Digital Sanskrit Buddhist Canon

Ātmabhāvapariśuddhiparicchedaścaturdaśaḥ

Technical Details
  • Text Version:
    Romanized
  • Input Personnel:
    DSBC Staff
  • Input Date:
    2007
  • Proof Reader:
    Miroj Shakya
  • Supplier:
    Nagarjuna Institute of Exact Methods
  • Sponsor:
    University of the West
ātmabhāvapariśuddhiparicchedaścaturdaśaḥ |



uktāni smṛtyupasthānāni | evaṃ yogyacitto daśasu dikṣu śeṣasya jagato duḥkhasāgaroddharaṇābhisaṃbodhyupāyo vyomaparyantatraikālyasarvadharmavaśavartitvāyaiva tu punaḥ sarvadharmaśūnyatāmavataret | evaṃ hi pudgalaśūnyatā siddhā bhavati | tataśca chinnamūlatvāt kleśā na samudācaranti ||



yathoktamāryatathāgataguhyasūtre- tadyathāpi nāma śāntamate vṛkṣasya mūlacchinnasya sarvaśākhāpatrapalāśāḥ śuṣyanti, evameva śāntamate satkāyadṛṣṭayupaśamātsarvakleśā upaśāmyantīti ||



śūnyatābhāvanānuśaṃsāstvaparyantāḥ || yathā tāvaccandrapradīpasūtre-

so'sau śikṣa na jātu trasatī[ oṣirī?] sugatānāṃ

so'sau śūru na jātu istriṇāṃ vaśametī |

so'sau śāsani prīti vindate sugatānāṃ

yo'sau dharmasvabhāva jānatī supraśāntam ||

so'sau neha cireṇa bheṣya(te) dvipadendraḥ

so'sau vaidya bhiṣak bheṣyate sukhadātā |

so'sau udvari śalya sarvaśo dukhitānāṃ

yo'sau dharmasvabhāva jānatī supraśāntam ||

so'sau kṣāntibalena udgato naracandraḥ

so'sau loṣṭakadaṇḍatāḍito na kupyī |

so'sau chidyati aṅgamaṅgaśo na ca kṣumyo |

yo'sau dharmasvabhāva jānati supraśāntam ||

nāsau durgatiṣū patiṣyatī anuvyañjana

nityaṃ lakṣaṇadhāri bheṣyatī abhirūpaḥ |

pañco tasya abhijña bhāvitā imi nityaṃ

purataḥ so sugatāna sthāsyatī sa ca śūraḥ || ityādi ||



bhagavatyāmapyuktam- punaraparaṃ śāriputra bodhisattvena mahāsattvena buddhakāyaṃ niṣpādayitukāmena dvātriṃśanmahāpuruṣalakṣaṇānyaśītiṃ cānuvyañjanāni pratilabdhukāmena sarvatra jātau jātismaratāṃ bodhicittāvipraṇāśatāṃ bodhisattvacaryāsaṃpramoṣatāṃ pratilabdhukāmena sarvapāpamitrapāpasahāyān vivarjayitukāmena sarvabuddhabodhisattvakalyāṇamitrāṇyārāgayitukāmena sarvamāramārakāyikadevatā nirjetukāmena sarvāvaraṇīyāni śodhayitukāmena sarvadharmānāvaraṇatāṃ pratilabdhukāmena prajñāpāramitāyāṃ śikṣitavyam | punaraparaṃ śāriputra bodhisattvena mahāsattvena ye daśasu dikṣu buddhā bhagavantastiṣṭhanti, te me varṇaṃ bhāveran iti prajñāpāramitāyāṃ śikṣitavyam | punaraparaṃ śāriputra bodhisattvena mahāsattvena ekacittotpādena pūrvasyāṃ diśi gaṅgānadīvālukopamān lokadhātūn samatikrāmitukāmena | peyālaṃ | evaṃ sarvadikṣu prajñāpāramitāyāṃ śikṣitavyam | ityādyativistaraḥ ||



tatra yathā nirātmānaśca sarvadharmāḥ, karmaphalasaṃbandhāvirodhaśca niḥsvabhāvatā ca, yathādṛṣṭasarvadharmāvirodhaśca, tathā pitṛputrasamāgame darśitam- ṣaḍdhāturayaṃ mahārāja puruṣaḥ ṣaṭsparśāyatanaḥ aṣṭādaśamanaupavicāraḥ | ṣaḍdhāturayaṃ mahārāja puruṣa iti na khalu punaretadyuktam-kiṃ vaitatpratītyoktaṃ ṣaḍime mahārāja dhātavaḥ | katame ṣaṭ? tadyathā pṛthivīdhāturabdhātustejodhāturvāyudhāturākāśadhāturvijñānadhātuśca, ime mahārāja ṣaḍdhātavaḥ | yāvat ṣaḍimāni mahārāja sparśāyatanāni | katamāni ṣaṭ? cakṣuḥ sparśāyatanaṃ rūpāṇāṃ darśanāya | śrotraṃ sparśāyatanaṃ śabdānāṃ śravaṇāya | ghrāṇaṃ sparśāyatanaṃ gandhānāmāghrāṇāya | jihvā sparśāyatanaṃ rasānāmāsvādanāya | kāyaḥ sparśāyatanaṃ spraṣṭavyānāṃ sparśanāya | manaḥ sparśāyatanaṃ dharmāṇāṃ vijñānāya | imāni ca mahārāja ṣaṭsparśāyatanāni|| pe|| aṣṭādaśeme mahārāja manaupavicārāḥ | katame'ṣṭādaśa? iha puruṣaścakṣuṣā rūpāṇi dṛṣṭvā saumanasyadaurmanasyopekṣāsthānīyānyupavicarati | evaṃ śrotrādiṣu vācyam | tena pratyekamindriyaṣaṭkena saumanasyāditrayāṇāṃ bhedā[da]ṣṭādaśa manaupavicārā bhavanti | peyālaṃ | katamaśca mahārāja ādhyātmikaḥ pṛthivīdhātuḥ? yatkiṃcidasmin kāye'dhyātmaṃ kakkhaṭatvaṃ kharagatamupāttam | tatpunaḥ katamat? tadyathā | keśā romāṇi nakhā dantā ityādi | ayamucyate ādhyātmikaḥ pṛthivīdhātuḥ || katamaśca mahārāja bāhyaḥ pṛthivīdhātuḥ? yatkiṃcid bāhyaṃ kakkhaṭatvaṃ kharagatamanupāttam, ayamucyate bāhyaḥ pṛthivīdhātuḥ | tatra mahārāja ādhyātmikaḥ pṛthivīdhaturutpadyamāno na kutaścidāgacchati, nirudhyamāno na kkacitsaṃnicayaṃ gacchati | bhavati mahārāja sa samayo yatstrī adhyātmamahaṃ strīti kalpayati | sā adhyātmamahaṃ strīti kalpayitvā bahirdhā puruṣaṃ puruṣa iti kalpayati | sā bahirdhā puruṣaṃ puruṣa iti kalpayitvā saṃraktā satī bahirdhā puruṣeṇa sārdhaṃ saṃyogamākāṅkṣate | puruṣo'pyadhyātmaṃ puruṣo'smīti kalpayatīti pūrvavat | tayoḥ saṃyogākāṅkṣayā saṃyogo bhavati | saṃyogapratyayātkalalaṃ jāyate | tatra mahārāja yaśca saṃkalpo yaśca saṃkalpayitā, ubhayametanna saṃvidyate | striyāṃ strī na saṃvidyate | puruṣe puruṣo na saṃvidyate | iti hyasannasadbhūtaḥ saṃkalpo jātaḥ | so'pi saṃkalpaḥ svabhāvena na saṃvidyate | yathā saṃkalpastathā saṃyogo'pi | kalalamapi svabhāvena na saṃvidyate | yaśca svabhāvato na saṃvidyate, tatkathaṃ kakkhaṭatvaṃ janayiṣyati? iti hi mahārāja saṃkalpaṃ jñātvā kakkhaṭatvaṃ veditavyam | [yathā] kakkhaṭatvamutpadyamānaṃ na kutaścidāgacchati, nirudhyamānaṃ na kkacitsaṃnicayaṃ gacchatīti |

