Digital Sanskrit Buddhist Canon

Vandanānuśaṃsā saptadaśaḥ paricchedaḥ

Technical Details
  • Text Version:
    Romanized
  • Input Personnel:
    DSBC Staff
  • Input Date:
    2007
  • Proof Reader:
    Miroj Shakya
  • Supplier:
    Nagarjuna Institute of Exact Methods
  • Sponsor:
    University of the West
vandanānuśaṃsā saptadaśaḥ paricchedaḥ |



ukto vandanādividhiḥ | tena puṇyavṛddhirbhavatīti kuto gamyate? āryāvalokanasūtrāt |

evaṃ hi tatroktam-



varjayatyakṣaṇānyaṣṭau ya ime deśitā mayā |

kṣaṇaṃ cārāgayatyekaṃ buddhotpādaṃ suśobhanam ||

varṇavān rūpasaṃpanno lakṣaṇaiḥ samalaṃkṛtaḥ |

sthāmnā balena copeto nāsau kausīdyamṛcchati |

āḍhayo mahādhanaścāsau adhṛṣyaḥ puṇyavānapi |

ārāgya lokapradyotaṃ satkaroti punaḥ punaḥ ||

śreṣṭhīkuleṣu sphīteṣu sa āḍhayeṣūpapadyate |

bhaveddānapatiḥ śūro muktatyāgo hyamatsarī ||

rājā bhaveddhārmiko'sau catudvīpeśvaraḥ prabhuḥ |

praśāsayenmahīṃ kṛtsnāṃ samudragirikuṇḍalām ||

maharddhikaścakravartī saptaratnasamanvitaḥ |

rājye pratiṣṭhito buddhān satkaroti punaḥ punaḥ ||

cyutaścāsmādgataḥ svarga prasanno jinaśāsane

śakro bhavati devendraḥ īścaro merumūrdhani ||

na śakyaṃ bhāṣatā varṇaṃ kṣapayituṃ kalpakoṭibhiḥ |

yaḥ stupaṃ lokanāthasya naraḥ kuryātpradakṣiṇam ||

na jātu so'ndhaḥ khañjo vā kalpānāmapi koṭibhiḥ |

utpādya bodhicittaṃ yaḥ śāstuḥ stūpaṃ hi vandate ||

dṛḍhavīryo dṛḍhasthāmo vīraśca dṛḍhavikramaḥ |

kauśalyaṃ gacchati kṣipraṃ kṛtvā stūpapradakṣiṇam ||

yo buddhakoṭiniyutaśatasahastrān

kalpāna koṭī ca tuliya satkareyā |

yaśceha kalpe caramaka ghorakāle

vandeya stūpaṃ bahutara tasya puṇyam ||

agro hi buddho atuliya dakṣiṇīyo

agrāṃ caritvā cariyaviśeṣaprāptaḥ |

tasyeha pūjāṃ kariya narariṣabhasya

vipāka śreṣṭho bhavati atulyarūpaḥ ||

itaścyutvā manuṣyebhyastrāyastriṃśeṣu gacchati |

vimānaṃ labhate tatra vicitraṃ ratanāmayam ||

kūṭāgāraṃ svayaṃ datvā apsarogaṇasevitaḥ |

mālāṃ stūpe saṃpradāya trāyastriṃśeṣu jāyate ||



aṣṭāṅgajalasaṃpūrṇāṃ suvarṇasikatāśritām |

vaiḍūryasphaṭikaiścaiva divyāṃ puṣkariṇīṃ labhet ||

bhuktvā ca tāṃ ratiṃ divyāṃ āyuḥ saṃpūrya paṇḍitaḥ |

cyutvā ca devalokātsa manuṣyo bhavati bhogavān ||

jātikoṭisahastrāṇi śatāni niyutāni ca |

satkṛtaḥ syācca sarvatra caitye mālāṃ pradāya ca ||

cakravartī ca rājāsau śakraśca bhavatīśvaraḥ |

brahmā ca brahmalokasmin caitye mālāṃ pradāya ca ||

paṭṭapradānaṃ datvā tu lokanāthasya tāyinaḥ |

sarve'syārthāḥ samṛdhyanti ye divyā ye ca mānuṣāḥ |

[ tyajeddhīnānakuśalān na sa tatropapadyate |]

