• Home
• Canon Text
• Romanized
• śāstrapiṭaka
• kośa
• 16 narakavargaḥ

16 narakavargaḥ

Technical Details

(16)narakavargaḥ



aṣṭau narakāgnayaḥ

kṛtvā duṣkṛtakarmāṇi sattvā viṣamajīvinaḥ |

yā gatiḥ pretya gacchantī tānapāyān (hi me) śṛṇu ||1||



sañjīvaṃ kāmasūtraṃ ca sampātaṃ dvau ca rauravau |

tamoparaṃ mahācitrapatanaṃ ca pratāpanam ||2||



ityete narakā aṣṭāvākhyātā duratikramāḥ |

raudrakarmābhisaṅkīrṇāḥ pratyekaṃ kṣobhadā (matāḥ) ||3||



narakāgnīnāṃ bhayānakatvam

catuḥskandhāścaturdvārā vibhaktā bhāgaśo mitāḥ |

ayaḥ prākāraparyantā ayasā pratiduḥkhitāḥ ||4||



taptāyomayasaṃ bhūmirjvalantī tejasodgatā |

anekayojanaśataṃ dahati svaciṃṣā(bhṛśam) ||5||



kandarpadamanā ghorā arciṣmanto durāsadāḥ |

romaharṣaṇarūpāste'pyāhurduḥkhā bhayānakāḥ ||6||



narake patitā bhṛśaṃ tapyante



ete patanti narake ūrdhvapādā avāṅmukhāḥ |

ṛṣīṇāmativaktāraḥ saṃyatānāṃ tapasvinām ||7||



te punastatra pacyante taptāmbhasi kṛtā iva |

krandamānā divārātrau, nagā vāteritā iva ||8||



praṇadanti mahānādaṃ tīvraduḥkhaiḥ pratāpitāḥ |

sarvā diśaśca dhāvanti nārakaiḥ puruṣairdrutāḥ ||9||



kudṛṣṭyā mohayitvārthe mohapāśāvṛto janaḥ |

prāpnoti narakaṃ ghoraṃ kāraṇodadhisaṃvṛtaḥ ||10||



kudṛṣṭyā dagdhasarvasvo manuṣyaḥ puruṣādhamaḥ |

tathā baddho'sti narake mānināṃ ghorakāraṇam ||11||



ye mithyāvaśamāpannāḥ puruṣā mandamedhasaḥ |

te sarve narakaṃ yānti cittairhi parivañcitāḥ ||12||



kukṛtaphalam

yastvayā duṣkṛtaṃ pūrva kṛtaṃ cittānuvartinā |

tasya bhuṅktaphalaṃ mūḍha vipākottama (māpsyasi) ||13||



hāryāṇi paricittāni, saṃsevyāḥ parayoṣitaḥ |

hrasvā (hi) jantavo nityaṃ svacittaparivañcitāḥ ||14||



tasya karmavipākasya vaśa eva tvamāgataḥ |

kiṃ krandasi svayaṃ kṛtvā kukarma puruṣādhama! ||15||



ye narāḥ kukṛtaṃ kṛtvā pañcatvaṃ yāntyamedhasaḥ |

yeṣāṃ tu niṣphalaṃ janma bījamuptaṃ yathoṣare ||16||



alpamādhuryasaṃyuktān kāmān kaṭuvipākinaḥ |

sevate yastvasau mūḍhaḥ sa yāti tamaso tamaḥ ||17||



kiṃ kṛtaṃ mūḍha bhavatā putradārasukhārthinā |

dahasye narake caikaḥ svakarmaphalavañcitaḥ ||18||



keṣāṃ duṣkaraṃ jīvanam?

