• Home
• Canon Text
• 22 pitāputrasamādānam

22 pitāputrasamādānam

Technical Details

22 pitāputrasamādānam |



aho mahārhaṃ guṇagauraveṇa |

vinā guṇaṃ yadvapuṣām gurutvaṃ

sthūlopalānāmiva niṣphalaṃ tat || 1||



śrīmān purā śākyapure narendraḥ

śuddhodanaḥ śuddhisudhānidhānam |

vairāgyayogātsugatatvamāptaṃ

smṛtvā sutaṃ sutsukatāmavāpaṃ || 2 ||



so'cintayatpuṇyaguṇādhivāsaṃ

sarasvatīvāsasaroruhaśri |

manaḥ prasādasya vilāsasaudhaṃ

drakṣāmi sūnorvadanaṃ kadāham || 3||



ehīti taddarśanalālasena

ye ye mayā jetavanaṃ visṛṣṭāḥ |

te te tadālokananirnimeṣaṃ

tatraiva tiṣṭhantyamṛtaṃ pibantaḥ || 4 ||



saṃpreṣitastasya mayā sa nāyayau

yo'pyātmatulyaṃ praṇayādudāyī |

sa lekhahastastridivābhirāme

tatraiva lekhatvamirābhiyātaḥ || 5 ||



saṃdeśavākyaṃ prahitaṃ mayā yat

tadvismṛtaṃ tasya mukhena nūnam |

sarvo hi nāma svahitābhilāṣī

dhatte parārthe kila śītalatvam || 6 ||



vilokanenaitya niṣiñca tūrṇaṃ

pīyūṣapūreṇa mamāṅgasaṅgam |

niḥsaṅgato viśramatāṃ muhūrtaṃ

dayāvidheyaḥ kuru bandhukāryam || 7 ||



ityetadākarṇya kathām sa kuryāt

kṣaṇaṃ vilambaṃ mama darśane'pi |

taccetasaḥ pallavapeśalasya

na hi svabhāvaḥ praṇayāvabhaṅgaḥ || 8 ||



manoratheneti puraḥ prayāte

taddarśanāyeva dharādhināthe |

pravrajyā vyañjitatatprasādaḥ

samāyayau harṣarasādudāyī || 9 ||



dṛṣṭvā tamānandavipūrṇamānasaṃ

pravrajyayā tatsadṛśānubhāvam |

utkaṇṭhitaḥ kuṇṭhitadhairyavṛttiḥ

saṃmohamūrcchāṃ nṛpatiḥ prapede || 10 ||



sa labdhasaṃjñaḥ śiśiraiḥ payobhiḥ

papraccha taṃ kiṃ nu sameṣyatīti |

so'pyabravīddeva dinairbhavanta-

masaṃbhṛtaiḥ sādarameṣyatīti || 11||



tataḥ prayāteṣu dineṣu keṣu

vyomnā śanairbhikṣugaṇānuyātaḥ |

sahāyayau nākasadām nikāyaiḥ

sarvārthasiddhairbhagavān kumāraḥ || 12 ||



dyusundarīpāṇisarojamukta-

mandāramālākalitaścakāśe |

svargīyagaṅgāsphuṭaphenakūṭa-

vilāsahāsāṅga ivāmarādriḥ || 13||



saṃghaṭṭabhinnābhrasakhaiḥ skhalidbhiḥ

saśabdajāmbūnadakiṅkiṇīkaiḥ |

babhurvimānaiḥ kakubhāṃ mukhāni

bhaktyeva śāsturvihitastavāni ||14||



nirantarairantarivārkatāraiḥ

suraiḥ savidyādharasiddhasaṃghaiḥ |

paryāptasaṃsaktasitātapatrai-

rvyāptaḥ samāptiṃ gaganaṃ jagāma || 15 ||



taṃ sarvalokopakṛtiprapannam

sarvākṛtiṃ sarvamayāvabhāsam |

samāpatantaṃ nabhaso'tha digbhyaḥ

kṣiteśca sarve dadṛśuḥ kṣaṇena || 16 ||



praharṣarāśiṃ janalocanānām

