• Home
• Canon Text
• Romanized
• śāstrapiṭaka
• kośa
• 30 bhikṣuvargaḥ

30 bhikṣuvargaḥ

Technical Details

(30) bhikṣuvargaḥ



ādarśo bhikṣuḥ lokamārgadarśakaḥ

yo hinasti na bhūtāni mitravettā sadā'kṣayaḥ |

pitṛvat sarvabhūtāni lokastamanupaśyati ||1||



adattādānavirato nityaṃ jñānī jitendriyaḥ |

praśāntadehakarmā (ca) tīrṇasambhavasaṅkramaḥ ||2||



nāpyālekhyagatā nāpi cakṣuṣā sā nirīkṣyate |

hatakāmo dṛṣṭasatyo muktastādṛśa ucyate ||3||



samaloṣṭāśmakanakaḥ vītaśokaḥ samāhitaḥ |

na kleśoragasampṛktaḥ sa saukhyaṃ dhruvamāpnuyāt ||4||



kaḥ bhikṣurvidyate?

arthānarthasamo yasya lābhālābhau tathaiva ca |

sukhaduḥkhasamāyuktaḥ bhikṣuḥ sa khalu kathyate ||5||



mitrāmitraprahīṇo yaḥ samacetā jitendriyaḥ |

vibheti yo na viṣayaiḥ vijñeyastādṛśo yatiḥ ||6||



viṣayadveṣī nirvāṇamadhigacchati

viṣamatvāddhi viṣayān dveṣṭi dhīro gatavyathaḥ |

na tasya dūre nirvāṇaṃ samyaksambuddhadeśitam ||7||



udaya-vyayatattvajñaḥ samyagdṛṣṭiralolupaḥ |

himavāniva niṣkramya saṃsārānmuktahetukaḥ ||8||



tṛṇacandanatulyo hi samatṛṣṇāmbarāśinaḥ |

sa kauśeyasaṅghaṭitatṛṣṇayā naiva bādhate ||9||



lābhasatkārasantuṣṭaḥ santuṣṭastṛṇasaṃstaraiḥ |

vahnivallābhasatkāraṃ yaḥ paśyati sa paśyati ||10||



buddhadeśitāḥ bhikṣudharmāḥ

vāhyate yo na viṣayaistṛṇanadyā na vāhayate |

svakarmaphalatattvajñaḥ sa bhikṣurbuddhadeśitaḥ ||11||



nātītaṃ śocate yo hi buddhayā (caiva) gataspṛhaḥ |

pratyutpannakriyāyogī na buddhistasya lipyate ||12||



nirvāṇe (ca) matiryasya dharme nityaṃ sthitā bhavet |

na vartate sa saṃsāre śukladharmasamāvṛtaḥ ||13||



nāvilaṃ kriyate yasya cittaṃ vidyāgnikalpayā |

dāruvadviṣayā yasya tasya duḥkhaṃ na vidyate ||14||



indriyāṇi vaśe yasya cendriyeṣu vaśānugaḥ |