yaḥ putradāravaśagaḥ sevate duṣkaraṃ naraḥ |

sa yāti narakatvaṃ (ca) pāpaṃ tadanubhūyate ||19||



na dārā na sutā nārtha na mitrāṇi kathañcana |

mṛtyukāle samutpanne rakṣanti samupasthitāḥ ||20||



yeṣāṃ sāṃkleśikaṃ cittaṃ tṛṣṇayā parivañcitam |

sahāyatā kutasteṣāṃ kasmāt (tvaṃ) paritapyase? ||21||



hṛto'si pūrvaviṣayaistṛṣṇayā parivañcitaḥ |

kiṃ krandasi svayaṃ kṛtvā kukṛtaṃ mūḍhacetanaḥ ||22||



na tathāgnirna śastrāṇi na viṣaṃ nārayaḥ sthitāḥ |

bādhate puruṣaṃ loke yathā duṣkṛtyamātmajam ||23||



pakṣiṇāṃ nīḍavāsavat bhavacakram

digbhāge hi yathā gatvā saṃśrayante vanaspatīn |

vihagāḥ kālamutthāya tathā prāṇisamāgamaḥ ||24||



nāśayitvā paraṃ dravyaṃ kṛtvā lokavyatikramaṃ |

kiṃ karotyaśubhaṃ karma mohena parivañcitaḥ ||25||





yena yāti parāṃ śāntiṃ yena yātyasurālayam |

tatra hetuḥ paraṃ mohastamasāmapi yat tamaḥ ||26||



kuṭumbāya kṛtaṃ pāpaṃ narake pātayati

putradāramayaiḥ pāśaiścānītā narakālayam |

yadartha kriyate pāpaṃ yuṣmābhiścittavañcitaiḥ ||27||



mitrāṇi putrāḥ (pitarau kiṃ ) bandhujana-bāndhavāḥ |

yeṣāmarthe kṛtaṃ pāpaṃ bhavadbhirmandabuddhibhiḥ ||28||



nūnamātmā na te kānto babhūva narabhūmiṣu |

yena tvayā kṛtaṃ pāpaṃ putrārthena narādhamaḥ ||29||



yena pūrvakṛtaṃ pāpaṃ paścānna paritapyate |

sa yāti narakaṃ ghoraṃ putrakāraṇavañcitaḥ ||30||



pāpakarma-phalam

kiṃ kariṣyanti putrāste kiṃ dārāḥ kiṃ ca bāndhavāḥ |

dahasyanādinarake vahniḥ karma dunotyasau ||31||



svayaṃ kṛtvā'śubhaṃ karmāsukhodayamaninditaḥ |

tapyase'pi vṛthādhānaḥ paścānmohena vañcikaḥ ||32||



rāgadveṣānugāḥ pāpaṃ mohena parivañcitāḥ |

aghaṃ prayānti te sarve putradārasukhārthinaḥ ||33||



antargatena ca punarbahiḥsthena ca vahninā |

dahyamāno(hi)duḥkhena narake pāpakarmaṇā ||34||



vaśaṃ prāptāḥ svacittasya sarva eva viḍambitāḥ |

kiṃ krandasi vṛthā nāde vahninā paritāpitaḥ ||35||



pāpānugaphalaṃ dṛṣṭam

atha pāpāni karmāṇi kṛtavānasi manyase |

durmate tatra mā kranda kiṃ vṛthā paridevase ||36||



pāpeṣu rakṣyate mūḍhaḥ kāraṇāśuci rakṣyate |

pāpānugaphalaṃ dṛṣṭaṃ hetupratyayasambhavam ||37||



kasmānna sevito dharmaḥ pāpañca nahi varjitam |

pāpād bahiśca puruṣo narakaṃ naiva paśyati ||38||



yo na vindanti mūḍhātmā phalaṃ pāpasya karttṛkam |

so'vaśyaṃ labhate doṣān kathaṃ bhokṣyasi durmate ||39||



pāpena vañcita pūrvaṃ pāpena paridahyate |

na kariṣyasi pāpāni tvaduḥkhenaiva yāsyasi ||40||



kṛtavānasi pāpāni śubhāni na kathañcana |

pāpena dahyate tasmādaśubhe na manaḥ kṛthāḥ ||41||



kiṃ duḥkhādapi duḥkham?

