• Home
• Canon Text
• 7 muktālatāvadānam

7 muktālatāvadānam

Technical Details

7 muktālatāvadānam |



kuślapraṇidhānaśuddhadhānmāṃ

vimalālokavivekabodhakānām |

parikīrtanamātrameva yeṣāṃ

bhavamohāpahatesta eva dhanyāḥ || 1 ||



purā parṣatsahasrāṇāṃ nyagrodhopavanasthitiḥ |

kapilākhye pure cakre bhagavān dharmadeśanām || 2 ||



amandānandasaṃdohasyandi candanaśītalam |

tasya vāgamṛtaṃ dhanyāḥ kṛtāṅjalipuṭāḥ papuḥ || 3 ||



rājā śuddhodanastatra dharmaśravaṇasaṃgame |

puṇyopadeśasalilairlebhe vaimalyanirvṛtim || 4 ||



atha tatra mahānāmā śākyarājakulodbhavaḥ |

dharmopadeśamākarṇya prātaḥ svagṛhamabravīt || 5 ||



aho nu bhagavān buddho dharmaḥ saṃghaśca siddhaye |

buddhotpādo'yamasmākaṃ nirvāṇāya mahāphalaḥ || 6 ||



upadeśaviśeṣāptānirvtestasya tadvacaḥ |

śrutvā śaśiprabhā patnī praṇayāttamabhāṣataḥ || 7 ||



anugrāhyā bhagavataḥ puruṣāḥ puṇyabhāginah |

nindyāstadupadeśānāmanarhā yoṣito vayam || 8 ||



iti jāyāvacaḥ śrutvā sa jagāda jagadguroḥ |

bhadre bhagavato nāsti bhedaḥ kāruṇyadarśane || 9 ||



samā sarvatra bhā bhānoḥ samā vṛṣṭiḥ payomucaḥ |

samā bhagavato dṛṣṭiḥ sarvasattvānukampinaḥ || 10 ||



mahāprajāpatervākyādaparāhṇakṣaṇaṃ tapaḥ |

śuddhodanaḥ karotyeva rājā bahgavato'ntike || 11 ||



iti patyuḥ priyagirā vṛtā śākyāṅganāgaṇaiḥ |

yācane tadbhagavatah sā puṇyopavanaṃ yayau || 12 ||



sā satvakusumaṃ tatra taṃ dadarśa mahāphalam |

praśamāmṛtasaṃsiktaṃ karuṇākalpapādapam || 13 ||



lateva pavanānamrā taṃ dūrāt praṇanāma sā |

lobheneva parityakrā cyutakarṇotpalacchalāt || 14 ||



vilokya kāñcanaruciṃ ratnabhūṣaṇabhūṣitām |

ānandanāmā bhikṣustāmuvāca prahitodyataḥ || 15 ||



veṣaḥ praśamaśūnyo'yaṃ mātarmunitapovane |

darpotsikto na yuktaste viraktānāmidaṃ padam || 16 ||



guṇasaṃyamasiktāni mukharābhraṇānyaho |

nehāstadgrahaṇaṃ yuktamitīvopadiśanti te || 17 ||



ityuktā tena sā tanvī vailajyavinatānanā |

unmucyābharaṇaṃ sarvaṃ prāḥiṇonnijamadniram || 18 ||



upaviṣṭeṣu sarveṣu nirdiṣṭakuśalastataḥ |

anityataivaṃ bhagavānupadeśaṃ pravakrame || 19 ||



mahāmohaprabhāvo'yaṃ yena nityamanityatām |

nityatāmiva manyante mūḍhā jagati jantavaḥ || 20 ||



asatye ramate lokaḥ satyapratyayamohitaḥ |

na vetti sarvabhāvānāmabhāvānubhavāṃ sthitim || 21 ||



kecid vyākaraṇaiḥ pare śrutipathaistarkapravādaiḥ pare

kecittantraparigrahairbahuvidhairanyaiḥ kalākauśalaiḥ |

saṃsaktāḥ punaruktajanmaśaraṇau yātā sahaiva kṣayaṃ

tatrāpyakṣyayalīlayā kṣaṇapadaṃ mugdhaurnibaddhā dhṛtiḥ || 22 ||



viṣayaviṣamāpāyaḥ kāyaḥ prapañca(ma)yāśayā

kharataramarusphārākāro mohabhāvo bhavaḥ |