bhavati mahārāja samayo yadayaṃ kāyaḥ śmaśānaparyavasāno bhavati | tasya tatkakkhaṭatvaṃ saṃklidyamānaṃ nirudhyamānaṃ na pūrvāṃ diśaṃ gacchati, na dakṣiṇāṃ na paścimāṃ nottarāṃ nordhvaṃ nādho na tu vidiśaṃ gacchati | evaṃ mahārāja ādhyātmikaḥ pṛthivīdhāturdraṣṭavyaḥ | bhavati mahārāja sa samayo yadākāśībhūte lokasaṃniveśe brāhmaṃ vimānaṃ saṃtiṣṭhate mahāratnamayam | tanmahārāja kakkhaṭatvamutpadyamānaṃ na kutaścidāgacchati | cakravālamahācakravālāḥ saṃtiṣṭhante dṛḍhāḥ sārā ekaghanā vajramayāḥ | teṣāmapi kakkhaṭatvamutpadyamānaṃ na kutaścidāgacchati | sumeravaḥ parvatarājāno yugaṃdharā nirmidharā īśādhārā yāvatkālaparvatāḥ saṃtiṣṭhante | sarvaśca trisāhastramahāsāhastro lokadhātuḥ saṃtiṣṭhate | caturaśītiryojanasahastrāṇyudvedhena, madhye cāṣṭaṣaṣṭiṃ yojanaśatasahastraṃ mahāpṛthivī saṃtiṣṭhate | tadapi mahārāja kakkhaṭatvaṃ samudāgacchat na kutaścidāgacchati | bhavati mahārāja sa samayo yadā ayaṃ lokaḥ saṃvartate | tadeyaṃ mahāpṛthivī agninā vā dahyate, adbhirvā midyate, vāyunā vā vikīryate | tasyā agninā dahyamānāyā maṣirapi na prajñāyate | tadyathāpi nāma sarpiṣo vā tailasya vā agninā dahyamānasya na maṣirna chārikā prajñāyate, evameva asyāstrisāhastramahāsāhastrāyā lokadhātoragninā dahyamānāyā naiva maṣirna chārikā avaśiṣṭā prajñāyate | evamadbhirlavaṇavilayavadvāyunā vairambhavātābhihataśakuntavatpṛthivyāṃ na kiṃcidavaśiṣṭaṃ prajñāyata iti paṭhayate | tatra mahārāja pṛthivīdhatorutpādo'pi śūnyaḥ, vyayo'pi śūnyaḥ | utpanno'pi pṛthivīdhātuḥ svabhāvaśūnyaḥ | iti hi mahārāja pṛthivīdhātuḥ pṛthivīdhātutvena nopalabhyate'nyatra vyavahārāt | so'pi vyavahāro na strī na puruṣaḥ | evamevaitanmahārāja yathābhūtaṃ samyakprajñayā draṣṭavyam | tatra katamo'bdhātuḥ? yadidamasmin kāye'dhyātmaṃ pratyātmamāpaḥ abgatam | aptvaṃ snehaḥ | snehagataṃ snehatvaṃ dravyatvamupagatamupāttam | tatpunaḥ katamat? tadyathā aśru svedaḥ kheṭaḥ siṅghāṇakaṃ vasā lasīkā majjā medaḥ pittaṃ śleṣmā pūyaḥ śoṇitaṃ kṣīraṃ prastrāva ityādi | ayamucyate ādhyātmiko'bdhātuḥ | peyālaṃ | bhavati mahārāja sa samayo yatpriyaṃ dṛṣṭvā aśru pravartate | duḥkhena cābhyāhatasya dharmasaṃvegena vā aśru pravartate | vātena vā akṣi prasyandate | yāvatsa mahārāja abdhāturna kutaścidāgacchati | bhavati mahārāja sa samayo yadādhyātmiko'bdhātuḥ pariśuṣyati | sa pariśuṣyannirudhyamāno na kkacidgacchati | pe | vivartamāne khalu punarloke samantād dvātriṃśatpaṭalā abhraghanāḥ saṃtiṣṭhante | saṃsthāya sarvāvantaḥ trisāhastramahāsāhastraṃ lokadhātuṃ chādayanti | yataḥ pañcāntarakalpānīṣādhāro devo varṣati | evaṃ pañcagajaprameho devo varṣati | pañca acchinnadhāraḥ | pañca sthūlabindukaḥ | tata iyaṃ mahāpṛthivī yāvad brahmalokādudakena sphuṭā bhavati | sa mahārāja tāvān mahānabdhāturutpadyamāno na kutaścidāgacchati | bhavati mahārāja sa samayo yadayaṃ lokaḥ saṃvartate | saṃvartamāne khalu punarloke dvitīyasya sūryasya prādurbhāvo bhavati | dvitīyasya sūryasya loke prādurbhāvādutsāḥ sarāṃsi kunadyaśca śuṣyanti | evaṃ tṛtīyasya | mahotsā mahānadyaḥ | caturthasyānavataptaṃ mahāsaraḥ sarveṇa sarvamucchuṣyati | caturthasya sūryasya prādurbhāvānmahāsamudrasya yojanikamapyudakaṃ parikṣayaṃ paryādānaṃ gacchati | dviyojanikamapi tricatuḥpañcadaśaviṃśatitriṃśaccatvāriṃśatpañcāśadyojanikamapi yāvaccatvāriṃśadyojanasahastramudakamavaśiṣṭaṃ bhavati | yāvad dvitālamātram yāvatkaṇṭhamātram yāvadgoṣpadamātramudakamavaśiṣṭaṃ bhavatiṃ | bhavati mahārāja sa samayo yanmahāsamudre pṛthitapṛthitānyavaśiṣṭhāni bhavanti | peyālaṃ | bhavati mahārāja sa samayo yanmahāsamudre'ṅgulisnehamātramapyudakaṃ nāvaśiṣṭaṃ bhavati | sa mahārāja tāvānabdhāturnirudhyamāno na kkacidgacchati | pe | tasya khalu punarmahārāja abdhātorutpādo'pi śūnyaḥ, vyayo'pi śūnyaḥ | tiṣṭhannapi so'bdhātuḥ svabhāvaśūnyaḥ | iti hi mahārāja abdhāturabdhātutvenopalabhyate'nyatra vyavahāramātrāt | so'pi vyavahāro na strī na puruṣaḥ | pūrvavat || pe|| ādhyātmikastejodhātuḥ katamaḥ? yatkiṃcidasmin kāye tejastejogatamūṣmagatamupagatamupāttam | tatpunaḥ katamat? yenāyaṃ kāya ātapyate saṃtapyate | yena vā asyāśitapītakhāditāni samyaksukhena paripākaṃ gacchati | yasya