• Home
• Canon Text
• 19 śroṇakoṭikarṇāvadānam

19 śroṇakoṭikarṇāvadānam

Technical Details

19. śroṇakoṭikarṇāvadānam |



sa ko'pi puṇyātiśayodayasya

varaḥ prabhāvaḥ paramākṣayo yaḥ |

pratyakṣalakṣyaḥ śubhapakṣasākṣī

janmāntare lakṣaṇatāmupaiti ||1||



ramye purā bhagavati śrāvastyāṃ jetakānane |

anāthapiṇḍadārāme vihāriṇi tathāgate ||2||



babhūva vāsavagrāme balasenābhidho gṛhī |

pūritāśaḥ phalabharaiśchāyātarurivārthinām || 3 ||



jāyāyāṃ jayasenāyāṃ kāḻe kamalalocanaḥ |

ajāyata sutastasya puṇyairmīrta ivotsavaḥ || 4||



sajahā ratnadīpārcirabhūtkarṇasya karṇikā |

nābhūnmūlyatulā yasya hemakoṭiśatairapi || 5 ||



śravaṇānakṣatrajāto'sau ratnakoṭyarhakarṇikāḥ |

sa śroṇakoṭikarṇākhyaḥ kumāro'bhūdguṇocitaḥ ||6 ||



sa nirmalaruciḥ kāntaḥ kalābhiṃ paripūritaḥ |

amandānandaniṣyandī na kasyendurivābhavat ||7 ||



sa yuvā vāryamāṇo'pi pitrā dhanadasaṃpadā |

jananī sāśrunayanā paraṃ puruṣayā girā ||8||



priyaṃvado'pi nirbhartsyo viṣavarṣīva candramāḥ |

mahāsārthena ratnārthī dūradvīpāntaraṃ yayau ||9||



makarākaramuttīrya vrajatasyasya nirjane |

karmormiviplavenābhūt svasārthavirahaḥ pathi ||10||



sārtho'pi tamanāsādya vinivṛttaṃ śucā śanaiḥ |

svadeśamarjitakleśaḥ praviveśa viśṛṅkhalāḥ ||11||



so'pi taptamaruśreṇīlakṣaṇāṃ dakṣiṇāṃ diśam |

śrāntaḥ praśāntaviśrāntirvāpigāhaṃ vyagāhata ||12||



so'cintayadaho vitte pratinittārjanodyamaḥ |

mamāyamanayenaiva jātakleśaḥ phalodayaḥ ||13||



aho dhanārjanāveśaḥ saṃtoṣavirahānnṛṇām |

sarvāpavādasaṃvādo nindyānām vipadāṃ padam ||14||



hemācale'pi saṃprāpte na paryāptirhanārjane |

saṃsāre vāsanābhyāsadveṣamohaḥ śarīriṇām ||15 ||



phithuprayāsavirasā dīpitā śrīrivāyatā |

tṛṣṇāṃ tanoti nitarāmiyaṃmarumahītale ||16 ||



aho bata kuraṅgāṇāṃ tṛṣṇāndhānāṃ pade pade |

mamāpi janayantyeva mohaṃ marumarīcikāḥ ||17||



iyaṃ tṛṣṇā śramaścāyamimā nirudakā bhuvaḥ |

kiṃ karomi kka gacchāmi paśyāmi jvalitā diśaḥ || 18 ||



iti saṃcintya sa śanaiḥ prasarpan salilāśayā |

āyāsamiva sākāraṃ dadarśa puramāyasam ||19||



ghoraṃ dvāri sthitaṃ tatra saṃtrāsasyeva sodaram |

dadarśa puruṣaṃ kālakarālaṃ raktalocanam ||20||



sa tena pṛṣṭaḥ pānīyaṃ yadā novāca kiṃcana |

tadā svayaṃ praviṣṭena pretaloko vilokitah ||21||



dagdhakaṣṭhopamān dhūlimalaliptānnirambarān |

śuṣkāsthinsāyuśeṣāṅgān pretān dṛṣṭvā sa vivyathe ||22||



tairyācitah sa pānīyaṃ pānīyavirahārditaḥ |

parityajya nijāmārtimabhūttadduḥkhaduḥkhitaḥ ||23||



tīvratṛṣṇāturānūce sa tānārtapralāpinah |

