• Home
• Canon Text
• 13 pratihāryāvadānam

13 pratihāryāvadānam

Technical Details

13 pratihāryāvadānam ||



yaḥ saṃkalpapathā sadaiva carati prpjjṛmbhamāṇādbhutaṃ

svapnairyasya na saṃgatiḥ paricayo yasminnapūrvakramaḥ |

vāṇī maunavatī ca yatra hi nṛṇāṃ yaḥ śrotranetrātithi-

staṃ nirvyājajanaprabhāvavibhavaṃ manaurameyaṃ numaḥ || 1 ||



pure rājagṛhābhikhye bimbirāseṇa bhūbhujā |

pūjyamānaṃ jina dṛṣṭvā sthitaṃ veṇuvanāśrame ||2 ||



mātsaryaviṣasaṃtaptā mūrkhāḥ sarvaġyamāninaḥ |

na sehire tadutkarṣaṃ prakāśamiva kauśikāḥ || 3 ||



malinaiḥ svavināśāya parabhāgoditaiḥ sadā |

kriyate vāsaraspardhā śārvaraistimirotkaraiḥ || 4 ||



maskarī saṃjayī vairairajitaḥ kakudastathā |

pūraṇajñātiputrādyā mūrkhāḥ kṣapaṇakāḥ pare || 5 ||



ūcurnṛpatimabhyetya māramāyāvimohitāḥ |

saṃgharṣadveṣadoṣeṇa dhūmenevāndhakāritāḥ ||6 ||



eṣa sarvajñatāmānī vane yaḥ śramaṇaḥ sthitaḥ |

ṛddhiprabhāvo bhavatā tasyāsmākaṃ ca dṛśyatām ||7 ||



ṛddhiprabhāvādyatkiṃcit janavyāvarjanorjitam |

drśyate mahadāścaryaṃ prātihāryaṃ taducyate || 8 ||



śaktiḥ saṃsadi yasyāsti pratihāryasya darśane |

asmākaṃ tasya vā rājan pūjāḥ santu jagatrtraye || 9 ||



iti teṣām vacaḥ śrutvā taddarpavimukho nṛpaḥ |

uvāca vāñchā keyaṃ vaḥ paṅgūnāṃ girilaṅghane ||10 ||



asamañjasamevaitat kā spardhāgneḥ pataṅgakaiḥ |

naitadvācyaṃ punarvādī mayā niṣkāsyate purāt ||11 ||



iti rājñā guṇajñena pratyākhyātodyamāḥ khalāḥ |

prayayuste nirālambe lambamānā ivāmbare || 12 ||



bimbisāro narapatirmūrkhatāpakṣapātavān |

anyaṃ vrajāmo bhūpālamiti te samacintayan || 13 ||



atrāṇtare bhagavati śrāvastīmabhitaḥ purīm |

prāpte tejavanārāmaṃ digantāneva te yayuḥ || 14 ||



te prasenajitaṃ tatra prāpya kosalabhūpatim |

prātihāryakṛtaspardhāṃ tāmevāsmai nyavedayan || 15 ||



guṇāntarajño nṛpatisteṣām darpakṣayecchayā |

ṛddhisaṃdarśanotsāhādyayau bhagavato'ntikam || 16 ||



sa samabhyetya vinayāt praṇipatya tamabravīt |

bhagavan darpabalanaṃ tīrthyānāṃ kartumarhasi || 17 ||



ṛddhispardhānubandhena tvatprabhāvadidṛkṣayā |

svaguṇaślāghayāsmākaṃ taiḥ karṇau badhirīkṛtau || 18 ||



prakāśaya nijaṃ tejaḥ sajjanāvarjanam vibho |

trthyābhidhānāmakhilaṃ prayātu pralayaṃ tamaḥ || 19 ||



iti rājavacaḥ śrutvā nirvikāro mahāśayaḥ |

bhagavān viratāmarṣaḥ saharṣastamabhāṣataḥ || 20 ||



rājannānyopamardāya vivādāya madāya vā |

vivekābharaṇārho'yaṃ kriyate guṇasaṃgrahaḥ || 21 ||



mātsaryamalinaiḥ kiṃ tairvicāraviguṇairguṇaiḥ |

ye haranti parotkarṣaṃ spardhābandhaprasāritāḥ || 22 ||



guṇācchādanamanyasya svaguṇena karoti yaḥ |