puṇyapramāṇaṃ sukṛtotsavānām |

lokastamālokanidhiṃ vilokya

samullalannucchalitādbhutormiḥ || 17 ||



āścaryabhūtaṃ ruciraprabhāva-

mudāyinā sūcitamākalayya |

jagadguruṃ bhūmipatiḥ kumāraṃ

kṛtāñjalistaṃ praṇanāma dūrāt || 18 ||



athāvatīryāryajanānuyātaḥ

saṃpūjyamānaḥ praṇayena rājñā |

sphīṭaprabhābhāsitadigvibhāgāṃ

nyagrodhinīṃ ratnabhuvam viveśa || 19 ||



hemāsanaṃ śāsanasaṃniviṣṭaṃ-

lokatrayaḥ saṃgatapādapīṭham |

sa tatra ratnāṅkuracitrapatraṃ

bhāsvadvapurmerun|| 20 ||



tanmānasendornayanāmṝtaughaṃ

manorathaprārthanayopayātam |

vilokayannirvṛtinirnimeṣaḥ

kṣaṇaṃ kṣitīśastridaśatvamāpa || 21 ||



sa taṃ jagādāśruniruddhakaṇṭhaḥ

sotkarṣaharṣākulitaṃ kumāram |

hārāgraratnapratibimbasaktaṃ

praveśayan prītirasādivāntaḥ || 22 ||



saṃtoṣaśītācalavat svabhāvāt

sarve ramante kuśalasthalīṣu |

kṛtastvayāsmākamayaṃ tu kasmāt

satsūpakārī virahopadeśaḥ || 23 ||



snehātpramodādguṇagauravācca

dhīrdhāvatīyaṃ tvayi me prasahya |

āliṅganāya sthirasaṃgamāya

pādapraṇāmāya ca tulyameva || 24||



yadvastu kiṃcidgaditaṃ mayā tat

śrotavyameva praṇayoparodhāt |

guṇojjhitaṃ vā virasakramaṃ vā

na snehamohasya bhavatyavācyam || 25 ||



pratyarṇaratnapratibimbitārka-

prauḍhaprabhāprāvaraṇānyamūni |

tvaṃ hemaharmyāṇi vihāya kasmāt

vigāhase śūnyavanāntarāṇi || 26 ||



kāntākarāvarjitahemakumbha-

satsaurabhāmbhaḥpravarābhiṣiktaḥ |

ekaḥ kathaṃ snāsi vikāsipāṃśu-

saṃtaptatoyāsu marusthalīṣu || 27 ||



gaṇḍasthalāt kuṇḍalaratnakānti

kiṃ lambitaṃ maṇḍanameva vetsi |

kasmādakasmāttava niḥsukhasya

na candanaṃ nandanaminduśubhram || 28 ||



mahāvitāne śayane nṛpārhe

śeṣe na kiṃ śeṣaviśeṣaśubhre |

lakṣmīnavāliṅganabhogayogyā

kathaṃ tanuste sahate kuśayyām || 29 ||



kāntāsmitormipratimāṃśukārhaṃ

kiṃ cīvarasyocitametadaṅgam |

pāṇau ca līlākamalāspade'smin

pātraṃ kathaṃ te priyamadya jātam || 30 ||



ayaṃ vihārastava kaṇṭhapīṭhaḥ

sotkaṇṭhakāntābhujabandhanārhaḥ |

saṃbhogalakṣmīkṣapitapramodaḥ

karotyakasmāt praṇayāvabhaṅgam || 31||



rūpaṃ vilakṣīkṛtapuṣpacāpaṃ

mattebhakumbhoccakucā vibhūtiḥ |

ratervilāsppavanaṃ vayaśca

kenāsamaste kalito virāgaḥ || 32 ||



śratveti taṃ śīlanidhirbadhāṣe

śaśāṅkalekhālalitasmitena |

saṃkrāntanānānṛparatnarāgāṃ

kurvannalakṣāmiva rājalakṣmīm || 33 ||



rājan jarārogahateva na syā-

ttaraṅgalolā yadi jīvavṛttiḥ |

tatkasya na syādaniśaṃ praharṣa-

