• Home
• Canon Text
• 25 māravidrāvaṇāvadānam

25 māravidrāvaṇāvadānam

Technical Details

25 māravidrāvaṇāvadānam |



jayanti te janmabhayapramuktā

bhavaprabhāvābhibhavābhiyuktāḥ |

yaiḥ sundarīlocanacakravartī

māraḥ kṛtaḥ śāsanadeśavartī || 1||



tatastapovane cāsmin bodhisattve tapojuṣi |

tadupasthāpakāḥ pañca vārāṇasyāṃ pravavrajuḥ || 2 ||



spṛhaṇīyo munīndrāṇāmatha śākyamuniḥ śanaiḥ |

svayaṃ senāyanīgrāmaṃ janacārikayā yayau || 3 ||



tatra senābhidhānasya kanye gṛhapateḥ sute |

nandā nandabalākhyā ca cāruvṛtte babhūvatuḥ || 4 ||



śuddhodanasya bhūbhartuste śrutvā viśrutaṃ sutam |

cakrāte tadvivāhārthaṃ vrataṃ dvādaśavārṣikam || 5 ||



āmodinīnāṃ hṛdaye sadā sūtravadāsthitaḥ |

mālānāmiva bālānāmabhilāṣaḥ svabhāvajaḥ || 6 ||



dhenūnāṃ pītadugdhānāṃ dugdhaṃ tābhyāṃ punaḥ punaḥ |

gṛhīṭvā sphaṭikasthālyā vratānte pāyasaṃ śubham || 7 ||



vidhivatpāyase siddhe viprarūpaḥ sureśvaraḥ |

taṃ samabhyāyayau deśaṃ devaśca kamalāsanaḥ || 8 ||



harṣādatithibhāge'tha kanyakābhyām samuddhṛte |

śakro'vadatsarvaguṇodayāyāgre pradīyatām|| 9 ||



matto'yamadhikastāvadbrahmaṇaḥ prathamo'pi ca |

ityukte surarājena provāca caturānanaḥ || 10 ||



matto'dhiko deva āste śuddhāvāsanikāyikaḥ |

ityukte brahmaṇā te'pi jagadurgaganasthitāḥ || 11 ||



sarvaprativiśiṣṭo'sau bodhisattvastapaḥkṛśaḥ |

nadyāṃ nirājanākhyāyāṃ vigāhya salile sthitaḥ || 12 ||



etadākarṇya kanyābhyāmāhūya maṇibhājane |

avatīryārpitaṃ bhaktyā tadasmai madhupāyasam || 13 ||



bodhisattvastadādāya ratnapātrīṃ dadau tayoḥ |

datteyaṃ na punargrāhyetyuktvā jagṛhaturna te || 14 ||



sā tena nadyāṃ nikṣiptā nāgairnītā prabhāvatī |

vikṣobhyāpyāhṛtā tebhyastārkṣyarūpeṇa vajriṇā || 15 ||



prasādī bodhisattvo'tha kanyāyugalamabhyadhāt |

dānasya praṇidhānena bhavatyoḥ kiṃ samīhitam || 16 ||



te tamūcaturānandanidhiḥ śuddhodanātmajaḥ |

sarvārthasiddho'bhimataḥ kumāraḥ patirāvayoḥ || 17 ||



udyamaṃ māralīlāyāḥ sarasaṃ tadvacastayoḥ |

na lilimpa manastasya pādmaṃ dalamivodake || 18 ||



sa jagāda kumāro'sau na kiṃ pravrajitaḥ śrutaḥ |

na tasya lolanayanāḥ priyāh śriya iva striyaḥ || 19 ||



ityanīpsitamākarṇya dīrghaṃ niśvasya kanyake |

ūcaturdānadharmo'yaṃ siddhau tasyaiva jāyatām || 20 ||



adṛṣṭasnehasaṃśliṣṭaḥ praviṣṭo'ntaḥ parāṅbhukhaḥ |

na nāma sucirābhyastaḥ pakṣapāto nivartate || 21 ||



iti tadvacanaṃ śrutvā bodhisattvaḥ prasannadhīḥ |