hriyate yaḥ pumarthaino nikaṣastādṛśo muniḥ ||15||



sādhuvaddhimano yasya kṣamāvān priyadarśanaḥ |

prahlādayati cetāṃsi sa nṛṇāṃ śaśivanmuniḥ ||16||



aruṇābhirato yastu harmyāgreṣu na rajyati |

santuṣṭaḥ pāṃśukūlena bhikṣurbhikṣārato bhavet ||17||



śānto dāntaḥ sudhīrarthāt tattvavit sukhaduḥkhayoḥ |

sa yātyuttamamadhvānaṃ yatra gatvā na śocati ||18||



ṛjumatpātakānyasya nityaṃ dhyānaparāyaṇaḥ |

prākṛtaiśca malai(rhīnaḥ) sa yogī satyavartmani ||19||



sarvendriyavighātī yaḥ sarvabhūtahite rataḥ |

śānto dāntendriyaḥ svastho bhikṣurbhavati tādṛśaḥ ||20||



ṣaḍindriyarathārūḍho rāgaśatrunivārakaḥ |

prajñādhīraḥ kriyāvān yaḥ sa śāntipadamaśnute ||21||



araṇyavāsī santuṣṭo bhūmivāsī samāhitaḥ |

dhunāti pāpako dharmaścāyurmeghānivāmbaraḥ ||22||



śubhaṃ vā dehakarmāntaḥ śubhacaryāsu saṃrataḥ |

tattvadṛṣṭiḥ kriyādakṣo nāśayanmārasādhanam ||23||



dayālurbhikṣurnirvāṇamārge sthito bhavati

rāgātyaye na bādheta śubhacittaṃ gatālayam |

maitryā kāruṇyabahulo bhikṣurnairyyāṇike sthitaḥ ||24||



yasya rūpādayo neṣṭā viṣayā bandhahetave |

sa yāti paramāṃ śāntiṃ yatra gatvā na śocyate ||25||



hetupratyayatattvajñaḥ sūkṣmārthe kṛtaniścayaḥ |

mokṣasrotasyabhiratastṛṣṇayā naiva rajyate ||26||



yo nādatte'śubhaṃ karma śubhakarmarataḥ sadā |

candrāṃśunirmalagatiryogī bhavati tādṛśaḥ ||27||



pradahan pāpakān dharmān śuṣkendhanamivānalaḥ |

vibhrājate tribhuvane muktapāyo gatavyathaḥ ||28||



mokṣe'sti yasya tu mano na saṃsāre kathañcana |

nāsau badhnāti saṃsāre muktaḥ pakṣī yathāmbare ||29||



vedanodayatattvajño vedanāphalaniścayaḥ |

sa mukta iti vijñeyastattvavid ṛtavāṃśca saḥ ||30||



tathāpyete sukhaduḥkhe mṛṣṭāmṛṣṭairna lipyate |

dīptaṃ paśyati saṃsāraṃ yaḥ sa yogī satāṃ mataḥ ||31||



bhikṣurbhavati kīdṛśaḥ?