mamāsmin marukāntāre niṣkṛpasya kutaḥ payaḥ ||24||



kṛcchre'smin duḥsahe nyastāḥ ke yūyaṃ kena karmaṇā |

yuṣmadaprakriyabandhaścātaḥ kṛcchraścarāmyaham ||25||



nidrā niḥśalyakalpasya sukhasikteva tasya yā |

nārtānnapaśyati dṛṣṭvā teṣāṃ kleśakṣaye kṣamā ||26||



te tamūcurviruddhena karmaṇā mohasaṃcayāt |

anivartya vayaṃ martyāḥ kṣiptā vyasanasaṃkaṭe ||27||



adhikṣepāt kṣepakṣatipataradhairyairmadabharā-

danāryairmānavyasanerṣyābhiravāryavyatikaraiḥ |

kṛtāsmābhirnityaṃ suhanahṛdaye nirdayatayā

vacobhirnārācairviṣaparicitaiḥ śalyakalanā ||28||



dānaṃ nadattaṃ hṛtameva vittaṃ

hiṃsānimittīkṛtameva cittam |

asmārbhiraṅgairvihitā vikārāḥ

parasya dārāpahṛtiprakārāḥ ||29||



te vayaṃ kuhakāsaktā dakṣāḥ kṣudreṣu karmasu |

prayātāḥ pretanagare ghore'smin kleśapātratām ||30 ||



iti teṣāṃ vacaḥ śrutvā so'nyatra ca tathāvidhān |

pretān dṛṣṭvānabhipretān karuṇakulito'bhavat ||31||



nirgamya durgamāt tasmāt purātpuṇyabalena saḥ |

vimalaṃ śītalacchāyamāsasāda vanāntaram ||32||



atha dūradhvasaṃtaptaḥ pariśrāntaḥ śanaiḥ śanaiḥ |

nipapātācalādandhastṛṣṭārta iva bhāṣkaraḥ || 33||



dine puṇya iva kṣīṇe niḥśeṣāśāprakāśake |

saṃmohamalinaṃ loke tamaḥ pāpamivodyayau ||34||



kṣīṇabhṛṅgavihaṅgānāṃ nalinīnāṃ prasaṅginī |

vikāsāsṃpasā mudrā nidreva samajāyata ||35||



kāruṇyādiva śītāṃśurjyotsnāmṛtaśalākayā |

sphāratāraṃ jagannitraṃ cakre vitimitaṃ tataḥ || 36 ||



kṣayodayaparāvṛttirdrśitānekavibhramaḥ |

saṃsāradinayāminyorjahāseva sudhākaraḥ ||37 ||



netrānandasudhāvarṣe sukhasparśe niśākare |

digvadhūvadanādarśe harṣe mūrta ivotite ||38 ||



śroṇakoṭirdadarśāgre vimānamānanadyutim |

kautukādanyarūpeṇa svargādbhuvamivāgatam ||39 ||



tasminnapaśyatsamadāścatasrastridaśāṅganāḥ |

diśaścandrodayānandavihārāyeva saṃgatāḥ ||40 ||



tāsāṃ madhye varākāraṃ ramamāṇaṃ vyalokayat |

taruṇapremasaṃbhāramiva sākāratām gataḥ ||41 ||



ratnamaṇḍaleyūrakirīṭikacirāmśubhiḥ |

ālikhantamivāścaryamamaryādaṃ diśāṃ mukhe ||42 ||



tasya tāmadbhutām dṛṣṭvā saṃbhogasukhasaṃpadam |

mene sa sukṛtākhyasya taroḥ sphītāṃ phalaśriyam || 43 ||



prītyā tena kṛtātithyaḥ svādupānāśanādibhiḥ |

tāṃ śroṇakoṭikarṇo'tha nināya rajanīṃ sukham ||44||



tārākusumavātāliprabhā prābhātikī tataḥ |

anityateva śaśinaścakre lakṣmīparikṣayam ||45||



kṣayaṃ kṣapāyāṃ yātāyām bhānau bhuvanacakṣuṣi |

udite sarvabhūtānām sukhaduḥkhaikasākṣiṇi || 46 ||



vimānaṃ suranāryaśca kṣasṇādadṛśyatāṃyayuḥ |

vinaṣṭavadanacchāyaḥ puruṣaścāpatatkṣitau ||47 ||



