• Home
• Canon Text
• 9 jyotiṣkāvadānam

9 jyotiṣkāvadānam

Technical Details

9. jyotiṣkāvadānam |



dhanyānāmaśivaṃ bibharti śubhatāṃ bhavyasvabhāvodbhavaṃ

mūrkhāṇāṃ kuśalaṃ prayātyahitatāmityeṣa lakṣyaḥ kramaḥ |

niśīthatimirāndhyamauṣadhivanasyātyantakāntipradaṃ

etaccaulukakūladṛṣṭahataye sarvatra maitraṃ mahaḥ || 1 ||



purā rājagṛhābhikhye bimbisārasya bhūpateḥ |

abhūt pauraḥ subhadrākhyaḥ paripūrṇagṛhasthiteḥ || 2 ||



maurkhyānmohaprapannasya sarvadarśanavidviṣaḥ |

tasya kṣapaṇakeṣveva babhūvābhyadhikādaraḥ || 3 ||



tasya satyavatī nāma jāyābhijanaśālinī |

garbhamādhatta pūrṇendubimbaṃ pauradarīva dik || 4 ||



kalandakanivāsākhyo veṇukānanasaṃśrayaḥ |

kadācit bhagavāt buddhaḥ prāptaḥ piṇḍāya targṛham || 5 ||



pūjāṃ sabhāryaḥ kṛtvātmai taṃ sa papraccha sādaraḥ |

garbhasthitamapatyaṃ yat kiṃrūpaṃ tadbhaviṣyati || 6 ||



so'vadat saṃpadaṃ bhuktvā putraste divyamānuṣīm |

pravrajyayā śāsane me saṃyukto muktimeṣyati || 7 ||



yāte bhagavati spaṣṭamityādiśya nijāśrayam |

abhyāyayau gṛhapaterbhūrikaḥ kṣapaṇo gṛham || 8 ||



bhagavadbhāṣitaṃ tattu subhadreṇa niveditam |

śrutvā kṣapaṇakah kṣipramabhūddeṣaviṣākulaḥ || 9 ||



gaṇayitvā sa suciraṃ grahajñānakṛtaśramaḥ |

yadevoktaṃ bhagavatā praśne'paśyattathāvidham || 10 ||



so'cintayadayo satyamuktaṃ tena na saṃśayaḥ |

tatprabhāvopamādāya kiṃ svasatyaṃ vadāmyaham || 11 ||



tasya sarvajñatāṃ vetti subhadro yadi madgirā |

tadeṣa kṣapaṇaśraddhāṃ tyakṣyati śramaṇādarāt ||12 ||



iti saṃcintya sāmarṣaḥ sa subhadramabhāṣata |

asatyemetat kathitaṃ tena sarvajñamāninā || 13 ||



manuṣyaḥ kathamāpnoti devārhāṃ divyasaṃpadam |

pravrajyā kiṃ tu satyeva kathaṃ tenāsya cintitā || 14 ||



kṣīṇaḥ kṣudupasaṃtapto yasya nāstyanyato gatiḥ |

tasya tasya subhikṣārhaṃ śaraṇaṃ śramaṇavratam || 15 ||



paśyāmyahaṃ gṛhapate pramāṇaṃ yadi madvacaḥ |

pratyutāyaṃ śiśurjātaḥ kulaṃ saṃtāpayiṣyati || 16 ||



ityudīrya kṣapaṇake yāte gṛhapatiściram |

vicārya vidadhe tāṃ tām yuktiṃ garbhanipātane || 17 ||



yadā dravyaprayoge'pi naiva garbhah paricyutaḥ |

tadāsya patnīmavadhīdekānte haṭhamardanaiḥ || 18 ||



tataḥ śītavanaṃ tasyāṃ śmaśānaṃ tena pāpinā |

prāpitāyām kṣapaṇakāstadvārtānanditā jaguḥ || 19 ||



