• Home
• Canon Text
• 11 virūḍhakāvadānam

11 virūḍhakāvadānam

Technical Details

11 virūḍhakāvadānam |



ārohati padamunnatamamalamatirvimalakuśalasopānaiḥ |

narakakuhareṣu nipatati malinamatirghoratimireṣu || 1 ||



śākyānāṃ nagare pūrvaṃ sphīte kapilavāstuni |

mahataḥ śākyamukhyasya sumukhī dāsakanyākā || 2 ||



śāstre kṛtaśramā sarvakalākauśalaśālinī |

mālikā nāma kāmasya mālikeva guṇocitā || 3 ||



prabhorgirā varodyāne kusumāvacayodyatā |

bhramantaṃ taṃ samāyāntaṃ dadarśa sugataṃ puraḥ || 4 ||



tasyānte'syāstamālokya prasannamabhavanmanaḥ |

śaratkāla iva svacchaḥ prasādayati mānasam || 5 ||



sācintayattadā lokaprītyā dṛḍhīkṛtāspadā |

sukṛtaiḥ piṇḍapātaṃ me gṛhṇīyādbhagavānapi || 6 ||



vijñāya tasyāh sarvaġyaḥ saṃkalpaṃ karuṇākulaḥ |

prasārya pātraṃ bhagavān bhadre dehītyuvāca tām || 7 ||



datvā praṇamya sā tasmai paripūrṇamanorathā |

praṇidhānaṃ pravidadhe dāsyaduḥkhanivṛttaye || 8 ||



tataḥ kadācidāyātaḥ pituastasyāḥ sakhā dvijaḥ |

naumittikastaṃ pradeśaṃ dṛṣṭvā tām vismito'va dat || 9 ||



aho gṛhapatestasya putrī tvaṃ śrīmatah sutā |

bandhuhīnā gatā dāsyaṃ dhanabhogavivarjitā || 10 ||



aho mohaghanārambhakṣaṇoddyotanavidyutaḥ |

saṃsārasarparasanāvilāsacapalāḥ śriyaḥ || 11 ||



gamyānāṃ mā kṛthāścintāṃ jāne'haṃ hastalakṣaṇaiḥ |

acireṇaiva bhūbharturvallabhā tvaṃ bhaviṣyasi || 12 ||



idaṃ paśyāmi te pāṇau lakṣmīkamalakomale |

mālācakrāṅkuśākāramityuktvā prayayau dvijaḥ || 13 ||



atha manmathasaṃbhogasuhṛnmadhupabāndhavaḥ |

latāliṅganasaubhāgyabhavyo'dṛśyata mādhavaḥ || 14 ||



madhoḥ kesariṇastasya kāntāmānadvipadviṣaḥ |

vibabhau jihmamānasya jihvevāśokamañjarī || 15 ||



bālākapolalāvaṇyacauraścampakasaṃcayaḥ |

sudṛśāṃ keśapāśeṣu yayau bandhanayogyatām || 16 ||



sahakārairvirahiṇīnidhanaṃ vidadhe madhu |

nirapekṣāparavadhe vidhurāḥ prabhaviṣṇavaḥ || 17 ||



yayurmadhulihāṃ cūtalatā nirbharabhogyatām |

sahasauva vidgadhānāmiva mugdhavibhūtayaḥ || 18 ||



rūtāyudhaścūtalatācāpanyastaśilīmukhaḥ |

jayatīti jagau bandī kandarpasyeva kokilaḥ || 19 ||



asminnavasare śrīmān kosalendraḥ prasenajit |

mṛgayānirgato'śvena hṛtastaṃ deśamāyayau || 20 ||



dhanvīmanobhavākāraḥ so'vatīrya turaṃgamāt |

dadarśānanyalāvaṇyām kanyāṃ ratimivāparām || 21 ||



tadvilokanavistīrṇaṃ manastasya mahātmanaḥ |

vismayāddṛṣṭimārgeṇa praviveśa manobhavaḥ || 22 ||



tāṃ lajjāvanatāṃ dṛṣṭvā sahasodbhūītasādhvasām |

