• Home
• Canon Text
• 21 jetavanapratigrahāvadānam

21 jetavanapratigrahāvadānam

Technical Details

21 jetavanapratigrahāvadānam |



dṛṣṭaṃ muṣṭiniviṣṭapāradakaṇākāraṃ narāṇāṃ dhanaṃ

dhanyo'sau yaśasā sahākṣayapadaṃ yadyasya vidyotate |

dīnānāthagaṇārpaṇopakaraṇībhūtaprabhūtaśriyaḥ

puṇyārāmavihāracaityabhagavadbimbapratiṣṭhādibhiḥ ||1 ||



śrīmān babhūva śrāvastyāṃ datto nāma gṛhābhipaḥ |

sutastasya sudatto'bhūdākaraḥ puṇyasaṃpadām ||2||



sa bālya evālaṃkāraṃ yācakebhyaḥ sadā dadau |

prāgjanmavāsanābhyāsaḥ kasya kena nirvāyate || 3 ||



nityamābharaṇatyāgātparaṃ pitrā nivāritaḥ |

nadīsamuddhṛtānyasmai sadaivānyānyadarśayat || 4 ||



nidhidarśī sa sarvatra pitari tridivaṃ gate |

dīnānāthapradānena babhūvānāthapiṇḍadaḥ || 5 ||



kṛtadānah sa kālena putravān putravtsalaḥ |

abhūt putravivāhārthī kanyānveṣaṇayatnavān ||6 ||



kanyakāṃ yācituṃ kāṃcit puraṃ rājagṛhaṃ tataḥ |

madhuskandhābhidhaṃ dakṣaṃ brāhmaṇaṃ visarsarja saḥ || 7 ||



āsādya magadhān rājagṛhaṃ nagarametya saḥ |

mahādhanaṃ gṝhapatiṃ yayāce kanyakām dvijaḥ || 8 ||



anāthapiṇḍado nāma śrāvastyāmasti viśrutaḥ |

tatputrāya sujātāya kanyāyām dehītyuvāca saḥ || 9 ||



so'bravīdeśa saṃbandhaḥ paramo'smatkulocitaḥ |

vaṃśe'smākaṃ tu kanyānām śuklamādīyate mahat || 10 ||



śataṃ śataṃ rathāgryāṇāṃ gajāśvāśvatarasya ca |

dāśīnicayaniṣkānāṃ dīyatāṃ yadi śakyate || 11 ||



ityukte tena taṃ vipraṃ sasmitaḥ pratyabhāṣata |

anāthapiṇḍadagṛhe dāsye śulkaṃ tadalpakam || 12 ||



brāhmaṇenākhile tasmin kanyāśulke pratiśrute |

tamādarādgṛhapatirbhojanāya nyamantrayat || 13 ||



sa bhuktvā vividhaṃ tatra bhakṣyabhojyamayantritaḥ |

rātrau visūcikākrāntaścukrośa vipulavyathaḥ ||14 ||



ye'nnamaśnanti laulyena niśi nidrāsukhāpaham |

janmakarma kathaṃ kuryuḥ paralokasukhāya te || 15 ||



tatyājāśucibhītyā taṃ gṛhātparijano bahiḥ |

āspadaṃ nairapekṣyasya jātyā dāsajanaḥ śaṭhaḥ || 16 ||



śubhena karmaṇā tasya saṃprāptastena vartmanā |

samaudgalyāyanaḥ śāriputraḥ kāruṇyapeśalaḥ || 17 ||



taṃ vaṃśasya dalāgreṇa nirlikhyāpi tathā mṛdā |

prakṣālya dharmamādiśya tau tasya yayatuḥ śanaiḥ || 18 ||



so'pi cittaṃ tayoragre prasādya tyaktavigrahaḥ |

caturmahārājikeṣu deveṣu samājāyata || 19 ||



tatra viśravaṇādeśānmartyaloke niketane |

sa cakre śibiradvāre pūjādhiṣṣṭhānasaṃnidhim || 20 ||



lekhavijñātasaṃbandhaviścayo'tha yathoditam |