tatastasyāpatat pṛṣṭhe śunāṃ saṃgho'tibhīṣaṇaḥ |

trailokyaśāpapāpotthaḥ kleśarāśirivākhilaḥ ||48 ||



sa taigrīvāmukhārabdhamāṃsagrāsāgrakarṣaṇaiḥ |

ākrandirudhirakṣīrairbhakṣyamāṇaḥ kṣayaṃ yayau || 49 ||



dinānte punarāyāntaṃ tadvimānamapaśyata |

catasro'psarāsastāśca puruṣaḥ sa ca kāntimān ||50 ||



taṃ śroṇakoṭikarṇo'tha papracchātyantavismitaḥ |

sakhe kimetadāścaryaṃ dṛśyate kathyatāmiti || 51 ||



sa tena pṛṣṭaḥ provāca vayasya śrūyatāmidam |

tvāṃ śroṇakoṭikarṇākhyaṃ jānāmi sukṛtocitam || 52 ||



abhavaṃ vāsavagrāme duṣkṛtī paśupālakaḥ |

paśūnāṃ māṃsamutkṛtya vikrītaṃ satata mayā ||53 ||



piṇḍapātāya saṃprāpto māmāryaḥ karuṇānidhiḥ |

kātyāyanākhyaḥ provācaḥ viramāsmāt kukarmaṇaḥ ||54||



hiṃsāmayo hyayaṃ kleśo duḥsahaḥ sāhasaiṣiṇām |

svaśarīre patatyeva chinnamūla iva drumaḥ ||55||



ityahaṃ vāryamāṇo'pi tenānāryaḥ kṛpātmanā |

yadā na virataḥ pāpāt tadā sa prāha māṃ punaḥ ||56||



divā tvaṃ kuruṣe hiṃsāṃ sarvathā yadi nirdayaḥ |

rātrau śīlasamādānaṃ gṛhāṇa samayānmama ||57 ||



ityuktvā tena yatnena sarvasattvahitaiṣiṇā |

dattā śīlasamādānamayī puṇyamatirmama ||58 ||



kālena kālavaśagaḥ prāptaḥ so'hamimāṃ daśām |

taptāṅgārasudhāvarṣairiva kīrṇo divāniśam || 59 ||



rātrau śīlasamādānaphalaṃ hiṃsāphalaṃ dine |

caryā matpuṇyapāpābhyām patitaḥ sukhaduḥkhayoḥ ||60||



tasya me kuru kāruṇyaṃ sakhe kalusakāriṇaḥ |

gatvā svadeśaṃmatputraṃ brūhi madvacasā rahaḥ || 61 ||



asti me gṛhakoṭānte nikhātaṃ hemabhājanam |

taduddhṛtya parityaktapāpavṛtti vidhīyatām || 62 ||



āryakātyāyano nityaṃ piṇḍapātena pūjyatām |

ityuktastena vinayāt tathetyuktvā jagāma saḥ || 63 ||



sa dadarśa vrajan divyavimānamaparaṃ punaḥ |

ratnapadmalatākāntaṃ dvitīyamiva nandanam || 64 ||



tasmin sāṅgamivānaṅgaṃ saṃgataṃ divyayoṣitā |

apaśyadvāsarārambhe puruṣaṃ ratnabhūṣitam || 65 ||



tena prītyupacāreṇa kṛtātithyastathaiva saḥ |

dinaṃ nināya dīrghaṃ ca kleśamadhye sudhāmayam || 66 ||



atha vyomavimānāgrāt patite padminīpatau |

apūryata jagad ghorairduḥkhairiva tamobharaiḥ || 67 ||



tataḥ kṣapāpatirjyotsnāṃ vamanneva kṣapājaḍaḥ |

śanakaiḥ pāṇḍurogīva gauradyutiradṛśyata ||68 ||



sukumāre dināloke rātrau rākṣasayoṣitā |

bhakṣite'lakṣyata śaśī kapālabalasaṃnibhaḥ ||69 ||



vyāpte candrikayā loke kālacandranacarcayā |

vimānamagamat kkāpisā ca svargamṛgekṣaṇā ||70 ||



vimānapatitaḥ so'pi puruṣaḥ sarvarūpayā |

śanaiḥ saptabhirāvartaiḥ śatapadyā viveṣṭitaḥ || 71 ||



sā tasya mūrdhni vivaraṃ kṛtvā mastiṣkaśoṇitam |