cotsadatvājjavarito jvarita iti saṃkhyāṃ gacchati | peyālaṃ bāhyastejodhātuḥ katamaḥ? yadbāhyaṃ tejastejogatamūṣmagatamupagatamupāttam | tatpunaḥ katamat? yanmanuṣyā araṇīsahagatebhyo garbhalasahagatebhyo vā gomayacūrṇena vā kāṃrpāsapicunā va samanveṣante | yadutpannaṃ grāmamapi dahati, grāmapradeśamapi dahati, yāvad dvīpaṃ vā kakṣaṃ tṛṇānāṃ vā dāvaṃ vā kāṣṭhaṃ vā yāvaddahan paraitītyādi | tatra mahārāja ādhyātmikastejodhāturutpadyate, na kutaścidāgacchati, nirudhyamāno na kkacitsaṃnicayaṃ gacchati | iti hyabhūtvā bhavati, bhūtvā ca prativigacchati svabhāvarahitatvāt || pe|| evaṃ yatkiṃcidasmin kāye vāyurvāyugataṃ laghutvaṃ samudīraṇatvam | tatpunaḥ katamat? tadyathā ūrdhvagamā vāyavo'dhogamāḥ pārśvāśrayāḥ pṛṣṭhāśrayāḥ kukṣigamāḥ śastrakāḥ kṣurakāḥ sūcakāḥ pippalakā vātāṣṭhīlā vātagulmā āśvāsapraśvāsā aṅgānusāriṇo vāyava ityādi | santi bahirdhā pūrve vāyavo dakṣiṇāḥ paścimā uttarā vāyavaḥ, sarajasaḥ arajasaḥ, parīttā mahadgatā vāyava iti | bhavati mahārāja sa samayo yanmahān vāyuskandhaḥ samudāgataḥ vṛkṣāgrānapi pātayati | kuḍayānapi parvatāgrānapi pātayati | pātayitvā nirupādāno vigacchati | yaṃ sattvāścīvarakarṇikena vā vidhamanakena vātānuvṛttane vā paryeṣante | yāvadayamucyate bāhyo vāyudhātuḥ | tasyāpyutpattiḥ pūrvavat || pe|| ādhyātmika ākāśadhātuḥ katamaḥ? yatkiṃcidasmin kāye'dhyātmaṃ pratyātmamupagatamupāttamākāśagatamihābhyantarasaṃkhyābhūtam, asphuṭamaspharaṇīyaṃ tvaḍyāsaśoṇitena | tatpunaḥ katamat? yadasmin kāye cakṣuḥ suṣiramiti vā yāvanmukhaṃ vā mukhadvāraṃ vā kaṇṭhaṃ vā kaṇṭhanāḍayo vā | yena cābhyavaharati yatra cāvatiṣṭhate, yena cāsya aśitapītakhāditāsvāditamadhastātpragharati, ayamucyata ādhyātmika ākāśadhātuḥ | evaṃ bāhye'pi yadasphuṭamaspharaṇīyaṃ rūpagatenāpaliguddhaṃ suṣirabhāvaśchidram | ayamucyate bāhyaḥ ākāśadhātuḥ || bhavati mahārāja sa samayo yatkarmapratyayādāyatanāni prādurbhavanti, tānyākāśadhātuṃ paricārayanti | tatra saṃkhyā bhavatyādhyātmika ākāśadhāturiti | sa na kutaścidāgacchati | bhavati samayo yadrūpaṃ bibharti, sarvamākāśībhavati | tatkasya hetoḥ? akṣayo hyākāśadhātuḥ sthiro'calaḥ | tadyathā mahārāja asaṃskṛto nirvāṇadhātuḥ, evamevākāśadhātuḥ sarvatrānugato draṣṭavyaḥ | tadyathāpi nāma mahārāja puruṣa utthale deśe udapānaṃ vā kuṭakaṃ vā kūpaṃ vā puṣkariṇīṃ vā khānayet | tatkiṃ manyase mahārāja yattatrākāśaḥ, kutastadāgatamiti? āha- na kutaścidbhagavan | bhagavānāha- tadyathāpi nāma mahārāja sa puruṣaḥ punareva tadudapānaṃ vā yāvatpuṣkariṇīṃ vā pūrayet, tatkiṃ manyase mahārāja yattadākāśaṃ kkacidgatamiti ? āha- na kkacidgataṃ bhagavan | tatkasya hetoḥ? na hyakāśadhāturgamane vā āgamane vā pratyupasthitaḥ | na strībhāvena na puruṣabhāvena pratyupasthitaḥ | bhagavānāha- iti hi mahārāja bāhyākāśadhāturacalaḥ avikāraḥ | tatkasya hetoḥ? śūnyo hyākāśadhāturākāśadhātutvena | virahita ākāśadhāturākāśadhātutvena | na puruṣabhāvena na strībhāvena pratyupasthitaḥ | evameva yathābhūtaṃ samyakprajñayā draṣṭavyam || tatra katamo vijñānadhātuḥ ? yā cakṣurindriyādhipateyā rūpārambaṇaprativijñaptiḥ | yāvaditi hi mahārāja yā kācidvarṇasaṃsthānaprativijñaptiḥ, ayamucyate cakṣurvijñānadhātuḥ | pe| iti hi yā ṣaḍindriyādhipateyā ṣaḍviṣayārambaṇā viṣayavijñaptiḥ, ayamucyate vijñānadhātu | sa khalu punarayaṃ mahārāja vijñānadhāturnendriyaniśrito na viṣayebhya āgato na madhye'ntarasthāyī | sa nādhyātmaṃ bahirdhā nobhayamantareṇa | sa khalu punarayaṃ mahārāja vijñānadhāturvastu prativijñapya niruddhaḥ | sa utpadyamāno na kutaścidāgacchati, nirudhyamāno na kkacidgacchati | tasya khalu punarvijñānadhātorutpādo'pi śūnyaḥ, vyayo'pi śūnyaḥ, utpanno'pi vijñānadhātuḥ svabhāvaśūnyaḥ | iti mahārāja vijñānadhāturvijñānadhātutvena śūnyo nopalabhyate'nyatra vyavahārāt | so'pi vyavahāro na strī na puruṣaḥ | evametadyathābhūtaṃ smyakprajñayā draṣṭavyam || tatra mahārāja katamaccakṣurāyatanam? yaccaturṇā mahābhūtānāṃ prasādaḥ | tadyathā- pṛthivīdhātorabdhātostejodhātorvāyudhātoryāvat | tatra na pṛthivīdhātuprasādaścakṣurāyatanam | nābdhātuprasādaḥ , na tejodhātuprasādaḥ, na vāyudhātuprasādaścakṣurāyatanam | tatkasya hetoḥ? na hi pṛthivīdhātuprasādaḥ kasyaciddharmāyatanaṃ vā āyatanapratilambhena vā pratyupasthitaḥ | evaṃ yāvanna vāyudhātuprasādaḥ kasyaciddharmasyāyatanaṃ vā āyatanapratilambhena vā pratyupasthitaḥ | tatkasya hetoḥ? niśceṣṭā hyete dharmā niṣṭhāpārā nirvāṇasamāḥ | iti hi mahārāja ekaikato dharmān mṛgyamāṇān cakṣurāyatanaṃ nopalabhyate'nyatra vyavahārāt | tatkasya hetoḥ? śūnyo hi pṛthivīdhātuprasādaḥ pṛthivīdhātuprasādena | yāvacchūnyo vāyudhātuprasādo vāyudhātuprāsādena | ye ca dharmāḥ svabhāvena śūnyāḥ, kasteṣāṃ prasādo vā kṣomo vā? yeṣāṃ na prasādo na kṣobha upalabhyate, kathaṃ te rūpaṃ drakṣyanti? iti hyatyantatayā cakṣurāyatanaṃ śūnyaṃ cakṣurāyatanasvabhāvena | tatpūrvāntato nopalabhyate, aparāntato'pi nopalabhyate anāgamanatāṃ gamanatāṃ copādāya | sthānamapyasya nopalabhyate svabhāvavirahitatvāt | yacca svabhāvena na saṃvidyate, na tat strī na puruṣaḥ | tena kā manyanā? manyanā ca nāma mahārāja māragocaraḥ | amanyanā buddhagocaraḥ |tatkasya hetoḥ? manyanāpagatā hi sarvadharmāḥ | peyālaṃ | tatra mahārāja katamacchrotrāyatanam? yaccaturṇāṃ mahābhūtānāṃ prasādaḥ | yāvaditi hi mahārāja sarvadharmā vimokṣābhimukhā dharmadhātuniyatā ākāśadhātuparyavasānā aprāptikā avyavahārā anabhilāpyā anabhilāpanīyāḥ | yatra mahārāja indriyāṇi pratihanyante, te viṣayā ityucyante | cakṣurhi rūpe pratihanyate, tasmādrūpāṇi cakṣurviṣayā ityucyante | evaṃ śrotraṃ śabdeṣvityādi | tatra cakṣū rūpe pratihanyata iti nipātaḥ pratihanyanā teṣāṃ nirdiṣṭā | tathā hi cakṣū rūpeṣu trividhaṃ nipatatīti anukūleṣu śubhasaṃjñayā, pratikuleṣu pratighasaṃjñayā, naivānukūleṣu na pratikūleṣūpekṣayā | evaṃ manodharmeṣvityādi | ta ime viṣaya manogocarā ityucyatne | atra hi manaścarati, upavicarati, tasmānmanogocarā ityucyante | yadetanmahārāja manopratikūleṣu rūpeṣvanunītaṃ carati, tenāsya rāga utpadyate | pratikūleṣu rūpeṣu pratihataṃ carati, tenāsya dveṣa utpadyate | naivānukūleṣu na pratikūleṣu saṃmūḍhaṃ carati, tenāsya moha utpadyate | evaṃ śabdādiṣvapi trividhamārambaṇamanubhavati pūrvavat || tatra mahārāja māyopamānīndriyāṇi, svapnopamā viṣayaḥ | tadyathāpi nāma mahārāja puruṣaḥ suptaḥ svaprāntare jana padakalyāṇyā striyā sārdha paricaret | sa śayitavivuddho janapadakalyāṇīṃ striyamanusmaret | tatkiṃ manyase mahārāja saṃvidyate svaprāntare janapadakalyāṇī strī ? āha - no hīdaṃ bhagavan | bhagavānāha- tatkiṃ manyase mahārāja api nu sa puruṣaḥ paṇḍitajātīyo bhavet, yaḥ svaprāntare janapadakalyāṇīṃ striyamanusmaret, tayā vā sārdha krīḍitamabhiniveśet? āha- no hīdaṃ bhagavan | tatkasya hetoḥ? atyantatayā hi bhagavan svapnāntare janapadakalyāṇī na saṃvidyate nopalabhyate, kutaḥ punaranayā sārdhaṃ paricaraṇā? anyatra yāvadeva sa puruṣo vighātasya klamathasya bhāgī syāt yastāmabhiniviśet | bhagavānāha- evameva mahārāja bālo'śrutavān pṛthagjanaścakṣuṣā rūpāṇi dṛṣṭvā saumanasyasthānīyānyabhiniviśet | so'bhiniviṣṭaḥ sannanunīyate | anunītaḥ saṃrajyate saṃrakto rāgajaṃ karmābhisaṃskaroti - trividhaṃ kāyena, caturvidhaṃ vācā, trividhaṃ manasā | tacca karma abhisaṃskṛtamādita eva kṣīṇaṃ niruddhaṃ vigataṃ vipariṇataṃ na pūrvā diśaṃ niśritya tiṣṭhati, na dakṣiṇāṃ na paścimāṃ nottarāṃ nordhvaṃ nādho nānuvidiśaṃ neha na tiryak, nobhayamantarā | tatpunaḥ kālāntareṇa maraṇakālasamaye pratyupasthite jīvitendriyanirodhe āyuṣaḥ parikṣayāttatsabhāgasya karmaṇaḥ kṣīṇatvāccaramavijñānasya nirudhyamānasya manasa ārambaṇībhavati | tadyathāpi nāma śayitavibuddhasya janapadakalyāṇīti [ manasa ārambaṇaṃ bhavati | iti ] hi mahārāja caramavijñānenādhipatinā tena ca karmaṇā ārambaṇena aupapattyaṃśikaddhayapratyayaṃ prathamavijñānamutpadyate | yadi vā narakeṣu, yadi vā tiryagyonau, yadi vā yamaloke, yadi vā āsure kāye, yadi vā manuṣyeṣu , yadi vā deveṣu | tasya ca prathamavijñānasya aupapattyaṃśikasya samanantaraniruddhasya anantarasabhāgā cittasaṃtatiḥ pravartate, yatra vipākasya pratisaṃvedanā prajñāyate | tatra yaścaramavijñānasya nirodhastatra cyutiriti saṃkhyāṃ gacchati | yaḥ prathama vijñānasya prādurbhāvastatropapattiḥ | iti hi mahārāja na kāściddharmo'smāllokātparaṃ lokaṃ gacchati, cyutyupapattī ca prajāyete | tatra mahārāja caramavijñānamutpadyamānaṃ na kutaścidāgaccati, nirudhyamānaṃ na kkacidgaccati | karmāpyutpadyamānaṃ na kutaścidāgacchati, nirudhyamānaṃ na kkaccidgacchati | prathamavijñānamapyutpadyamānaṃ na kutaścidāgacchati, nirudhyamānaṃ ca na kkacidgacchati | tatkasya hetoḥ? svabhāvavirahitatvāt | caramavijñānaṃ caramavijñānena śūnyam | karma karmaṇā śūnyam | prathamavijñānaṃ prathamavijñānena śūnyam | cyutiścyutyā śūnyā | upapattirupapattyā śūnyā| karmaṇāṃ cāvandhyatā prajñāyate, vipākasya ca pratisaṃvedanā | na cātra kaścitkartā na bhoktā'nyatra nāmasaṃketāt | tadyathāpi nāma mahārāja puruṣaḥ suptaḥ svapnāntare śatruṇā sārdhaṃ saṃgrāmayet | sa śayitavibuddhaḥ tamevānusmaret | tatkiṃ manyase mahārāja saṃvidyate svapnāntare śatruḥ, śatruṇā vā sārdhaṃ saṃgrāma iti | āha- no hīdaṃ bhagavan | bhagavānāha- tatkiṃ manyase mahārāja api nu sa puruṣaḥ paṇḍitajātīyo bhavet yo'sau svapnāntare śatrumabhiniviśet, śatruṇā vā sārdhaṃ saṃgrāmam? āha - no hīdaṃ bhagavan | tatkasya hetoḥ? atyantatayā hi bhagavan svapne śatrurna saṃvidyate, kutaḥ punastena sārdhaṃ saṃgrāmaḥ? anyatra yāvadeva sa puruṣo vighātasya klamathasya ca bhāgī syāt yastamabhiniviśet | bhagavānāha-evameva mahārāja bālo'śrutavān pṛthagjanaścakṣuṣā rūpāṇi dṛṣṭvā daurmanasyasthānīyānyabhiniviśate | abhiniviṣṭaḥ san pratihanyate | pratihataḥ saṃduṣyati | duṣṭo doṣajaṃ karmābhisaṃskarotīti pūrvavat | tadyathāpi nāma mahārāja puruṣaḥ suptaḥ svapnāntare piśācena paripātyamāno bhītaḥ saṃmohamāpadyate | sa śayitavibuddhastaṃ piśācaṃ taṃ ca saṃmohamanusmaret | tatkiṃ manyase mahārāja saṃvidyante svapne piśācaḥ saṃmoho vā? yāvadevameva mahārāja bālo'śrutavān pṛthagjanaścakṣuṣā rūpāṇi dṛṣṭvā upekṣāsthānīyānyabhiniviśate, abhiniviṣṭaḥ san muhyati, mūḍho mohajaṃ karmabhisaṃskarotīti pūrvavat | tadyathāpi nāma mahārāja puruṣaḥ suptaḥ svapnāntare janapadakalyāṇyā gāyantyā madhuraṃ gītasvaraṃ madhuraṃ ca tantrīsvaraṃ ca śṛṇuyāt | sa tena gītavāditena paricārayet | sa śayitavibuddhastadeva gītavāditamanusmaret | tatkiṃ manyase mahārāja api nu sa puruṣaḥ paṇḍitajātīyaḥ svapnāntare janapadakalyāṇyā gītavāditabhiniviśet? āha- no hīdaṃ bhagavan | bhagavānāha- tatkasya hetoḥ? atyantatayā hi bhagavan svapnāntare janapadakalyāṇī strī na saṃvidyate, nopalabhyate, kutaḥ punarasyā gītavāditam? anyatra yāvadeva sa puruṣo vighātasya klamathasya ca bhāgī syāt, yastadabhiniviśet | bhagavānāha evameva mahārāja bālo'śrutavān pṛthagjanaḥ śrotreṇa śabdān śrutvā saumanasyasthānīyānyabhiniviśate | iti pūrvavat | evaṃ gandhādiṣu tridhā tridhā veditavyam | peyālaṃ | atra mahārāja mānasaṃ nirveśayitavyam kimityahaṃ sadevakasya lokasya cakṣurbhaveyam, ulkā pradīpa ālokabhūtaḥ | kūlaṃ naustīrtham nāyakaḥ pariṇāyakaḥ daiśikaḥ sārthavāhaḥ | puro javeyam | mukto mocayeyam, āśvasta āśvāsayeyam, parinirvṛtaḥ parinirvāpayeyamiti | pūrvā hi koṭirmahārāja na prajñāyate aiśvaryādhipatyānāmanubhūyamānānām | iti hi mahārāja māyopamānīndriyāṇyatṛptānyatarṣaṇīyāni | svapnopamā viṣayā atarṣakā atṛptikarāḥ || atra anantayaśaścakravartinaḥ kathā - svargācca patite tasmin sarājakaiḥ pauraiḥ parivṛta evaṃ paṭhayate | tadyathāpi nāma mahārāja sarpirmaṇḍo vā navanītamaṇḍo vā taptāyāṃ bālukāyāmupanikṣipto'vasīdati, na saṃtiṣṭhate, evameva mahārāja anantayaśā avasīdati na saṃtiṣṭhate | atha rājā priyaṃkaro rājānamanantayaśasaṃ tathāvasīdantamupasaṃkramyaitadavocat- kiṃ vayaṃ mahārāja lokasya vyākuryāmaḥ? kiṃ rājño'nantayaśasaḥ subhāṣitamiti? sa āha- vaktavyaṃ mahārāja anantayaśāścaturdvīpeṣu rājyaiśvaryaṃ kārayitvā vandhyamanorathatāmanubhūya sarvadrumākālaphalatāṃ sarvopadravaprastrabdhisarvasattvāvandhyamanorathatāṃ gandhodakavarṣaṃ hiraṇyavarṣaṃ suvarṇavarṣaṃ sarvopakaraṇavarṣaṃ cānubhūya caturo mahādvīpānadhyāvasitvā śakrasyārdhāsanamākramya atīcchayā na muktaḥ, atṛpta eva kāmaiḥ kālagata iti | evaṃ tvaṃ mahārāja vyākuryāḥ | ityevamuktvā ca rājā anantayaśāḥ kālamakārṣīt | pe | tasmāttarhi te mahārāja marīcikāyāmudakasvabhāvo nābhunna bhaviṣyati na caitarhi vidyate | evameva mahārāja rūpavedanāsaṃjñāsaṃskāravijñānānāṃ svabhāvo nābhūnna bhaviṣyati, na caitarhi vidyata ityādi ||