anāthapiṇḍadaḥ śulkamādāya svayamāyayau ||21||



sa saṃbandhigṛhaṃ prāpya dadarśāścaryakāriṇīm |

śikharākārarājārhabhakṣyasaṃbhārasaṃpadam || 22 ||



sa vismayādgṛhapatiṃ papraccha svacchamānasaḥ |

bhūribhakṣyptsavaḥ ko'yamapi rājā nimantritaḥ || 23 ||



sa taṃ babhāṣe bhagavān buddhaḥ saṃghaparigrahaḥ |

mayā nimantritaḥ saṃghe so'yam mama mahotsavaḥ || 24 ||



iti buddhābhidhānena jātaromāzncakaṇṭakaḥ |

indusyandirivālkinnaḥ sahasaiva babhūva saḥ || 25 ||



aviditaparamārthe kasyacinnāmamātre

sphurati sahajabhāvaḥ ko'pi janmānubandhaḥ |

abhinavaghananāde vyaktaharṣabhilāṣaḥ

spṛśati lalitanṛtyodvṛttavṛttiṃ mayūraḥ ||26 ||



so'vadadvadanāmbhojasaṃjātābhinavadyutiḥ |

ka eṣa bhagavān buddhaḥ kaśca saṃgho'bhidhīyate || 27 ||



iti pṛṣṭo gṛhapatistena provāca sasmitaḥ |

aho bata na jānīṣe śāstāraṃ bhuvanatraye || 28 ||



saṃsārapāśabhītānāṃ śaraṇyaṃ śaraṇaiṣiṇām |

jina yastaṃ na jānāti sa loke vañcitaḥ param || 29 ||



kiṃ tena mohalīnena viphalīkṛtajanmanā |

ajñānataraṇopāyaṃ vayo yena vyayīkṛtam || 30 ||



gotamo bhagavān buddhaḥ śākyarājakuladbhivaḥ |

saṃbudhyānuttaraṃ samyaksaṃbodhimanagārikaḥ || 31 ||



paścāt pravrajitānām ca tasyaivānugrahātparam |

bhikṣūṇāṃ gatarāgāṇām samūhaḥ saṃgha ucyate || 32 ||



sa eṣa buddhapramukhaḥ saṃghaḥ svakuśalaiṣiṇāḥ |

mayā puṇyapaṇaṃ prāpyaṃ praṇayena nimantritaḥ || 33 ||



iti tadvacanaṃ śrutvā tatsmṛtvānāthapiṇḍadaḥ |

buddhālambanabhāvena niśi nidrāṃ samāyayau || 34 ||



rajanyāṃ yāmaśeṣāyāṃ samākṛṣṭa ivetsukaḥ |

prabhātamiti sa jñātvā puradvāreṇa niryayau || 35 ||



śibikādvāramāsādya saṃprāpta iva devatām |

madhuskandhena nirdiṣṭaṃ śreyaḥpanthānamāptavān || 36 ||



bhagavāṃstaṃ tataḥ prāpya sa tṛṣṇārta ivāmṛtam |

babhūvānupamāsvādaṃ pramodāmodanirvṛtaḥ || 37 ||



taṃ dṛṣṭvā sādaraṃ dūrāt chāyātarumivādhvagaḥ |

avāpa gatasaṃtāpaḥ śrāntiṃ viśrāntiśītalām || 38 ||



tasya taddarśaneva vimalābhigataḥ manaḥ |

śaratsamāgameneva ghanadhvāntojjhitaṃ nabhaḥ || 39 ||



sa ko'pi puṇyaśīlānāmanubhāvaḥ prasādinām |

bhavanti yatprasādena nirvighnāścittavṛttayaḥ || 40 ||



so'cintayadaho mohavihīnasya hi me tathā |

anucchedavikāro'yaṃ jātaḥ praśamasaṃpadaḥ || 41 ||



vañcito'smi na yatpūrvaṃ dṛṣto'yaṃ bhagavān mayā |

nādhanyānāmiyaṃ yāti mūrtirlocanagocaram || 42 ||



amṛtamadhirodārā dṛṣṭirdyutiḥ śaśipeśalā

