• Home
• Canon Text
• 17 ādarśamukhāvadānam

17 ādarśamukhāvadānam

Technical Details

17 ādarśamukhāvadānam |



cittaprasādavimalapraṇayojjvalasya

svalpasya dānakusumasya phalāṃśakena |

hemādrirohaṇanagendrasudhābdhidāna-

saṃpatphalaṃ na hi tulākalanāmupaiti || 1 ||



purā manojñe sarvajñaḥ śrāvastyāṃ jetakānane |

anāthapiṇḍadārāme vijahāra mahāśayaḥ ||2 ||



āryo mahākāśyapākhyastacchiṣyaḥ karuṇānidhiḥ |

nagaropavanasyāntaṃ janacārikayā yayau || 3 ||



tatra sudrugatiryoṣinnagarāśravalambikā |

apaśyat kuṣṭharogārtā kāśyapaṃ taṃ yadṛcchayā || 4 ||



sā taṃ dṛṣṭvā prasādinyā śraddhayā samacintayat |

pātre'sya piṇḍapātārhā kiṃ na jātāsmi puṇyataḥ ||5 ||



vijñāya tasyā āścaryaśraddhāyuktaṃ manoratham |

prasārya pātraṃ jagrāha piṇḍaṃ taṃ karuṇākulaḥ || 6 ||



tīvracittaprasādena bhaktasārasamaraṇe |

kuṣṭhinyā nipapātāsyāḥ pātre śīrṇakarāṅguliḥ ||7 ||



tataḥ sā pātakamiva tyaktvānityakalevaram |

devānāṃ tuṣitākhyānāṃ nilaye samajāyata || 8 ||



śakrastadadbhutaṃ jñātvā dānapuṇypditādaraḥ |

yatnātkāśyapasatpātraṃ sudhayā samapūrayat || 9 ||



sudhārpaṇe'pyasau bhikṣurnispṛhastṛṇalīlayā |

praśamāmṛtasaṃpūrṇaścakre pātramadhomukham || 10 ||



bhajante praṇayaprītiṃ kṛpaṇeṣu kṛpākulāḥ |

santaḥ saṃpatsamādhmātavadane mīlitādarāḥ || 11 ||



śrutvā tāṃ tuṣite devanikāye niratām nṛpaḥ |

prasenajit bhagavataścakre bhojyādhivāsanām || 12 ||



rājñastasya gṛhe dṛṣṭvā lakṣmīmāścaryakāriṇaḥ |

āryānandena bhagavān pṛṣṭastatpuṇyamabhyadhāt || 13 ||



purā gṛhapateḥ sūnurdāridyrāddāsatāṃ gataḥ |

kṣetrakarmāṇi saṃsaktaḥ kṣutkṣāmaḥ klāntimāyayau || 14 ||



svajananyā samānītāṃ niḥsnehalavaṇāṃ cirāt |

kulmāṣapiṇḍimāsādya bhoktuṃ sādaramāyayau || 15 ||



dhautahastaḥ kṣaṇe tasmin saṃprāptāya yadṛcchayā |

dadau pratyekabuddhāya tām prasannena cetasā || 16 ||



jātaḥ sa eva kālena bhūpālo'yaṃ prasenajit |

tasya dānakaṇasyaivaṃ vibhūtiḥ prathamaṃ phalam ||17 ||



śrutveti bhagavadvākyaṃ bhikṣūrvismayamāyayau |

rājāpi vipulāṃ pūjāṃ cakre bhagavataḥ puraḥ ||18 ||



rājārhairakhilairbhogaiḥ kṛtvā bhaktinivedanam |

sa koṭīstailakumbhānāṃ dīpamālāmakalpayat ||19 ||



dīpamekaṃ dadau tatra svalpakaṃ durgatāṅganā |

snehakṣayātprayāteṣu sarveṣu na jagāma yaḥ || 20 ||



vicintya praṇidhānena tayā vimalacetasā |

bhāvinīm śākyamunitāṃ sarvajño'syāh samabhyadhāt || 21 ||



ratnadīpāvaliṃ datvā rājā bhagavataḥ purah |

upaviśya praṇamyāgre praṇayāttaṃ vajijñapat || 22 ||



bhagavatpraṇidhānena tattatpuṇyānubhāvataḥ |

na kasyānuttarā samyaksaṃbodhirbhavadarpitā || 23 ||



bhavatprasādapraṇayāt prāptumicchāmi tāmaham |

nirvikalpaphalāvāptyai sevyante kalpapādapāḥ || 24 ||



iti rājavacaḥ śrutvā bhagavān samabhāṣata |

durlabhānuttarā samyaksaṃbodhiḥ pṛthivīpate || 25 ||



sūkṣmā mṛṇālatantubhyo giribhyo'pi garīyasī |

samudrebhyo'pi gambhīrā sā sukhena na labhyate || 26 ||



na dānairbahubhirlabdhaṃ mayaivānyeṣu janmasu |