athāmūḍhamatirnityaṃ nityaṃ dharmaparāyaṇaḥ |

bhikṣuvṛttāvabhirato bhikṣurbhavati tādṛśaḥ ||32||



na tṛptirdarśanārāmaiḥ sādhūnāṃ darśane ratiḥ |

niṣkrāntagṛhakalmāṣo bhikṣurbhavati tādṛśaḥ ||33||



na nṛtyagītasandarśī (satyaṃ) ca punarīkṣate |

saṃrakṣito śmaśāneṣu bhikṣurbhavati tādṛśaḥ ||34||



ekāhaṃ paramaṃ piṇḍamādatte'nyatra kāṅkṣati |

tribhāgakukṣisantuṣṭo bhikṣurbhavati tādṛśaḥ ||35||



vastrottamavivarjī yaḥ pāṃsukūleṣu rajyate |

muktāhāravihāro yo bhikṣurbhavati tādṛśaḥ ||36||



karmāṇyārabhate yo na nirāśaḥ sa ca karmasu |

niruddhako noparato bhikṣurbhavati tādṛśaḥ ||37||



kāyakoṭivinirmukto mohadhvāntavivarjitaḥ |

aliptaḥ pāpakairdharmaibhikṣurbhavati tādṛśaḥ ||38||



sarvāśayajanānītaḥ sarvāśayavivarjitaḥ |

sarvāśayavinirmukto bhikṣurbhavati tādṛśaḥ ||39||



āryāṣṭāṅgena mārgeṇa nirvāṇapurataḥ sthitaḥ |

sarvārthadharmatā hyeṣā bhikṣurbhavati tādṛśaḥ ||40||



śāntendriyo dṛḍhamatiḥ kāmapākavivarjitaḥ |

ekāgrasaṃsthitamanā bhikṣurbhavati tādṛśaḥ ||41||



bhūmisaṅkramaṇajño yo bhūmitattvanidarśakaḥ |

bhūmeḥ parāparajño yo bhikṣurbhavati tādṛśaḥ ||42||



sambhavāsambhavān dharmān hetupratyayasambhavān |

jānīte vidhivat sarvān bhikṣurbhavati tādṛśaḥ ||43||



brahmacārī ṛtujñānī styānamiddhavivarjitaḥ |

kalpodagro'vanau dakṣo bhikṣurbhavati tādṛśaḥ ||44||



śamasthovipaśyanāśca caturdhyānarataśca yaḥ |

ālaye muditārāmo bhikṣurbhavati tādṛśaḥ ||45||



pakṣiṇo gaganasthasya chāyevānugataḥ sadā |

saddharmasyānujīvī sa bhikṣurbhavati tādṛśaḥ ||46||



kleśopakleśabadhakaḥ samadarśī śubhānvitaḥ |

anāpānavidhijño yo bhikṣurbhavati tādṛśaḥ ||47||



anukramavidhijño yo yogavit tattvadarśakaḥ |

pārāpāravidhijño yo bhikṣurbhavati tādṛśaḥ ||48||



yo na hṛṣyati harṣeṣu bhayeṣu na bibheti ca |

mukto harṣabhayodvegairbhikṣurbhavati tādṛśaḥ ||49||



janmamaraṇatattvajñaḥ surāsuranamaskṛtaḥ |

parāvarajñaḥ sattvānāṃ bhikṣurbhavati tādṛśaḥ ||50||



saṅghāṭimātrasaṃhṛṣṭaḥ sañcayeṣu na rajyate |

alpeccho brahmacārī yo bhikṣurbhavati tādṛśaḥ ||51||



ekāśī vṛkṣamūle yaḥ sadā dhyānaṃ samīhate |

lābhasatkāravirato bhikṣurbhavati tādṛśaḥ ||52||



upekṣākaruṇārāgo mokṣadoṣavivarjitaḥ |

nirdagdhadoṣasarvasvo bhikṣurbhavati tādṛśaḥ ||53||



mandavīryakusīdānāṃ bhikṣūṇāṃ darśanāya ca |

nānyayogābhirakto yo bhikṣurbhavati tādṛśaḥ ||54||



kausīdyābhirato bhikṣuḥ nahi kalyāṇamarhati

na śayyāsanasambhogī bhikṣurbuddhena bhāṣitaḥ |

kausīdyabhirato yastu nāsau kalyāṇamarhati ||55||



kleśānāṃ mūlapākaṃ hi kausīdyaṃ yasya vidyate |

tasya duḥkhaṃ mahāghoraṃ saṃsāre sampravartate ||56||



kausīdyameva yasyāsti tasya dharmo na vidyate |

kevalaṃ vastramātreṇa 'bhikṣuḥ' sa iti kathyate ||57||



bhikṣurbhavati na tādṛśaḥ

nādhyāpane ratiryasya na dhyānenāśu rakṣati |

kevalaṃ vastumātreṇa bhikṣurbhavati tādṛśaḥ ||58||



vihārābhirato yastu na rato dharmagocare |

strī-madyalolupamatibhikṣurasti na tādṛśaḥ ||59||