taruṇakaruṇāyattā vṛttiḥ prasādamayī matiḥ |

ayamatiśayaṃ pratyāsannaḥ karoti virāgatāṃ

vigatarajasāṃ niḥsaṃsāraḥ priyo'pi parigrahaḥ || 43 ||



iti cittaprasādena cintayannupasṛtya saḥ |

vidadhe tasya sānandaḥ pādapadmābhivandanam || 44 ||



bhagavānapi tatprāptiprasādānandalakṣaṇam |

uvāha vadanacchāyaṃ pūrṇakāruṇyapūritam ||45||



dṛṣṭimāśvāsajananīṃ kāmaṃkāmapi tasya saḥ |

visasarjojjvalāṃ janmarajaḥśuddhyai sudhānadīm || 46||



athāsya bhagavān bhradrāṃ vidadhe dharmadeśanām |

caturṇāmāryasatyānāṃ pratibhāvavidhāyinīm || 47 ||



sa śāsanāddhi saṃvyastasamastakleśasaṃtatiḥ |

nijaṃ janma nivedyāsmai praṇatastamabhāṣataḥ || 48 ||



atikrānto'smi bhagavan bhavantaṃ śaraṇaṃ gataḥ |

vipannavāsanābhyāsaḥ saṃsāre na rame param || 49 ||



karotyakuśalaṃ dūre śubhamāśu prayacchati |

sūcayatyucitācāraṃ mahatamavalokanam || 50 ||



sukhārhaṃ tvadvihārāya vihāraṃ paramādarāt |

ratnasārapurodāraṃ svapuraṃ kārayāmyaham || 51 ||



karotu tatra bhagavān satataṃ sthityanugraham |

dhanairāsevito'smābhiḥ saparyāparicaryayā || 52 ||



ityarthanāṃ tathetyasya bhagavān pratyapadyata |

praṇayuprārthanābhaṅgapragalbhā na hi sādhavaḥ || 53 ||



bhagavantamathāmantrya śrāvastīṃ sa purīṃ yayau |

tadādiṣṭena sahitaḥ śāriputreṇa bhikṣuṇā || 54 ||



tatra jetakumāreṇa hiraṇyārghoṇa bhūyasā |

dattaṃ kāñcanamādāya vihāraṃ tamasūtrayat || 55 ||



bhaktyutsāhādathārambhakṛtasāhāyyakah suraiḥ |

vihāraṃ tridivākāraṃ cakārānāthapiṇḍadaḥ || 56 ||



tatra jetakumāro'pi bhaktyā bhagavataḥ param |

yaśaḥpuṇyapratiṣṭhāyai vidadhe dvārakoṣṭhakam || 57 ||



ath atīrthyāstamālokya vihārārambhamadbhutam |

sāpavādavivādena cakrurdveṣākulāḥ kalim || 58 ||



raktākṣapramukhasteṣām mātsaryātkṣudrapraṇḍitaḥ |

sapakṣa iva kṛṣṇāhiścakitaḥ purataḥ sadā || 59 ||



ruddhe vihārasaṃbhāre tena vādajayāvadhi |

anāthapiṇḍadagirā śāriputraḥ samāyayau || 60 ||



raktākṣo'tha tamāhūya prabhāvotkarṣadarśane |

indrajālabalotphullaṃ sahakāramadarśayat || 61 ||



śāriputraprabhāvotthairvipulaistanmukhānilaiḥ |

unmūlitaḥ śakalatāṃ tīrthyotsāha ivāpa saḥ || 62 ||



raktākṣavihitāṃ phullakamalāṃ padminīṃ tataḥ |

paṅkaśeṣāṃ dvipaścakre śāriputravinirmitaḥ || 63 ||



ratkākṣavakṣonikṣiptaḥ saptaśīrṣamahoragaḥ |

śāriputreṇa nikṣiptastārkṣyapakṣāgramārutaiḥ ||64||



tadāhūto'tha vetālaḥ śāriputreṇa kīlitaḥ |