āsvādayantī śanakaiścakāra śuṣiraṃ śiraḥ || 72 ||



athāruṇakaracchanne socchvāsavadāne dine |

bībhatsadarśanakleśādiva mīlitatārake ||73 ||



prādurāsan punardivyavimānaṃ sā ca kāminī |

yuvā sa cādbhutatanurdivyābharaṇabhūṣitaḥ || 74 ||



pṛṣṭo|tivismayāt tena svavṛttāntaṃ jagād saḥ |

dvijo'haṃ vāsavagrāmanivāsī manasābhidhaḥ || 75 ||



taruṇī prātiveśyasya patnī malayamañjarī |

abhūnmama bhujaṅgasya svairiṇī vallabhā bhṛśam || 76 ||



paradāraratergrāme vyagrā me kṣamate matiḥ |

minagnā viṣayagrāme samagrā me kṣayaṃ gatā || 77 ||



āryakātyāyanaḥ pāpaṃ jñātvā mām cauryakāmukam |

dayāvidheyaḥ kāruṇyāt provāca vijane śanaiḥ ||78 ||



parāṅganāṅgasaṃsargaprītyā rūparateḥ kṣaibam (?) |

anaṅgāgnau patannāśaṃ pataṅgaṃ iva mā gamaḥ || 79 ||



aho āsaktaraktānāṃ saṃpatanapramādinām |

kāminām hiṃsakānāṃ ca paradārādaraḥ param ||80 ||



pṛthu pravepathu (?) svāpaśramavihvalānām

gṛdhrāṅganāmukhanikhātanakhakṣatānām |

saṃmohane paravadhūvihitaspṛhāṇāṃ

romāñcakāriṇi paraṃ narake ca kāmaḥ || 81 ||



tasmādasmānnivartasva vatsa kutsitakarmaṇaḥ |

jāyate pātakaṃ sparśe śunāmevāśucau ratiḥ||82||



ityahaṃ kṛpayā tena niṣiddho'pyaviśuddhadhīḥ |

aniruddhena rāgeṇa baddhastāmeva nātyajam || 83||



vijñāya māmavirataṃ tataḥ kātyāyano dadau |

mahyaṃ śīlasamādānaṃ dinacaryāhitodyataḥ || 84 ||



dinaśīlasamādānāt parastrīgamanānniśi |

iyaṃ me puṇyapāpotthā sukhaduḥkhamayī sthitīḥ ||85||



gatena vāsavagrāmaṃ vācyaḥ putro mama tvayā |

suvarṇamagniśālāyāmasti gūḍhaṃ dhṛtaṃ mayā || 86 ||



vṛttiḥ kāryā tadudbhṛtya pūjyaḥ kātyāyanaśca saḥ |

praṇayāditi tenoktaḥ śroṇakoṭiryayau tataḥ || 87 ||



so'paśyaddivyalalanāmagre maṇivimānagām |

lakṣmīṃ lāvaṇyaduġdhābdheranāyāsodgatāmiva || 88 ||



tasya vimānapādeṣi caturṣu snāyusaṃyutam |

sa dadarśātidurdaśaṃ baddhaṃ pretacatuṣṭayam || 89 ||



sāpi taṃ pratyabhijñāya saṃbhāṣya snigdhayā girā |

surocitaṃ dadau tasmai rasavat pānabhojanam || 90 ||



bhuñjānasaṃjñayāṃ dūrāt pretairdainyena yācitaḥ |

sa dadau kṛpayā tebhyaḥ kākebhya iva piṇḍikāḥ || 91 ||



piṇḍo busatvamekasya prayāto'nyasya lohatām |

svamāṃsatvaṃ tṛtīyasya caturthasya prapūyatām || 92 ||



vilokya tatkṛpāviṣṭaḥ sa teṣāṃ kaṣṭaceṣṭayā |

papraccha tanmukhacchāyām vicchāyīkṛtapaṅkajām || 93 ||



pṣṭā tadadbhutaṃ tena uvāca sā migekṣaṇā |

na śroṇakoṭirṇaiṣāṃ dattaṃ bhavati tṛptaye || 94 ||



brāhmaṇasyāsya bhāryāhaṃ pūrvapādābalambinaḥ |

nandanāmnaḥ sunandākhyā vāsavagrāmavāsinaḥ || 95 ||