acintayannarapatiḥ kāntikallilinīhṛtaḥ || 23 ||



keyaṃ navā śaśimukhī śyāmā taralatārakā |

yatkāntiraniśaṃ netraśatapatravikāśinī || 24 ||



bakulāmodavibhrāntabhramare pāṭalādhare |

kāntaṃ vasantaṃ paśyāmi mukhe'syāḥ kumudāyudham || 25 ||



aho lāvaṇyamamlānaṃ tāruṇyābharaṇaṃ tanoḥ |

dhīrasyāpi dhṛtieyena śaṇ



ahi nu madhumañjaryāḥ prārambhe'pyadbhuto guṇaḥ |

yena gantuṃ na śaknoti ṣaṭpado'pi padātpadam || 27 ||



iti saṃcintya bhīpālastāṃ matvā vanadevatām |

pṛṣṭvā viveda tadvṛttaṃ krameṇa kathitaṃ tayā || 28 ||



tatastatra kṛtātithyastayā pallavavījanaiḥ |

śuciśītaiśca salilaiḥ prāptavān nirvṛtiṃ nṛpaḥ || 29 ||



śrāntaḥ saṃvāhane tasya tayā caraṇapadmayoḥ |

kṛte karāptasaṃsparśe sa nidrām sahasā yayau || 30 ||



kṣaṇena pratibyddho'tha viśrāntamṛgayāśramaḥ |

divyasparśena tām mene ratiṃ rūpāntarāgatām || 31 ||



mahānapi tataḥ śākyaḥ saṃprāptaṃ kosaleśvaram |

śrutvā taṃ deśamabhyetya pūjārhaṃ tamapūjayat || 32 ||



sādareṇārthitāṃ tena svasutāmiva mālikām |

ratnārhāya dadau tasmai smaramaṅgalamālikām || 33 ||



tāmādāya manojanmavaijayantīṃ sitasmitām |

nijaṃ jagāma nagaraṃ gajamāruhya bhūpatiḥ || 34 ||



tasminnāganagotsaṅge sā lolālakaṣaṭpadā |

babhau rājavasantena saṃgatā navamālikā || 35 ||



rājadhānīṃ samāsādya sundaryā sahitastayā |

ratnaharmyakarodāramandire vijahāra saḥ || 36 ||



varṣākārābhidhā devī rājñaḥ prathamavallabhā |

abhinnavṛttiṃ tām mene rājalakṣmīmiva kṣitiḥ || 37 ||



divyasparśena sā tasyāḥ sā cāsyā rūpasaṃpadā |

parasparaguṇotkarṣātparaṃ vismayamāpatuḥ || 38 ||



divyarūpavatī jyeṣṭhā divyasparśavatī par ā|

iti pravādaḥ sāścaryastayuorlokeṣu paprathe || 39 ||



atrāntare tayordivyarūpasaṃsparśakāraṇam |

āśrame bhikṣubhiḥ pṛṣṭaḥ provāca bhagavān jinaḥ || 40 ||



purā śrutavarākhyasya dvijasya gṛhamedhinaḥ |

kāntā śirīṣikā ceti priye bhārye babhūvatuḥ || 41 ||



sa kadācidatho kāntābhrātā pravrajyayā śanaiḥ |

pratyekabuddhatāṃ yātaḥ svasurbhavanamāyayau || 42 ||



traimāsikopacāreṇa sa tayā patyurājñayā |

bhaktyā nimantritastasthau tatsaptnyāvapūjitaḥ || 43 ||



te cārumṛdubhirbhogaistamabhyarcyānyajanmani |

jāte'dhunā cārurūpadivyasaṃsparśasaṃyute || 44 ||



kṛṣṭeṣu prathamaṃ prayuktavinayāmādāya gosaṃpadaṃ

satkṣetreṣu tapaḥ pratatptanuṣu prāptiṣvatisvādutām |

yatkāle śubhabījamuptamucitaṃ satkarmaśakteḥ paraṃ

bhujyante phalasaṃpadaḥ sumatibhistasyaiva pākojjvalāḥ || 45 ||