(bhavenmatiryasya nityaṃ vividhe) pāpakarmaṇi |

sa bhikṣurdeśito buddhaiḥ na bhoktā svakagocare ||60||



varamāśīviṣaviṣaṃ kathitaṃ tāmrameva ca |

bhuktasyātyantaduḥśīlairadhikaṃ pāpabhojanam ||61||



yo hi nārhati piṇḍāya nāsau piṇḍāya kalpate |

yasya piṇḍikṛtāḥ kleśāḥ sarpā iva vileśayāḥ ||62||



sa bhikṣuḥ piṇḍabhojī syānna strīdarśanatatparaḥ |

bandhakaṃ yadi cātmānaṃ kṛtvā paraśubhakṣatim ||63||



bhikṣurdurguṇānāṃ svarūpam

kathaṃ sa bhikṣurvijñeyaḥ saṅgharatnapradūṣakaḥ |

yasyeṣṭā lābhasatkārā viṣayā yasya sammatāḥ ||64||



nāridarśanasākāṅkṣī na bhikṣurna gṛhīva saḥ |

rājaseviṣu sṛṣṭāśo madyapaḥ krodhanastathā ||65||



sadā bhikṣurbañcayate dāyakānnanu cetasā |

upāyanānyupādāya rājadvārāśritā hi ye |

saṃrabdhā gṛhibhiḥ sārdha yathā nāgā vanāśritāḥ ||66||



tasmāt tāneva puṣṇanti vāterṣyāste samāgatāḥ |

putradārān parityajya ye śāntā ratnamāśritāḥ ||67||



bhikṣorguṇānāṃ māhātmyam

prahāya doṣān yo bhikṣurasti darśanatattvavit |

rūpādiskandhatattvajño mokṣāya yatate sadā ||68||



dharmāvabodhābhirato dhyānārāmavihāravān

tattvalakṣaṇasambodhāt prāpnuyāt padamavyayam ||69||



maitryārāmo hi satatamudyukto dharmagocare |

tattvalakṣaṇatattvajño bhikṣurbhavati tādṛśaḥ ||70||



yoniśastu matiryasya kāmakrodhairna hanyate |

sa bhikṣuriti vijñeyo viparītastato'nyathā ||71||



sarvabhūtadṛḍhaḥ śāntaḥ sarvasaṅgativarjitaḥ |

sarvabandhananirmukto bhikṣurbhavati tattvavit ||72||



karmaṇi yasya vijñānaviṣayairyo na hanyate |

nirmalaḥ syāt kanakavat santuṣṭo bhikṣurucyate ||73||



priyāpriye mano yasya na lepamanugacchati |

saṅkalpānāṃ vidhijño yaḥ sarvapāpavivarjitaḥ ||74||



anyasaṃduṣṭacarito dharmaśīlo jitendriyaḥ |

ahīnasatvo matimān bhikṣurbhavati tādṛśaḥ ||75||



śāstre śāstrārthavijñāne matiryasya sadā ratā |

na pānabhojanarataḥ sa bhikṣuḥ śāntamānasaḥ ||76||



bhikṣoḥ svarūpanirūpaṇam

vanāraṇyavihāreṣu śmaśāne tṛṇasaṃstare |

ramate yasya tu mano bhikṣurbhavati tādṛśaḥ ||77||



doṣāṇāṃ karmatattvajñaḥ phalavit pariśeṣataḥ |

hetupratyayatattvajño bhikṣuḥ syād vītakalmaṣaḥ ||78||



(hata) kilviṣakāntāro hatadoṣo jitendriyaḥ |

punarbhavavidhijño yo bhikṣuḥ śāntamanāḥ (smṛta) ||79||



notkarṣo hṛṣṭahṛdaye nindayā naiva rūṣyati |

samudratulyagāmbhīryo yogavān bhikṣurucyate ||80||



āveṇiko dṛḍhamatiḥ sūkṣmavādī na lolupaḥ |

kāmavādī samo dakṣaḥ sa bhikṣuḥ śānta ucyate ||81||



kāmadhātūpagān hetūn rūpadhātau tathaiva ca |

āruṣyeṣu ca tattvajñaḥ śāstrā bhikṣuḥ sa ucyate ||82||



na laukikakathāsaktaḥ śatrudoṣabadhe sadā |

viṣavad yasya viṣayāḥ sa bhikṣurdeśito budhaiḥ ||83|



śuddhā yasya (hi)kāmeṣu matirbhavati nityaśaḥ |

sa nirmuktamatirbhikṣurmuktaḥ saṃsārabandhanāt ||84||



dhyānādhyayanakarmaṇyaḥ kausīdyaṃ yasya dūrataḥ |

hitakārī ca sattvānām āraṇyo bhikṣurucyate ||85||



praśnottaramatiryasya pratibhāvan jitendriyaḥ |

sa dharmaḥ kathito jñeyo viparītastṛṇaiḥ samaḥ ||86||



buddhaśāsane kīdṛg bhikṣuḥ śastaḥ?

