkhāṇāmekayātānupātinī || 14 ||



jñātvāpi tamabhiprāyaṃ sarvajñaḥ pāpacetasām |

prātaḥ samāyayau sārdhaṃ bhikṣūṇāṃ pañcabhi śataiḥ || 15 ||



atha hastipakotsṛṣṭaḥ kṛṣṭaprāsādapādapaḥ |

tamabhyadhāvadāviddhaḥ krodhāndhaḥ krūrakuñjaraḥ || 16 ||



anāyattaḥ paricayādaṅkuśasya gurorapi |

khalaviddhāniva dveṣī madena malinīkṛtaḥ || 17 ||



sevavyasanasaktānāmasakṛtkarṇacāpalāt |

prāṇāpahārī bhṛṅgāṇāṃ bhṛtyānāmiva duṣpatiḥ || 18 ||



mandaropadrave tasmin drumadrohiṇyabhidrute |

vidrute sahasā loke hāhākāro mahānabhūt || 19 ||



tasyāñcatkarṇatālānilatulitasaratsāndrasindūrapūraiḥ

saṃpūrṇe rājamārge cyutacakitavadhūraktavastrāsamānaiḥ |

uddaṇḍoccaṇḍaśuṇḍabhramaṇaravalasatsādhvasāyāsitāśā

vyālolālakābhabhramaramiladvibhramaḥ saṃbhramo'bhūt || 20 ||



purapramāthavyathite jane kolāhalākule |

āruroha mahāharmyaṃ devadattaḥ pramattadhīḥ || 21 ||



bhagavadgrahaṇaṃ draṣṭuṃ so'bhavadbhṛśamutsukaḥ |

unmūlanena guṇināṃ mātaṅgaḥ parituṣyati || 22||



vidruteṣu gajatrāsāt teṣu sarveṣu bhikṣuṣu |

ānanda eka evābhūd bhikṣurbhagavato'ntike || 23 ||



tatra pañcānanāh pañca niryayurbhagavatkarāt |

karālakesarasaṭāstannakhāṃśucitā iva || 24 ||



dvipastadgandhamāgrāya pardāpasmāravāraṇam |

abhūt srutaśakṛnmūtraḥ sahasaiva parāṅmukhaḥ || 25 ||



javena vidrutastatra dantī darpadaridratām |

prāptaḥ pradīpadahanāḥ sa dadarśa diśo daśa || 26 ||



sa vilokya jālavahnijvalajjvālākulaṃ jagat |

pādapadmāntikaṃ śāstuḥ śītalaṃ samupāyayau || 27 ||



saṃkocābhiruceḥ sacintamanasaḥ pradhvastavaktradyute-

rdainyāpannavihīnadānamadhupaprārabdhakolāhalaḥ |

lobhāndhasya mahāvyayotsava iva kleśoṣmaniśvāsina-

stasyābhūtparitāpaniślathagaterbhārāyamāṇaḥ karaḥ || 28 ||



taṃ pādamūlamāyāntaṃ bhītaṃ kāruṇyasāgaraḥ |

śāstā kareṇa pasparśa cakrasvastikalakṣmaṇā || 29 ||



kumbhavinyastahastastaṃ provāca bhagavān jinaḥ |

putra svakarmaṇainemāṃ prāpto'si tvamimāṃ daśām || 30 ||



vivekālokahaladaḥ kāyo'yaṃ māṃsabhūdharaḥ |

bhāraste mohasaṃbhāraḥ pāpādupanataḥ paraḥ || 31 ||



ityukte karuṇardreṇa bhito bhagavatā gajaḥ |

sa labdhaścāsamālānalīno niścalatām yayau || 32 ||



devadattasya saṃkalpe kuñjare ca mahotkaṭe |

bhagne nirvighnaharṣo'bhūtsamudgatādbhuto janaḥ || 33 ||



tataḥ kṛtvā gṛhapatergṛhe bhojyapratigraham |

bhagavān bhikṣubhiḥ sārdhaṃ kānanaṃ gantumudyayau || 34 ||



abhisṛtya gajendro'pi jinasya caraṇābjayoḥ |

kṛtvā kareṇa saṃsparśaṃ vapustatyāja kauñjaram || 35 ||



cāturmahārājikeṣu deveṣu viśadadyutiḥ |

upapannaḥ sa sahasā sugataṃ draṣṭumāyayau || 36 ||



svamāśramapadaṃ prāptaṃ bhagavantamupetya saḥ |

praṇanāmārkasaṃkāśaṃ pradīptamaṇikuṇḍalaḥ || 37 ||



tasya keyūramukuṭaprabhāpallavapūritāḥ |



śakracāpairiva vyāptā virejurghanarājayaḥ || 38 ||



vinayādupaviśyāgre sa śāstuḥ srastakalmaṣaḥ |

taṃ divyapuṣpairākīrya sattva śubhrairabhāṣataḥ || 39 ||



bhagavan bhavataḥ pādapadmasaṃsparśanena me |

durdaśāduḥkhasaṃtāpaḥ śāntaḥ saṃtoṣaśālinaḥ || 40 ||



śamaślāghyā kāpi vyasanaviṣadoṣoṣmaśamanī

sudhāvṛṣṭirdṛṣṭirbata bhagavataḥ snigdhamadhurā |

yayā spṛṣṭaspṛṣṭaṃ kharataravikāravyatikaraṃ