iti sarvajñavacanam tathyamākarṇya bhikṣavaḥ |

tattatheti viniścitya babhūvuḥ śāntisaṃśrayāḥ || 46 ||



atha kālena bhūbharturmālikāyāmabhūtsutaḥ |

virūḍhaketimukhyākhyo vidyāsu ca kṛtaśramah || 47 ||



priyastulyavayāstasya purohitasuto'bhavat |

māturduḥkhena jātatvādviśruto duḥkhamātṛkaḥ || 48 ||



kadācit sahitastena hayārūḍho virūḍhakah |

prāpa śākyavarodyānaṃ mṝgayāyām vinirgataḥ || 49 ||



nyakkāraṃ cakrire tatra śākyāstasyodyatāyudhāḥ |

ayaṃ dāsīsuto'smākamiti darpapravādinah || 50 ||



gatvāsau svapuraṃ teṣāṃ vairaṃ darpyamacintayat |

kuladarpāpavādo hi śalyatodaḥ śarīriṇām || 51 ||



tasya nirdahyamānasya tatpratīkāracintayā |

rājyāya jātā janake jīvatyapi parā sphā || 52 ||



sa cārāyaṇamukhyānāṃ mantriṇāṃ śatapañcakam |

svavaśaṃ piturākṛṣya vidadhe bhedayuktibhiḥ || 53 ||



tataḥ kadācitsaṃjātavivekaḥ pṛthivīpatiḥ |

dharmopadeśaśravaṇe vardhamānādaraḥ param || 54 ||



cārātyaṇagṛhītāśvaṃ rathamāruhya saṃyataḥ |

draṣṭuṃ jagāma sarvajñaṃ bhagavantam prasenajit || 55 ||



prāyāśramaṃ bhagavataḥ kṛtvā pādābhivandanam |

dharmānvayam sa śuśrāva tatprasādaprasannadhīḥ || 56 ||



cārāyaṇo'pyāśu gatvā rathena nagaraṃ javāt |

akarodantare tasmin rājaputrābhiṣecanam || 57 ||



bhagavantamathāmantrya nṛpatirgantumudyataḥ |

dadarśa nānugānagre na rathaṃ na ca mantriṇam || 58 ||



sa padbhyāmeva śanakaiḥ prasthitām pṛthivīpatiḥ |

dūrādapaśyadāyāntīṃ varṣākārāṃ samālikām || 59 ||



te pṛṣṭvā tadgirā jñātvā so'bhiṣiktaṃ virūḍhakam |

visasarja sutaiśvaryaparibhogāya mālokām || 60 ||



varṣākārāṃ samādāya sa mitrasya mahīpateḥ |

ajātaśatrornagaraṃ prāta rājagṛhābhidham || 61 ||



sa tatptaśchatravirahāt kṣuptipāsāśramānvitaḥ |

yayau vamanniva śvāsaṃ dīrgheśvāramamārutaiḥ || 62 ||



sukhamaskhalitaṃ kena prāptaṃ kasyāyurāyatam |

na kasyānupadaṃ dṛṣṭaḥ kṣayaḥ sapadi saṃpadaḥ || 63 ||



sa jīrṇamūlakaṃ bhuktvā karmamūlamivāyatam |

kṣaṇaṃ pītvā ca pānīyaṃ papātāptaviṣūcikaḥ || 64 ||



anityatāmavijñāya mohāya patate janah |

sa cāpāyanikāyasya kāyasyopāyatṛṣṇayā || 65 ||



ajātaśatruḥ śrutvaiva kosaleśvaramāgatam |

abhyetya pāṃśupūrṇāsyaṃ vigatāsuṃ dadarśa tam || 66 ||



tasya jāyānuyātasya sa kṛtvā dehasatkriyām |

bhagavantaṃ yayau druṣṭuṃ sugataṃ duḥkhaśāntaye || 67 ||



sa taṃ praṇamya provāca bhagavan kosaleśvaraḥ |

puraṃ me suhṝdaḥ prāya nirdhano nidhanaṃ gataḥ || 68 ||



dhiṅbhāmasaṃpadaṃ pāpaṃ mihādayaśasaḥ padam |

