• Home
• Canon Text
• 15 śilānikṣepāvadānam

15 śilānikṣepāvadānam

Technical Details

15 śilānikṣepāvadānam |



balabhatuladhairyavīryaṃ sāścaryaṃ bhavati saprabhāvāṇām |

mahadāśrayayogādyasmai sarvaṃ mahimatvamāyāti || 1 ||



purā kuśīpurīṃ ramyāṃ mallānāṃ balaśālinām |

svecchāvihārī bhagāvān pratasthe sugataḥ svayam || 2 ||



te tadāgamanaṃ śrutvā kalyāṇaṃ kuśalaiṣiṇaḥ |

vartmasaṃśodhanaṃ cakrurupacārapadodyatāḥ || 3 ||



deśaṃ bhūṣayatāṃ teṣāṃ saṃsiktaṃ candanodakaiḥ |

tṛṇakaṇṭakapāṣāṇasarkarāreṇuvarjitam || 4 ||



madhye samāyayau bhūminimagnā mahatī śilā |

avasannā visannā ca vadhūrvindhyagireriva || 5 ||



tāmutpāṭayatāṃ teṣāṃ kuddālabhujarajjubhiḥ |

māso jagāma na tvasyāḥ sahasrāṃśe'pyabhūta kṣatiḥ || 6 ||



atha samsārasaṃtāpapraśamāmṛtadīdhitiḥ |

āyayau bhagavān sarvamānasollāsabāndhavaḥ || 7 ||



ghanāndhakāravirativyaktasatphaladarśanaḥ |

prasādasaṃvibhaktāśaḥ prakāśa iva śāradaḥ || 8 ||



sa tān dṛṣṭvā pariśrāntān viphalakleśapiḍāītān |

śrutvā ca tadvyavasitaṃ tānūce praṇatānanān || 9 ||



aho kleśaphalārambhaḥ prayāsavyavasāyinām |

saṃsārakarmaṇīvāsmin vyāpāre vaḥ samudyamaḥ || 10 ||



prārambhe viṣamakleśaṃ kriyamāṇaṃ sasaṃśayam |

siddhamapyanupādeyaṃ na prājñāḥ karma kurvate ||11 ||



ityuktvā caraṇāṅguṣṭhaghaṭṭitām vāmapāṇinā |

vinyasya dakṣiṇe pāṇau bhagavān vipulāṃ śilām || 12 ||



visṛjya brahamlokāntamaparyantaparākramaḥ |

cacārāścaryacaryāyāṃ dūtamiva jagattraye || 13 ||



kṣiptāyāṃ sahasā tasyām tenātyadbhutakāriṇā |

udabhūdganodbhūta iva vyāptajanaḥ svanaḥ || 14 ||



anityaḥ sarvasaṃskāra ityabhrāntavidhāyinaḥ |

sarvadharmā nirātmānaḥ śāntanirvāṇameva tat || 15 ||



iti sphuṭodite śabde śilā bhagavataḥ kare |

girīndraśīrṣakākārā sthitā punaradṛśyata || 16 ||



kṣaṇena sā bhagavatā kṣiptā vadanamārutaiḥ |

kṛtā visāriṇī dikṣu paramāṇuparaṃparā || 17 ||



punarekīkṛtāmeva bhagavān paramāṇubhiḥ |

śilāmanyatra nidadhe vismayaṃ ca jagattraye || 18 ||



āścaryaniścaladṛśastato mallā balirjitam |

vīryaṃ bhagavato vīkṣya praṇatāstaṃ babhāṣire ||19 ||



aho mahāprabhāvo'yaṃ balavīryodayastava |

niścayādhigame yasya na pragalbhāḥ surā api || 20 ||



anugrahapravṛttena balena guruṇā tava |

adhogatinimagneyaṃ janateva dhṛtā śilā || 21 ||



vīryaprajñābalādīnām pramāṇāvadhiniścayam |

api jānāti te kaścidāścaryatarakāriṇaḥ || 22 ||



iti bruvāṇānāścaryaniścalānavalokya tān |

tasyāṃ śilāyāmāsīnaḥ provāca bhagavān jinaḥ || 23 ||



ekībhūtabalaṃ yaddhi bhūtānām bhuvanatraye |

sugatasya tadekasya loke naiva samaṃ balam || 24 ||



ambhāṃsi kumbhairambhodherjaganti paramāṇubhiḥ |

śakyānyalaṃ laṅghayituṃ prabhāvo na tu saugataḥ || 25 ||



saṃkhyāṃ sumeroryo vetti tulāmānena tattvataḥ |

sugatānām na jānāti so'pi sudguṇagauravam || 26 ||



kathayitveti bhagavān saṃprāpte suramaṇḍale |

saśakrapadmanilaye cakre kuśaladeśanam || 27 ||



mallāstadupadeśena tattadbodhisamāśrayāt |

saśrāvakākhyāṃ pratyekasamyaksaṃbuddhatāṃ yayuḥ || 28 ||



srotaḥprāptiphalaṃ kauścitsakṛdāgāmi cāparaiḥ |

anāgāmiphalaṃ cāṇyaiḥ prāptamarhatpadaṃ paraiḥ || 29 ||



ityāśyayānuśayadhātugatiṃ nirīkṣya

jñātvā tathāprakṛtimapratimopadeśam |

teṣāṃ cakāra bhagavāṃścaturāryasatya-

samyakprakāśaviśadaṃ kuśalodayāya ||30 ||



iti kṣemendraviracitāyāṃ bodhisattvāvadānakalpalatāyāṃ

śilānikṣepāvadānaṃpañcadaśaḥ pallavaḥ ||