hitabhūmi (?) tathākāryaṃ kāryaṃ vivekināṃ tathā

niravadhirayaṃ dṛṣṭvā vyādhiryathā (hi) nivartate || 23 ||



ityādyanityasaṃskārasaṃyuktaṃ yuktamudyate |

dharmopadeśakuśalaṃ vaktuṃ bhagavati svayam || 24 ||



ekā śākyavadhūstatra rūpasaubhāgyagarvitā |

sthitā śauśavatāruṇyasaṃghau vayasi duḥsahe || 25 ||



muktāhāraṃ stanataṭe lolāpāṅgairmuhurmuhuḥ |

āliloke yaśaḥsphārasāraṃ ratipateriva || 26 ||



hārāvalokinīṃ dṛṣṭvā tāmanekāgrahādasau |

acintayādviraktena magatpatnī śaśiprabhā || 27 ||



iyaṃ dharmopadeśe'pi capalā hāramīkṣate |

bhāvānāṃ na śṛṇotyeva mūḍhā kṣaṇikatāmimām || 28 ||



svaṃ hāraṃ darśayitvāsyā hārotsāhaṃ harāmyaham |

adhikālokanenaiva darpaḥ śāmyati dehinām || 29 ||



iti saṃcintya sā dāsīṃ rohikākhyāmabhāṣata |

rohike gaccha me hāraṃ gṛhāt satvaramāhara || 30 ||



ityuktā sā tayā tatra pravṛtte dharmasaṃśrave |

akālagamanodvignā niḥśvasyācintayat kṣaṇam || 31 ||



aho batāntarāyo'yaṃ saṃjātaḥ kuśale mama |

nāsmin śrotuṃ labhe dharmaṃ yatparāyattajīvitā || 32 ||



puṇyasaurabhasaṃbhārāt kīrṇakāruṇyakesarāt |

mukhapadmād bhagavato dhanyaḥ prāpnoti vāṅbhadhuḥ || 33 ||



aho svācchandyavicchedastanubhaṅgaḥ sukhakṣayaḥ |

sevā jagati jantūnāṃ duḥkhe duḥkhaparaṃparā || 34 ||



sevāprayāsasaṃprāptaṃ dhanamānakaṇodayam |

tatpamatyuṣṇaniḥśvāsairaho kṛcchreṇa pīyate || 35 ||



mānaglānirguṇaglānirojaḥpunaśamaḥ śramah |

prathamaṃ bandhanaśṛṅkhalā caraṇayorhelāvamānāvanī

svavyāpāraniṣedhanityaniyatī nidrāsukhadrohiṇī |

āśāsyasya viśālajālasaraṇiḥ satsaṅgabhogāśaniḥ

mugdhānāṃ mṛgatṛṣṭikāmarumahī sevā śarīrakṣayaḥ || 37 ||



iti saṃcintya suciraṃ sā jagāma tadājñayā |

sevāvikrītakāyānāṃ svecchāviharaṇaṃ kutaḥ || 38 ||



vrajantīṃ tām parapreṣyāṃ kṛpaṇāṃ karuṇākulaḥ |

nirīkṣya bahgavān divyacakṣuṣācintayat kṣasṇam || 39 ||



asmin janmani śeṣo'syā saṃpūrṇo jīvitāvadhiḥ |

iyaṃ varākī saṃsārāduddhartavyā svayaṃ mayā || 40 ||



atha tām karmayogena vrahantīṃ sahasā pathi ||

vatsavātsalyavivaśā śṛṅgābhyāmājaghāna gauḥ || 41 ||



sā pradaghyau bhagavataḥ prasādāt tanmayasmṛtiḥ |

janmāntarādhivāsena buddhālambanamānasā || 42 ||



aho karmormibhiḥ śīrṇe saṃsāramakarākare |

janmāvarteṣu jantūnāṃ majjanonmajjanakramaḥ || 43 ||



puṃso lalāṭavipulopalapaṭṭikāsu

niḥśarmakarmaghaṭitaprakaṭāṅkaṭaṅkaiḥ |

nayastāni janmamaraṇaprasarākṣarāṇi

naitāni pāṇiparimārjanayā calanti || 44 ||



iyaṃ karmāyattā pracuracitravaicitraracanā

narāṇāṃ māyūracchadapaṭalatulyā pariṇatiḥ |

yayā garbhārambhe kramanipatane vṛddhisamaye

kṣaye vā nānyat prābhajata tanulekhācchavirati || 45 ||



saṃcintyātha puraḥ pravṛttasudaśāsannāvasannasthitiṃ

