• Home
• Canon Text
• देवनागरी
• शास्त्रपिटक
• मध्यमक
• तथागतपरीक्षा द्वाविंशतितमं प्रकरणम्

तथागतपरीक्षा द्वाविंशतितमं प्रकरणम्

Technical Details

२२

तथागतपरीक्षा द्वाविंशतितमं प्रकरणम्।



स्कन्धा न नान्यः स्कन्धेभ्यो नास्मिन् स्कन्धा न तेषु सः।

तथागतः स्कन्धवान्न कतमोऽत्र तथागतः॥१॥



बुद्धः स्कन्धानुपादाय यदि नास्ति स्वभावतः।

स्वभावतश्च यो नास्ति कुतः स परभावतः॥२॥



प्रतीत्य परभावं यः सोऽनात्मेत्युपपद्यते।

यश्चानात्मा स च कथं भविष्यति तथागतः॥३॥



यदि नास्ति स्वभावश्च परभावः कथं भवेत्।

स्वभावपरभावाभ्यामृते कः स तथागतः॥४॥



स्कन्धान् यद्यनुपादाय भवेत्कश्चित्तथागतः।

स इदानीमुपादद्यादुपादाय ततो भवेत्॥५॥



स्कन्धांश्चाप्यनुपादाय नास्ति कश्चित्तथागतः।

यश्च नास्त्यनुपादाय स उपादास्यते कथम्॥६॥



न भवत्यनुपादत्तमुपादानं च किंचन।

न चास्ति निरुपादानः कथंचन तथागतः॥७॥



तत्त्वान्यत्वेन यो नास्ति मृग्यमाणश्च पञ्चधा।

उपादानेन स कथं प्रज्ञप्येत तथागतः॥८॥



यदपीदमुपादानं तत्स्वभावत्वान्न विद्यते।

स्वभावतश्च यन्नास्ति कुतस्तत्परभावतः॥९॥



एवं शून्यमुपादानमुपादाता च सर्वशः।

प्रज्ञप्यते च शून्येन कथं शून्यस्तथागतः॥१०॥



शून्यमिति न वक्तव्यमशून्यमिति वा भवेत्।

उभयं नोभयं चेति प्रज्ञप्त्यर्थं तु कथ्यते॥११॥



शाश्वताशाश्वताद्या कुतः शान्ते चतुष्टयम्।

अन्तानन्तादि चाप्यत्र कुन्तः शान्ते चतुष्टयम्॥१२॥



येन ग्राहो गृहीतस्तु घनोऽस्तीति तथागतः।

नास्तीति स विकल्पयन्निर्वृतस्यापि कल्पयेत्॥१३॥



स्वभावतश्च शून्येऽस्मिंश्चिन्ता नैवोपपद्यते।

परं निरोधाद्भवति बुद्धो न भवतीति वा॥१४॥



प्रपञ्चयन्ति ये बुद्धं प्रपञ्चातीतमव्ययम्।

ते प्रपञ्चहताः सर्वे न पश्यन्ति तथागतम्॥१५॥



तथागतो यत्स्वभावस्तत्स्वभावमिदं जगत्।

तथागतो निःस्वभावो निःस्वभावमिदं जगत्॥१६॥