cittaprasādaviśadaṃ jñānaṃ tatkāraṇaṃ jaguḥ || 27 ||



caturdvīpādhipatyena mayā māndhātujanmani |

ciraṃ dānaphalaṃ bhuktaṃ bodhirnādhigatā tu sā || 28 ||



dānena cakravartīśrīḥ sā sudarśanajanmani |

bhuktā mayāmahīyasī bodhirnādhigatā tu sā || 29



purā datvā gajānaṣṭau velāmadvijajanmāni |

mayā prāptaṃ mahatpuṇyaṃ bodhirnādhigatā tu sā || 30 ||



kurūpaḥ kuśalātmāhaṃ rājaputraḥ purābhavam |

yaḥ piśāco'yamityuktvā nijalatnyā vivarjitaḥ || 31 ||



śriyai śrīskandho bhūtyāge prītiryasya sadā sthitā |

sa duḥkhī rūpavaikalyāt kka vā sarvaguṇodayaḥ || 32 ||



taṃ rūpavirahe dehatyāgārūḍhaṃ śacīpatiḥ |

divyacūḍāmaṇiṃ datvā cakre pañcaśaropamam || 33 ||



ṣaṣṭiḥ purasahasrāṇi tasya yajñeṣu yajvanaḥ |

hemayūpābhirūpāṇi prāpurmerubalaśriyam || 34 ||



tasmin mayātidānādrikṛte kuśalajanmani |

tāni puṇyānyavāptāni bodhirnādhigatā tu sā || 35 ||



mayā satyaprabhāveṇa triśaṅkunṛpajanmani |

kṛtā vṛṣṭiḥ sudurbhikṣā bodhirnādhigatā tu sā || 36 ||



mithilāyāṃ mahādevanṛpajanmani yajvanā |

mayāptā puṇyasaṃpattirbodhirnādhigatā tu sā || 37 ||



mithilāyāṃ purā puṇyaṃ nimibhūpālajanmani |

prāptaṃ dānatapoyaġyairbodhirnādhigatā tu sā || 38 ||



purā nandasya nṛpateścatvāraḥ piśunāḥ sutāḥ |

babhūvurādarśamukhaḥ pañcamaśca guṇādhikaḥ || 39 ||



kālenāpannaparyantaḥ sa bhūpatiracintayat |

ete madante catvāro rājyaṃ nārhanti karkaśāḥ || 40 ||



putre mamādarśamukhe rājyaśrī pratibimbitā |

suvṛtte labhate śobhāṃ prajñāvaimalyaśālini || 41 ||



dhyātvetyamātyān so'vādīt sa bhavadbhirnareśvaraḥ |

kṛto'ntaḥpuravargeṇa yo'bhyutthānena pūjyate || 42 ||



maulirna kampate yasya sameva maṇipādukaiḥ |

dvāradrumādrivāpīṣu nidhiṣaṭkaṃ sa paśyati || 43 ||



ityuktvā tridivaṃ yāte nṛpatau mantriṇaḥ kramāt |

taduktrairlakṣaṇaiścakrurādarśamukhamīśvaram || 44 ||



dharmanirṇayakāryeṣu yaṃ vādiprativādinah |

vilokyaiva svayaṃ tasthurnyāyairjayaparājaye || 45 ||



purā nirabhiasṃghena prātavaiśasakilbiṣam |

brāhmaṇaṃ daṇḍinaṃ nāma dayāluḥ prayayau puraḥ || 46 ||



guyugārthe gṛhasthena mṛtena vaḍavāhateḥ |

kuṭhārapātataḥ patnyā takṣavāsī vivāditaḥ || 47 ||



śauṇḍikenātmajavadhāddīkṣitaṃ tulyanigraham |

tadvipakṣabhayenoktvā tatsaṃtyaktaṃ vyamokṣayat || 48 ||



amānuṣāṇāṃ sattvānāmadhyāśayaviśeṣataḥ |

cakāra cittaśodhanaṃ tattatsaṃdehanirṇayam || 49 ||



avṛṣṭimṛṣṭe durbhikṣe yena dvādaśavarsake |

vihitaṃ sarvasattvānāmaśanaprāṇavartanam || 50 ||



ityamūnmama puṇyāptirādarśamukhajnmani |

na tu sā samyaksaṃbodhirvibodhitā mahodayā || 51 ||



bahujanmaśatābhyāsaprasāsena mahīyasā |

adya tu jñānavaimalyaṃ mayāptaṃ lutpasaṃvṛti || 52 ||



jñānaprajñādhigamyā kimapi paratarānuttarā satyāsṃvit

samyaksaṃbodhireṣā na ca khalu nṛpate labhyate dānapuṇyaiḥ |



mohaśyāmāvirāme gataghanagaganavyaktavaimalyabhājāṃ

nirvyājānandabhūmirbhavati bhavatamaśchedinī sā dinaśrīḥ || 53 ||



iti kṣemendraviracitāyām bodhisattvāvadānakalpalatāyāṃ

ādarśamukhāvadānaṃ nāma saptadaśaḥ pallavaḥ ||