vibhavo yena naivāyaṃ mitropakaraṇīkṛtaḥ || 69 ||



hṛdaye viniveśyāśāṃ prāptaḥ suhṝdamāpadi |

suhṛnnaiṣphalyamāyāti yasya kiṃ tena jīvatā || 70 ||



mitropakaraṇaṃ lakṣmīrdīnopakaraṇam dhanam |

bhītopakaraṇaṃ prāṇā yeṣāṃ teṣāṃ sujīvitam || 71 ||



kukarma kiṃ kṛtaṃ tena bhagavan ūrvajanmani |

yasya pākena paryante prapede so'tidurdaśām || 72 ||



iti pṛṣṭaḥ kṣitīśena bhagavān sāśrucakṣuṣā |

tamūce tāpaśamanīṃ diśan daśanacandrikām || 73 ||



mā śucaḥ pṛthivīpāla svabhāve|yaṃ bhavasthitaḥ |

evaṃvidhaiva bhāvānāmasatyānāmanityatā || 74 ||



visārisaṃsāravanāntare'smin

nisargalolaḥ kila kāmabhṛṅgaḥ |

svacchandajātajanapuṣkarajīvapuñja -

kiñjalkapuñjamaniśaṃ kavalīkaroti || 75 ||



taraṅganto bhogāścakitahariṇīlocanacalāḥ

kṣaṇe'lakṣyā lakṣmīrjanajaladavidyotanataḍit |

śarīrābje bālātapacapalarāgaṃ navavayaḥ

kṣayaṃ yāti kṣipraṃ bhavamarūtaṭe jīvitakaṇaḥ || 76 ||



mano maitrīpātraṃ parahitaratirdharmadhanatā

madodbhedacchedakṣamaśamavicāre paricayaḥ |

ayaṃ tatvānveṣo viṣayasukhavaimukhyasukhinā-

masāre saṃsāre parihṛtavikāraḥ paribhavaḥ || 77 ||



janah śocati duḥkheṣu kṣipraṃ hata ivāśmanā |

na karoti punastīvratadāpātapratikriyām || 78 ||



paśyato'pibhavāyāsaṃ nirvivekasya sarvathā |

kriyate kiṃ janasyāsya mohādakuśalaspṛśaḥ || 79 ||



purā vipraḥ suśarmākhyaḥ kutaścitprāpya mūlakam |

nidhāya jananīhaste yayau snātuṃ nadītaṭam || 80 ||



sāpi pratyekabuddhāya tām pāptāya tadantare |

praṇatā pātrahastāya tadevābhimūkhī dadau || 81 ||



atha snātvā samāyātastatsutastvaritaṃ kṣudhā |

jananīṃ bhojanārambhe yayāce nijamūlakam || 82 ||



puṇyaṃ putrānumodasva tanmayātithaye'rpitam |

iti māturvacaḥ śrutvāso'bhūdviddha iveṣuṇā || 83 ||



sadyo viṣūcikārtasya manmūlakamanalpakam |

kukṣiṃ bhittvā viniryātu prāṇaiḥ saha ta vātitheḥ || 84 ||



iti tasyāptapāpasya vākyāruṣyeṇa bhūyasā |

visūcikaiva paryante babhūvaparajanmani || 85 ||



prāpuṇyāntarapākena sa evādya prasenajit |

vipulaṃ rājyamāsādya tayaivānte kṣayaṃ gataḥ || 86 ||



saṃsārapathapānthānāmevaṃ karma śubhāśubham |

pātheyamiva hastastham bhogāyaivopapadyate || 87 ||



iti śrutvā bhagavatastathyaṃ pathyaṃ ca tadvacaḥ |

evametaditi dhyātvā taṃ praṇamya yayau nṛpaḥ || 88 ||



atrāntare prāptarājyaḥ śākyavairaṃ virūḍhakaḥ |

purohitasutenaitya smāritastatkṣayodyataḥ || 89 ||



prayayau śākyanagaraṃ gajāśvarathareṇunā |

moheneva diśāṃ kurvan nirvivekaṃ dhiyāmiva || 90 ||



