Digital Sanskrit Buddhist Canon
- (626) 571-8811 ext.321
- [email protected]
Dvātriṃśatimaḥ
Technical Details
- Text Version:
Romanized
- Input Personnel:
DSBC Staff
- Input Date:
2005
- Proof Reader:
Miroj Shakya
- Supplier:
Nagarjuna Institute of Exact Methods
- Sponsor:
University of the West
- Parallel Devanāgarī version द्वात्रिंशतिमः
297. dānena pretagati chindati bodhisattvo
dāridrakaṃ ca chinatī tatha sarvakleśān|
bhogāṃścanantavipulāṃ labhate caranto
dānena sattva paripācayi kṛcchraprāptān||1||
298. śīlena tīryagati varjayi nekarupā-
maṣṭau ca akṣaṇa kṣaṇāṃ labhate sa nityam|
kṣāntīya rupa labhate paramaṃ udāraṃ
suvarṇacchavi priyu jagasya udīkṣaṇīyo||2||
299. vīryeṇa śuklaguṇa hāni na abhyupaiti
jñānaṃ ananta labhate jinakośagañjam|
dhyānena kāmaguṇa utsṛjate jugupsyān
vidyā abhijña abhinirharate samādhim||3||
300. prajñāya dharmaprakṛtī parijānayitvā
traidhātukānta samatikramate apāyān|
vartitva cakraratanaṃ puruṣarṣabhāṇāṃ
deśeti dharma jagatī dukhasaṃkṣayāye||4||
301. paripūrayitva imi dharma sa bodhisattvo
api kṣetraśuddhi parigṛhṇati sattvaśuddhim|
api buddhavaṃśa parigṛhṇati dharmavaṃśaṃ
tatha saṃghavaṃśa parigṛhṇati sarvadharmān||5||
302. vaidyottamo jagati rogacikitsakārī
prajñopadeśa kathito ayu bodhimārgo|
nāmena ratnaguṇasaṃcaya bodhimārgaḥ
taṃ sarvasattva itu mārgatu prāpnuvanti||6||
bhagavatyāṃ ratnaguṇasaṃcayagāthāyāṃ parīndanāparivarto nāma dvātriṃśatimaḥ||
[ācāryaharibhadrakṛtā praśastiḥ|]
lokaṃ prāpayituṃ sukhena padavīṃ saṃpaddūyāvāhinīṃ
kāruṇyāhitacetasā bhagavatā buddhena saṃdīpitam|
śrutvā te'khiladharmatattvanilayaṃ sūtraṃ samādānato
gatvā sthānamaharniśaṃ nijamalaṃ dhmāyantu ye'bhyāgatāḥ||1||
kāle'smin bahudṛṣṭisaṃkulakalau pāṭhe'pi dūraṃ gate
gāthābhedamanekapustakagataṃ dṛṣṭvādhunā nyāyataḥ|
kūpaṃ vādigajendrakumbhadaraṇe bhadreṇa yā śodhitā
lokārthaṃ hariṇā mayā suvihitā seyaṃ budhairgṛhyatām||2||
āryāṣṭasāhasrikāyā bhagavatyāḥ prajñāpāramitāyāḥ parivartānusāreṇa bhagavatī ratnaguṇasaṃcayagāthā samāptā||
ye dharmā hetuprabhavā hetuṃ teṣāṃ tathāgato hyavadat|
teṣāṃ ca yo nirodha evaṃ vādī mahāśramaṇaḥ||
[lekhakapraśastiḥ|]
yo'sau dharmaṃ sugatagaditaṃ paṭhate bhaktibhāvā-
nmātrāhīnaṃ kathamapi padaṃ pādagāthākṣaraṃ vā|
jihvādoṣaiḥ pavanacaritaiḥ śleṣmadoṣapracārai-
ryūyaṃ buddhāḥ subhavanagatā bodhisattvāḥ kṣamadhvam||
samāptam| śubham||
The rights of the materials herein are as indicated by the source(s) cited. Rights in the compilation, indexing, and transliteration are held by University of the West where permitted by law. See Usage Policy for details.
Our Address
Newsletter
Subscribe to our newsletter for latest updates about the canon text of our project