• Home
• Canon Text
• 26 śākyotpattiḥ

26 śākyotpattiḥ

Technical Details

26 śākyotpattiḥ |



vaṃśaḥ sa ko'pi vipulaḥ kuśalānubandhī

yaścāruvṛttamucitaṃ guṇasaṃgrahasya |

ratnaṃ viśuddharucisūcitasatprakāśaṃ

muktāmayaṃ jagadalaṃkaraṇaṃ prasūte || 1 ||



nyagrodhārāmanirataṃ purā kapulavāstuni |

śākyāḥ svavaṃśaṃ papracchurbhagavantaṃ tathāgatam ||2 ||



taiḥ pṛṣṭaḥ svakulotpattiṃ sa maudgalyāyanaṃ puraḥ |

vaktuṃ nyayuṅkta kṛtvāsya vimalajñānadarśanam || 3 ||



sa vilokya yathātattvamatītaṃ jñānacakṣuṣā |

tānavocata saṃsmṛtya śrūyatāṃ śākyasaṃbhavaḥ || 4 ||



aśeṣe'smin jalamaye jagatyekārṇave purā |

sthite pavanasaṃsparśātpayaḥ paya ivābhavat || 5 ||



jale tasmin ghanatayā yāte kaṭhinatām śanaiḥ |

abhūdvarṇarasasparśaśabdagandhamayī mahī || 6 ||



tasyāmābhāsvarā devāścyutāḥ karmaparikṣayāt |

tattulyavarṇasaṃbhūtāḥ sattvāḥ sattvabalādhikāḥ || 7 ||



aṅgulyā rasamāsvādya tattṛṣṇātīvramohitāḥ |

āhāradoṣātsaṃprāpourgururūkṣavivarṇatām || 8 ||



annaprasavinī teṣāṃ krameṇābhūdvasuṃdharā |

tamobhiśca viluptānām kṣetrāga|| 9 ||



tatasteṣāṃ kṣatatrāṇāt kṣatriyaḥ kṣitipālane |

mahāsaṃmatanāmābhūjjanasya mahato mataḥ || 10 ||



tasyānvaye mahatyāsīnṛpaḥ śrīmānupoṣadhaḥ |

amlānakīrtikusumaḥ pārijāta ivodadhau || 11 ||



cakravartī sutastasya māndhātābhūdayonijaḥ |

jagatyekātapatrasya yasya vaṃśo mahānabhūt || 12 ||



vaṃśe sahasravaṃśasya kṛkistasyābhavannṛpaḥ |

cittaprasādamakarod bhagavān yasya kāśyapaḥ || 13 ||



ikṣvākuranvaye tasya tasya cābhūd virūḍhakaḥ |

prītyā kanīyasaḥ sūnorjyeṣṭhāstena vivāsitāḥ || 14 ||



ekībhūya tataḥ sarve svadeśavigataspṛhāḥ |

kumārāḥ kapilākhyāsya maharṣerāśramaṃ yayuḥ || 15 ||



dhyānakālāṇtarāyāṇāṃ bālyāduccaiḥ pralāpinām |

so'nyatra nirmame teṣāṃ puraṃ kapulavāstviti || 16 ||



kālena putravātsalyādanutāpena bhūpatiḥ |

ānīyantāṃ kumārāste sacivānityabhāṣata || 17 ||



tamūrcurmantriṇaḥ sarve rājan prāptapurottamāḥ |

pratyānetumaśakyāste jātāpatyapṛthuśriyaḥ || 18 ||



iti teṣāṃ pitustatra śakyāśakyavicintane |

babhūvuḥ śākyasaṃjñāste nṝpurasteṣu vaṃśakṛt || 19 ||



tadvaṃśeṣu pañcapañcasahasreṣu mahībhujām |

atīteṣu kṣitipatiḥ śrīmān daśaratho'bahvat || 20 ||



tasyānvaye siṃhahanurbabhūva pṛthivīpatiḥ |

na raṇe siṃhamiva yaṃ sehire rājakuñjarāḥ || 21 ||



jyeṣṭhaḥ śuddhodanastasya sutaḥ śuklodanaḥ paraḥ |

droṇodanastadanujaḥ kanīyānamṛtodanaḥ || 22 ||



kanyāścatasraḥ śuddhākhyā śuklā droṇāmṛtā tathā |

śuddhodanasya bhagavān sūnurnandastathāparaḥ || 23 ||



śuklodanasya tanayau dvau tiṣyākhyo'tha bhadrikaḥ |

droṇodanasya dvau putrāvaniruddho mahāṃstathā || 24 ||



ānandadevadattākhyāvamṛtodanasaṃbahvau |

śuddhāsutaḥ supraśuddhaḥ śuklāsūnuśva mālikaḥ || 25 ||



droṇāputraśca bhadrāṇirvaiśālyakhyo'mṛtāsutaḥ |

rāhulo bhagavatsūnuryasmin vaṃśaḥ pratiṣṭhitaḥ || 26 ||



ityujjvalajñānamayena tena

vaṃśaṃ yathāvatkathitaṃ niśamya |

śākyā babhūvarbhagavatprabhāvaiḥ

saṃbhāvitotkarṣaviśeṣaśuddhāḥ || 27 ||



iti kṣemendraviracitāyāṃ bodhisattvāvadānakalpalatāyāṃ

śākyotpattīrnāma ṣaḍviṃśaḥ pallavaḥ ||