dharmastenāpraśastena svayameva nighātitaḥ ||23 ||



sadguṇānāṃ parikṣaiva paravailakṣyakāriṇī |

ucitā na hi śuddhānāṃ tulārohaviḍambanā || 24 ||



guṇavānapi nāyāti yaḥ pareṣu prasannatām |

sa dīpahastastatpātracchāyayā malinīkṛtaḥ || 25 ||



loka ta eva sarvajñā vidmaḥ kimadhikaṃ vayam |

parābhimānābhibhavaprāgalbhyaṃ svaparābhavaḥ ||26 ||



iti śrutvā bhagavataḥ praśamābhimataṃ vacaḥ |

bhṛśamabhyarthanāṃ rājā cakārāścaryadarśane || 27 ||



tataḥ dṛcchrādbhagavatā kṛtābhyupagamo nṛpaḥ |

rājadhānīṃ yayau hṛṣṭaḥ saptāhāvadhisaṃvidā || 28 ||



asminnavasare bhrātā bhūmibharturasodaraḥ |

cacārāntaḥpuropānte prāsādatalavartmanā || 29 ||



salīlaṃ vrajatastasya karmavātairiveritā |

kusumasrak papātāṃse rājapatnīkarāccyutā || 30 ||



tasya vijñātadoṣasya doṣaṃ saṃbhāvya sākṣibhiḥ |

piśunāḥ kiṃvadantīṃ tām cakrire rājagāminīm ||31 ||



chidramalpamapi prāpya kṣudrāḥ sarvāpakāriṇaḥ |

dvijihvāḥ praviśantyāśu prabhūnāṃ śūnyamāśayam || 32 ||



piśunapretiro rājā bhrāturīrṣyāviṣolbaṇaḥ |

chedamasyādideśāśu pāṇipādasya mūrcchitaḥ || 33 ||



nikṛttapāṇicaraṇaḥ kumāraḥ karmaviplavāt |

sa vadhyavasudhāśāyī viveśa viṣamāpadam || 34 ||



tīvravyathāparivṛtaṃ śocadbhirmātṛbandhubhiḥ |

dadṛśustaṃ kṣapaṇakāḥ kṣaṇaṃ nayanacālane || 35 ||



tān samabhyetya śokārtāste rājasutabāndhavāḥ |

jagadustatparitrāṇasaṃliptāḥ sarvaprāṇinah || 36 ||



doṣaṃ nigṛhīto'yaṃ kālanāmā nṛpātmajam |

sarvaġyavādino yūyaṃ prasādo'sya vidhīyatām || 37 ||



iti tai prasaradbāṣpairarthyamānāh pralāpibhiḥ |

te maunino niṣpratibhā vailakṣyādanyato yayuḥ || 38 ||



atha tena yathāyāto bhikṣuḥ sugataśāsanāt |

ānando vidadhe'ṅgāni tasya satyopayācanāt || 39 ||



rājaputrastu saṃjātapāṇipādaḥ prasannadhīḥ |

jinaṃ śaraṇamabhyetya tadupasthāyako'bhavat || 40 ||



saptaratre vyatīte'tha śrāntihāryaṃ gṛhaṃ mahat |

ṛddhiṃ bhagavato draṣṭuṃ mahīpatirakārayat || 41 ||



upaviṣṭe nṛpe tatra saha kṣapaṇakādibhiḥ |

kalpavṛkṣīkṛtā bhūmirabhavat sugatecchayā ||42 ||



tataḥ prāpteṣu deveṣu draṣṭuṃ bhagavataḥ prabhām |

ratnapradīpaṃ bhagavān bheje siṃhāsanam mahat || 43 ||



tejodhātuṃ prapannasya tasya gaṇḍasamudgataiḥ |

vyāptaṃ pāvakasaṃghātairabhūdbhuvanamaṇḍalam || 44 ||



śānte śanaiḥ kamalakānanasaṃnikāśe

vahnau samastabhuvanasthitibhaṅgabhītyā |

dehāttato bhagavataḥ karuṇāmburāśeḥ

pūrṇāmṛtormivimalā rucayaḥ prasasruḥ || 45 ||



lāvaṇyasāramaticandrasahasrakāntiṃ

tejaḥ pratānaviphalīkṛtasūryacakram |

taṃ nāganāyakanikāyavilocanāni

prītyā papuḥ sukṛtalabdhamapūrvaharṣam || 46 ||



vaidūryanālavipulāruṇaratnapātra-

kāntollasatkanakakesarakarṇikāni |

abhyudyayuḥ kṣititalādatha tatsamīpe

padmāni saurabhabharāhṛtaṣaṭpadāni || 47 ||



teṣūpaviṣṭamatha kāñcanacārukāntiṃ

snigdhekṣasṇaṃ sugatacakramadṛśyatārāt |

pīyūṣapeśalaśaśidyutiśītalena

yasyodayena sahasā sukhamāpa lokaḥ || 48 ||



teṣāṃ prabhāvavibhavaṃ bahgavān babhāra

madhye'dhikaṃ kanakaśaila ivācalānām |

suskandhabandhuraghanadyutisaṃniveśaḥ

prāṃśuḥ surakṣitiruhāmiva pārijātaḥ || 49 ||



svargāṅganākarakuśeśayakīryamāṇai-

ramlānamālyavalayaiḥ kalitottamāṅgāḥ |

tasyānanāmbujavilokananirnimeṣe

martyā api kṣaṇamavāpuramartyabhāvam || 50 ||



vyomāṅgaṇeṣu suradundubhiśaṅkhatūrya-

ghoṣāvṛtaḥ kusumavarṣamahāṭṭahāsaḥ |

gandharvakinnaramunīśvaracāraṇānāṃ

sphīṭaścacāra bhagavatstutivādanādaḥ ||51 ||



tatrāruṇādharadalāddaśanāṃśuśubhrād

vyākīrṇakeśarakulāddaśanāravindāt |

satsaurabhaṃ bhagavataḥ svarasaṃnivṛttaṃ

dhanyāḥ papurmadhuravāṅbhadhu puṇyasūtam || 52 ||



pāpaṃ vimuñcata niṣiñcata puṇyabījaṃ

vairaṃ parityajata sāmyasukhaṃ bhajadhvam |

jñānāmṛtaṃ pibataṃ mṛtyuviṣāpahāri

neyaṃ tanuḥ kuśalakarmasakhī cirāya || 53 ||



lakṣmīścalā taruṇatā ca jarānuyātā

kāyo'pyapāyanicayasya nivāsa eva |

prāṇāḥ śarīrakakuṭiṣu muhūrtapānthā

nityodaye kuruta dharmamaye prayatnam || 54 ||



ityādibhirbhagavataḥ pravibhaktadīpta-

jñānairvivekavimalaiḥ kuśalopadeśaiḥ |

vajrairivāśu dalanaṃ prayayau janānāṃ

satkāyadṛṣṭisamaviṃśatiśṛṅgaśailaḥ || 55 ||



ṛddhiprabhāṃ bhagavataḥ pravibhāvya tīrthyā

mantrahatā viṣadharā iva bhagnadarpāḥ |

dīpā ivārkakiraṇapratibhābhibhūtā-

ścitrārpitā iva yayuściraniścalatvam || 56 ||



atrāntare bhagavataḥ satataṃ vipakṣaḥ

sarvātmanā kṣapaṇako navadharmayakṣaḥ |

kṣiptaśravān sa vṛtavarṣavaraiścakāra

vidravya randhraśaraṇān bhuvi vajrapāṇiḥ || 57 ||



addiśya tānatha kṛpārdrabhayāśaraṇyaḥ

sarvopadeśaviṣayān bhagavān babhāṣe |

bhūbhṛdvanābanimaṇirvivarādi sarvaṃ

tene bhayeṣu śaraṇaṃ kila kātarāṇām || 58 ||



buddhiṃ prabodha mama dhāmbi nidhāya buddhiṃ

dharmaṃ sasaṃghamapi ye śaraṇaṃ prapannāḥ |

teṣā jagatkṣayabhayeṣvapi nirbhayāṇāṃ

naivānyataḥ śaraṇadainyaparigraho'sti || 59 ||



durvāre paralokatīvratimire dharmaḥ pravṛddho'sumān

dānaṃ duḥsahapāpatāpavipadāmabhyudgame vāridaḥ |

prajñā mohamahāprapātaviṣamaśvabhre karālambanaṃ

dainyākrāntamahīnameva śaraṇaṃ sarvatra puṇyaṃ nṛṇām || 60 ||



iti timiravṛtākṣṇāṃ cakhurunmīlanārhaṃ

daśanamaṇimarīcivyajyamānaprakāśam |

sadasi sugatacandraḥ śuddhadharmopadeśaṃ

sthirapadamiva kṛtvā kānanaṃ svaṃ jagāma || 61 ||



iti kṣemendraviracitāyāṃ bodhisattvāvadānakalpalatāyāṃ

prātihāryāvadānaṃ nāma trayodaśaḥ pallavaḥ ||