prayātaste samāmantrya viśrāntyai kānanāntaram ||22 ||



polabdhadivyabalodayaḥ |

pracchāyatarusucchāyamāruroha mahīdharam || 23 ||



paryaṅkabandhamādhāya tatra tasmin sukhaṃ sthite |

ahaṃkāra ivātyuccaśirāh so'drirvyagīryata || 24 ||



viśīrṇabhūdhare tasmin sa pradadhyau viṣaṇṇadhīḥ |

sapakṣālāni karmāṇi mayā kāni kṛtānyaho || 25 ||



iti cintāśatocchvāsaṃ tamūcurvyomadevatāḥ |

na tvayā vihitaṃ sādho karma kiṃcidasāṃpratam || 26 ||



acchinnottaptakuśalaṃ dhartuṃ na kṣamate kṣitiḥ |

sa tvamuttaptakuśalaḥ proccaśailaśatāgdguruḥ || 27 ||



nirañjanīṃ samuttīrya saritaṃ vraja niścalam |

siddhidaṃ bodhisattvānām deśaṃ vajrāasnābhidham || 28 ||



devatādiṣṭamārgeṇa prasthitasyāsya bhūtale |

pādanyāsairabhūttasya hemapadmaparaṃparā || 29 ||



pṛthivī vrajatastasya prollasatsalilākulā |

raṇantī kāṃsyapātrīva pronnanāma nanāma ca || 30 ||



tāni tāni nimittāni pravṛttāni dadarśa saḥ |

yeṣāmanuttarajñānanidhānasādhanaṃ phalam || 31 ||



nirañjanāya bhuvane nāgo'ndhaḥ kālikābhidhaḥ |

buddhotpāditadṛrabhūmeḥ śabdamākarṇya niryayau || 32 ||



sarvalakṣaṇasaṃpannaṃ dīptajāmbūnadadyutim |

sa bodhisattvamālokya provāca racitāznjaliḥ || 33 ||



nalinanayana kāntastvaṃ vane yauvane'smin

viharasi virahārtiṃ saṃpadāmarpayitvā |

aśamaśamaviśeṣonmeṣasaṃtoṣahetu-

rbhavasi bhavasamudre dehināṃ satyasetuḥ || 34 ||



athāmuñcantyete bhayataralatāmatra hariṇāḥ

yathā līlācakraṃ viharati samīpe khagagaṇaḥ |

sasattvāsattvānā kimapi hṛdayāśvāsasadanaṃ

tathā manye bauddhaṃ vapuridamanāyāsasukhadam || 35 ||



karikalabhakah padmaprītyā karoti hare karaṃ

sukhayati śikhī snigdhālāpaṃ kalāpaśikhānilai |

bhavati hariṇī lolāpāṅgā puraḥ praṇayonmukhī

praśamasamayasyeyaṃ puṇyaprasādamayī sthitiḥ || 36 ||



adyiva buddhatvamavāpya śuddhaṃ

kumudvatī pūrṇa ivāmṛtāṃśuḥ || 37 ||



anyonyaṃ dinanāthadīptamahasaḥ sadyastavālokanā-

llokānāṃ kanalaprabodhakalayā divyaprakāśaspṛśām |

niryātī hṝdayānnibaddhamadhupaśreṇiva saṃbandhana-

trastāntarna punaḥ kariṣyati padaṃ mohāndakārāvaliḥ || 38 ||



iti bruvāṇāṃ vinayānnāgarājaḥ prasannadhīḥ |

bodhisattvaṃ samābhāsya samuttīrya nadīṃ yayau || 39 ||



vajrāsanapadaṃ prāpya bodhimūlamanākulam |

dakṣiṇāgraiḥ kuśaiścakre śaktadattaiḥ sa saṃstaram || 40 ||



tatropaviśya paryaṅkabaddho niścalaniścayaḥ |

manthāvasānaviśrāntaḥ sa dugdhābdhirivābabhau ||41||