sarvajño bhagavān jñātvā tasya tadduṣṭaceṣṭitam |

gatvā śākyapuropānte tasthau śuṣkataroradhah || 91 ||



dūrāttatra sthitaṃ dṛṣṭvā tamāgacchan virūḍhakaḥ |

avatīrya rathādagramabhyetya praṇato'vadat || 92 ||



satsu snigdhapalāśeṣu ghanacchāyeṣu śākhiṣu |

bhagavannatra viśrāntiḥ kimu śuṣkataroradhaḥ || 93 ||



ityuktaḥ kṣitipālena taṃ prāha bhagavān jinaḥ |

jñāticchāyā narapateḥ candanādapi śītalā || 94 ||



nāsti jñātisamaṃ vittaṃ nāsti jñātisamā dhṛtiḥ |

nāsti jñātisamā chāyā nāsti jñātisamah priyaḥ || 95 ||



mamaite bhūpate śākyā jñātayasyatpurāntike |

jātaḥ priyo'yaṃ tatprītyā śuṣkaśākho'pi pādapaḥ || 96 ||



śrutvaitadviratāmarṣaḥ śākyānāṃ pakṣapātinam |

bhagavantaṃ viditvaiva nyavartataḥ virūḍhakaḥ || 97 ||



bhagavānapi śākyānāṃ jñātvāgāmi bhayaṃ tataḥ |

śreyase śuddhasattvānām vidadhe dharmadeśanām || 98 ||



śrotāpattiphalaṃ kaiścit sakṛdāgāmi cāparaiḥ |

anāgāmiphalaṃ cānyaiḥ saṃprāptaṃ tasya śāsanāt || 99 ||



śeṣāstu mūḍhamatayaḥ śākyāḥ prāpurna tatpadam |

santi ke'pi khagā yeṣām vāsare timiro'dbhavaḥ || 100 ||



nivṛttasyātha nṛpateḥ pi|

vairasarpasya suptasya vidadhe pratibodhanam || 101 ||



sa tena preritaścakre matiṃ śākyakulakṣaye |

vairānalaṃ pracalanaṃ karoti piśunānilaḥ || 102 ||



ghoradurjanamantreṇa sahasotthāpitāḥ khalāḥ |

vetālā kṣitipālāśca na kasya prāṇahāriṇah || 103 ||



sainye gajarathodagre tatastasmin prasarpati |

babhūva purasaṃkṣobhaḥ śākyānāṃ rūddhavartmanām || 104 ||



tasmin bhagavān rakṣārthaṃ śākyānāṃ pakṣapātinam |

samudyataṃ tatra mahāmaudgalyāyanamabravīt || 105 ||



śākyānāṃ karmadoṣo'yaṃ sarvathā samupasthitaḥ |

tatra rakṣavidhānaṃ te gagane setubandhanam || 106 ||



puṃsamavintyavibhavāni śubhāśubhāni

āyānti yānti ca muhurniravagrahāṇi |

karmākṣarāṇi nijajanmapadasvahasta-

nyastāni nāma na bhavanti nirarthakāni || 107 ||



iti vākyādbhagavatastasmin yāte praṇamya tam |

cakrire saṃvidaṃ śāyāh pratyāsanne virūḍhake || 108 ||



hiṃsāsmābhirna kartavyā prāṇimātrasya kasyacit |

śarāḥ śarīramasmākaṃ viśantvarisamīritāḥ || 109 ||



iti saṃvidamādhāya te viyaṣṭikapāṇayaḥ |

dhīrḥ parodyame tasthuravārayitakārmukāḥ || 110 ||



atrāntare karmayogānnijadeśānavasthitaḥ |

ajñātvā saṃvidaṃ śākyaḥ śaṃpākah samupāyayau || 111 ||



sa dṛṣṭvā nagare baddhasaṃnāhaṃ vasudhādhipam |

kopādekaścakārāsya raṇe subhaṭasaṃkṣayam ||112 ||



yuddhe puruṣasiṃhena hatāste vīrakuñjarāḥ |