kāyamānasabhīryasya sarvadā naiva khidyate |

sarvakṛtyakaro jñeyo yaḥ saṅghāya ca tatparaḥ ||87||



na parārtha na lobhārtha yaśo'rtha kurute na tu |

saṅghakārye matiryasya sa muktaḥ sarvabandhanaiḥ ||88||



na svargārtha matiryasya lābhārtha yaśase na vā |

nirvāṇārtha kriyā sarvā sa bhikṣuḥ srota ucyate ||89||



pāpebhyo nityavirataḥ satkṛtyeṣu rataḥ sadā |

na pāpamitrasaṃsargī bhikṣuḥ syād buddhaśāsane ||90||



maitryā bhāvitacittasya dakṣasya ṛjucetasaḥ |

śikṣāpadeṣu raktasya nirvāṇaṃ nātidūrataḥ ||91||



jarāmaraṇaśīlasya saṃsāravimukhasya ca |

dhyāne'pi na pramattasya nirvāṇaṃ nātidūrataḥ ||92||



anityatāvidhijñasya śūnyatāvatkriyāvataḥ |

dhyānotkarṣavidhijñasya nirvāṇaṃ nātidūrataḥ ||93||



dhīro'yamagracoro'yaṃ yo'yaṃ bhikṣurasaṃvṛtaḥ |

antaḥpurīvarasrāvī bahiścīvarasaṃvṛtaḥ ||94||



dharmavinayād rikto bhikṣurduḥkhabhāgī bhavedeva

yathā yatnamayo rāśiḥ sarvo'sāraśca durbalaḥ |

evaṃ sañcarati rikto vitatho bhikṣuvādikaḥ ||95||



sa nārakeyo duḥśīlaḥ saṅgharatnabahiṣkṛtaḥ |

kāyasya bhedānnarakaṃ nīyate cittavañcitaḥ ||96||



vañcito dharmavinayād yāti tat svena karmaṇā |

malinastamasā baddho duḥkhabhāgī bhaviṣyati ||97||



aprāvṛtaḥ śubhadhaman nagnaḥ sādhujugupsitaḥ |

nayate narakaṃ ghoraṃ yathā dharmabahiṣkṛtaḥ ||98||



aśobhanasya nicayo duḥkhadvāramanāvṛtam |

saṃsārabandhanaṃ tīvraṃ dauḥśīlyamiti kathyate ||99||



asaṃvareṇa yo dagdhaḥ sa dagdho vahninā bhṛśam |

tasya saṃvarakṣīṇasya vinipāto dhruvaṃ sthitaḥ ||100||



kukartṛbhikṣurapi narakaṃ yāti



manasā saṃvarasthena svācāraiḥ saṃvarāyate |

samūḍhacaryāmāruhya narakāyopakalpate ||101||



aśubhaṃ vardhate tasya divārātrau ca sarvataḥ |

yasya śīlamayaṃ ratnaṃ dauḥśīlyena nivāritam ||102||



dharmaśūnyasya riktasya tamasā saṃvṛtasya ca |

vidyate'saṃvarastasya yo na śaucāya kalpate ||103||



asaṃvaramayaḥ pāśo malinaḥ sādhuvarjitaḥ |

ākarṣati sa duḥśīlān pāpiṣṭhān śīlavarjitān ||104||



asaṃvaraiśca dauḥśīlyaiḥ pāpaiśca saha saṅgatiḥ |

dūtakā narakasyaite kāmānāmapi sevakāḥ ||105||



asaṃvṛtaprasūtasya capalasya viśeṣataḥ |

pāpakarmābhiyuktasya narakaṃ nātidūrataḥ ||106||



kimete nāvagacchanti karmaṇāṃ sadṛśaṃ phalam |

akṣipātāya mūḍhāya durmatau (ye) vimohitāḥ ||107||



ahanyahani vardhante pāpanadyo durāsadāḥ |

duḥkhormimālāścapalāḥ pāpiṣṭhajanahāriṇaḥ ||108||



na teṣāṃ sukaraṃ janma na teṣāṃ sukaraṃ manaḥ |

aśīlāḥ puruṣā ye vā śukladharmavivarjitāḥ ||109||



dharmo'tyuccaḥ śubho mārgaḥ

atyuccaśca śubho mārgaḥ sa 'dharma' iti kathyate |

taṃ prāpyamanujaḥ śīghraṃ prayāti padamacyutam ||110||



tato'pavādāḥ sādhyante śaktimantaḥ sukhāstu ye |

saṃvarasya sadā dāsāsteṣāṃ duḥkhaṃ na vidyate |