mālāvihāraṃ kṛtvā ca lokanāthasya dhātuṣu |

abhedyaparivāreṇa rājā bhūyānmaharddhikaḥ ||

priyaḥ sa dayitaścāsau satkṛtaśca praśaṃsitaḥ |

devānāmatha nāgānāṃ ye loke'smiṃśca paṇḍitāḥ ||

yatrāsau jāyate vīraḥ puṇyateja sudīpitaḥ |

te kulāḥ satkṛtā bhonti rāṣṭrāṇi nagarāṇi ca ||

yaḥ sarṣapāt sūkṣmataraṃ gṛhītvā dhūpeya dhūpaṃ bhagavati caityakeṣu |

tasyānuśaṃsān śṛṇuta prabhāṣato me

prasannacittā jahiya khilāṃ malāṃśca ||

sa puṇyavāṃścarati diśaḥ samantā-

dārogyaprāpto dṛḍhamatirapramattaḥ |

vineti śokaṃ vicarati cārikāyāṃ

priyo manāpo bhavati mahājanasya ||

rājyaṃ ca labdhvā jinavaru satkarotī

mahānubhāvo vidu cakravartī |

suvarṇavarṇo vicitralakṣaṇaiḥ sa

manojñagandhān labhi sarvaloke |

jātamātro labhate śreṣṭhavastrān

divyaviśiṣṭa surucira kauśikāṃśca ||

bhotī sukhasukāyaḥ saṃveṣṭaya stūpaṃ nāthasya cīvaraiḥ |

yaścīvareṇa caityeṣu kuryāt pūjāmatulāṃ nāyakānām |

tasyeha bhotī asadṛśu ātmabhāvo

dvātriṃśatībhiḥ kavacita lakṣaṇebhiḥ ||

pāṇītaleṣu surucira muktahārāḥ

prādurbhavantī vividha anantakalpāḥ |

siṃhalatāḥ suruciravarṇasūtrā

veṭhitva stūpaṃ bhagavata cīvarebhiḥ ||

datvā patākāṃ bhagavata cetikeṣū

chandaṃ janitvā tatha siya buddhaloke |

sa pūjanīyo bhavati mahājanasya

carantu śreṣṭho jinacārikāye ||

suvarṇavarṇo bhavati si ātmabhāvo

lābhī sa bhotī suruciracīvarāṇām |

karpāsikānāṃ susahitakambalānāṃ

dukūlakānāṃ tatha varakauśakānām ||

dhvajaṃ daditvā hataraji sattvasāre

dhanaṃ prabhūtaṃ pratilabhi nacireṇa |

prabhūtakoṣo bhavati anantaprajño

paricāru tasya bhavatyadīnacittaḥ |

na cittaśūlaṃ janayati so parasya

prasādacittaḥ sada apramattaḥ ||

na tasya agniḥ kramati viṣāṃ na śastraṃ

udvīkṣaṇīyo bhavati mahājanasya |

adho upādāya ca vibhavāgru yāvat

jāmbūnadaṃ tena bhavati buddhakṣetram ||

śakyaṃ kṣayetuṃ āyu śriya evarūpā

na buddhastūpe dharayata ekadīpam ||

na tasya kāyo bhavati avarṇitāṅgo

dṛḍhāṃsu bhotī parighabhujo achambhī |

ālokaprāpto vicarati sarvaloke

daditva dīpaṃ bhagavata cetikeṣu ||

yadi buddhakṣetrā niyutaśatā sahastrā

bhaveyu pūrṇā śikhagatasarṣapebhiḥ |

śakyaṃ gaṇetuṃ tulayitu bhāṣituṃ vā

na tathāgateṣū dharayitu ekadīpam ||

alaṃkaritvā suruciradarśanīyaṃ

yo deti chatraṃ bhagavata cetikeṣu |

tasyeha bhotyasadṛśa ātmabhāvo

dvātriṃśatībhiḥ kavacita lakṣaṇebhiḥ ||

yebhirjinasya pratapata ātmabhāvo

rūpaṃ viśiṣṭaṃ yathariva kāñcanasya |

jāmbūnado vā suruciradarśanīyā

abhikīrṇa [puṣpebhi] kusumita lakṣaṇebhiḥ ||

abhijñaprāpto bhavati mahāyaśākhyaḥ

carati śreṣṭhāvaracārikāyām |

na bhogahānirbhavati kadācidasya

devāna bhoti gurukṛta pūjitaśca ||