prayayuḥ spṛhaṇīyatvaṃ yaśobhirmaktikairiva ||113 ||



sa ko'pi tasya jajvāla kopitasya parairasiḥ |

sa yayau yatpratāpena vipulāṃ ripuvāhinīm || 114 ||



praveśaṃ na daduḥ śākyāḥ śaṃpākasya dviṣāṃ vadhāt |

svajano'pi parityaktaḥ sa tairnistriṃśakarmaṇā || 115 ||



nije'pi vimukhāḥ krūre sādhave dahrambandhavaḥ |

dhānādapi vadānyatvaṃ sukṛtaṃ svajanādapi || 116 ||



* * *

śatamaucityanityānāmāyuṣo'pi yaśaḥ priyam || 117 ||



nirvāsitaḥ sa taiḥ prāptaḥ śanairbhagavato'ntikam |

yayāce'bhyudayāyāiva taṃ kiṃcinnijalāñchanam || 118 ||



ṛddhaṃ bhagavatā dattaṃ nijakeśanakhāṃśakam |

sa jagāma samādāya vākuḍaṃ nāma maṇḍalam || 119 ||



tatra prajñāprabhāveṇa śauryotsāhaguṇena ca |

sa prāpa rājyaṃ dhīrāṇāṃ sarvatra sulabhāḥ śriyaḥ || 120 ||



dakṣāṇāṃ lakṣaṇaṃ lakṣmīḥ sahajaṃ viduṣāṃ yaśaḥ |

vyavasāyasahāyānām kalatraṃ sarvasiddhayaḥ || 121 ||



tatra sthito bhagavataḥ so'tha keśanakhāṃśake |

stūpapratiṣṭhāmakarodvarratnavirājitām ||122 ||



virūḍhako'pi śākyānāṃ vairapāratitīrṣayā |

punaryuktyā puradvhārabhedena sahasāviśat || 123 ||



hatvā tatra sahasrāṇi śākyānāṃ saptasaptati |

baddhvā kanyākumārāṇāṃ sa sahasramathāharat || 124 ||



śatāni pañca śākyānām gajairlohaiśca mardanaiḥ |

saṃpramṛjya purīṃ cakre kṛtāntanagarīmiva || 125 ||



bhagavānapi śākyānām śatrūṇā bhedanaṃ kṛtam |

karmānubaddhaṃ vijñāyaṃ babhūva vimanāḥ kṣaṇam ||126 ||



papracchustaṃ samabhyetya bhikṣavaḥ karuṇākulāḥ |

kiṃ karma vihitaṃ śāyairghoraṃ yasyedṛśaṃ phalam || 127 ||



bhagavānaniti taiḥ pṛṣṭaḥ sarvaġyastānabhāṣata |

nijakarmavipākena śākyānāmeṣa saṃkṣayaḥ || 128 ||



kṛṣṭau purā mahāmatsyau dhīvaraiḥ sarito'ntarāt |

tadā nikṛttau śalyena bhūyo'pyavyathayan dhṛtau || 129 ||



kālena cārutām yātaistaireva parajanmani |

hatau gṝhapatī dagdhvā tāveva dhanahāribhiḥ || 130 ||



tau matsyau tau gṛhasthau ca virūḍhakapurohitau |

dāsānāṃ taskarāṇām ca śākyānām mṛtyutām gatau || 131 ||



iti śrutvā bhagavataḥ karmaṇāṃ phalasaṃtatim |

avisaṃvādinīmeva menire sarvabhikṣavaḥ || 132 ||



virūḍhako'tha svapuraṃ prāpya vijayadurmadaḥ |

jetānāmnā sutenoktaḥ praṇayādbālalīlayā || 133 ||



deva kiṃ nihatāḥ śākyān na te'smākaṃ kṛtāgasaḥ |

iti bruvāṇamavadhīnnijasūnuṃ virūḍhakaḥ || 134 ||



nipātamatimidgati nihatni na karoti kim |

madalabdhanadhāyāso mātaṃga iva darjanaḥ || 135 ||



sa jagāda sabhāsīnaḥ svabhūjāvavalokayan |

aho nu mama tāpāgnau dvisadbhiḥ śalabhāyitam || 136 ||