aho batāho sarvajñaḥ śiśoḥ satyaṃ taduktavān |

seyaṃ sūnāvajāte'sya jananī pañcatāṃ gatā || 20 ||



iyaṃ sā śrīḥ śiśordivyā soktā divyamanuṣyatā |

iyaṃ ca sāsya pravrajyā yat kukṣau nidhanaṃ gataḥ || 21 ||



iti teṣāṃ pravādena sopahāsena sarvataḥ |

śmaśānadarśanāyaiva babhūva janasaṃgamaḥ || 22 ||



atrāntare divyadṛśā bhagavān bhūtabhāvanaḥ |

sarvaṃ vijñāya tadbuddhaḥ pradadhyau sasmitaḥ kṣaṇam || 23 ||



aho mohānubandhena dūrasthairapi dehinām |

ālokaśchādyate mūrkhairmeghairiva vikāribhiḥ || 24 ||



śubhaṃ kṣapayatā tena kṣapaṇena sa mugdhadhīḥ |

aho gṛhapatiḥ pāpādakāryamapi kāritaḥ || 25 ||



iti saṃcintya bahgavān svayaṃ bhikṣugaṇairvṛtaḥ |

yayau śītavanaṃ kṣipraṃ śmaśānaṃ karuṇākulaḥ || 26 ||



śmaśānacārikāṃ jñātvā rājā bhagavataḥ svayam |

bimbisāraḥ sahāmātyaistāmeva bhivamāyayau || 27 ||



tataḥ subhadrajāyāyāṃ prakṣiptāyāṃ citānale |

kukṣiṃ bhittvāmbujāsīnaḥ śiśuḥ sūrya ivodyayau || 28 ||



jvālitāṇalamadhyasthaṃ taṃ kaścinnāgrahīdyadā |

tadā janasamūhasya hāhākāro mahānabhūt || 29 ||



tatastaṃ saṃbhramāvṛddhagatiḥ sugataśāsanāt |

kumārabhṛtyo jagrāha jīvakākhyaḥ kumārakam || 30 ||



jināvalokanenaiva bālakagrahaṇakṣaṇe |

abhūccitānalastasya haricandanaśītalaḥ || 31 ||



jīvantaṃ jvalanānmuktaṃ ruciram vīkṣya dārakam |

vailakṣyeṇa kṣapaṇakāḥ kṣaṇaṃ tasthurmṛtā iva || 32 ||



tataḥ subhadraṃ bhagavān sarvabhūtahite rataḥ |

babhāṣe vismayodbhāntaṃ putro'yaṃ gṛhyatāmiti || 33 ||



sa tu dolākulamatiḥ kiṃ karomīti saṃśayāt |

kṣapanānāṃ mukhānyeva śikṣāyai kṣaṇamaikṣata || 34 ||



te tamūcurna bālo'yaṃ grāhyaḥ śmāśānavahnijaḥ |

yatrāyaṃ tiṣṭhati vyaktaṃ na bhavatyeva tadgṛham || 35 ||



iti teṣāṃ girā mūrkhaḥ sa jagrāha na taṃ yadā |

tadā kṣitipatirbālamādade jinaśāsanāt || 36 ||



jyotirmadhyādavāptasya jyotiṣkasadṛśatviṣaḥ |

jyotiṣka iti nāmāsya cakāra bhagavān svayam || 37 ||



tasya pravardhamānasya bhūpālabahvane śiśoḥ |

deśāntaragataḥ kāḻe mātulaḥ samupāyayau || 38 ||



sa viditvā svasurvṛttaṃ nidhanaṃ putrajanmani |

kopāt subhadramabhyetya kampamānaḥ samabhyaghāt || 39 ||



mūrkha kṣapaṇabhaktena tadgirā hatayoṣitā |

tvayā tyaktasvaputreṇa kiṃ nāma sukṛtā kṛtam || 40 ||



niścetanāḥ svabhāvena paramantrasamutthitāḥ |