pīyūṣavarṣī viṣayābhilāṣaḥ || 34||



śamāmṛtāsvādanasusthirāṇā-

mapātanaṃ śūnyavanāntabhūmeḥ |

vibhūtilīlāmadavihvalānāṃ

harmyāṇi paryantanipātanāni || 35||



sakuṅkumaiḥ snāntiḥ nṛpāḥ payobhiḥ

sarāgatāṃ yaiḥ satataṃ prayānti |

saṃtoṣaśīlastu manaḥ prasāda-

śuddhāmbudhautā vimalībhavanti || 36 ||



śrotraṃ śrutenaivana kuṇḍalena

dānena pāṇirna tu kaṅkaṇena |

vibhāti kāyaḥ karuṇākulānāṃ

paropakāreṇa na candanena || 37 ||



etāni mohāhatavallabhāni

saṃsaktamuktāṃśusitasmitāni |

satāṃ na bhogyāni bhavanti bhūbhṛ-

ducchiṣṭaśiṣṭāni vibhūṣaṇāni || 38 ||



rāgāturāṇāṃ ritupāpitānāṃ

nidrā dhanadhyānavatāṃ na nāma |

śayyāsu susparśavatīṣu rājñā

sarvatra śāntaḥ sukhameva śete || 39 ||



nirmokakāntena varāmśukena

bhujaṅgavṛttirna tu cīvareṇa |

pātraṃ pavitrāṇi samāplitāni

pīyūṣamaitrāṇyaśanāni sūte || 40 ||



chatrāṇi vakrkraṃ bhṛśamaprakāśaṃ

manivilolaṃ vyajanānilaughāḥ |

saṃsaktajāṅyaṃ hṛdayaṃ nṛpāṇāṃ

kurvanti hārā haricandanārdrāḥ || 41 ||



viyogarogānugatā vibhūtiḥ

kāntāh kṣaṇāntā viraso vilāsaḥ |

yasminnapāyaḥ satatānuśāyī

sa kasya bhogaḥ subhagopayogaḥ || 42||



jāḍyaṃ sajṛmbhaṃ janayatyajasraṃ

tanoti tṛṣṇābhramamohamūrcchāḥ

karotyasahyaṃ sarasatvameva

bhogopabhogaḥ prasabhaprayogaḥ || 43 ||



yadā sukhaśrīrnavacandralekhā

prabhātapuṣpāṇyapi yaivanāṇi |

karmormimālāgrahaṇaṃ śarītaṃ

tadā mamāyaṃ gamito'nurāgaḥ || 44 ||



sacāmarāh sadhvajapuñjapaṭṭāḥ

savājivālā dvipakarṇatālāḥ |

svabhāvalolāḥ kila rājalakṣmyaḥ

sarve vilāsāh kṣaṇabhaṅgasaṅgāḥ || 45 ||



uktveti tattatkuśalāya rāġya-

ścittaprasādaṃ paramaṃ vidhāya |

sa śāntikallolasudhāpravāhaṃ

kiran dṛśā pārṣadamāluloke || 46 ||



manīṣiṇāṃ śākyakulodgatānāṃ

saptāyutāni pratipādya dharmam |

cakre sahasrāṇi ca sapta tatra

saṃprāptaparyāptaviśeṣabhāñji || 47 ||



śaklodanādyaiḥ kuśalopapannaiḥ

gaṇe'tha tattulyasahasrasaṃkhyaiḥ |

droṇodanādyairamṛtpdanādyai -

ścittaprasādaḥ sumahānavāptaḥ || 48 ||



kecidyayuḥ śrāvakabodhiyuktaḥ-

pratyekabodhau niratāśca kecit |

samyak tathānuttarabodhisaktāḥ

pare babhūvurgaganaprasannāḥ || 49 ||



srotaḥ pariprāptaphalaṃ tato'nye

sakṛttathāgāmiphalaṃ tathānye |

anye'pyanāgāṃiphalaṃ tadāpu-

rarhatphalaṃ kleśavimuktimanye || 50 ||



ekastu tatrārjitapāpaśāpa-

stamaḥsamūhopahitapramohaḥ |

māyeyamityāha hasan janānām

