• Home
• Canon Text
• 18 śāriputrapravrajyāvadānam

18 śāriputrapravrajyāvadānam

Technical Details

18. śāriputrapravrajyāvadānam |



nedaṃ bandhunoṃ suhṛt sodaro vā

nedaṃ mātā na pitā vā karoti |

yatsaṃsārāmbhodhesetuṃ vidhatte

jñānācāryaḥ ko'pi kalyāṇahetuḥ || 1 ||



kalandakanivāsākhye ramye veṇuvanāśrame |

bhagavān viharan buddhaḥ pure rājagṛhe purā ||2 ||



kilitaṃ copayiṣyaṃ ca dvau parivrājakau purā |

prapannau bhikṣubhāvena cakāra śamasaṃvṛtau || 3 ||



tataśca śāriputrasya bhikṣoḥ saṃdeśanāṃ vyaghāt |

yayā sākṣātkṛtārhattvo so'bhūnmokṣagatikṣamaḥ || 4 ||



tasya tadadbhutaṃ dṛṣṭvā dhanārhaṃ sarvabhikṣubhiḥ |

papracchuḥ pūrvavṛttāntaṃ sa ca tebhyo vyabhāṣata ||5 ||



brāhmaṇasyāgnimitrasya bhāryā guṇavarābhavat |

śūrpiketi kṛtaṃ pitrā krīḍānāma ca bibhratī || 6 ||



bhrātā prathamaśīlākhyaḥ tasya śūrpasamābhidhaḥ |

pratyekabuddhatāṃ yātaḥ kadācid gṛhamāyayau || 7 ||

sa tayā bharturādeśād gṛhībhaktyādhivāsitaḥ |

praṇatipraṇayācāraistoṣitaḥ paricaryayā || 8 ||



kadāciccīvare tasya kurvāṇasya vipātraṇam (?) |

sūcīkarmavahād dṛṣṭvā praṇidhānaṃ samādadhe ||9 ||



yatheyaṃ kartarīṃ tīkṣṇā yathā gambhīragāmiṇī |

sūcī tathāparā prajñā mama syāditi sādarā || 10 ||



pratyekabuddhavinayāt praṇidhānena tena ca |

gatāsmin janmani saiva saprajñaśāriputratām || 11||



sa eṣa śāriputro'dya bhikṣuṣtīkṣṇatarāgradhīḥ |

kalyāṇapātratām yātaḥ kalpavallī hi sanmateḥ || 12 ||



vākyaṃ bhagavataḥ śrutvā papracchurbhikṣavaḥ punah |

kasmānnāṭyakule jātaḥ śāriputro narādhame ||13 ||



tatastān bhagavānūce pūrvasminneṣa janmani |

abhūnmahāmatirnāma rājaputraḥ satāṃ mataḥ || 14 ||



śrīmato'pi matistasya pravrajyāyāmajāyata |

paripākaprasannānāṃ kāluṣyāya na saṃpadaḥ || 15 ||



pravrajyā rājaputrāṇāṃ yūnāṃ naiva kulocitā |

ityuktvā janakaḥ prītyā taṃ yatnena nyavārayat ||16||



kadācit kuñjarārūḍhaḥ sa vrajan janavartmani |

dṛṣṭvā daridraṃ sthaviraṃ kāruṇyādidamabravīt ||17 ||



adhanyā dhanīno loke bandhubandhanayantritāḥ |

pravrajyāṃ nāpnuvantyeva tvaṃ tu kena nivāritaḥ ||18 ||



sa nyavedayanme daridrasya na pātraṃ na ca cīvaram |

dhanopakaraṇānyeva śamopakaraṇānyapi ||19 ||



rājasūnuriti śrutvā gatvā munitapovanam |

pravrajyāṃ kārayitvāsya pradadau pātracīvaram || 20 ||



so'cireṇaiva kāḻena yātaḥ pratyekabuddhatām |

rājaputraṃ samabhyetya divyāmṛddhimadarśayat ||21 ||



tasya prabhāvamālokya sa pradadhyau nṛpātmajaḥ |

aho mahodayatvānme pravrajyā durlabhābhavat || 22 ||



dāridyrādavivekācc nīcānāmapi durlabhā |

jāyeyamadhame kule tasmadasmi vivekavān ||23||



sa eva śāriputro'yaṃ jñātastatpraṇidhānataḥ |

pravrajito bhagavatā kāśyapenānyajanmani ||24||



tenāyaṃ niyamapraṇayavinayī samyakprasādodayā-

dādiṣṭaḥ kuśalāya satyanidhinā prajñāvatāmagraṇīḥ |

kāle śākyamunerbhaviṣyati mataḥ śiṣyatvayogādvaraṃ

maudgalyāyana eṣa cātra kathitaḥ saṃvinmayānāṃ vadaḥ ||25||



anyajanmani daridraḥ kārmikaḥ kenacidapi dayayā maharṣiṇā |

dattapātracīvaro'bhavaddarśitarddhirāsīdatulaprabhāvavān ||26||



iti kṣemendraviracitāṃ bodhisattvāvadānakalpalatāyāṃ

śāriputraprajajyāvadānam nāmāṣṭādaśaḥ pallavaḥ ||