dauḥśīlyaparamo hyeṣa malinīkurute nṛṇām ||111||



ye śaikṣyapadavibhraṣṭā bhāgino narakasya te |

evaṃ jñātvā naraḥ sarva saṃvaraṃ pratipadyate ||112||



śubhadharmī bhikṣurnirvāṇaṃ nāticiraṃ prāpnoti

bhavārṇasya sarvasya setubhūto hi saṃvaraḥ |

śuddhājīvaviśuddhasya śāntavaktrasya karmaṇaḥ ||113||



dhyāyino vipramuktasya nirvāṇaṃ nātidūrataḥ |

dhūrdharasyāpramattasya śmaśānavanasevinaḥ ||114||



śāyino bhūtale nityaṃ nirvāṇaṃ nātidūrataḥ |

pāṃśuśayyāvalambāṃsapātamekaṃ sajarjaram ||115||



santoṣaḥ phalamūlaiśca sa sukhī buddhasambhavaḥ |

vipramuktasya kāmebhyaḥ santoṣo hītarasya ca ||116||



savimuktakacittasya nirvāṇaṃ nātidūrataḥ |

kuhakāmalamuktasya rajo vā tasya tāyinaḥ ||117||



ākāśasamacittasya nirvāṇaṃ nātidūrataḥ |

bahubaddhapadairyuktā vijñeyā (bhava)cārikā ||118||



nāśikā brahmacaryasya nirvāṇagatiduḥkhikā |

sevyate yā janairnityaṃ prākṛtaiḥ śīlavarjitaiḥ ||119||



ajastraṃ parivarjyā sā dhyāyibhistattvadarśibhiḥ |

daurbalyamūlamekā sā manaskārapraṇāśikā ||120||



nāśinī brahmacaryasya narakasya pradarśikā |

bhraṃśikā svargamārgasya duḥkhasāgaraśoṣikā ||121||



dūtikā pretalokasya tiryagyoninipātikā |

nāmnā saṅgaṇikā sevā saṃsāre bandhamātṛkā ||122||



dhyānādhyayanaśaktaiva varjyā nityaṃ hi bhikṣubhiḥ |

dhyānādhyayananirmukto nimittābhirataḥ sadā ||123||



paradharmo bhayāvahaḥ

vivarjitaḥ śubhairdharmairapāpagamanāya saḥ |

svadharma yaḥ parityajya paradharmeṣu rajyate ||124||



dharmadvayaparibhraṣṭo vinipātāya kalpate |

svagṛhaṃ yaḥ parityajya paraveśyāni tiṣṭhati ||125||



sadā'yaṃ lāghavaṃ yāti nidhanaṃ cāśu gacchati |

tathā yo vimatirbhūto vidvanmānī janecchayā ||126||



svadharmaviratiṃ kṛtvā paradharmeṣu vartate |

adharme cāśayastasya paraliṅgopajīvinaḥ |||127||



tṛṇavidyābhilipto'yaṃ pretaḥ pāpeṣu pacyate |

yaśo'ntaṃ padamāsthāya pāpakarmaṇi vartate ||128||



nāsau bhikṣurihocyate

śaśvat sa patito dṛṣṭaḥ śāsanāntāt pravartate |

nispṛhaḥ kāmacaryāsu nirāmodaḥ pravarjitaḥ ||

ārabdhavīryaḥ santuṣṭo dhyāyī bhikṣurihocyate ||129||



na ca kāmeṣu saṃsakto nityāhāravihāravān |

kāṣāyasaṃvṛtaḥ kṣauro nāsau bhikṣurihocyate ||130||



nimittabodhako ( yastu) nakṣatragaticintakaḥ |

rājasevāpramattaśca na sa bhikṣurihocyate ||131||



vaidyakarmāṇi kurvaśca śruti saṅgrathanaṃ tathā |

saṅkīrṇā dinacaryā ca kurvan bhikṣuḥ praṇaśyati ||132||



dhyānādhyayanavidveṣī rataḥ saṅgaṇikāsu ca |

lobhasatkāralābhaṃ ca kurvan bhikṣuḥ praṇaśyati ||133||



suvarṇadhātusaṃsakto bahumitraratiśca yaḥ |

anyalābhābhilāṣito bhikṣuḥ patati śāsanāt ||134||



tapasaḥ saṅganirmukto na pāpagaṇasevakaḥ |

saktūdakena santuṣṭaḥ sa bhikṣurniṣṭhuraḥ smṛtaḥ ||135||



kaḥ śuddho bhikṣuḥ?