asādhāraḥ kṣamādhāraḥ sa dhīrasaralākṛtiḥ |

ruruce kāñcanaruciḥ paro merurivācalaḥ || 42 ||



asāvakṣayaparyantaḥ paryaṅko'yaṃ mama sthiraḥ |

babandheti sa saṃkalpaṃ kṛtvā pratimukhīṃ smṛtim || 43 ||



atrāṇtare samabhyetya māraḥ saṃyamamatsaraḥ |

lekhahārastatra tūrṇaṃ bodhisattvamabhāṣataḥ || 44 ||



akāmakāmatā keyaṃ loke bandhanadā matā |

akālakalikākārā matiste kāsya kāmanā || 45 ||



gṛhītaṃ hataśaṅkena devadattena te puram |

niruddhantaḥpuraśreṇīrbaddhaḥ śuddhodano nṛpaḥ || 46 ||



iti śrutvaiva vacanaṃ śokāmarṣaviṣojjhitaḥ |

aśikṣitavikāreṇa cetasā sa vyacintayat || 47 ||



aho batāntarāyaṃ me māraḥ kartuṃ samudyataḥ |

nartayatyeṣa durvṛttaḥ śisvaṇḍikrīḍayājagat || 48 ||



māra māra virāmaste daurjanyasya na jāyate |

ekena hiṃsāyajñena prāpteyaṃ kamratā tvayā || 49 ||



yajñadāṇatapaḥślāghāṃ nātmanaḥ kartumutsahe |

svaguṇodīraṇamlānaṃ puṇyapuṣpaṃ hi śīryati || 50 ||



iti nirbhatsitastena cittastenaḥ śarīriṇām |

sāmarṣaḥ prayayau māraḥ samārambhād hatodyamaḥ || 51 ||



athādṛśyanta lalitā lālityāzncitalocanāḥ |

bhramadbhṛṅgaraṅgiṇyaḥ kāntāścūtalatā iva || 52 ||



cārutaccaritātṛptāstisrastāḥ kāmakanyakāḥ |

sarāgaṃ pādanalinīnyāsaiścakrustapovanam || 53 ||



vilocanena hariṇī kariṇī gativibhramaiḥ |

tatra tābhirmukhāmbhojairnalinī malinīkṛtā || 54 ||



yauvanābharaṇairaṅgauranurāgāvilepanaiḥ |

lāvaṇyavasanaistāsāṃ kāmo'bhūdapyacetasām || 55 ||



vajrāsanasamādhānadhyānaniścalalocanam |

taṃ vilokyābhavat tāsāṃ vismayadhyānadhāraṇā || 56 ||



tā bodhisattvasaṃkalpān madarāgamayaṃ vayaḥ |

parityajyaiva sahasā salajjā bhejire jarām || 57 ||



pratīpagamanāttāsāmatha bhagnamanorathaḥ |

manmathaḥ prathitārambhaḥ sainyasaṃbḥāramādade || 58 ||



sarvapraharaṇairvyāptaṃ nānāprāṇimukhairbhayaiḥ |

ṣaṭtriṃśatkoṭīvipulaṃ balaṃ tasya samudyayau || 59 ||



svayamākarṇaniṣkṛṣṭakopakrūraśarāsanaḥ |

māraḥ sphāravikāreṇa bodhisattvaṃ samādravat || 60 ||



śastravṛṣṭistadutsṛṣṭā saha pāṃśuviṣāśmabhiḥ

prayayau bodhisattvasya mandārāmbujatulyatām || 61 ||



punarmārabalotsṛṣṭā śastravṛṣṭirghṛtakṣame |

cakrire devatāstasya vajrapratisamāśrayam || 62 ||



smaro'pi naṣṭasaṃkalpaḥ samādheḥ śrotrakaṇṭakam |

ghaṇṭāpaṭuraṭatpatraṃ nirmame sphaṭīkadrumam || 63 ||



taṃ tāramukharaṃ vṛkṣaṃ māraṃ ca sabalāyudham |

cakravāṭe samutkṣipya cikṣipurvyomadevatāḥ || 64 ||