na kāmabhogai ramati kadāci dhīro |

viśuddhaśīlaḥ sakuśalabrahmacaryaḥ |

samādayitvā vanupavane uṣitvā

'bhiyuktidhyāno bhavati viśeṣaprāptaḥ ||

na jñānahānirbhavati kadācidasya

bodhicittaṃ vijahati so kathaṃcit |

maitrīvihārī bhavati adīnacitto

datveha chatraṃ bhagavata cetikeṣu ||

vādyena pūjāṃ naravṛṣabhasya kṛtvā

na śokaśalyavaśa jātu bhoti |

manojñaghoṣo bhavati manuṣyaloke

svarāṅgu tasyāvikala[vi] śuddha bhoti ||

viśuddhacakṣurbhavati sa saṃprajanyā

viśuddhaśrotro bhavati udagracittaḥ |

ghrāṇendriyaṃ parama uttapta bhoti

vāditva vādyaṃ bhagavata cetikeṣu ||

jihvāsya bhoti surucira darśanīyā

susūkṣma mṛdvī rucira manojñaghoṣā |

raktā pravālā yathariva devatānāṃ

svarāṅgakoṭīvara sṛjate'prameyām ||

na jātu bhotī uragu ajihvako vā

na khañjakubjo nāpi ca nāmitāṅgaḥ |

viśiṣṭa bhotī surucira ātmabhāvo

vāditva vādyaṃ bhagavata cetikeṣu |||

na jātu kaścijjanaye'prasādaṃ

devo ca nāgo manuja mahorago vā |

āśvāsaprāpto vicarati sarvaloke

vāditva vādyaṃ bhagavata cetikeṣu ||

kalpāna koṭī niyuta[śatā] sahastraṃ

viśiṣṭakāyo bhavati aninditāṅgaḥ |

prāsādiko'sau kavacita lakṣaṇebhiḥ

saṃśodhya stūpaṃ bhagavata nirvṛtasya ||

vimāna śreṣṭhaṃ labhati manojñagandhaṃ

divyaṃ viśiṣṭaṃ suruciracandanasya |

na jātu tṛṣṇāṃ janayati so kadācit

saṃśodhya stūpaṃ bhagavata nirvṛtasya ||

pralopakāle jinavaraśāsanasmin

na jātu bhotī upagata jambudvīpe |

svarge sa bhoti pratiṣṭhita tasmi kāle

gandhānulepaṃ dadiya jinasya stūpe ||

durgandhikāmānaśucijugupsanīyān

varjeti nityaṃ pratiṣṭhita śīlaskandhe |

carī sa nityamimu vara brahmacarya

gandhānulepaṃ kariya jinasya stūpe ||

itaścyuto'sau marupati svargaloke

artha sahastrā tulayati no cireṇa |

karoti cārtha suvipula devatānāṃ

gandhānulepaṃ kariya jinasya stūpe ||

viśiṣṭavākyo bhavati manojñaghoṣaḥ

priyo manāpo bahujanasatkṛtaśca |

sukhaṃ ca tasya bhavati sadā prasannaṃ

gandhānulepaṃ kariya jinasya stūpe ||

apāyabhūmiṃ vijahātyaśeṣāṃ

āsannako bhavati tathāgatānām |

prasādalabdhaḥ sada sukhi premaṇīyo

gandhānulepaṃ kariya jinasya stūpe ||

so akṣaṇaṃ vai vijahāti sarvaṃ

aṣṭa kṣaṇāścāsya viśiṣṭa bhonti |

buddhāna pūjāmatuliya so karoti |

choritva jālaṃ bhagavata cetikeṣu ||

śūraśca bhoti dṛḍhamatirapramatto

na kāmabhoge'bhiratiṃ janeti |

naiṣkramyaprāpto ca adīnacittaḥ

choritva jālaṃ bhagavata cetikeṣu ||

na bodhicittaṃ pramuṣyati tasya jātu

akhaṇḍaśīlo'sti susaṃvṛtaśca |

dharma virāgaṃ labhate viśuddhaṃ

upanīya jālaṃ bhagavata cetikeṣu ||

durvācatāṃ vijahati sarvakālaṃ

prajñāabhāvaṃ ca jahātyaśeṣam |

viśālaprajño viharati cārikāyāṃ

upanīya jālaṃ bhagavata cetikeṣu ||