sahanto'pi vinighnanti vetālā iva durjanāḥ || 41 ||



adhunaiva na gṛhṇāsi yadi rājagṝhāt sutam |

tatte strīvadhamuddhuṣya kārayāmyarthanigraham || 42 ||



ityuktastena tadbhītyā sa bhūpatigṛhāt sutam |

ānināya cirānmuktamakāmena mahībhujā || 43 ||



tataḥ subhadre kālena kālasya vaśamāgate |

abhūnnirdirvibhūtīnāṃ jyotiṣko'rka iva tviṣām || 44 ||



arthikalpadrumaḥ prāya saṃpadaṃ divyamānuṣīm |

sa buddhadharmasaṃgheṣu śaraṇyeṣvakaronmatim || 45 ||



tadbhaktyupanataṃ divyaratnasaṃcayamadbhutam |

pradadau bhikṣusaṃghebhyaḥ puṇyaratnārjanodyataḥ || 46 ||



tasya devanikāyebhyaḥ sāścaryā vividharddhayaḥ |

svayamevāyayurveśma mahodadhimivāpagāḥ || 47 ||



tṛṇe ratne ca samadhīrbhavagānapi tadgṛhe |

cakre tadanurodhena ratnapātraparigraham || 48 ||



sa divyavastrayugalaṃ yaśasāmupamākṣamam |

prāpa puṇyapaṇakrītaṃ nijaṃ gṛhamivāmalam || 49 ||



kadācidatha tadvastraṃsnānārdraṃ nyastamātape |

samīraṇenāpahṛtaṃ nyapatanmūrdhi bhūpateḥ || 50 ||



vilokyāpūrvaruciram jyotiṣkasya tadaṃśukam |

vidyaśrīvismito rājā tṛṇaṃ mene nijaśriyam || 51 ||



bhoktuṃ nimantritaḥ prāpya tasya ratnamayaṃ gṛham |

nṛpatiḥ svargamajñāsīt jyotiṣkabhavanasthitaḥ || 52 ||



atha kālena bhūpālaḥ putreṇājātaśatruṇā |

chadmanā rājyalubdhena dharmaśīlo nipātitaḥ || 53 ||



atīte sadguṇe rāġyi tasmin kṛtayugopame |

adharma iva sa prāpa rājyaṃ rājavarātmajaḥ || 54 ||



sa bhūbhṛddurlabhāṃ dṛṣṭvā jyotiṣkasya gṛhe śriyam |

tamuvāca samabhyetya matpitrā tvaṃ vivardhitaḥ || 55 ||



bhrātā tavāhaṃ dharmeṇa vibhavārdhaṃ prayaccha me |

na cedbhāgadhandrohāt kalireva prajāyate || 56||



ityuktastena kauṭilyāt jyotiṣkaḥ krūrakāriṇā |

ratnapūrṇaṃ gṛhaṃ tasmai datvā prāyāt paraṃ gṛham || 57 ||



sā divyaratnarucirasphītā lokopakāriṇī |

hyotiṣkamevānuyayau śrīḥ prabheva divākaram || 58 ||



punastyaktāpi sā saṃpat saptakṛtvaḥ prabhāvatī |

jyotiṣkamaspṛṣṭanṛpā sādhvī parimivāyayau || 59 ||



sarvasvāharaṇodyuktaṃ dasyucaurādiyuktibhiḥ |

jyotiṣkaḥ kupitaṃ jñātvā nirviṇṇaḥ samacintayat || 60 ||



apuṇyaparipākeṇa prajānāṃ janakopamaḥ |

saṃyātaḥ smṛtiśeṣatvaṃ rājā vātsalyapeśalaḥ || 61 ||



ko'nyastatsadṛśo yasmin nirvyājasarale prajāḥ |

pitarīva kṛtāśvāsāḥ sukhaṃ rātriṣu śerate || 62 ||