dvitīyapādasaṃsaktaḥ putro me niṣṭhurābhidhaḥ |

paścātpādāvalambinyau dāsī ceyaṃ snuṣā ca me || 96 ||



nakṣatrayogapūjāyām purā sajjīkṛate mayā |

bhaikṣyopahāre me gehamāryakātyāyano'viśat || 97 ||



mayā cittaprasādinyā piṇḍapātena so'rcitaḥ |

kurvanneva yayau kāntyā vaimalyānugrahaṃ diśām || 98 ||



tataḥ snātvā samāyātastūrṇaṃ patirayaṃ mama |

patpiṇḍapātamākarṇya pramidāya mayoditam || 99 ||



kopāduvāca māṃ kasmād viśikhaḥ śramaṇaḥ śaṭhaḥ |

apūjiteṣu pūjyeṣu busārhaḥ pūjitastvayā || 100 ||



iti mohādanenokte putro'pyeṣa jagād mām |

pāke pūrvāśanāyogyaḥ sa kiṃ nāśnātyayoguḍān || 101 ||



iyaṃ snuṣā me satataṃ pūrvabhakṣyāvabhoginā |

mayokte śapathaṃ cakre svamāṃsādanavādinī ||102 ||



iyaṃ dāsī ca bhaikṣyāṇā cairyāttadvyayakāriṇī |

ākṣiptā cākarot satyaṃ pūyaśoṇitavādinī || 103 ||



tatra te pretatām yātāḥ svavākyasadṛśāśanāḥ |

ahaṃ tvāryaprasādena divyabhogopabhoginī || 104 ||



tvayā tvāryaśamāptena vaktavyā duhitā mama |

santi hemanidhānāni gṛhe catvāri te pituḥ || 105 ||



tānyuddhṛtya yathāyogaṃ bhajasv asvajanisthitim |

pūjanīyaḥ piturbhrātā nāmnā kātyāyana sadā || 106 ||



sa ḥ śroṇakoṭikarṇastvaṃ gaccha deśaṃ tyaja śramam |

varṣā dvādaśa saṃpūrṇāḥ svagṛhānnirgatasya te || 107 ||



ityuktvā taṃ samādiśaya tasya pretacatuṣṭayam |

suptasyaiva muhūrtena svadeśāptimakārayat || 108 ||



utthitaḥ so'pi sahasā svadeśodyānakānanāt |

viyogaśokātpitarau śuśrāvāndhyamupāgatau || 109 ||



bhikṣudvijātithigaṇe pūjyamāne surālaye |

svakaṃ pitṛgṛhaṃ dṛṣṭvā paraṃ vismayamāyayau || 110 ||



niścitya sarvaṃ bhāvānāṃ kṣaṇikatvādanityatām |

sneharāgaṃ samutsṛjya tatrasthaḥ samacintayat || 111 ||



aho saṃmohanidreyaṃ nirantato divāniśam |

svapnamāyāvilasitaiḥ karotyadbhutavibhramam ||112||



janmavartmapradā mātā pitā bījavapatkhagaḥ |

pānthapūjāsanaṃ kāyaḥ ko'yaṃ niyamasaṃgamaḥ || 113 ||



śriyaḥ saṃsārābhrabhramaparicitāḥ kāñcanarucā

āśā dig (?) nirbandhāstaḍita iva nirlepacapalāḥ |

vapuḥ sarvāpāyaiḥ kṣayabhayanikāyaiḥ parigataṃ

jarārogodvegaistadapi na virāgastanubhṛtām || 114||



śriye svastisamāptaye svajanasyāyamañjaliḥ |

dākṣiṇyaiḥ kṣamataṃ śrīṣu pravrajyaiva priyā mama || 115 ||



iti dhyātvā sa pitarau samāśvāsyāptalocanau |

buddhau dharmapathe śuddhe śamadhāmni nyaveśayat || 116 ||



sārthabhraṣṭaścirāyāt kṛśo'pi svajanasya ca |

aluptasattvavibhavānnakṛpāspadatāṃ yayau || 117 ||



anukampasva yadyetaṃ saṃsārakleśavihvalam |

sataḥ kasyānukampyāste saṃpatsaṃparkanitspṛhāḥ || 118



