• Home
• Canon Text
• 27 śrīṇākoṭīviṃśāvadānam

27 śrīṇākoṭīviṃśāvadānam

Technical Details

27 śrīṇākoṭīviṃśāvadānam |



sa ko'pi sattvasya vivekabandhoḥ

puṇyopasannasya mahān prabhāvaḥ |

nāpaiti yaḥ kāyaśateṣu puṃsaḥ

kastūrikāmoda ivāṃśukasya || 1 ||



jine sarvajagajjantusaṃtāpakaruṇāhrade |

pure rājagṛhe veṇuvanāntaravihāriṇi ||2 ||



śrīmānabhūdbhūmipatiścampāyāṃ potalābhidhaḥ |

jahāra dhanadarpāndhyaṃ dhanena dhanadasya yaḥ || 3 ||



ajāyata sutastasya manorathaśatānvitaḥ |

dhanānāmīpsitāvāptya sukhasakhyo vibhūtayaḥ || 4 ||



śravaṇarkṣeṇa jātasya sa sūnostasya janmani |

prītyā dadau daridrasya koṭīnāṃ viṃśatiṃ tadā || 5 ||



sa śroṇakoṭiviṃśākhyaḥ śiśuḥ khyātastadābhavat |

vibhavaḥ sukṛtenaiva yena vaṃśo vibhūṣitaḥ || 6 ||



prāptavidyaḥ sa sarvārthaiḥ saha vṛddhimupāgataḥ |

cakāra sukhaviśrāntiṃ vyavahāradharaḥ pituḥ || 7 ||



sa kadācitprabhāpuñjamiav sūyasya maṇḍalāt |

avatīrṇaṃ puraprātaṃ maudgalyāyanamabravīt || 8 ||



ko bhavānarkasaṃkāśaḥ prakāśitadigantaraḥ |

tridaśeśaḥ śaśāṅko vā devo vā draviṇeśvaraḥ || 9 ||



sa taṃ babhāṣe na suraḥ śiṣyo bhagavatastvaham |

buddhasya vibudhādhīśavandyamānaguṇaśriyaḥ || 10 ||



svacchaṃ tasya prayacchantaṃ piṇḍapātaṃ mahāmuneḥ |

sattvaśuddhodayāvāptaṃ bhogyaṃ bhagavataḥ priyam || 11 ||



iti śroṇasya bhagavannāmnā śravaṇagāminā |

ravibhakrasya jātyāpi romāñcaḥ samajāyataḥ || 12 ||



prāgjanmavāsanāyuktaḥ svabhāvo yasya yaḥ sthitaḥ |

sa tasyodīraṇenāpi sphuṭa eva vibhāvyate || 13 ||



sa tasmai viṃśatisthālībhāgaṃ nākajanocitam |

prahiṇodbhaktisaṃsaktaśraddhāyuktena cetasā || 14 ||



tatastaṃ preṣitaṃ tena bhagavān bhaktisaṃsadā |

anugrahāgrahavyagraḥ samagraṃ svayamagrahīt || 15 ||



asminnavasare bhaktyā sthālībhāgaṃ nṛpocitam |

samādāya svayaṃ rājā bimbisāraḥ samāyayau || 16 ||



śroṇaprahītabhogānāmāmodaṃ tatra pārthivaḥ |

āghrāya śakraprahitaṃ sarvaṃ divyamamanyata || 17 ||



pātraśeṣaṃ bhagavatā dattamāsvādya bhūpatiḥ |

śroṇena preṣitaṃ śrutvā tadanu vismayaṃ yayau || 18 ||



bhagavantaṃ praṇamyātha rājadhānīṃ nareśvaraḥ |

praviśyācintayatsphītāṃ divyāṃ śroṇasya saṃpadam || 19 ||



gacchāmi taṃ svayaṃ gatvā draṣṭavyo'sau amhāyaśāḥ |

iti niścitya sacivaiḥ sa yātrārambhamādiśat || 20 ||



potalaḥ kṣitipaṃ jñātvā svayamāgamanodyatam |

nītijñaṃ putramekāṇte śroṇakoṭimabhāṣata || 21 ||



putra tvām draṣṭumāyāti varṇāśramagururnṛpaḥ |

ityeṣa bhṛśamutkarṣaḥ sadoṣaḥ pratibhāti me || 22 ||



kṣitīśā lakṣatāṃ yātaṃpakṣapātodyatā iva |

avilambitamāghnanti śarā iva guṇacyutāḥ || 23 ||



bhṛtyānāmapi vidveṣyo bhavatyatiśayonnatiḥ |

abhimānaikasārāṇāṃ kiṃ punaḥ pṛthivībhūjām || 24 ||



rūpe vayasi saubhāgye prabhāve vibhave śrute |

svasutasyāpi saṃgharṣānnotkarṣaṃ sahate janaḥ || 25 ||



jane dveṣamaye putra guṇamācchādya jīvyate |

ācchāditaguṇaḥ padmaḥ priyastīkṣṇarucerapi || 26 ||



uddhataḥ kasya na dveṣyaḥ praṇataḥ kasya na priyaḥ |

drumaṃ pātayati stabdhaṃ namtraṃ rakṣati mārutaḥ || 27 ||



sa cābhigamyo bhūpālastvāṃ yadi svayameṣyati |

tadeṣaṃ darpamohaste śreyase na bahviṣyati || 28 ||



tasmāditaḥ svayaṃ gatvā praṇamyaṃ praṇama prabhum |

nakṣatrarāśisadṛśaṃ datvā hāramupāyanam || 29 ||



pituḥ śrutveti vacanaṃ śroṇakoṭirhahīpatim |

prayayau nāvamāruhya draṣṭuṃ ratnavibhūṣitaḥ || 30 ||