lābhī ca bhotī śucibhojanānāṃ

vastrān viśiṣṭān labhate suvarṇān |

sparśābhyupetān rucidarśanīyā-

nupanīya jālaṃ jinacetikebhyaḥ ||

abhyutkṣipitvā jinacetikebhyaḥ

nirmālya śuṣkaṃ pramuditavegajātaḥ |

vrajeta kāmān duḥkhadavairaghorān

ārāgayeddaśabalasārthavāhān ||

prāsādiko bhoti viśuddhakāyaḥ

udvīkṣaṇīyo bahujanapūjanīyaḥ |

na tasya rājāpi praduṣṭacittaḥ

yo jīrṇapuṣpānapaneya caitye ||

kumārga sarvaṃ pithita apāyabhūmiḥ

sa śīlaskandhe sthita bodhisattvaḥ |

avatārayitvā jinacetikebhyaḥ

puṣpaṃ ca prāganyanaraiḥ pradattam ||

śokāṃśca doṣān vijahātyamatto

rogānaśeṣān vijahātyanekān |

āśvāsaprāptaśca anantakalpān

yo jīrṇapuṣpānapaneti caitye ||

buddhaśca bhotyasadṛśadakṣiṇīyo

atulyaprāpto naramarupūjanīyaḥ |

alaṃkṛto bhavati viśuddhakāyaḥ

yo jīrṇapuṣpānapaneti caitye ||

dadyācca yaḥ surucira divya puṣpaṃ

māndāravānapyatha pāṭalaṃ vā |

nirmālyakaṃ yo'panayeta caitye

vipāka śreṣṭho'sya bhavedatulyaḥ ||

yaḥ prāñjaliḥ praṇamati nāthastūpaṃ

chandaṃ janitvā ca sa buddhaloke |

so bhoti loke gurukṛtu satkṛtaśca

prāsādiko bhavati sudarśanīyaḥ ||

tasyeha rājyaṃ nipatati sarvaloko

devāsurā nāgamanuṣyakāśca |

sarvāḥ sahastrāḥ kusumita lokadhātuḥ

praśāsti rājño vaśa īścarāṃśca ||

ye tasya rājye sthita bhonti sattvāḥ

sthāpeya sarvānukaluṣa buddhajñāne |

apāyabhūmyastyaktā bhavanti

karoti caiṣāṃ paramasuśreṣṭhamartham ||

paricāro'sya bhavati manojñaghoṣaḥ

puṇyairupetaḥ smṛtimatipūjanīyaḥ |

āśvāsaprāpto vicaratī jīvaloke

sadābhiprāyaṃ janayati śreṣṭhaprītim ||

paricāra bhotyasya svarāṅgaśuddhaḥ

jñāyeta sattvairmadhura praśāntavākyaḥ |

na tasya kaścijjanayati ceśvaratvaṃ

vilokanīyo bhavati mahājanasya ||

dānapramodaṃ priyatārthacaryāṃ samānārthatāṃ janayati mahājanasya |

ākruṣṭaḥ sanno janayeta roṣaṃ

yaḥ prāñjaliḥ praṇamati buddhastūpam ||

devendra bhotyupagata svargaloke

manuṣyako bhavati narasya rājā |

na pārihāṇirbhavati kadācidasya

yo añjalībhirnamatīha stūpam ||

nāsāvapāye prapateta jātu

hīnāṃśca varjeta sa kāma loke |

āḍhayo dhanī bhoti prabhūtakoṣo

yo'ñjalībhirnamatiha buddhastūpam ||

sūtrāntacaryā na kadācidasya

nāsthānakopaṃ kurute nṛloke |

sattvāśca tṛptā muditāsya bhonti

yaḥ saṃpramuñcī guṇavati ekavācam ||

yaḥ puṣpamuṣṭiṃ gṛhītvodagracittaḥ

prasādato'vakirati lokanāthe |

sa puṇyavān bhavati manuṣyaloke

rākṣe ca sthitvā jina satkaroti ||

śokā na doṣāḥ khilamala nāsya bhonti

atulyatāptaśca susaṃsthitāṅgaḥ |

ālokanīyaśca mahājanasya

vrajeta kāmān bhayakara vairaghorān || iti ||



āryamahākaruṇā[puṇḍarīka] sūtre'pyuktam- tiṣṭhatu tāvadānanda yo māṃ saṃmukhaṃ satkuryāt