paśupālakaviprastrīsaṃdeśādi yathoditam |

nigadya tebhyaḥ kanakaprāptipratyayalakṣaṇam || 119 ||



śāntaḥ kātyāyanaṃ prāpya pravrajyāṃ sa samādade |

mugdhānām yadviṣādāya tatprasādāya dhīmatām || 120 ||



sa samāsādya viśadaṃ sritaḥprāptiphalaṃ tataḥ |

sakṛdāgāmyanāgāmiphalamarhatphalaṃ tathā || 121||



traidhātuko vītarāgaḥ samaloṣṭāśmakāñcanaḥ |

ākāśapāṇitulyo'bhūdasicandanayoḥ samah || 122 ||



śrāvastyām veṇugahane jinaṃ jetavane sthitam |

bhagavantaṃ yayau draṣṭuṃ so'tha kātyāyanājñayā || 123||



praṇitātakṛtātithyaḥ prītyā bhagavatā svayam |

sa śroṇakoṭīkarṇo'tha babhāṣe harṣanirbharaḥ || 124|



bhagavān dharmakāyena dṛṣṭo'yaṃ śrotravartmani |

adhunā rūpakāyena puṇyairālokito mayā || 125 ||



analpasukṛtaprāpyamidaṃ taddarśanāmṛtam |

pītvā na tṛptimāyānti vañcitā eva te param || 126 ||



aspṛhasyāpi te mūrtiḥ kurute kasya na sphāt |

nirlopasyāpi te dṛṣṭiraho harṣeṇa limpati ||127 ||



tvatkathā tvadanudhyānaṃ tvatprāptistvanniṣevaṇam |

etāḥ kuśalamūlānāṃ sphītāḥ phalasamṛddhayaḥ || 128 ||



iti śrutvā bhagavatā prasādenābnhinanditaḥ |

tadādiṣṭaṃ śamārāmaṃ sa vihāramavāptavān || 129 ||



tasyāspadaṃ samabhyetya praṇayādbhagavānapu |

śrutvāsya madhuraṃ dharmaṃ svādhyāyaṃ praśaśaṃsa saḥ || 130 ||



tāṃ śroṇikoṭikarṇasya dṛṣṭvā praśamasaṃpadam |

bhikṣubhirbhagavān pṛṣṭaḥ pūrvavṛttamabhāṣata ||131||



vārāṇasyāṃ purā samyaksaṃbuddhe kāśyapābhidhe |

nirvāṇadhātau niḥśeṣakāryatvāt parinirvṛte || 132 ||



kṛkināmanṛpaścaityaṃ tasya ratnairakārayat |

svayaṃ tatpuṇyasaṃbharaṃ svargaṃ vaktumivodgatam || 133||



śīrṇasthāpitasaṃskāre tasmin saṃjñādhṛtaṃ dhanam |

tatputraḥ prāptarājyo'tha na dadau lobhamohitaḥ || 134||



athottarāpathāyātaḥ sarthavāho'rthadābhidhaḥ |

pradadau pṛthivīmūlyaṃ tatkṛte karṇabhūṣaṇam || 135||



kālāntaropagato'pi datvā cānyaddhanaṃ mahat |

praṇidhānaṃ sa kṛtavān bhūyāsaṃ puṇyavāniti || 136 ||



sa śroṇakoṭikarṇo'yaṃ puṇyaiḥ prātapadaṃ mahat |

tadvidhenaiva saṃyātaḥ karṇabhūṣaṇalakṣaṇaḥ || 137 ||



prasthānasamaye mātā śrāvitā paruṣaṃ vacaḥ |

yasmādanena tenāsya babhūvāsya śramo mahān || 138 ||



madhyeṣu mahataḥ śuklaguṇasatkarmavāsasaḥ |

kṛṣṇakarmalavāṃśo'pi sphuṭa evāvadhāryate || 139 ||



sukṛtasacivaḥ sattvetsāhaḥ pravāsasakhī dhṛtiḥ

viṣamataraṇe vīryaṃ seturvipadyadhikā kṛpā |

śamaparicitā paryante ca prasādamayī matiḥ

pariṇatiriyaṃ puṇyaprāpteḥ sphuratphalaśālinī ||140 ||



iti kṣemendraviracitāyām bodhisattvāvadānakalpalatāyāṃ

śroṇakoṭikarṇāvadānaṃ nāmonaviṃśatitamaḥ pallavaḥ ||