satyasthitiṃ saṃsadi devadattaḥ || 51 ||



nṛpaṃ tu vātsalyanilīnameva

putrodayātpratyupajātadarpam |

maudgalyabhikṣurjinaśāsanena

maharddhibhirvītamadaṃ cakāram ||52 ||



dṛṣṭvāpi rājā bhagavatprabhāvaṃ

nātyadbhutam pauruṣameva mene |

abhyāsalīnāni janasya nūnaṃ

sotkarṣakṛtyāni na vismayāya || 53 ||



athāparedyurbhagavān surendra-

saṃpādite hemamahāvimāne |

sumeruśīrrṣṇīva samānakāntau

siṃhāsane ratnamaye nyaṣīdat || 54 ||



brahmendramukhyeṣu tataḥ sureṣu

tatropaviṣṭeṣu pṛthuprabheṣu |

babhustaduṣṇīṣaśikhāvilāsai -

ścandrāṃśumālājaṭīlā ivāśāḥ || 55 ||



anyonyasaṃghaṭṭavilolahārai-

rdhanāvahāraistridaśairviśadbhiḥ |

nirantarām tām bhavametya rājā

dvāreṣu mārgānna caturṣu lebhe || 56 ||



sabhrūbhramaistatra kuveramukhyai-

rnivāryamāṇābhimatapraveśah |

vicchāyavakraḥ skhalitābhidhāyī

bhūbhṛtparaṃ niṣpratibho babhūva || 57 ||



praveśitastairjinaśāsanena

kadācidāsādya tadagrabhūmim |

śuddhodanast apraṇipatya mūrdhnā

cittaprasādena puro'sya tasthau || 58 ||



śāstā tu tasmai caturāryasatya-

prabodhikāṃ dharmakathām dideśa |

jñānena yā viṃśatiśṛṅgamasya

satkāyadṛgbhūdharamapyabḥāṅkṣīt || 59 ||



tataḥ sa gatvā kṛtakṛtyajanmā

śuklodanaṃ prāpta bhajasva rājyam |

svasyāvratīttaṃ bhagavatpradiṣṭaṃ

tacchāsanaṃ modayituṃ na rājyam || 60 ||



droṇodane rājyaparāṅbhukhe'pi

vairāgyayogādamṛtodane ca |

jagrāha śuddhodanasaṃpradiṣṭāṃ

tāṃ rājalakṣmīmatha bhadrakākhyaḥ || 61 ||



rājārhabhogairatha pūjayitvā

jinaḥ janeśaḥ śucisaṃpraṇitaiḥ |

nyagrodhadhāma pratipādya cāsmai

śuddhodanaṃ śuddhamanoratho'bhūt || 62 ||



droṇodanasyāpi sutau yuvānau

rājājñayā preraṇayā ca mātuḥ |

ekastu yaḥ pravrajito'niruddhaḥ

paro mahānnāma gṛhī babhūva || 63 ||



athābhavaccetasi bhadraksya

rāġyo viraktasya vanābhilāṣaḥ |

vivekabhājāṃ praśamapravṛttaṃ

navāpi lakṣmīrna mano ruṇaddhi || 64 ||



tataḥ samāhūya sa devadattaṃ

rājyābhiṣekapratipannacittam |

uvāca me pravrajanasya kālaḥ

samāgataḥ kiṃ bhavatābhidheyam || 65 ||



taṃ pratyuvācāttavivekadambhaḥ

susaṃvṛtaṃ saṃsadi devadattaḥ |

rājanna rājye'sti mamābhilāṣaḥ

pravrajyayā tvatsadṛśo bhavāmi || 66 ||



śrutveti rājā kuṭilasya tasya

mithyāvinītasya kadarthavākyam |

udīritaṃ śākyagaṇastavāyaṃ

saṃkalpasākṣīti hasannuvāca || 67 ||



athārthatāpopahataḥ pradadhyau

bhogānurāgāditi devadattaḥ |

mayā kimetadavipātamuktaṃ