dhaninastṛṇavatprāpyāḥ prāpyante ratnavadbudhāḥ |

amṛtādapi duṣprāpyaḥ saujanyasaralo janah || 63 ||



nirvyājavaidagdhyajuṣāmamugdhasaralātmanām |

anuddhatonnatānāṃ ca viralaṃ janma tādṛśām ||64 ||



adhunā dveṣadurvṛttaḥ pravṛttanikṛtirnṛpaḥ |

pāpapākena lokānāmakāle kalirāgataḥ || 65 ||



mitre jagati yāte'staṃ tasmin bhāsvati bhūpatau |

doṣodayaḥ pravṛddho'yamandhakārāya tatsutaḥ || 66 ||



nūnaṃ satāmatītānāṃ niṣkāraṇasuhṛt khalaḥ |

yadvṛttaparabhāgeṇa yaśasteṣāṃ prakāśate || 67 ||



tasmādiyaṃ parityājyā nṛpatyadhiṣṭhitā mahī |

kāle k alau kṣitīśe ca janānāṃ jīvitaṃ kutaḥ || 68 ||



varaparicayodārā dārāh satāṃ guṇinām guṇāḥ

kulamavikalaṃ bhavyā bhūtiryaśaḥ śaśisaṃnibham |

sthitisamucitaṃ vṛttaṃ vittamanimittamanāpadaṃ

guṇavati nṛpe sarvaṃ bhavatyapāṃśulaṃ prajākulam || 69 ||



dharmadrumasya dhanamūlasamudgatasya

nirdoṣakāmakusumapravarojjvalasya |

lokaḥ sukhāni kila puṇyaphalāni bhuṅkte

hato na cet kunṛpatervinipātavātaiḥ || 70 ||



kaliḥ kālaḥ patirbālastatpratāpaścitānalah |

akālaviplavottālakhalavetālasaṃkulaḥ || 71 ||



prītirviṣaṇṇā khinnā dhīḥ sukhaśrīrgatayauvanā |

adhunā vibhavābhoge bhogayoge na me ruciḥ || 72 ||



dhanaṃ bhūmirgṛhaḥ dārāḥ sutā bhṛtyāḥ paricchadāḥ |

aho niravadhiḥ puṃsāmādhivyādhiparigrahaḥ || 73 ||



yathā yathā vivardhante grīṣmoṣmaviṣamāḥ śriyaḥ |

tathā tathā jvalatyeva tṛṣṇātāpaḥ śarīriṇām || 74 ||



pravṛddhairapi vittaughe rājanyopārjitairnṛṇām |

lavaṇābdheriva jalairvitṛṣṇā naiva jāyate || 75 ||



nāsti nāstītyasaṃtoṣād ya eva dhanināṃ japaḥ |

pubarbhave bhavet ko vā sa eva praśamo yadi || 76 ||



kiṃ vittairdurnimittaiḥ kalikalahamohalobhānuvṛttaiḥ

kiṃ bhogairviprayogairvyasanaśatapatanābhyāsasaṃsaktarogaiḥ |

kiṃ vā mithyābhimānairnarapatisadanaprātasevāvamānaiḥ

asmin vairāgyameva kṣayasamayabhaye bhogyamārogyayogyam ||77 ||



atikrānte kāle svajanasuhṛdālokavimale

samāpanne mohaprabala (tara) kāluṣyamaline |

sukhāśvāsah puṃsāṃ praśamasalilasnātamanasāṃ

parityaktāyāse vijanavanavāse parivayaḥ || 78 ||



iti saṃcintya sa ciraṃ paraṃ vairāgyamāyayau |

duḥkhaṃ mohāya mūrkhāṇāṃ vivekāya ca dhīmatām || 79 ||



sa datvā sarvamarthibhyaḥ prayayauḥ sugatāśramam |