sa rājadhānīmāsādya prāpya dṛṣṭvā ca bhūpatim |

dadau hāraṃ parṇamyāsmai harṣahāsamiva śriyaḥ || 31 ||



taṃ dṛṣṭvā svayamāyātaṃ nṛpatiḥ snigdhayā dṛśā |

hemaromāṅkacaraṇaṃ vismayādityabhāṣata ||32 ||



aho puṇyamaheśākhyaḥ ko'pi tvaṃ sattvabāmdhavaḥ |

yasya saṃdarśanenaiva manovṛttiḥ prasīdati || 33 ||



guṇebhyaḥ paramaiśvaryamaiśvaryātsukhamuttamam |

sukhebhyaḥ paramārogyamārogyātsādhusaṃgamaḥ || 34 ||



api dṛṣṭastvayā sādho bhagavān veṇukānane |

tatpādapadmayugalaṃ draṣṭumarhasi me mataḥ || 35 ||



ityukte kṣitināthena saujanyātpakṣapātinā |

taṃ śroṇakoṭīviṃśo'pi praṇayātpratyabhāṣata || 36||



asmādatulyakalyāṇātprasādāddevadeva te |

adhunā yogyatāyātā bhagavaddarśane mama || 37 ||



ityukte tena sahitaḥ pratasthau sthitikovidaḥ |

bhaktyā tathāgataṃ draṣṭuṃ padbhyāmeva mahīpatiḥ || 38 ||



aspṛṣṭapādasya bhuvā śruṇasyājanmavāsarāt |

mahārhavastraiḥ prasthāne bhṛtyairācchāditā mahī || 39 ||



bhagavadbhaktivinayādgauravācca sa bhūpateḥ |

vastrāṇyavārayadbhṛtyairavācca iva kṣitau || 40 ||



vāriteṣvatha vastreṣu divyavastrairvṛtā mahī |

aprayatnopakaraṇāḥ saṃpadaḥ puṇyaśālinām || 41 ||



nivārya dinyavastrāṇi bhūmau tenārpite pade |

vicacālācalā pṛthvī saśailavanasāgarā || 42 ||



tataḥ sa bhūmipatinā saha prāpya jināśramam |

bhagavantaṃ vilokyāsya vidadhe pādavandanam || 43 ||



upaviṣṭasya tasyāgre hṛṣṭasyālokanāmṛtaiḥ |

cakre śamavivekasya bhagavānabhiṣecanam || 44 ||



āśayānuśayaṃ dhātuṃ prakṛtiṃ ca vicārya saḥ |

satyasaṃdarśanāyāsya vidaśe dharmadeśanām || 45 ||



satkāyadṛṣṭiśailo'sya tayā viṃśatiśṛṅgavān |

jñānavajreṇa nirbhinnaḥ srotaḥprāptipadaspṛśaḥ || 46 ||



pravrajyāyāṃ tatastasya jātāyāṃ sahasā svayam |

bhagavantaṃ praṇamyātha vismitaḥ prayayau nṛpaḥ || 47 ||



tīvravrate'pi śroṇasya kadācitsamajāyata |

vāsanāśeṣasaṃskārādbandhabhogasukhasmṛtiḥ || 48 ||



sa tamāhūya bhagavān vilakṣaṃ prāha sasmitaḥ |

ko'yaṃ parivitarkaste pratisaṃlīnacetasaḥ || 49 ||



viśliṣṭātyantakṛṣṭā vā tantrī bahvati visvarā |

samā mādhuryamāyāti tasmātsāmyaṃ samāśrayet || 50 ||



ityādeśādbhagavataḥ sarvasāmyamupāgataḥ |

sa prāpa vimalajñānaṃ paścāttāpavivarjitaḥ || 51 ||



tasya tāmadbhutāṃ siddhiṃ vilokya pṛthuvismayāḥ |

papracchurbhikṣavaḥ sarve bhagavantaṃsa cābhyadhāt || 52 ||



śroṇasya śrūyatām śreyaḥkarma janmāntarārhitam |

na hyapuṇyānubhāvānāṃ bhavantyadbhutasaṃpadaḥ || 53 ||



vipaśvī bhagavān samyaksaṃbuddhaḥ sugataḥ purā |

purīṃ bandhumatīṃ nāma janacārikayā yayau ||54 ||



tatra bhaktyā sukṛtibhirbhaktāyopanimantritaḥ |

vāreṇa pratyahaṃ gehaṃ yayau teṣāṃ sahānugaḥ || 55 ||



tato daridraḥsaṃprāptavāro brāhmaṇadārakaḥ |

indrasomābhidhaścakre yatnāt yadyogyabhojanam || 56 ||



sa prayatnena mahatā bhojyaṃ bhaktipavitritam |

āchādya vastrairvasudhāṃ prahvastasmai nyavedayat || 57 ||



tadbhogapraṇidhānena jātaḥ so'yaṃ mahādhanaḥ |

sauvarṇaromacaraṇaḥ śroṇakoṭī suropamaḥ || 58 ||



na vastrarahitā bhūmiḥ spṛṣṭānena kadācana |

kampastaccaraṇasparśādata evābhavadbhuvaḥ || 59 ||



iti sugatavacaḥ sudhāavdātaṃ

daśanamayūkhamivonmiṣatsvabhāvam |

praṇihitahṛdayaḥ paraṃ nipīya

sthirakuśalāya babhūva bhikṣusaṃghaḥ || 60 ||



iti kṣemendraviracitāyām bodhisattvāvadānakalpalatāyāṃ

śroṇakoṭīviṃśāvadānaṃ saptaviṃśaḥ pallavaḥ ||