āgatān viṣayān sarvān tyajati jvalanopamān |

viśuddhadoṣo maṇivacchuddho bhikṣurihocyate ||136||



antarbahirviśuddhātmā jñānādibhiralaṅkṛtaḥ |

śraddhayā śīlavastreṇa kriyāvān bhikṣurucyate ||137||



lobhadharmavyatīto yaḥ sthito merurivācalaḥ |

sarvalokapriyaḥ śāntaḥ pārago bhikṣurucyate ||138||



trirātrivāsī kutrāpi kuśāsanavidhārakaḥ |

girigahvarasevī ca vimukto bhikṣurucyate ||139||



pāpabhīrurasaṃsparśī saṃvṛtaḥ ca susaṃvṛtaḥ |

jñānasevī sthiraḥ śānta ekākī bhikṣurucyate ||140||



acalaḥ priyavādī ca pāpamitravivarjitaḥ |

aśaktaḥ sarvakṛtyeṣu mukto bhikṣurihocyate ||141||



rājasevā kukaṣāyoktisevā

rājasevā vigarhyāsti bhikṣoścāraṇyavāsinaḥ |

kukaṣāyoktisevā'sau mṛtyutaskarajīvikā ||142||



na hi rājasevako bhikṣuryaḥ sevyo devatairapi |

na hiṃsāsavasaṃsṛṣṭo mahate'śucisevakaḥ ||143||



bhikṣoḥ rājasevā na śobhate

nirmalasya nirāmasya nispṛhasya ca dehinaḥ |

saṃsārabhayabhītasya rājasevā na śobhate ||144||



vanāraṇyaśmaśāneṣu palvalo giribhūmiṣu |

prāntabhūmiṣu grāmasya sthitaḥ bhikṣuḥ praśobhate ||145||



vanāraṇyaśmaśāneṣu bhikṣurna rājasevayā |

dhyānādhyayananirmuktaḥ kavalāhārabhojitā |

na bhikṣuriti vijñeyaḥ piśācasamamānasaḥ ||146||



dhyānāddhi vimalaṃ saukhyaṃ pravadanti manīṣiṇaḥ |

na tatsukhātsukhaṃ cānyadasti loke kathañcana ||147||



taduttamadhyānasukhaṃ muktvā yaḥ puruṣādhamaḥ |

raseṣu ramate bālastena mūḍho vihanyate ||148||



viṣayairbhrāmitasyāsya nityaṃ tadgatacetasaḥ |

vardhante'kuśalā dharmāḥ paralokāpakarṣakāḥ ||149||



ātmajño bhikṣurnirvāṇamadhigacchati

ātmano yānahīnaśca gurupṛcchanakastathā |

bhikṣurudyuktavīryaśca nirvāṇamadhigacchati ||150||



śrutaṃ yāvad bhavatyeva tāvadeva prabhāṣate |

ātmajño mānahīnaśca bhikṣurbhavati tattvavid ||151||



mānāpamānahīno yo mārgāmārgavicakṣaṇaḥ |

svaparārthavidhijño yaḥ sa tuṣṭo bhikṣurucyate ||152||



māninaḥ kutaḥ śāntiḥ?

māninaḥ krūramanasaścapalasyālpamedhasaḥ |

lābhasatkārayātasya kutaḥ śāntirbhaviṣyati? ||153||



prasannācārayuktasya jñānagocarasevinaḥ |

saṃsāradoṣabhītasya pravrajyā saphalā matā ||154||



svabhāvaparabhāveṣu yasya buddhirnamuñcati |

na karmaṇyavipāke ca mārgāmārge tathaiva ca ||155||



nivāsopahato bhikṣuḥ sukhaṃ na vindati

sadācāraviyuktasya sukhaduḥkhābhayasya ca |

nivāsopahato bhikṣurbālavad dṛśyate paraiḥ ||156||



tṛṇavallaghutāṃ yāti svārthācca parihīyate |

nivāsopahato bhikṣuḥ parihīṇavane sthitaḥ ||157||



dhyānādhyayanakṛtyeṣu mano naiva pravartate |

nivāsopahato bhikṣurjanasañcayatatparaḥ ||158||



sañcayavyagramanasā jīvitaṃ parihīyate |

kṣiṇoti retasaṃ svasya jīvitaṃ naiva gacchati ||159||



kaḥ durgatiṃ yāti ?