vimutyāntaḥśāntiṃ śrayati hatamoha paśurapi || 41 ||



iti tasya bruvāṇasya bhagavān bhavaśāntaye |

satyadarśanasaṃśuddhāṃ vidadhe dharmadeśanām || 42 ||



maulimuktāṃśuśubhreṇa śirasā caraṇadvayam |

sa śāstuḥ prayayau natvā hasanniva bhavabhramam || 43 ||



gate tasmin mukhaśaśiprakāśitanabhastale |

bhagavān bhikṣubhiḥ pṛṣṭastadvṛttāntamabhāṣata || 44 ||



pūrvakalpāntare śāstuḥ kāśyapākhyasya śāsane |

abhūtpravrajito'pyeṣa śikṣāpadanirādaraḥ || 45 ||



anādarātkuñjaratābhogaḥ saṃghopasevanāt |

satyadṛṣṭibalenānte saṃprāptaḥ śāsanagrahaḥ || 46 ||



prāgjanmavihitaṃ karma kasyacinna nivartate |

karmopadiṣṭasaṃbandhabhaktibhogaiḥ sacetasaḥ || 47 ||



tasmin vyatikare ghore sarvaistyakro'smi bhikṣibhiḥ |

na tvānandena tatrāpi śrūyatām pūrvasaṃgatiḥ || 48 ||



śaśāṅkaśītasarasi bhrātarau rucirau purā |

pūrṇamukhaḥ śukhaśceti rājahaṃsau babhūvatuḥ || 49 ||



kadācidbrahmadattasya vārāṇasyāṃ mahīpateḥ |

brahamamatīṃ puṣkariṇīṃ ramyāṃ pūrṇamukho yayau || 50 ||



sa tasyāṃ lolakamalakiñjalkaparipiñjaraḥ |

vijahāra sarojinyāṃ haṃsānāṃ pañcabhiḥ śataiḥ || 51 ||



pūrvapuṇyānubhāvena taṃ rūpātiśayojjvalam |

dadarśaṃ kāryāṇyutsṛjya jano niścalalocanah || 52 ||



taṃ śrutvā bhūpatistatra sthitaṃ taddarśanotsukaḥ |

kuśalān grahaṇe tasya vyasṛjajjālajīvinaḥ || 53 ||



tasmin gṛhīte nalīnīlīlāsmitasitatviṣi |

śatāni pañca haṃsānāṃ tyaktvā taṃ prayayurjavāt || 54 ||



ekastu tasya saujanyādabaddho'pi subaddhavat |

tadarthaṃ vyathitastasthau premapāśavaśīkṛtaḥ || 55 ||



tatastaiḥ prāpitaṃ rājā rājahaṃsaṃ vilokya tam |

snehabaddhaṃ dvitīyaṃ ca vismitastāvavalokayat || 56 ||



haṃsaḥ pūrṇamukhaḥ so'hamānandastasya cānugaḥ |

gatāstadadya ca tyaktvā māṃ gaṃsā eva bhikṣavaḥ || 57 ||



pūrvasminnabahvatkāle vārāṇasyāṃ mahīpatiḥ |

tutturnāma manaḥpaṭṭe likhitaṃ yadyaśaḥ paraiḥ || 58 ||



sahasrayodhastasyābhūd dākṣiṇātyo niratyayaḥ |

karadaṇḍīti vikhyātaḥ saṃgrāmāgresaraḥ priyaḥ || 59 ||



kadācid ghorasamare pañcāmātyaśatāni tam |

nṛpaṃ tyaktvā yayurbhītyā karadaṇḍī tu nātyajat || 60 ||



ahameva sa bhūpālaḥ sacivāste ca bhikṣavaḥ |

karadaṇḍī sa evāyamānando na jahāti mām || 61 ||



janmāntare'pi siṃho'haṃ māsaṃ kūpe nipātitaḥ |

upekṣitaḥ kṣaṇādbhṛtyaiḥ śṛgālairye'dya bhikṣavaḥ || 62 ||



ekena ca nakhaiḥ khātaṃ dīrghaṃ kṛtvāsmi mokṣitaḥ |

jambukena sa evāyamānando'dya mamānugaḥ || 63 ||



kūṭapāśanibaddhasya mṛgayūthapateḥ purā |

lubdhakāgamane eva jagmustadanugā mṛgāḥ || 64 ||



anuraktā na tatyāja taṃ mṛgī sāśrulocanā |

prītiśṛṅkhalayā baddhā yātā nispandatāmiva || 65 ||



atha lubdhakamāyāntaṃ dṛṣṭvā mṛgavadhodyatam |

sāvadanmama bāṇena prathamaṃ hara jīvitam || 66 ||



iti spaṣṭagirā tasyāḥ snehena ca sa vismitaḥ |

mumoca lubdhakaḥ prītyā hariṇaṃ hariṇīsakham || 67 ||



mṝgayūthapatiḥ so'hamānandaḥ sā kuraṅgikā |

ityeṣa prītisaṃbandhaḥ prāgvṛttamanuvartate || 68 ||



śrutveti vākyaṃ sugatasya sarve

lajjānilīnā iva bhikṣavaste |

sānandamānandamukhāravindaṃ

prabhābhirāmaṃ dadṛśuḥ spṛhārdrāḥ || 69 ||



iti kṣemendraviracitāyāṃ bodhisattvāvadānakalpalatāyāṃ

dhanapālāvadānaṃ aṣṭaviṃśaḥ pallavaḥ ||