punarapyuktam- etāvaccaitat jñeyam yaduta saṃvṛtiḥ paramārthaśca | tacca bhagavatā śūnyataḥ sudṛṣṭaṃ suviditaṃ susākṣātkṛtam | tena sa sarvajaña ityucyate | tatra saṃvṛtirlokapracāratastathāgatena dṛṣṭā | yaḥ punaḥ paramārthaḥ, so'nabhilāpyaḥ anājñeyo'vijñeyo'deśito'prakāśito yāvadakriyo yāvanna lābho nālābho na sukhaṃ na duḥkhaṃ na yaśo nāyaśaḥ, na rūpaṃ nārūpanityādi ||

tatra jinena jagasya kṛtena

saṃvṛti deśita lokahitāya |

yena jagatsugatasya sakāśe

saṃjanayīha prasādasukhārthe ||

saṃvṛti prajñapayī narasiṃhaḥ

ṣaḍgatayo bhaṇi sattvagaṇānām |

narakatiraśca tathaiva[ ca ] pretān

a [|] surakāya narāṃśca marūṃśca ||

nīcakulāṃstatha uccakulāṃśca

āḍhayakulāṃśca daridrakulāṃśca || ityādi ||



punaścoktam-katama eṣa dharmo yo bhagavatā vyākṛto'nuttarāyāṃ samyaksaṃbodhau? kiṃ rūpamuta vedanā āhosvitsaṃjñā utāho saṃskārāḥ atha vijñānaṃ bhagavatā vyākṛtamanuttarāyāṃ samyaksaṃbodhāviti | teṣāmetadabhūt- na rūpaṃ yāvanna vijñānaṃ bhagavatā vyākṛtamanuttarāyāṃ samyaksaṃbodhau | tatkasya hetoḥ? anutpado hi rūpam, anutpādo bodhiḥ | tatkathamanutpādo'nutpādamabhisaṃbudhyate? evaṃ yāvadvijñānam || pe|| tadevamanupalabhyamāneṣu sarvadharmeṣu katamo'tra buddhaḥ? katamā bodhiḥ? katamo bodhisatvaḥ? katamad vyākaraṇam? śūnyaṃ hi rūpaṃ rūpeṇa yāvadvijñānam || pe|| yāvadeva vyavahāramātrametat, nāmadheyamātraṃ saṃketamātraṃ saṃvṛtimātraṃ prajñaptimātram | nālamatra paṇḍitairabhiniveśa utpādayitavyaḥ | iti ||



tathā atraivāhurnirmāṇaratayoḥ- devā yathā vayaṃ bhagavan bhagavato bhāṣitasyārthamājānīmaḥ, sarvadharmā bhūtakoṭirantakoṭiranāvaraṇakoṭīrapratiṣṭhitakoṭirityādi || sarvadharmā bhagavan bodhisvabhāvavirahitā boddhavyāḥ | antaśa ānantaryāṇyapi bodhiḥ || tatkasya hetoḥ? aprakṛtikā hi bhagavan bodhiḥ, aprakṛtikāni ca pañcānantaryāṇi | tenocyate ānantaryāṇi bodhiriti | tathā vihāsyante bhagavan ye kecit parinirvātukāmāḥ | tatkasya hetoḥ? yadi kaścitsaṃsārapratipanno bhavet, sa nirvāṇaṃ paryeṣata iti ||



punaruktam- bhūtakoṭiriti bhagavan yadukta nirmāṇaratibhirdevaistatra vayaṃ bhūtamapi nopalabhāmahe, kiṃ punarasya koṭim | tatkasya hetoḥ? yo hi kaścidbhagavan bhūtamupalabhate, koṭimapi sa tasyopalabhate, dvaye cāsau caratīti ||

tathā atraiva sahāṃpatibrahmaṇā śāstā stutaḥ-



supiti yatha naraḥ kṣudhābhibhūtaḥ śatarasabhojanabhuñjino ca tṛptaḥ |

na pi ca kṣudha na bhojanaṃ na sattvaḥ supina yathaiva nidṛṣṭa sarvadharmāḥ ||

bhaṇi naru paṭhane manojñavācaṃ priyu bhavatī na ca saṃkramo'sti vācam |

na ca vacana na cāsya rakta vācāmupalabhase na ca tatra saṃśayo'sti ||

śruṇati yatha manojña vīṇaśabdaṃ madhura na cāsti svabhāvataḥ sa śabdaḥ |

tatha imi vidu skandha prekṣamāṇo na labhati bhāvu svabhāvataḥ sumedhāḥ || pe||

yatha naru iha śaṅkhaśabda śrutvā vimṛśati vidva kuto ya prādurbhūtaḥ |

na ca labhati svabhāva śūnyabhāvaṃ tatha tvaya dṛṣṭa narendra sarvadharmāḥ ||

yatha naru iha bhojanaṃ praṇītaṃ vimṛśati aṅgaśu siddhamasvabhāvam |

yatha rasu tatha te'ṅga tatsvabhāvāstatha tvaya dṛṣṭa maharṣi sarvadharmāḥ ||

yatha naru iha indrayaṣṭi dṛṣṭvā vimṛśati aṅgaśu niḥsvabhāva śūnyam |

vimṛśatu yatha yaṣṭi te'ṅga śūnyāstatha tvaya dṛṣṭa maharṣi sarvadharmāḥ ||

puravara yatha aṅgaśo vibhajya nagaru svabhāvatu nāmato na labdham |

yatha nagara tathāṅga sarvaśūnyāstatha tvaya dṛṣṭa narendra sarvadharmāḥ ||

mudita yatha na rāgamukta bherī harṣa janeti svabhāvaśūnyaśabdā |

svaru ya[tha] tatha te'ṅga tatsvabhāvaṃ tatha tvaya dṛṣṭa maharṣi sarvadharmāḥ ||