prāptevāsamadāsabhāvakalanāvailakṣyaniḥ spandatām |

ādhāya praṇidhānadhāmni dhavale saddharmaśuddhāṃ dhiyaṃ

saṃsāre vicikitsya eva malinaṃ tatyāja sā jīvitam || 46 ||



tataḥ sā siṃhaladvīpe samīpe svargasaṃpadām |

candralekheva dugdhābdhau divyadyutirajāyata || 47 ||



ādhānajanmanastasya muktāvarṣeṃ divaścyute |

sābhūnmuktālatā nāma siṃhalādhipateḥ sutā || 48 ||



sā puṇyamiva lāvaṇyaṃ vahantī vṛddhimāgatā |

lebhe vivekenāṅgānāṃ saṃtoṣamiva yaovanam || 49 ||



tataḥ kadācidvaṇijaḥ śrāvastīpuravāsinaḥ |

makarākaramuttīrya siṃhaladvīpamāyayuḥ || 50 ||



te tatra rātriparyante viśrāntisukhamājaguḥ |

dharmārthagāthāsaṃnaddhaprabuddhabuddhabhāṣitam || 51 ||



tdantaḥpuraharmyasthā śrutvaiva śravaṇāmṛtam |

kimetaditi papraccha tānānāyya nṛpātmajā || 52 ||



te tāmūcuḥ pramuditāmidaṃ buddhasya bḥāṣitam |

svabhāvārhaṃ bhagavataḥ sarvasattvānukampinah || 53 ||



buddhāmidhānaṃ śrutviva pulakālaṃkṛtākṛtiḥ |

sā babhūva samudbhūtasaṃvidbhavyānubhāvabhūḥ || 54 ||



unmubhī sāmayūriva śabdaireva payomucaḥ |

ka eṣa bhagavān buddha iti paparcchaḥ tān punaḥ || 55 ||



tataste nikhilaṃ tasyai śraddhāsaṃvardhitādarāḥ |

nyavedayan puṇyamayīṃ bhagavaccaritasthitim || 56



atha sā tatkathāvāptaprāgjanmakuśalodayā |

viġyaptilekhaṃ pradadau teṣāṃ bhagavataḥ kṛte || 57 ||



kālena sindhumuttīrya saṃrpāptāste nijāṃ pirīm |

praṇamyāvedya tadvṛttaṃ dadurlekhaṃ mahātmane || 58 ||



bhagavānapi sarvaġyaḥ pūrvameva vibhāvya tat |

muktālatāyāḥ kṛpayā svayaṃ lekhamavācayat || 59 ||



aho smaraṇameva te kimapi puṇyapaṇyaṃ satāṃ

bhavātibahvabhaiṣajaṃ vyasanatāpatṛṣṇāpahat |

bhavanmayakathākramopanatasaṃvidāsvādabhūḥ

s eṣa bhagavan mahānamṛtasaṃvibhāgo mama || 60 ||



iti saṃkṣiptalekhārthaṃ vibhāvya bhagavān svayam |

īṣatsmitviṣā sattvaprakāśamadiśaddiśām || 61 ||



tataścitrakarāśakyāṃ prabhāvairanupūritām |

bhagavān prāhiṇot tasyai nyastāṃ svapratimāṃ paṭe || 62 ||



punaḥ pravahaṇārūḍhā vaṇijaste tadājñayā |

avāpya siṃhaladvīpaṃ tasyai paṭamadarśayan || 63 ||



hemasiṃhāsananyaste paṭe dṛṣṭvā tathāgatam |

janastanmayatādhyānādekībhāvamivāyayau || 64 ||



adhastāllikhitaṃ tasmin puṇyaprāptamadṛśyata |

tisraḥ śaraṇyā gatayaḥ pañca śikṣāpadāṇi ca || 65 ||



sapratītyasamutpādaḥ sānulomaviparyayaḥ |

āryāṣṭāṅgastathā mārgaḥ paramāmṛtanirbharaḥ || 66 ||



svayaṃ bhagavatā vyastaṃ tasyopari subhāṣitam |

śobhate bhāvanālīnaṃ bhrājiṣṇu kanakākṣaram || 67 ||



viṣamaviṣayālolavyālāvalīvalayākulāt

taruṇatimirānniṣkramyāsmāt pramohamayādgṛhāt |

jananamaraṇakleśāveśapravṛttapṛthivyathā

vrajata śaraṇaṃ bauddhaṃ dharmaṃ na cātra bhavādbhayam || 68 ||