prerito mantravirtyeṇa raktākṣaṃ hantumudyayau || 65 ||



vetālābhihatastrāsānnaśyanmānamadajvaraḥ |

śaraṇaṃ pādapatitaḥ śāriputraṃ jagāma saḥ || 66 ||



raktākṣastena bhaṅgena śaraṇyaṃ śaraṇaṃ gataḥ |

pravrajyāyām vītarāgaḥ śuddhāṃ bodhismavāptavān || 67 ||



tīrthyāstvanye paridveṣakrodhapāramitāṃśavaḥ |

tatra karmakaravyājāttasthurbhikṣavadhodyatāḥ || 68 ||



te'tha dharmadruhaḥ kāle śāriputreṇa lakṣitāḥ |

taddṛṣṭipātamātreṇa babhūvurmaitramānasāḥ || 69 ||



āśayānuśayaṃ dhātuṃ prakṛtiṃ ca vicārya saḥ |

dharmadeśanayā teṣāṃ dideśānuttarāṃ daśām ||70 ||



atha tasya vihārasya nirvighnārambhakarmaṇi |

anāthapiṇḍadaṃ prāha śāriputraḥ smitānanaḥ || 71 ||



vihārasūtrapātasya tulya eva kṣaṇe mahān |

haumo vihāraḥ saṃvṛttastuṣite devasadmani || 72 ||



etadākarṇya saṃjātaprasādadviguṇāntaraḥ |

hemaratnavarāgāraṃ vihāraṃ samakārayat || 73 ||



vibhavairatha rājārhaiḥ pathi tenopakalpitaiḥ |

vijñaptistridivaiḥ sārdhamāyayau bhagavān jinah || 74 ||



tadāgamanaharṣeṇa prasanne bhavanatraye |

anāthapiṇḍadastasmai vāridhārāmapātayat || 75 ||



tasmin yadā na pradeśe vāridhārā papāta sā |

tadā bhagavato vākyāt tvaritaṃ patitānyataḥ || 76 ||



taṃ dṛṣṭvā kautukāt pṛṣṭo bhikṣubhirbhagavān punaḥ |

uvāca śrūyatāmetad vāristambhasya kāraṇam || 77 ||



anena pūrvabuddhebhye asminnevedamāspadam |

pratipāditamityeṣā vāridhārānyataścyutā || 78 ||



anenaiva purā samyaksaṃbuddhāya vipaśyine |

ayameva varārāmapradeśaḥ pratipāditaḥ || 79 ||



buddhāya śikhine prādāt puṣyajanmanyayaṃ punaḥ |

tato dadau viśvabhuve jināya raghijanmani || 80 ||



bhavadattābhidho bhūtvā kakucchandāya dattavān |

dadau bṛhaspatirbhūṭvā kanakākhyāya tāyine || 81 ||



kāśyapāya punaścāyaṃ prādādāṣāḍhajanmaniḥ |

anenaivādhunā mahyaṃ deśo'yaṃ pratipāditaḥ || 82 ||



kālena sudhanākhyo'yaṃ maitreyāya pradāsyati |

sattvavān kṣāntiśīlatvānnidhānānyeṣa paśyati || 83 ||



punaścāyaṃ gṝhapatirbhūtvā hemapradābhidhaḥ |

cakre pratyekabuddhasya saṃskāraṃ parinirvṛtau || 84 ||



ratnakumbhe tadasthīni dhṛtvā tatpraṇidhānataḥ |

adhunā ratnakośārhaḥ saṃjāto'yaṃ suvarṇabhās || 85 ||



śrutveti śāsturvacanābhidhānaṃ

te bhikṣavaḥ sāramivāmṛtasya |

kartuḥ pratiṣṭhārjitapūrṇapuṇya-

puṣpādhivāsena bhṛśaṃ nananduḥ || 86 ||



iti kṣemendraviracitāyāṃ bodhisattvāvadānakalpalatāyāṃ

jetavanapratigrahāvadānaṃ nāma ekaviṃśaṃ pallavaḥ ||