kṛtāntatoraṇastambhau prājyau mama bhujāvimau |

niṣḥśeṣavadhadīkṣāyāṃ śākyānāṃ gurutāṃ gatau ||137 ||



taṃ tasya vikramaṃ ślāghyaṃ hṛtāstāḥ śākyakanyakāḥ |

śrutvā babhāṣire tīvramudveganamitānanāḥ || 138 ||



karmapāśanibaddhānāṃ khagānāmiva dehinām |

nidhanollaṅghane śaktirnāsti pakṣavatāmapi || 139 ||



yenāgniḥ śamameti tatkila jalaṃ prāpnotyalaṃ vāḍavaḥ

tigmāṃśugrahaṇaṃ karoti samaye helāvalehyaṃ tamah |

paryālocanavartmanāmaviṣayaṃ sāścaryacaryāspadaṃ

sarvaṃ kārmikatantrayantimidaṃ kaḥ kasya kartuṃ kṣamaḥ || 140 ||



etadākarṇya nṛpatiḥ padāntara iveragaḥ |

karacchedaṃ dideśāsāṃ ghorāmarṣaviṣotkaṭaḥ || 141 ||



tīre yasyāḥ kṛtaṃ tāsāṃ pāṇicchedanavaiśasam |

sādyāpi hastagabhati khyātā puṣkariṇī bhuvi || 142 ||



latāsvapi hkukūlāgniṃ krakacaṃ nalīnīṣvapi |

mālāsvapi śilāvarṣaṃ pātayantyeva nirghṛṇāḥ || 143 ||



tāśchinnapāṇikamalāstatra tīvravyathāturāḥ |

bhagavantaṃ dhiyā dhyātvā śaraṇaṃ śaraṇaṃ yayuḥ || 144 ||



tāsāṃ vijñāya sarvaġyastīvrām marmāhativyathām |

śacīmacintayaddevīṃ tatsamāśvāsanocitām || 145 ||



tatsparśajātahastābjāstā divyavasanāvṛtāḥ |

yayuścittaprasādena tāh svargaṃ tyaktavigrahā || 146 ||



devakalpāstamāsādya divyapadmotpalāṅkitāḥ |

dharmadeśanayā śāstustāh prāpurvipulaṃ padam || 147 ||



bhikṣubhirbhagavān pṛṣṭastatkarmaphalamabhyadhāt |

pāṇicāpalyametābhiḥ kṛtaṃ bhikṣuviḍambane || 148 ||



karmaṇastasya pākena viśase patitāh param |

mayi cittaprasādena prāptāścaitāh śubhāṃ gatim || 149 ||



ityuktvā bhagavān karmaphalapākavicitratām |

bhukṣīṇāṃ tatprasaṅgena vidadhe dharmadeśanām || 150 ||



atrāntare gūḍhacārī rājñā praṇihitaścaraḥ |

bhagavaccaritaṃ jñātvā virūḍhakamupāyayau || 151 ||



so'vadaddeva bhikṣūṇāṃ tenedaṃ kathitaṃ puraḥ |

svakarmaphalamāsannaṃ tasya paśyāmi bhūpateh || 152 ||



saptāhenāgninā dagdhaḥ sa pāpātmā purohitaḥ |

avīcināmni narake duḥsahe nipatiṣyati || 153 ||



iti tadvacanaṃ śrutvā nṛpatiḥ sapurohitaḥ |

yatnāduvāsa saptāhaṃ jalānvitagṛhāntare || 154 ||



kṣaṇāvaśeṣe saptāhe tasminnantaḥpuraṃ gate |

sūryakāntārkasaṃtāpayogājjajvāla pāvakaḥ || 155 ||



udbhūtena pralayasavanāvartinevāśu vegā-

nnirdagdho'sau dhagiti śikhinā nārakaṃ prāpa vahnim |

asmiṃllike jvalanajaṭilāḥ pāpināṃ pretya rāgāḥ

sarvatraiva sthirasukhabhuvaḥ śītalāḥ puṇyabhājām || 156 ||



iti kṣemendraviracitāyām bodhisattvāvadānakalpalatāyāṃ

virūḍhakāvadānaṃ nāma ekādaśaḥ pallavaḥ ||