• Home
• Canon Text
• Romanized
• śāstrapiṭaka
• prajñāpāramitā
• 3. kṣāntipāramitāsamāsaḥ

3. kṣāntipāramitāsamāsaḥ

Technical Details

3. kṣāntipāramitāsamāsaḥ



saṃmohanīṃ manmathapakṣamāyāṃ

prāhuḥ sukhāṃ caiva vimokṣamāyām|

tasyāṃ na kuryāt kaiva kṣamāyāṃ

prayatnamekāntahitakṣamāyām || 1 ||



parāparādheṣu sadānabhijñā

vyavasthitiḥ sattvavatāṃ manojñā|

guṇābhinirvartitacārusaṃjñā

kṣameti lokārthacarī kṛpājñā || 2 ||



parārthamabhyudyatamānasānāṃ

dīkṣāṃ titikṣāṃ prathamāṃ vadanti|

seturjalānīva hi roṣadoṣaḥ

śreyāṃsi lokasya samāvṛṇoti||3||



alaṃkriyā śaktisamanvitānāṃ

tapodhanānāṃ balasaṃpadagrā|

vyāpādadāvānalavāridhārā

pretyeha ca kṣāntiranarthaśāntiḥ || 4 ||



kṣamāmaye varmaṇi sajjanānāṃ

vikuṇṭhitā durjanavākyabāṇāḥ|

prāyaḥ praśaṃsākusumatvametya

tatkīrtimālāvayavā bhavanti || 5 ||



pratikriyā durjanavāgviṣāṇāṃ

prahlādanī jñānaniśākarābhā|

dhīraprakārā prakṛtiryatīnāṃ

kṣāntirguṇānām adhivāsabhūmiḥ || 6 ||



sattvasya gāmbhīryamayasya sāro

ghanāgamaḥ krodhanidāghaśāntyai|

vyatītavelasya guṇārṇavasya

vyāpī svanaḥ kṣāntimayo'bhyudeti||7||



ā brahmalokādadhirohāṇārthā

sopānapaṅktirgatakhedadoṣā|

karmāntaśālā guṇaśībharasya

rūpasya sallakṣaṇabhūṣaṇasya || 8 ||



unmūlanī vairaphalācitānāṃ

kṣamāsariddoṣamahādrumāṇām|

saṃbodhicittasya vivardhitasya

guṇāmburaśeḥ satatānukūlā || 9 ||



śubhā paratrāpi hite samṛddhirjaga-

ddhitārthasya parā vivṛddhiḥ|

śubhasvabhāvātiśayaprasiddhiḥ

kṣāntirmanaḥkāyavacoviśuddhiḥ || 10 ||



saṃsāradoṣairna ca cchedameti

sattvān kṛpāsnigdhamavekṣamāṇaḥ|

satkarmabhirlokahitaiḥ samantād

yaśomayatvaṃ vrajatīva loke || 11 ||



na spṛśyate vismayavācyadoṣairjñā-

nāvadānena titikṣureva|

anityatākṣāntibalodayācca

praharṣamāyāti sukhe'pi naiva || 12 ||



saṃkocamāyāti na cāyaśobhirvi-

sāriṇā kṣāntibalaśrayeṇa|

ataśca śeṣairapi lokadharmairani-

śritatvānna sa cāpalīti || 13 ||



tīvraprakārairapi viprakārairna

vikriyāṃ yānti satāṃ manāṃsi|

dṛḍhābhilāṣāṇi munīndrabhāve

kṣāntyā balādhānasusaṃskṛtāni || 14 ||



sa kṣāntidhīreṇa ca mānasena

kaṣṭāni saṃdarśayate tapāṃsi|

darponnatiṃ tīrthakṛtāṃ manaḥsu

nīcaiḥ kariṣyan hitakāmyayaiva || 15 ||



loko'yamātmābhiniveśasamūḍhaḥ

śeṣān parānityabhimanyamānaḥ|

tadviprakārairabhibhūtacetā<ḥ>

kṣamāviyogāt parikhedameti || 16 ||



kṛpāsanāthāni satāṃ manāṃsi

kṣāntyā kṛtasvastyayanakriyāṇi|

naṣṭātmadṛṣṭiṇi parāpakārān

na vikriyāṃ yānti guṇānurāgāt || 17 ||



mithyāvikalpo hṛdayajvarasya

krodhasya heturdhṛtidurbalānām|

samyagvikalpastu samādadhāti

kṣāntiprakārāṃ manasaḥ praśāntim || 18 ||



vikalpasanniśrayasaṃśritāyāṃ

kṣāntyāṃ na tu syāccalitāvakāśaḥ|

pratyūṣavātasphurite'mbhasīva

saṃpūrṇacandrapratibimbalakṣayāḥ || 19 ||



vikalpaśāntiṃ paramārthatastu

kṣāntiṃ kṣamātattvavido vadanti|

tasmādvikalpopaśame yateta

svapnopamaṃ lokamavekṣamāṇaḥ || 20 ||



cakṣuḥ kim ākrośati cakṣure-

tacchrotrādi vākrośati kiṃ tadādi|

yaivaṃ kṣamā sāyatanānvavekṣā

na kṣāntireṣā paramārthatastu || 21 ||



vaktā vacaścaitadanityameva

śrutirvikalpo'pi ca yo mamāyam|

anityabhāvapravikalpanaiṣā

na kṣāntimetām paramāṃ vadanti || 22 ||



kartāpakārasya na kaścidasti

naivāsti kaścitkriyāte ca yasya|

nairātmasaṃdarśanasiddhireṣā

na kṣāntireṣāpi gataprakarṣā || 23 ||



tattatpratītya prabhavanti bhāvā

nindāpraśaṃsāsukhaduḥkhasaṃjñāḥ|

pratītyasiddheravatārabhūmirna

kṣāntiratyantasamāhitaiṣā || 24 ||



yadyesā saṃmohamahāgraheṇa

paryastacetā nanu nāhamevam|

ityunnate cāvanate ca citte

kṣāntiprakarṣasya kuto'vakāśaḥ || 25 ||



pradhvaṃsinī varṇalavapratiśru-

dyantrādivaikaikaśa uccarantī|

kuryāṃ kathaṃ kasya ca kāṃ ca pīḍām

eṣāpi na kṣāntiratiprakṛṣṭā || 26 ||



yadyesā matpāpaparikṣayārthaṃ

na vīkṣate svāmapi dharmapīḍām|

asmān na kalyāṇataraṃ hi mitram

asāvapi kṣāntyupacārā eva || 27 ||



karmasvatāṃ eva hi vīkṣamāṇasti-

tikṣate tadguṇadarśanācca|

naivaṃprakārāpi hi naiṣṭhikatvaṃ

kṣāntirvikalpopahatā prayāti || 28 ||



anityaduḥkhāśuciniḥsvabhāvatā

mama kṣamante na tu tadviparyayāḥ|

iyaṃ vipakṣapraśamakṣamā kṣamā

dvayapravṛtterna tu pāramārthikī || 29 ||



ayatnatattvārthavicakṣaṇo janaḥ

paropakāreṣu yataḥ pravartate|

kṣamā na caivaṃ samatāṃ sameti yā

yataḥ kṣamaivaṃ na vikalpanakṣayā || 30 ||



nirodham āyānti yadā tvaśeṣatāḥ

samādhikanyūnavikalpanakramāḥ|

anuttarāṃ kṣāntimamānagocarāṃ

vadanti tāmadvāyamārgacāriṇāḥ || 31 ||



svataḥ parasmādubhayādahetuto

yathā na bhāvāḥ prabhavanti ke cana|

svataḥ parasmād ubhayād ahetutastathā

na bhāvā vibhavanti ke cana || 32 ||



naṣṭād anaṣṭād ubhayāc na nobhayān

na jātu kāryaṃ khalu vidyate kva cit|

tathāpi kāryaṃ samudeti vastuno

yetthaṃ kṣamā sā dvayavarjitā kṣamā || 33 ||



sato'sato vāsti na janma janmanā

vinā nirodho'pi na kasya cit kva cit|

svabhāvaśūnyāmiti bhāvakalpanāṃ

vipaśyataḥ kṣāntirudeti naiṣṭhikī || 34 ||



avāpya yāṃ vyākriyate sahasraśo

jinairasau nāma jino bhaviṣyati|

pravartate lokahitakriyāvidhiḥ

samāhitasyaiva ca tasya sarvadā || 35 ||



yāvacca bhāvābhiniviṣṭabuddhiratra

dvayaṃ tāvadupaiti mohāt|

tathānimittaṃ ca vimokṣaheturdure

bhavatyasya yathā kṣiteḥ kham || 36 ||



upaiti dharmapraṇidhānakarmasu

prabhutvamṛddhāvadhimuktijanmasu|

tathā pariṣkāravidhau svacetasi

prakarṣiṇi jñānabale tathāyuṣi || 37 ||



avāpya caitadvaśitāmayaṃ dhanaṃ

prakṛṣṭaṃ akṣiṣṇu parārthasādhanam|

janasya kṛcchreṣu patiṣyataḥ sataḥ

sa jāyate dhāraṇakāraṇaṃ vibhuḥ || 38 ||



tasmāt parārthamahatīṃ dhuramudvahadbhiḥ

kṣānterupāyavidhireṣa sadānugamyaḥ|

atra sthitasya hi bhavanti parārthacittāḥ

sarvā<ḥ> kriyā guṇaphalābharaṇābhirāmāḥ || 39 ||



asyāṃ hi bhaktirapi yā pravirūḍhamūlā

tāmabhyasanti munayo munirājabhāve|

śraddhānuviddhamanasāṃ na hi dharmamārge

dṛṣṭo manoratharathasya yato'kṣabhaṅgaḥ || 40 ||



|| kṣāntipāramitāsamāsaḥ ||