• Home
• Canon Text
• 16 maitreyavyākaraṇāvadānam

16 maitreyavyākaraṇāvadānam

Technical Details

16 maitreyavyākaraṇāvadānam |



asaṃgamo nāma viśuddhidhāmo

śreyāṃsi sūte kuśalābhikāmaḥ |

saṃsāravāmaḥ sukṛtābhirāmo

manomalairvairarajovirāmaḥ || 1 ||



purā gaṅgāṃ samuttīrya nāgānāṃ phaṇasetunā |

bhagavān sugataḥ pāraṃprāpya bhikṣūnabhāṣata || 2 ||



iha ratnamayaḥ pūrvaṃ yūpo'bhūdadbhutadyutiḥ |

darśayāṃi tamatraiva draṣṭuṃ vaḥ kautukaṃ yadi || 3 ||



ityuktvā bhagavān bhūmau pāṇinā divyalakṣmaṇā |

spṛṣṭvā nāgagaṇotkṣiptaṃ ratnayūpadarśayat ||4 ||



taṃ dṛṣṭvā bhikṣavaḥ sarve nirnimeṣekṣaṇāściram |

babhūvuścitralikhitām iva niścalavigrahāḥ ||5 ||



tatkathāmatha taiḥ pṛṣṭaḥ provāca bhagavān punaḥ |

atītānāgatajñānaṃ dantālokaiḥ kirannivaḥ || 6 ||



devaputraḥ purā kaścit kāle svargaparicyutaḥ |

mahāpraṇādanāmābhūnnṛpatiḥ śakraśāsanāt || 7 ||



dharmavṛttānusaraṇasmaraṇāya mahītale |

ucitaṃ lakṣaṇaṃ kiṃcit sa yayāce śatakratum || 8 ||



tataḥ surapatervākyādviśvakarmā tadālaye |

bhāsvaraṃ vidadhe ratnayūpaṃ puṇyamivonnatam || 9 ||



tatastaddarśanāsakte jane kautukaniścale |

kṛṣyādikarmaṇyucchinne rāġyaḥ koṣakṣayo'bhavat || 10 ||



tatastena kṣitibhujā kṣipto'yaṃ jāhnavījale |

tiṣṭhatyadyāpi pātāle ratnaiḥ sūryairivācitaḥ || 11 ||



bhaviṣyatyasya kālena paricchinnaḥ parikṣayaḥ |

na tajjagati nāmāste pariṇāme yadakṣayam || 12 ||



āgāmisamaye puṃsāṃ varṣāśītisahasrake |

śaṅkhaśubhrayaśāḥ śaṅkho nāma rājā bhaviṣyati || 13 ||



puṇyalabdhamimaṃ yūpaṃ npaḥ kalpadrumopamaḥ |

sa purohitaputrāya maitreyāya pradāsyati || 14 ||



maitreyo'pyanmumādāya kṛtvā sapadi khaṇḍaśaḥ |

arthicintāmaṇirlokamadaridraṃ kariṣyati || 15 ||



yūpaṃ datvātha maitreyaḥ samyaksaṃbuddhatām gataḥ |

anuttarajñānanidhirbhaviṣyati surārcitaḥ || 16 ||



śaṅko rājā sahasrāṇāmaśītyā parivāritaḥ |

sāntaḥpurāmātyagaṇo rājāpi pravrajiṣyati || 17 ||



prāgjanmapraṇidhānena śaṅkhasya kuśalodayaḥ |

kṛtasyāvaśyabhogyatvātpariṇāme phaliṣyati || 18 ||



madhyadeśe purā rājā vāsavo vāsavopamaḥ |

dhanasaṃmatanāmā ca nṛpo'bhūduttarāpathe || 19 ||



tayorvibhavasaṃgharṣo bhūto vairāgnitaptayoḥ |

abhūd yuddhasamārambhasaṃbhārarabhasaṃ manah || 20 ||



nagaraṃ ca praviśyātha sametya dhanasaṃmataḥ |

cakre garajathānīkairgaṅgātīraṃ nīrantaram | 21 ||



tatra ratnaśīkhī nāṃa samyaksaṃbuddhatām gataḥ |

dṛṣṭastenārcyāmānāṅghrirbrahmaśakrādibhiḥ suraiḥ || 22 ||



so'cintayadaho rājā vāsavaḥ pṛthipuṇyavān |

viṣayānte vasatyeṣ ayo hi tridaśavanditaḥ || 23 ||



tatastasyānubhāvena tatra bhūpālayostayoḥ |

yayau vairarajaḥ śāntyā mithyāmohaparikṣayam || 24 ||



kṝtasaṃghiḥ pareṇātha vāsavaḥ pṛthivīpatiḥ |

bhagavantaṃ samabhyetya sarvabhogaurapūjayat || 25 ||



praṇidhānaṃ ca vidadhe pūjānte praṇamāmi tam |

ahaṃ kuśalamūlena syāmetena mahāniti || 26 ||



asminnavasare ghore śankhaśabde samudgate |

provāca taṃ ratnaśikhī praṇataṃ purataḥ sthitam || 27 ||



śankho nāma mahīpālaścakravartī bhaviṣyasi |

paryante bodhiyuktaśca kuśalaṃ samāvāpsyasi || 28 ||



evaṃ satpraṇidhānatah kṣitipatiḥ puṇyodayādvāsavaḥ

śaṅkho nāma nṛpa sa ratnaśikhinādiṣṭaḥ śriyaṃ prāpsyati |

maitreyaḥ praṇayātkariṣyati tathā bodhau viśuddhāṃ dhiyaṃ

kalyāṇābhiniveśapuṇyataraṇirāḍya hi satsaṃgamaḥ || 29 ||



iti kṣemendraviracitāyām bodhisattvāvadānakalpalatāyāṃ

maitreyavyākaraṇāvadānaṃ nāma ṣoḍaśaḥ pallavaḥ ||