tiṣṭhatu me śarīrasya pūjā sarṣapaphalamātreṣu dhātuṣu | tiṣṭhatu māmuddiśya kṛteṣu stūpeṣu satkāraḥ | ye kecidānanda buddhamālambya antaśa ekapuṣpamapyākāśe kṣepsyanti, tasya puṇyaskandhasya yo vipākaḥ, sacedyāvānanādiḥ saṃsāro yasya pūrvā koṭirna prajñāyate, tāvataḥ kalpān saṃsaratāṃ teṣāṃ śakratvaṃ brahmatvaṃ cakravartitvam, na śakyastatparyanto'dhigantum | tiṣṭhatu buddhālambanatā antaśa ākāśe'pyekapuṣpanikṣepaḥ, sacedantaśaḥ svaprāntaragatā api sattvā buddhamālambya ākāśe ekapuṣpamapi kṣepsyanti, tadapyahaṃ kuśalamūlaṃ nirvāṇaparyavasānaṃ vadāmīti ||



uktaṃ ca āryavṛhatsāgaranāgarājaparipṛcchāyām- aṣṭābhirbhujagādhipate dharmaiḥ samanvāgatā bodhisattvāḥ satatasamitaṃ buddhasamavadhānaṃ pratilabhante | katamairaṣṭābhiḥ? buddhabimbadarśanasattvasamādāpanatayā | tathāgatapratimākaraṇatayā | tathāgatasyābhīkṣṇaṃ varṇabhāṣaṇatayā | tathāgatadarśanasarvasattvasamādāpanatayā | yatra ca buddhakṣetre tathāgataśravaṃ śṛṇvanti, tatra praṇidhānamutpādayanti | nacāvalīnasaṃtatayo bhavanti | udārasaṃtatikāśca buddhajñānamabhilaṣante iti ||



kiṃ punaḥ puṇyavṛddhayarthino buddhasamavadhānena prayojanabhūtam, yasya guṇaparyantamasarvajño nādhigacchet | yathā āryagaṇḍavyūhe saṃvarṇitam-

sudurlabho buddhaśabdaḥ kalpakoṭiśatairapi |

kiṃ punardarśanaṃ sarvakāṅkṣācchedanamuttamam ||

sudṛṣṭo lokapradyotaḥ sarvadharmagatiṃ gataḥ |

puṇyatīrthaṃ trailokasya sarvasattvaviśodhanam ||

mahatpuṇyamayaṃ kṣetramuditaṃ jñānamaṇḍalam |

bhāsayatyamitaṃ lokaṃ puṇyaskandhavivardhanam ||

chedano duḥkhajālasya jñānaskandhaviśodhanaḥ |

na durgatibhayaṃ teṣāṃ yairihārāgito jinaḥ ||

vipulaṃ jāyate cittaṃ paśyatāṃ dvipadottamam |

prajñābalamasaṃkhyepaṃ jāyate candrabhāsvaram ||



punaratraivāha-



arthāya sarvasattvānāmutpadyante tathāgatāḥ |

mahākāruṇikā vīrā dharmacakrapravartakāḥ ||

pratikartuṃ kathaṃ śakyaṃ buddhānāṃ sarvadehibhiḥ |

sattvārtheṣvabhiyuktānāṃ kalpakoṭiśatairapi ||

kalpakoṭiṃ varaṃ pakkaṃ tryapāye bhṛśadāruṇe |

na tvevādarśanaṃ śāstuḥ sarvasaṅganivartinaḥ |

yāvantyaḥ sarvalokasminnapāyagatayaḥ pṛthak |

varaṃ tatra ciraṃ vāso buddhānāmaśrutirna ca ||

kiṃ kāraṇamapāyeṣu nivāsaściramiṣyate |

yatkāraṇaṃ jinendrasya darśanaṃ jñānavardhanam ||

chidyante sarvaduḥkhāṇi dṛṣṭvā lokeśvaraṃ jinam |

saṃbhavatyavatāraśca jñāne saṃbuddhagocare ||

kṣapayatyāvṛtīḥ sarvā dṛṣṭvā buddhaṃ narottamam |

vardhayatyamitaṃ puṇyaṃ yena bodhiravāpyate || iti ||



tadevamasti puṇyavṛddhau buddhasamavadhānena prayojanam | api ca pratimāmātradarśanamapi tāvadaparimitaphalaṃ tathāgatānām, kiṃ punaḥ svarūpeṇa? uktaṃ hi āryaśraddhābalādhānāvatāramudrāsūtre-