bhajeta vā pravrajito'pi rājyam || 68 ||



rājyaṃ samutsṛjya nijaṃ vrajantaḥ

śākyaṃ kumārāḥ saha bhadrakādyāḥ |

śuddhodanaṃ niryayurāyavṛtta-

prītiṃ puraskṛtya rathairdvipaiśca || 69 ||



vrajatsu sarveṣvatha devadattaḥ

kirīṭasaktaṃ pṛthipadmarāgam |

jahāra raktāktamivāmiṣārthī

śyenaḥ prabhāpallavitāmbarārkam || 70 ||



naimittikairuktamathāsya lakṣma

dṛṣṭvā tadugraṃ narakaprayāṇam |

cittaṃ sadoṣaṃ kila durnimittaṃ

nimittamanyat punaruktameva || 71 ||



kokālikhaṇḍotkaṭamorakāṇāṃ

tithyādināmnām madadurmadānāṃ |

saṃsūcitānyatyadhikāni tatra

tathāvidhānairbahulakṣaṇāni || 72 ||



bhūpapramodādatha bhadrako'pi

tairdevadatapramukhaiḥ sahaiva |

pravrajyayā cīvarapātrayogāt

cakāra vairāgyamayīmiva kṣmām || 73 ||



rājñastathā rājakumārakāṇā-

mutsṛṣṭahārāṅgadakuṇḍalānām |

sāsro virāgādavatārya teṣāṃ

keśānupālī kila kalpako'bhūt || 74 ||



mūrkhaḥ sa nīco'pi jinājñayaiva

pravrajyayā pūjyataro babhūva |

cittaprasādasya parasya manye

na kāraṇaṃ paṇḍitatā najātiḥ || 75 ||



sāmīcikāyāmatha bhadrako'pi

jñātvā nṛpaḥ pārṣadikaṃ tamenam |

nīcasya pādau kathamasya vande

mahīpati sanniti niścalo'bhūt ||76 ||



tamabravīdaskhalitābhimānaṃ

vikalpabhinnaṃ bhagavān vihasya |

pravrajyayā mohamahānuvandhī

saṃtyajyate jātimayo'bhimānaḥ || 77 ||



śrutveti rāġyā saha rājaputraiḥ

kṛte praṇāme phithivī cakampe |

na devadattaḥ paruṣābhidhāyī

padau vavande bhagavadgirāsya || 78 ||



kampāt kṣitervismitamānasena

pṛṣṭastato bhikṣugaṇena śāstā |

uvaca rājā kila kalpasya

janmāntare'pyasya kṛtaḥ praṇāmaḥ || 79 ||



purā yuvā kāśipure vilokya

bhadrābhidhānām gaṇīkāṃ daridraḥ |

sevām vyaghāt sundarakastadāsyai

rāgo hi sarvavysanopadeṣṭā || 80 ||



tayā visṛṣṭaḥ kusumoccayāya

punahpunarbhṛṅga ivādhikārthī |

tatsaṅgamānaṅgamanorathena

śrāntaḥ sa babhrāma vanāntareṣu || 81 ||



atrāntara śrāntataraḥ kṣitīśaḥ

prāpto vanāntaṃ mṝgayārasena |

taṃ brahmadattaḥ prasamīkṣya gītaṃ

tasyāśṛṇocchannatanurlatābhiḥ || 82 ||



navanavakusumāśayā kimevaṃ

madhukaraṃ tāpahato'si gaccha tūrṇam |

vikasitakamalānanābjinī sā

bhavati hi saṃkucitā dināvasāne || 83 ||



tasyā hi gītaṃ nṝpatirniśamya

smitaprabhāghaṭṭitahārakāntiḥ |

uvāca taṃ tīvrakarārkatāpaḥ

ko'yaṃ sakhe gītarasābhioyogah || 84 ||



so'pyabravīdbhūmipate na nāma

tapto ravistaptatarastu kāmaḥ |

svakarmaduḥkhāni vihanti loke