śrīśṛṅkhalākṛṣṭamatirna hi satyasukhonmukhaḥ || 80 ||



yadaiva rājhaṃsena smaryate śuci mānasam |

tadaivāsmai vasumatī sarasīva na rocate || 81 ||



yāte duḥsahamohadhūmamaline bhogānurāgānale

saṃtoṣāmṛtanirjhareṇa manasi prāte śanaiḥ śītatām |

naitāḥ pānamadottaraṅgavicaladvārāṅgarāṅganābhaṅgura-

bhrūbhaṅgakṣaṇasaṃgamāḥ śamavatāṃ kurvanti vighnaṃ śriyaḥ || 82 ||



sarvajñaśāsanavinaṣṭabhavādhvakaṣṭaḥ

pravrajyayā vimalameva padaṃ praviṣṭaḥ |

saṃprāpya sarvasamatāmasamaprakāśaḥ

nirlakṣyamokṣagamanāya munirbabhūva || 83 ||



tām bodhisiddhimālokya jyotiṣkasya savismayaiḥ |

bhikṣubhirbhagavān pṛṣṭaḥ prāgvṛttāntamabhāṣataḥ || 84 ||



janmakṣetraśatoptānāṃ bījānāmiva karmaṇām |

bhujyate phalasaṃpattiravisaṃvādinī janaiḥ || 85 ||



rājño bandhumataḥ puryāṃ bandhumatyām mahāyaśāḥ |

abhūdanaṅgano nāma śrīmān gṛhapatiḥ purā || 86 ||



śāstātha samyaksaṃbyddho viaśvī nāma tā purīm |

janacārikayā prātaḥ kadācit sukṛtaiḥ satām || 87 ||



dvāṣaṣṭibhiḥ sa bhikṣūṇāṃ sahasaiḥ parivāritaḥ |

śraddhayānaṅganenaitya praṇamyopanimantritaḥ || 88 ||



sarvopakaraṇaistena traimāsaṃ paricāritaḥ |

yathā tathaiva rājñāpi praṇipatya nimantritaḥ || 89 ||



bhogaiḥ spardhānubandhena sa tābhyāmadhivāsitaḥ |

anaṅganena paurārhairbhūpālārhaiśca bhūbhujā || 90 ||



gajadhvajamaṇicchatracāmarodārayā śriyā |

taṃ dṛṣṭvā pūjitaṃ rājña cintārto'bhūdanaṅganaḥ || 91 ||



tasya sattvāvadātasya pakṣapātī śatakratuḥ |

cakāra divyayā lakṣmyā sāhāyyāṃ jinapūjane || 92 ||



sa tayā divyayā bhūtyā bhagavantamapūjayat |

yadagre cakravartidhrīrlajjābhājanatām yayau || 93 ||



ratnairnyakṣatacandrasūryabhānarākaṃkīraṇairāvaṇabhai (?) -

ramlānāmbaragandhamālyaśabalaiḥ kampadrumāṇāṃ phalaiḥ |

bhaktiprahvaścīvilāsacanāhelocchasaccāmaraṃ

tenābhyarcitamākalayya sugataṃ lajjānato'bhūnnṛpaḥ || 94 ||



iti bahutaraṃ bhaktyā śāstuḥ phalaṃ tadanaṅganaḥ

śubhapariṇateḥ puṇyodāraḥ purā samavāptavān |

vimalamanasastasyaivāsau kṣaṇapraṇidhānataḥ

para iva ravijyotiṣko'bhūt sa eva padāśritaḥ || 95 ||



ityāha vimalajñānaprakāśitagatrtrayaḥ |

praṇīdhānopadeśāya bhikṣūṇāṃ bhagavān jinaḥ || 76 ||



iti kṣemendraviracitāyām bodhisattvāvadānakalpalatāyāṃ

jyotiṣkāvadānaṃ nāma navamaḥ pallavaḥ ||