nāsti duḥkhādato duḥkhaṃ yaḥ pāpamanusevate |

tasmāt pāpaṃ na seveta yadi duḥkhaṃ na vāñchasi ||42||



kuṭumbijanānāṃ spaṣṭoktiḥ

tasyāntarhṛdaye bimbaṃ kintu śāntirna vidyate |

kāruṇyāspadabhūtāḥ smo nāsmākaṃ karuṇāhṛdi ||43||



yathā kṛtaṃ bhavadbhiśca pāpaṃ mohāvṛtairbahu |

tad vaḥ pradhāvate gāḍhaṃ na ca ye tatra hetavaḥ ||44||



śīlaṃ na rakṣitaṃ mūḍha pāpaṃ ca bahu sañcitam |

sambhūtasya ca pāpasya phalametadupasthitam ||45||



na vayaṃ kāraṇaṃ tatra yūyameva hi kāraṇam |

yaḥ pāpaṃ kurute karma sa hetustasya karmaṇaḥ ||46||



bhavadbhiryat kṛtaṃ pāpaṃ tṛṣṇāśāpaviḍambitaiḥ |

tad vo prapadyate ghoraṃ kimasmān paribhāṣata ||47||



nākṛtaṃ pacyate pāpaṃ na pāpaṃ syādahetukam |

yena yaddhi kṛtaṃ pāpaṃ tasya tat paripacyate ||48||



pāpī narakaṃ yāti

tad bhavantaḥ kriyāhīnā madyapānena vañcitāḥ |

patitā narake tīvre kiṃ vṛthā paritapyatha ||49||



te yūyaṃ kāmaparamāḥ ghoraṃ narakamāgatāḥ |

kāraṇeṣvapi tīvreṣu kiṃ tathā paritapyatha ||50||



yadā kṛtāni pāpāni bhavadbhiḥ kāmamohitaiḥ |

tadā kasmānna nikṛṣṭaṃ kimadya paritapyatha ||51||



hetubhūto hi narako mṛṣāvādasya deśitaḥ |

heturvai sevitaṃ pūrva niṣphalaṃ paridevatha ||52||



nārthena labhate satyaṃ na kṛcchreṇopapadyate |

tasmāt satyaṃ parityajya mṛṣāvādeṣu rajyase ||53||



pūrveṣu pāpamahitaṃ bhavatā mūḍhacetasā |

kṛtaṃ bhavadbhiḥ kukṛtaṃ (duṣkṛtyaṃ ) paripacyate ||54||



pāpakṣayād vinirmukto narakaṃ nopalabhyate |

nākrandamānāḥ puruṣāḥ vimucyante kathañcana ||55||



pāpakartṛ phalaṃ svayameva bhuṅkte

kiṃ krandatha vṛthā mūḍhā vañcitāḥ svena karmaṇā |

muñcitā vañcitā bālā vṛthā krandantyabuddhayaḥ ||56||



ahitairhitarūpaistvaṃ mitrarūpaiśca śatrubhiḥ |

vipralabdho'si bho martya! gacchannasi mahat tamaḥ ||57||



nānyaḥ śatruryathā karma duṣkṛtaṃ tava pāpakam |

karmaṇā trividhenā'tha nīyase yamasādhanam ||58||



kasmādasi tato mūḍha, vañcitaḥ putrasaṃjñakaiḥ |

na dānādiṣu buddhistaiḥ kṛtā (te) mohavañcitā ||59||



asmāṃllokātparaṃ lokaṃ śatrupṛṣṭhorago yathā |

śatrūṇāṃ prathamaḥ śatruḥ sarvapāpanidarśakaḥ ||60||



viṣāgniśastrapratima! svayaṃ hi duṣkṛtaṃ kṛtam |

tvayā kṛtāni karmāṇi tvamevamanubhokṣyase ||61||



yasya śāntaṃ sadā cittaṃ viṣayairyo na hanyate |

na hyavasthāmimāṃ yānti tathātvamanupaśyasi ||62||



narakasya dhvaniṃ śrutvā kathaṃ krandasi durmate! |

kiṃ punaryatra vahnistvāṃ dhakṣyati śuṣkakāṣṭhavat ||63||



na dagdhā vahninā ye ca dagdhāste kukṛtaiḥ svakaiḥ |

vahnistu śāmyate kvāpi duṣkṛtāgnirna śāmyati ||64||



nāgnirniryāti lokāntaṃ nāgnispṛṣṭo naro (mṛtaḥ) |

kukṛtāgnimayaṃ pāpaṃ yad dhakṣyati hi tattvataḥ ||65||



kukṛtāgnividagdhā ye te dagdhā narake narāḥ |

pāpāgnivarjitā ye tu na teṣāṃ narakodayaḥ |

yadyātmanaḥ priyo nityaṃ vibheṣi narakād yadi ||66||