hanatu yatha narasya tāṃ hi bherīṃ pratighu na vidyati nāpi snehadhātuḥ ||



vimṛśatu bherīva te'ṅga tatsvabhāvāḥ tatha tvaya dṛṣṭa narendra sarvadharmāḥ |

hanatu yatha narasya tāṃ hi bherīṃ svaru na sa manyati rāmayāmi lokam |

svaru yatha tatha te'ṅga tatsvabhāvāḥ tatha tvaya dṛṣṭa narendra sarvadharmāḥ ||

hanatu yatha narasya tasya bheryāṃ na pi svaru aṅgaśu nāpi sa svatantraḥ |

svaru yatha tatha te'ṅga tatsvabhāvāstatha tvaya dṛṣṭa maharṣi sarvadharmāḥ ||



punaścoktam-



sattvārambaṇa nāyakena kathitā maitrī śubhā bhāvanā

sattvaścāsya vibhāvitaḥ suviditaṃ niḥsattva sarvaṃ jagat |

tatraivaṃ dvipadottamo akaluṣo niḥsaṃśayāmānasaḥ

tena tvā sugataṃ vibhāvitamarti pūjema pūjāriham ||

duḥkhaṃ cāsugatā daśaddiśigataṃ naivaṃ parīdṛśyate

sattveṣū karuṇā ca nāma bhaṇitā devātideva tvayā |

evaṃ bho jinapuṃgavā jinamataṃ ājñāta yāthāvataḥ

tena tvāṃdvipadottamā naravarā pūjema pujāriham |||

sattvā naiva na duḥkha śākyamuninā yasyāpanītaṃ dukhaṃ

jātāste muditāśca hṛṣṭamanaso'ratīśca tairnoditāḥ |

evaṃ buddhanayaṃ acintiyanayaṃ yāthāvato jānato

[tasmāt] pūjiya tvāṃ narāṇa pravaraṃ prāyema prāptaṃ phalam ||

kāyaḥ kāyavivarjitena muninā nāsādito mārgatāṃ

naivaṃ te smṛtināyakā na bhaṇitā nava pramuṣṭā smṛtiḥ |

uktaṃ co sugatena bhāvapathimāḥ kāyaṃ gatā bhāvanāḥ

evaṃ buddhanayaṃ viditva sugatā pūjā kṛtā tāyinaḥ ||

bhāvethā śamathaṃ vipaśyanamayaṃ mārgaṃ dukhāśāntaye

śāntāste bhagavan savāsanamalā yehī jagat kliśyate |

śamathaścātha vipaśyanā na ca malā sarve ti śūnyā mune

asmin devagaṇā na kāṅkṣa kkacanā pūjentu tvāṃ nāyakam || ityādi||



punaruktam- śūnyaṃ hi cakṣuścakṣuḥsvabhāvena | yasya ca dharmasya svabhāvo na vidyate, so'vastukaḥ | yo'vastukaḥ, so'pariniṣpannaḥ | yo'pariniṣpannaḥ, sa notpadyate na nirudhyate || pe || yat triṣvapyadhvasu nopalabhyate, na taccakṣurnendriyam | kathaṃ tasya vyavahāro jñeyaḥ? tadyathāpi nāma riktamuṣṭiralīkaḥ, yāvadeva nāmamātram, no tu khalu paramārthato riktamupalabhyate na muṣṭiḥ | evaṃ cakṣuścendriyaṃ ca riktamuṣṭisadṛśamalīkamasadbhūtaṃ tucchaṃ muṣā moṣadharma bālopalāpanaṃ mūrkhasaṃmohanam, yāvadeva nāmamātram ||



punaratraivāha-



svapnāntare mahāvṛṣṭirāstravāṇāṃ pravartanā |

darśitā te mahāvīra āstravotpatti paṇḍitā ||

svapne yathā śiracchedo dṛṣṭaste āstravakṣayaḥ |

darśitaḥ sarvavijñānāṃ sarvadarśinnamo'stu te |



atraiva ca drumeṇa kinnararājena bhagavān pṛṣṭaḥ pratyāha- yadvadasi śūnyatāṃ ca vyākaraṇaṃ cāpyahaṃ na jānāmi | syādyadi kiṃcidaśūnyam, na bhavejjinenāsya vyākaraṇam | kiṃ kāraṇam? tathā hi- sthitaṃ bhavettatsvake bhāve, kūṭasthanirvikāram | na tasya vṛddhirna parihāṇiḥ | na kriyā na ca kāraṇam | yatsvabhāvaśūnyamādarśamaṇḍale supariśuddhe saṃdṛśyate pratibimbam, tathaiva druma jānīhi imān dharmān | avikāraṃ dharmadhātum | imāṃ ca pūjāṃ druma a[ ṅgaśo] vicārayasi | aṅgaśo nirīkṣya pūjām | katame'vikāriṇo'ṅgāḥ?



yadapi ca nirīhakatvaṃ kriyāṃ ca na jānase mayā proktam |

śakaṭāṅgasaṃnipātaṃ nirīkṣva śakaṭasya caiva kriyām ||

karma ca me ākhyātaṃ kartā na vidyate daśasu dikṣu |

vāteritādiva taroryathā hi na nivartate vahniḥ ||

na ca māruto na ca taruścetayati hutāśanaṃ ca yajane |

na nivartate vahnistathaiva karmasya kartāraḥ ||

yadapi vadase- na ca saṃcayaḥ puṇyasya hi vidyate, sucaritasya samudāgamaśca | bodhistasyāpi śṛṇu kramanta tvam | yathā bhaṇasi manuṣyāṇāmāyuḥ parimāṇaṃ varṣaśataṃ jīvin | na cāsti varṣapuñjī | ayamapi samudāgamastadvaditi ||



bhagavatyāmapyuktam- kiṃ punarāyuṣman subhūte utpanno dharma utpadyate utānutpannaḥ? subhūtirāha- nāhamāyuṣman śāriputra utpannasya dharmasyotpattimicchāmi, na cānutpannasyeti ||



dharmasaṃgītyāmapyuktam- tathatā tathateti kulaputra śūnyatāyā etadadhivacanam | sā ca śūnyatā notpadyate na nirudhyate | āha- yadyevaṃ dharmāḥ śūnyā uktā bhagavatā, tasmātsarvadharmā notpatsyante na nirotsyante | nirārambho bodhisattvaḥ | āha- evameva kulaputra tathā yathā amisaṃbudhyase- sarvadharmā notpadyante na nirudhyante | āha- yadetaduktaṃ bhagavatā- saṃskṛtā dharmā utpadyante nirudhyante ca , ityasya tathāgatabhāṣitasya ko'bhiprāyaḥ ? āha- utpādanirodhabhiniviṣṭaḥ kulaputra lokasaṃniveśaḥ | tatra tathāgato mahākāruṇiko lokasyottrāsapadaparihārārthaṃ vyavahāravaśāduktavān-utpadyante nirudhyante ceti | na cātra kasyaciddharmasyotpādo na nirodha iti ||