na ca vindati yat kṛtvā sukhamanyatra bhujyate |

nivāsopahato bhikṣurjanasañcayatatparaḥ |

pāpāni yāti nityaṃ sa tena gacchati durgatim ||160||



śrāmaṇyadharmasya mahattvam

anabhipretamanaso nirāśasya ca dehinaḥ |

sarvasaṅgavimuktasya śrāmaṇyaṃ saphalaṃ matam ||161||



girigahvaravṛkṣeṣu nityaṃ dhyānavihāriṇaḥ |

prasīdati śubhaṃ jñānaṃ dauḥśīlyaparivarjitam ||162||



keṣāṃ saphalaṃ jīvanam?

sarvasaṅgavinirmukto viṣayairna ca vañcitaḥ |

(sa) bhikṣu niṣphalo jñeyaḥ śuṣkendhanamivānalaḥ ||163||



nirvāṇābhiratasya bhikṣoḥ praśaṃsā

nirvāṇābhirato yo hi bhītasya vibhavārṇavāt |

bhikṣurbhavati śuddhātmā na nivāsena karhicit ||164||



tṛṣṇā eva anarthakarī

lobhamoheṣu ye śaktāste śaktā tṛṣṇayā sadā |

tṛṣṇābandhanabaddhānāṃ nāyaṃ loko na cāparaḥ ||165||



dharmajño durgati na labhate

asaṃśaktā matiryasya mithyākarmasu sarvadā |

apakṣapātī dharmajño na sa gacchati durgatim ||166||



kaḥ munirucyate?

doṣapaṅkemano yasya na limpati kathañcana |

ekārāmavihārīyo nirāśo munirucyate ||167||



nirmukto vimalācāro nivṛttamalakalmaṣaḥ |

mukto yo viṣayaiḥ sarvairāraṇyo munirucyate ||168||



lokadharmairna nirvedaṃ samāyāti kathañcana |

sukhaduḥkhasamaprajño nirmalo munirucyate ||169||



santoṣaḥ paramo(dharmo) nityaṃ kāmavivarjitaḥ |

nirāmayaḥ kṛcchrajīvī śucirmunirihocyate ||170||



nayenna tena saṃśleṣaṃ yatra yatrānugacchati |

ekacārī dṛḍhamatiḥ kriyāvān munirucyate ||171||



śubhāśubhānāṃ sarveṣāṃ karmaṇāṃ phalatattvavit |

śubhāśubhaparityāgī loke'sau munirucyate ||172||



udyukto doṣanāśāya nityakāmagatiḥ smṛtaḥ |

udayavyayatattvajño buddhimān munirucyate ||173||



deśakālavidāṃ śreṣṭho'dvayavādī jitendriyaḥ |

saṃsārabhayabhīto'yaṃ praśānto munirucyate ||174||



kaḥ bhikṣuḥ nirvāṇamadhigacchati?

ekārāmagato bhikṣuḥ saṃkṣiptendriyapañcakaḥ |

dehalakṣaṇatattvajño nirvāṇamadhigacchati ||175||



vīryavān ( satyavāk) bhikṣurnityaṃ doṣavivarjitaḥ |

udyānamiva krīḍāyā nirvāṇamadhigacchati ||176||



kalyāṇadharmī bhava

dagdhe kleśe vayaṃ dagdhā vanaṃ dagdhaṃ yathāgninā |

kalyāṇadharme saṃraktā na raktā kāmabhojane ||177||



māyayā janāḥ vañcakāḥ bhavanti

nityaṃ prāptyutsukā ye (hi) nityaṃ svajanasaṃratāḥ |

māyayā vañcakā (ye tu ) mūḍhāste dharmavartmani ||178||



śubhakarmaṇi manaḥ kāryaḥ

ramaṇīyānyaraṇyāni tatraiva ramate manaḥ |

ramante vītarāgāste na tu kāmagaveṣiṇaḥ ||179||



sa kathābhirato yastu rato viṣayatṛṣṇayoḥ |

na yāsyati puraṃ śāntaṃ yo ca mṛtyuṃ na vindati ||180||



advayavādī bhava

yo'tyantaśāntamanasā nityaṃ dhyānaparāyaṇaḥ |

ādimadhyāntakalyāṇo nityamadvayagocaraḥ ||181||



||iti bhikṣuvargastriṃśaḥ ||



karuṇā-dāna-śīlāni-kṣāntirvīryamathāpi ca |

dhyānaṃ prajñā'tha nirvāṇo mano bhikṣuśca te daśa ||



||iti tṛtīyam udānam ||