yaḥ kaścinmañjuśrīḥ kulaputraḥ kuladuhitā vā sarvalokadhāturajopamānāṃ pratyekabuddhānāṃ dine dine śatarasamāhāraṃ dadyāt divyāni ca vastrāṇi, evaṃ dadadgaṅgānadīvālukopamān kalpān dadyāt | yaścānyo mañjuśrīḥ kulaputraḥ kuladuhitā vā citrakarmalikhitaṃ vā pustakakarmakṛtaṃ vā buddhaṃ paśyet, ayaṃ tato'saṃkhyeyataraṃ puṇyaṃ prasavati | kaḥ punarvādo yo'ñjalipragrahaṃ vā kuryāt, puṣpaṃ vā dadyāt, dhūpaṃ vā gandhaṃ vā dīpaṃ vā dadyāt | ayameva tato'saṃkhyeyataraṃ puṇyaṃ prasavatīti ||



āryabodhisattvapiṭake'pi puṇyavṛddhayupāya uktaḥ- yastathāgatacaityaṃ śodhayati, sa catastro'grāḥ praṇidhānaviśuddhīranuprāpnoti | katamāścatastraḥ? agrāṃ rūpapraṇidhānaviśuddhim, agrāṃ dṛḍhasamādānapraṇidhānaviśuddhim, agrāṃ tathāgatadarśanapraṇidhānaviśuddhim, agrāṃ lakṣaṇasaṃpatpraṇidhānaviśuddhimiti ||



punaratraivākhyātam- tathāgatacaityeṣu puṣpāvaropaṇaṃ gandhānulepanaṃ kṛtvā aṣṭāvavikalatā anuprāpnoti | katamā aṣṭau? na rūpavikalo bhavati | na bhogavikalaḥ | na parivāravikalaḥ | na śīlavikalaḥ | na samādhivikalaḥ | na śrutavikalaḥ | na prajñāvikala | na praṇidhānavikalaḥ | iti ||



uktaṃ ca āryaratnarāśisūtre- ye tribhavaparyāpannāḥ sattvāste sarve pratyekaṃ tathāgatastūpān kārayeyurevaṃrūpānuccaistvena tadyathā sumeruḥ parvatarājaḥ | tāṃśca gaṅgānadīvālikāsamān kalpān pratyekaṃ sarvasattkāraiḥ satkuryuḥ | yaśca bodhisattvo'virahitasarvajñatācittainaikapuṣpamapyāropayet, ayaṃ tasmātpūrvakātpuṇyaskandhādbahutaraṃ puṇyaṃ prasavet ||



atraivoktam- ye khalu punastrisāhastramahāsāhastre lokadhātau sattvāste sarve mahāyānasaṃprasthitā bhaveyuḥ | sarve ca cakravartirājyasamanvāgatā bhaveyuḥ | ekaikaśca rājā cakravartī mahāsamudrapramāṇa dīpasthālīṃ kṛtvā sumerumātrāṃ vartīmādīpya pratyekamevaṃrūpāṃ dīpapūjāṃ tathāgatacaityeṣu pravartayet | yaśca abhiniṣkrāntagṛhāvāso bodhisattvastailaprakṣiptāṃ vartī kṛtvā ādīpya tathāgatacaitye dhārayet, asyāstailaprakṣiptāyā varteretatpūrvakaṃ pradīpadānaṃ śatatamīmapi kalāṃ nopaiti | yāvadupaniṣadamapi na kṣamata iti | peyālaṃ | ye ca khalu punaste rājānaścakravartino buddhapramukhaṃ bhikṣusaṃghaṃ sarvasukhopadhānaiḥ satkuryuḥ, yaścābhiniṣkrāntagṛhāvāso bodhisattvaḥ piṇḍapātraṃ caritvā pātraparyāpannaṃ pareṣāṃ saṃvibhajya paribhuñjīta, idaṃ tato bahutaraṃ ca mahārghataraṃ ca | yacca te rājānaścakravartinaḥ sumerumātraṃ cīvararāśiṃ buddhapramukhāya bhikṣusaṃghāya dadyuḥ, yaccābhiniṣkrāntagṛhāvāso bodhisattvastricīvaraṃ bahirdhā mahāyānasaṃprasthitāya buddhapramukhāya bhikṣusaṃghāya vā tathāgatacaitye vā dadyāt, idaṃ bhikṣoścīvaradānametatpūrvakacīvararāśimabhibhavati | yacca te rājānaḥ pratyekaṃ sarvaṃ jambūdvīpaṃ puṣpasaṃstṛtaṃ kṛtvā tathāgatacaitye niryātayet, yaccābhiniṣkrāntagṛhāvāso bodhisattvaḥ antaśa ekapuṣpamapi tathāgatacaitye āropayet, asya dānasyaitat pūrvakaṃ dānaṃ śatamīmapi kalāṃ nopaiti, yāvadupaniṣadamapi nopaitīti ||