punaratraivoktam- tatra bhagavaṃścakṣū rūpeṣu na raṇati śrotraṃ śabdeṣu | yāvanmano dharmeṣu na raṇati, sa dharmaḥ | tatra kathaṃ cakṣū rūpeṣu na raṇati? saṃsargābhāvāt | na hi cakṣū rūpeṇa saṃsṛjyate | yāvanna mano dharmeṇa saṃsṛjyate | yanna saṃsṛjyate tanna raṇati | advitīyasya bhagavan dharmasya raṇaṃ nāsti | advitīyaśca bhagavan sarvadharmāḥ | parasparaṃ na jānanti na vijānanti na kalpayanti na vikalpayanti | na saṃbhavanti na visaṃbhavanti | na hīyante na vardhante | na rajyanyti na virajyanti | na saṃsaranti na parinirvānti | naite kasyacit, naiṣāṃ kaścit | naite bhagavan dharmā udvijante, na saṃkliśyante na vyavadāyante | evamahaṃ bhagavan jānāmi, evamavabudhye | yadapyahaṃ bhagavannevaṃ vadāmi- evamahaṃ jānāmi evamahaṃ budhyāmīti, āyatanānāmeṣa vikāraḥ | na ca bhagavannāyatanānāmevaṃ bhavati- asmākameṣa vikāra iti | yo hyevaṃ jānāti, sa na kenacitsārdha vivadati | yanna vivadati tacchramaṇadharmamanusaratīti | tathā dharmadarśanaṃ buddhadarśanaṃ sarvasattvadarśanaṃ sarvasattvahetupratyayadarśanaṃ śūnyatādarśanamadarśanam | adarśanaṃ bhagavan sarvadharmāṇāṃ darśanaṃ samyagdarśanamiti ||



kathamanadhiṣṭhānā saṃvṛtiryuktā? kathaṃ punarayuktā? yathā asati sthāṇau puruṣabhrāntiḥ | kasya punaḥ śūnyatāvādinaḥ paramārthataḥ sthāṇuḥ siddho yadāśrayātpuruṣabhrāntiḥ syāt? amūlā eva ca sarvadharmāstattvato mūlānupapatteḥ ||



tathā coktamāryavimalakīrtinirdeśe- abhūtaparikalpasya kiṃ mūlam? āha- viparyastā saṃjñā mūlam | āha- viparyastāyāḥ saṃjñāyāḥ kiṃ mūlam | apratiṣṭhānaṃ mūlam? āha- apratiṣṭhāyāḥ kiṃ mūlam? āha- yanmañjuśrīrapratiṣṭhānaṃ na tasya kiṃcinmūlam | iti hyapratiṣṭhānamūlapratiṣṭhitāḥ sarvadharmāḥ | iti ||



iyaṃ samāsataḥ prajñāpāramitā cittaśuddhayarthinā bhāvayitavyā | bhāvayitvā ca kleśaripuraṇakuśalena bhavitavyam, na svagṛhaśūreṇa ||



yathoktamāryasaṃgītisūtre- na śūnyatāvādī lokadharmaiḥ saṃhviyate'niścitatvāt | na sa lābhena saṃhṛṣyati | alābhena na vimanā bhavati | yaśasā na vismayate | ayaśasā na saṃkucati | nindayā nāvalīyate | praśaṃsayā nānulīyate | sukhena na rajyate | duḥkhena na virajyate | yo hyevaṃ lokadharmairna saṃhriyate, sa śūnyatāṃ jānīte | iti || tathā śūnyatāvādino na kkacidanurāgo na virāgaḥ | yasmin rajyeta, tacchūnyameva jānīte, śūnyameva paśyati | nāsau śūnyatāṃ jānīte, yaḥ kkaciddharme rajyate vā virajyate vā | tathā nāsau śūnyatāṃ jānīte, yaḥ kenacitsārdhaṃ vigrahaṃ vivādaṃ vā kuryāt | śūnyameva jānīte, tacchunyameva paśyatītyādi ||

etatsaṃkṣepāccittaśodhanam ||

ayaivamapi paramaviśuddhirdharmadarśane sati iha pañcakaṣāyasaṃkliṣṭasya kalyāṇamitrāvasāditasya vā saṃkṣepeṇa tāvatkutra yatnaṃ kṛtvā śīghraṃ cittaśuddhirbhavati? ātmabahumāna-parāvajñātyāge'nayormūlamātmasattvadṛṣṭiḥ | sā caitadabhyāsātsukaraṃ prahīyata iti paragauravamātmāvajñā caivaṃ bhāvanīyā-



yadi sattvo yadi skandhāḥ kṣamatā sarvathā sthitā |

ekasya hi parātmatvaṃ viruddhaṃ saṃbhavetkatham ||

vinālambanamapyetadācarantyeva dehinaḥ |

anādikalpanābhyāsātkimabhyāsasya duṣkaram ||

evamabhyāsavaśyatve tulye kasmātsukhodayam |

paragauravamutsṛjya svasukhāyānyadiṣyate ||

cintāmaṇiryathoktāśca santi gauravahetavaḥ |

na tu me gauravātsaukhyamihāpi janadurbhagāt |

tasmātsattvāntare yadvadrūkṣamatsaramāninaḥ |

ātmasnehavato vṛttirbhāvayettadviparyayam ||

ātmano bahumāno'yaṃ stutinindādisekataḥ |

vardhate nārakavaśātsekānnarakavahnivat ||

śabdastāvadacittatvānmāṃ stautīti na saṃbhavaḥ |

paraḥ kila mayi prīta ityayaṃ me matibhramaḥ ||

tattuṣṭayaiva mama prītiḥ sāmānye na sadāstu sā |

tatsukhena na cetkāryaṃ tena tuṣṭena kiṃ mama ||

anyatra mayi vā prītyā kiṃ hi me parakīyayā ||

na me pareṇa tuṣṭena kāye saukhyamihāṇvapi ||

evaṃ jñātvā prahātavyā kalpanā nirvibandhanā |

akīrtinindāsatkārā evaṃ jñeyāśca niṣphalāḥ ||

na dharmo nāyurārogyaṃ na balaṃ vandanādibhiḥ |

yadvadutprāsyamānasya vikārairanyakāyikaiḥ ||

hṛṣṭasyātha viṣaṇṇasya lābhālābhau samodayau |

vivarjya niṣphalaṃ tasmādbhaveyaṃ śailamānasaḥ ||

saṃstavatyāgācca śīghraṃ cittaviśuddhirbhavati iti tatrāpi cintyate-

nimittodgrahasaṃbhūtā pratyabhijñā punaḥ punaḥ |

utpādayatyanunayaṃ jāyate pratigho'pyataḥ ||

pratighānunayau yasya tasya pāpamavāritam |

abhyākhyānāni citrāṇi mātsaryaṃ cerṣyayā saha ||

lābhādikāmatā māna ityādyāvartate bahu |

tasmātsarvaprayatnena saṃstavaṃ praharenmuniḥ ||

sādṛśyādanyadapyetadvāristrotovadīkṣyate |

tadevedamiti bhrāntyā tattve tiṣṭhāmyato balāt ||

avastu caitatsādṛśyaṃ duḥkhaṃ ca janayiṣyati |

ahaṃ caitacca sarvaṃ ca nacirānna bhaviṣyati || iti ||



ātmabhāvapariśuddhiścaturddhaśaḥ paricchedaḥ ||
uwestlogo

The rights of the materials herein are as indicated by the source(s) cited. Rights in the compilation, indexing, and transliteration are held by University of the West where permitted by law. See Usage Policy for details.

Our Address
Newsletter

Subscribe to our newsletter for latest updates about the canon text of our project