bhagavānatha saṃprāptaprasannajñānanirmalaḥ |

sarvavitsarvagaḥ saravjātismṛtiparo'bhavat || 65 ||



sa tatrānuttarajñānasamyaksaṃbodhimāpitaḥ |

dadarśa sarvabhutāṇi gatiṃ karmorminirmitām || 66 ||



atha śākyapure māraḥ pravādamasṛjaddivaḥ |

bodhisattvaḥ prayāto'staṃ tapaḥkleśavaśāditi || 67 ||



tatra śuddhodano rājā putrasnehaviṣāturaḥ |

nipapāta tamākarṇya vajrāhata iva kṣitau || 68 ||



antaḥpure sahanṛpe prāṇatyāgakṛtakṣaṇe |

suvṛttapakṣapātinyastamūcurvyomadevatāḥ || 69 ||



putrastavāmṛtaṃ pītvā samyaksaṃbuddhatām gataḥ |

tenāvalokitasyāpi nāste bhṛtyubhayaṃ kutaḥ || 70 ||



iti sāntaḥpurāmātyaḥ śrutvā narapatirvacaḥ |

abhūtpratyāgataprāṇaḥ sudhāsikta iva kṣaṇāt || 71 ||



tasmin mahotsavānande bodhisattvavadhūḥ sutam |

kāntaṃ yaśodhaāsūta rāhugraste niśākare || 72 ||



rāhulākhyaḥ sa bālo'pi nṛpaterjanmaśaṅkinaḥ |

jananyā saśilaḥ śuddhyai nikṣipto'mbhasi pupluve || 73 ||



bhagavānapi saptāhaṃ sthito niścalavigrahaḥ |

vajraparyaṅkabandhena devānām vismayaṃ vyadhāt || 74 ||



sa brahmakāyikākhyābhyām devatābhyāṃ virodhitaḥ |

avadatparamānandasudhāsaṃdohasundaraḥ || 75 ||



aho tava mayā jñātā pūrvameṣā sukhasthitiḥ |

yayā surāsuraiśvaryasukhaṃ duḥkhagaṇāyate || 76 ||



lāvaṇyāmbhaḥplāvitāṅgāstaruṇyaḥ

pīyūṣārdraḥ svargasaṃbhogavargaḥ |

asyāśeṣatyāgahelāsukhasya

spardhābandhe pāṃśuniḥsāra eva || 77 ||



saṃtapto'haṃ viṣayaviṣamakleśasaṃsārapānthaḥ

klāntaḥ śāntyāśritimupagataścandanacchāyayeva |

saṃjāteyaṃ sakalakaraṇavyāpinī nirvṛtime

viśrāntānām śamahimavane kiṃ sukhasyopamānam || 78 ||



asminnavasare puṇyaparipākeṇa tadvanam |

vaṇijau pṛthusārthena prāptau trapusabhallikau || 79 ||



devatāpretitau bhaktyā bhagavantamupetya tau |

praṇatau piṇḍapāto'yaṃ gṛhyatāmityabhāṣatām || 80 ||



dayāvidheyaḥ sarvaġyastadākarṇya vyacintayat |

pūrvaiḥ pātre gṛhīto'yaṃ na pāṇī pātravarjite || 81 ||



iti cintayatastasya mahārājābhidhāḥ surāḥ |

datvā sphaṭikapātrāṇi catvāri tridivaṃ yayuḥ || 82 ||



kṛtvātha bhagavān pātre piṇḍapātapratigraham |

anugrahaṃ tayoścakre śaraṇyatrayaśāsanāt || 83 ||



vitatasukṛtasākṣī puṇyanikṣepadakṣaḥ

kṣayitavipadaśeṣaḥ prārthanākalpavṛkṣaḥ |

bhavati kuśalamūlaiḥ kasyacidbhāgyabhājaḥ

śubhapariṇatidīkṣādakṣiṇaḥ sādhusaṅgaḥ || 84 ||



iti kṣemendraviracitāyām bodhisattvāvadānakalpalatāyāṃ

māracidrāvaṇāvadānam nāma pañcaviṃśaḥ pallavaḥ ||