āryānupūrvasamudgataparivarte'pi deśitam- catura imān bhadrānuśaṃsān paśyan bodhisattvastathāgatapūjāyāmutsuko bhavati | katamāṃścaturaḥ? agraśca me dakṣiṇīyaḥ pūjito bhaviṣyati, māṃ ca dṛṣṭvā anye'pi tathā śikṣiṣyanti, tathāgataṃ ca pūjayitvā bodhicittaṃ dṛḍhaṃ bhaviṣyati, dvātriṃśatāṃ ca mahāpuruṣalakṣaṇānāṃ saṃmukhadarśanena kuśalamūlamupacittaṃ bhaviṣyati | imāścatvāraḥ [iti] ||



idaṃ ca niruttaraṃ tathāgatapūjopasthānam | yathodāhṛtamāryasāgaramatiparipṛcchāsūtre-trīṇīmāni sāgaramate tathāgatasya niruttarāṇi pūjopasthānāni | katamāni trīṇi? yacca bodhicittamutpādayati | yacca saddharma parigṛhṇāti | yacca sattveṣu mahākaruṇācittamutpādayatīti ||



nirdiṣṭamapyāryaratnameghe- daśabhiḥ kulaputra dharmeḥ samanvāgatā bodhisattvā ananuliptā garbhamalena jāyante | katamairdaśabhiḥ? yaduta tathāgatapratimākaraṇatayā jīrṇacaityasaṃskaraṇatayā | tathāgatacaityeṣu gandhavilepanānupradānena | tathāgatapratibhāsu gandhodakasnānānupradānena | tathāgatacaityeṣu saṃmārjanopalepanānupradānena | mātāpitṝṇāṃ kāyaparicaryācaraṇena | ācāryopādhyāyānāṃ kāyaparicaryācaraṇena | sabrahmacāriṇāṃ kāyaparicaryācaraṇena | tacca nirāmiṣeṇa cittena na sāmiveṇa | tacca kuśalamevaṃ pariṇāmayanti- anena kuśalamūlena sarvasattvā nirupaliptā garbhamalena jāyantāmiti | tacca tīvreṇāśayena cintayanti | ebhiḥ kulaputra daśabhirdharmairiti ||