jinapratikṛtiṃ puṇyām paśyantī pārthivātmajā |

anādikālopacitāṃ mumocājñānavāsanām || 69 ||



prāṃśuṃ kavata(?) kāñcanakāntakāyaṃ

suskandhamājānubhujābhirāmam |

dhyānāvadhānārthanimīlitākṣaṃ

lāvaṇyadhārāyitatuṅganāsam || 70 ||



svabhāvabhavyaṃ pravibhāsamānaṃ

pralambanirbhūṣaṇakarṇapāśam |

bāḻapravālāruṇavalkalāṅkaṃ

saṃsaktasaṃdhyābhramivāmarādrim || 71 ||



tviṣā diṣāṃ śīlamivādiśantaṃ

ānandadānodyatavaktracandram |

kṣamāguṇaṃ kṣāmiva śikṣayantaṃ

puṇyocitā sā subhagaṃ vilokya || 72 ||



praṇāmaparyantakapolacumbi-

karṇotpalānāṃ parivartanena |

nirasya niḥsāraśarīratṛptiṃ

satyānubhāvaṃ paramaṃ prapede || 73 ||



srotaḥsamāpattiphalaprakāśaṃ

sāsādya tatra kṣaṇalabdhabodhiḥ |

vicintayantī sugataprabhāvaṃ

samabhyadhādvismayaharṣabhūmiḥ || 74 ||



aho mahāmohatamohareṇa

dūrasthitenāmi tathāgatena |

prasahya bḥāsvadvapuṣārpiteyaṃ

vikāsalakṣmīḥ kuśalāmbujasya || 75 ||



tīrṇo bahvaḥ satpraṇidhānamāptaṃ

prasannamantaḥkaraṇaṃ kṣaṇena |

aho nu tṛṣṇāparitāpaśāntyai

samucchalantīva samāmṛtaughāḥ || 76 ||



ityuktvā sā bahgavate muktāratnānyupāyanam |

vitīrya saṃghapūjāyāṃ visasarja vaṇigjanam || 77 ||



te mahodadhimuttīrya prāptā bahgavato'ntikam |

tanmuktāratnanikaraṃ praṇamyāsmai nyavedayan || 78 ||



vaṇigbhiḥ kathitāṃ śrutvā tatkathāṃ tatra bhikṣuṇā |

ānandanāmnā pṛṣṭho'tha babhāṣe bhagavān jinaḥ || 79 ||



yāsau purā rohitākhyā dāsī śākyagṛhe'bahvat |

saiva muktālatā jātā satkarmapraṇidhānataḥ || 80 ||



abhūnmahādhano nāma vārāṇasyāṃ vaṇik purā |

tasya ratnavatī nāma patnī puṇyocitābhavat || 81 ||



sā patyau pañcatāṃ yāte niḥputrā stūpaśekhare |

pūjāṃ kṛtvā mahāhārāṃ bhaktiyuktā nyavedayat || 82 ||



tena puṇyavipākena siṃhalādhipateḥ sutā |

jātā muktālatā saiva prātā ca parinirvṛtim || 83 ||



saiva janmani cānyasminnairvaryamadamohitā |

pūjādhikṣepadakṣābhūddhāsī tenātivatsaram || 84 ||



janmabhūmau janenātpaṃ yadyatkarma śubhāśubham |

tasya tasya sa tadrūpaṃ bhuṅkte pariṇataṃ phalam || 85 ||



nikhilakuśalamūlā kīrtipuṣpojjvalaśrīḥ

śubhaphalabharasūrirdharmavallī narāṇām |

bhavati ca viṣavallī kilbiṣakleśamūla-

bhramanipatanamohānantasaṃtāpahetuḥ || 86 ||



saṃtapte'smin kharataramaruṣphārasaṃsāramārge

pāpaṃ punyaṃ tyajata janatāḥ saktatīvrānutāpam |

puṇyaṃ puṇyaṃ kuruta satataṃ puṇyapīyūṣasiktāḥ

puṇyacchāyātarutalabhuvaḥ śītalāḥ puṇyabhājām || 87 ||



iti satpraṇidhānasya phalaṃ kathayatā svayam |

bhikṣūṇāmupadeśo'yaṃ bhaktyai bhagavatā kṛtaḥ || 88 ||



iti kṣemendraviracitāyām bodhisattvāvadānakalpatāyāṃ

muktālatāvadānaṃ nāma saptamaḥ pallavaḥ ||