na grīṣmadagdhāni marusthalāni ||85 ||



ityarthavadvākyaguṇārpaṇena

sa bhūpatervallabhatāmavāpa |

saṃvādasaṃsparśasubhāṣitaṃ hi

keṣām c asatkārapadaṃ na yāti || 86 ||



tenātha rājā vijane śramāturaḥ

śītopacārairapanītatāpaḥ |

prītyā tamādāya tataḥ sahaiva

svarājadhānīmagamat kṛtajñah || 87 ||



tatrāsya jīvaprada ityudanta-

saṃtoṣa saṃpūritacittavṛttiḥ |

rājyārdhadānābhimukhaḥ sa tasthau

cittānuvṛttasya kimasya deyam || 88 ||



rājyārdhadānaprasṛte'tha tasmin

nācintayat sundarakaḥ kṛpāyām

bhadrāṃ vinā rājyasukhena kiṃ me

dhanyo hi tatprītisudhābhiṣiktaḥ || 89 ||



mahmaṃ na rājyādyapi rocate'rdha-

makhaṇḍitālpāpi hi śobhate śrīḥ |

ekārthayoge hi sadā vivādaḥ

dvayorhi bhogaiḥ kalireva mūrtaḥ || 90 ||



tasmānnṛpaṃ kuṇṭhamahaṃ nipātya

samastarājyena bhavāmi pūrṇaḥ |

kṣaṇaṃ vicintyetyanutāpataptaḥ

tīvraṃ manaḥ svasya punaḥ pradadhyau || 91 ||



kiṃ cintitaṃ nindyaparaṃ mayaitat

ko'yaṃ prakāraḥ khalu tīkṣṇatāyāḥ |

kṛtaghnasaṃkalpakalaṅkalepā-

daho nu lajjā nijacetaso'pi || 92 ||



svastyastu rājyāya namaḥ sukhebhyaḥ

saṃmohamātā kṣamatāṃ ca lakṣmīḥ |

yeṣāmanāsvāditacintitānā-

mevaṃvidhā dhīḥ prathamaḥ svabhāvaḥ || 93 ||



bhramaṃ vidhatte vidadhāti mūrcchāṃ

nipātayatyeva tamastanoti |

āghrātamātraiva karoti puṃsā-

maho vināśaṃ viṣavallarī śrīḥ || 94 ||



ciraṃ vicintyeti sa jātacittaḥ

pratyekabodhirvimalaḥ prabhāte |

abhyarthamāno'pi nareśvareṇa

rājyaṃ n ajagrāha nivṛttatṛṣṇaḥ || 95 ||



pratyekabuddhatvamavāptamenaṃ

kālena dṛṣṭvā nṛpatirmaharddhiḥ |

tatpādapadmacyutamaulimālya-

ścittaprasādocitamityavecat || 96 ||



sa ko'pi satkarmavipākajanmā

vandyo vivekaḥ praśamābhiṣekaḥ |

yasya prabhāvādvirataspṛhāṇāṃ

tyājyeva ratnākaramekhalā bhūḥ || 97 ||



śrutveti rājñā kathitaṃ tadartha -

jātaṃ tadabhyarthanayā vidhāya |

tatkalpakaḥ śāntipadaṃ prapede

sevāntaraṅgaḥ kila gaṅgapālaḥ || 98 ||



prāptaṃ tamayuttamakarmayogāt

pravrajyayā sajjanapūjyabhāvam |

rājā vavande praṇataḥ pṛthivyāḥ

kampastadābhūdapi ṣaḍvikāraḥ || 99 ||



so'yaṃ rājā vihitavinatirbhadrako brahmadatto

paśyopālī sa kila kuśalī kalpako gaṅgapālaḥ

ityāścaryaṃ bhagavaduditaṃ bhikṣavaste niśamya

svacchaṃ cittaṃ sukṝtaśaraṇe menire hetumeva || 100 ||



iti kṣemendraviracitāyāṃ bodhisattvāvadānakalpalatāyāṃ

pitāputrasamādānam nāma dvāviṃśatitamaḥ pallavaḥ ||