anumodanānuśaṃsāstvāryaprajñāpāramitāyāmuktāḥ- yaḥ prathamayānasaṃprasthitānāṃ bodhisattvānāṃ mahāsattvānāṃ tāścittotpādānanumodate, caratāmapi bodhisatvacaryā tāṃścittotpādānanumodate, avinivartanīyāmapi avinivartanīyadharmatāmanumodate bodhisattvānāṃ mahāsattvānām, kiyantaṃ sa bhagavan kulaputro vā kuladuhitā vā bahutaraṃ puṇyaskandhaṃ prasavati? evamukte bhagavān śakraṃ devānāmindrametadavocat-syātkhalu punaḥ kauśika trisāhastramahāsāhastrasya lokadhātoḥ palāgreṇa tulyamānasya pramāṇamudragrahītum, na tveva kauśika bodhisattvasya mahāsattvasya teṣāmanumodanāsahagatānāṃ cittotpādānāṃ puṇyapramāṇaṃ grahītum | evamukte śakro devānāmindro bhagavantametadavocat- mārādhiṣṭhitāste bhagavan sattvā veditavyāḥ, ye bodhisattvānāṃ mahāsattvānāṃ prathamacittotpādamupādāya yāvadanuttarāṃ samyaksaṃbodhimabhisaṃbuddhānāmevamaprameyamanumodanāsahagataṃ puṇyamiti na śṛṇvanti na jānanti, tāmanumodanāṃ na samanvāharanti, mārapakṣikāste bhagavan sattvā bhaviṣyanti | bhagavānāha - yaiḥ kauśika kulaputraiḥ kuladuhitṛbhiśceme cittotpādā anumoditā bodhisattvayānikairvā pratyekabuddhayānikairvā śrāvakayānikairvā, te kṣipraṃ tathāgatānarhataḥ samyaksaṃbuddhānārāgayiṣyanti | bhagavānāha - evaṃ tairanumodanāsahagataiścittotpādakuśalamūlairyatra yatropapatsyante, tatra tatra satkṛtāśca bhaviṣyanti, gurukṛtāśca mānitāśca pūjitāśca arcitāśca apacāyitāśca bhaviṣyanti | na ca te amanaāpāni rūpāṇi drakṣyanti | na ca te amanaāpān śabdān śroṣyanti | evaṃ na gandhānna rasānna spraṣṭavyān sprakṣyanti | na ca teṣāmapāyeṣūpapattiḥ pratikāṅkṣitavyā | svargopapattisteṣāṃ pratikāṅkṣitavyā | tatkasya hetoḥ? tathā hi taiḥ satvaiḥ sarvasattvasukhāvahāni asaṃkhyeyānāṃ satvānāṃ kuśalamūlānyanumoditāni, yāvadanuttarāṃ samyaksaṃbodhimabhisaṃbuddhaya aprameyāsaṃkhyeyān sattvān parinirvāpayiṣyantīti ||



punaratraivāha- ye subhūte gaṅgānadīvālikopameṣu trisāhastramahāsāhastreṣu lokadhātuṣu sarvasattvāste sarve'nuttarāṃ samyaksaṃbodhiṃ pratitiṣṭheyuḥ, anuttarāṃ samyaksaṃbodhiṃ pratiṣṭhāya gaṅgānadīvālikāsamān kalpānupalambhasaṃjñinaścatvāri dhyānāni samāpadyeran, yaśca bodhisattvo mahāsattvo'nayā prajñāpāramitayā upāyakauśalyena ca parigṛhīto'tītānāgatapratyutpannānāṃ buddhānāṃ bhagavatāṃ śīlasamādhiprajñāvimuktivimuktijñānadarśanaskandham, śrāvakāṇāṃ pratyekabuddhānāmapi śīlasamādhiprajñāvimuktivimuktijñānadarśanaskandhaṃ sarvamekato'bhisaṃkṣipya piṇḍayitvā tulayitvā niravaśeṣamanumodeta agrayāanumodanayā jyeṣṭhayā śreṣṭhayā varayā pravarayā praṇītayā uttarayā niruttarayā uttarottarayā asamayā asamasamayā apratisamayā anumodanayānumodya anumodanāsahagataṃ puṇyakriyāvastu anuttarāyai samyaksaṃbodhaye pariṇāmayati | asya subhūte anumodanāsahagatasya puṇyakriyāvastuno'sau pūrvaka aupalambhikānāṃ bodhisatvānāṃ caturdhyānamayaḥ puṇyābhisaṃskāraḥ śatatamīmapi kalāṃ nopaiti, yāvadupaniṣadamapi na kṣamate iti ||



ayameva nayaḥ pariṇāmanāyāmuktaḥ | athavā agrapariṇāmanayā pariṇāmitatvātsarvapuṇyānāmasya buddhatvāya satkṛtapraṇidhibuddhatvameva syāt | ataḥ kā parā puṇyavṛddhiḥ? taddhi aśeṣasattvamokṣakṛtapuṇyajñānopetaṃ nirvikalpaṃ ca ||



adhyeṣaṇāyāstvanuśaṃsā āryograparipṛcchāyāmuktāḥ- dharmagrāhyatāmupādāya aprameyāsaṃkhyeyeṣu buddhakṣetreṣvāyuḥ parirakṣaṇāyeti ||

āryaśikṣāsamuccaye vandanādyanuśaṃsā saptadaśaḥ paricchedaḥ samāptaḥ ||
uwestlogo

The rights of the materials herein are as indicated by the source(s) cited. Rights in the compilation, indexing, and transliteration are held by University of the West where permitted by law. See Usage Policy for details.

Our Address
Newsletter

Subscribe to our newsletter for latest updates about the canon text of our project