vivarjaya svapāpāni tato duḥkhaṃ na yāsyasi |

yānti pāpamaye nityaṃ(narā) mohavaśānugāḥ ||67||



prāpnoṣi narakaṃ ghoraṃ kimaśrūṇi vimuñcasi ? |

duḥkhaṃ duḥkhavipākaṃ ca duḥkhāntagamanaṃ tathā ||68||



sukṛtaṃ nādimadhyāntaśobhanaṃ paripacyate |

nātra loke tvayā'pāpaṃ yatkṛtaṃ sukṛtaṃ (muhuḥ) ||69||



tasya tīvravipākasya phalamadyopabhokṣyase |

hetupratyayasādṛśyaṃ viparītaṃ na kalpyate ||70||



hetuḥ kṛto yathā pūrva tathā phalamavāpsyasi |

yathā tava tathā'nyeṣāṃ prāṇarakṣā prayatnataḥ ||71||



kasmāt prāṇātipātāste kṛtāḥ pāpānuvartinā |

prāṇatyāgena puruṣairyad dhanaṃ samupārjitam ||72||



karmodayakṛtaṃ tatte yattvayā samupārjitam |

sarveṣāṃ dayitā dārāḥ prāṇebhyo'pi garīyasaḥ ||73||



tattvayā rāgaraktena kasmādapakṛtā'vanāt |

buddhervyāmohajanakaṃ dharmāṇāṃ dūṣaṇaṃ param ||74||



dharmapānaṃ tvayā kārya karmānuparivarjitam |

jihvāviṣasamutthaṃ yat sarvāpratyayakārakam ||75||



mṛṣāvādaṃ tvayā pāpaṃ karmā'nuparivarjitam |

evaṃ pañca-vidheyeṣu yasmāt tvamanuraktavān ||76||



tasmāt saṃmukṣya mā rodi kiṃ vṛthā paridevase |

viṣayaṃ pāpakā dharmā yasmānnu parivañcitaḥ ||77||



tasmāt prāpnoṣi narakaṃ jvālāmālākulaṃ mahat |

etat tṛṣṇāgninā sarva pradīptaṃ bhuvanatrayam ||78||



dharmācaraṇe sāvahitena bhavitavyam

dṛṣṭvā nācarito dharmaḥ kimadya paritapyase |

(śrutvā) te madhuraṃ cittaṃ kāmamandirakaṃ vacaḥ ||79||



udīrite mahāpāpe tasmai tatphalamāgatam |

sa kṛtvā pāpakaṃ karma niyatā pāpavedanā ||80||



karuṇaṃ vikalaṃ dīnaṃ kimadya paritapyase |

karmakṣayeṇa narakāt mucyante pāpakāriṇaḥ ||81||



vikrośamagnā bahuśo na mucyante kathañcana |

aniṣṭaṃ pāpakaṃ karma kṛtvā rogavaśe sthitāḥ ||82||



ajñānino'śubhamācaranti

paridevati yo mūḍho vṛthā sa paridevati |

anāgataphalajño yaḥ pratyutpannaśubhe rataḥ ||83||



krośate narake nāsau yathā tvamanutapyase |

mayā kṛtāni karmāṇi phaladāni mamaiva hi ||84||



rogeṇa śatruṇā dagdhaḥ paścānnarakamāgataḥ |

pramādabhūmiraśubhā rāgadagdhasya dehinaḥ ||85||



tena pāśena baddho'haṃ gato'vasthāmimāṃ bhṛśam |

durācāraratānāṃ tu nṛṇāmasya phalaṃ kaṭu ||86||



ajñānabādhito'smīti svakṛtaṃ bhujyate mayā |

nirdayānāṃ sughorāṇāṃ pāpānāṃ vaśamāgataḥ ||87||



muktiḥ kathaṃ syāt?

muktirasmāt kathaṃ syādvai duḥkhasaṃsārasāgarāt |

duḥkhād duḥkhataraṃ karma mayedaṃ paripacyate ||88||



sukhāvāptiṃ na paśyāmi kṣemaṃ vā narakasya me |

jīvalokādahaṃ bhraṣṭo abuddha iva mārgataḥ ||89||



jīvo'yaṃ vivaśo bhūtvā vikṛtaiḥ parivāritaḥ |

jvālāmālākulaṃ sarvamantarikṣaṃ nirantaram ||90||



diśaśca tridiśaścaiva pṛthi(vī) ca nirantarā |

kṛpaṇo'jñānago duḥkhī nivāsaṃ nopalakṣaye ||91||



kṣuradhārāvitaptasya nṛpasyāsyātibhīṣaṇam |

kāntāre bāhyamānasya niḥ sahāyasya sarvataḥ |

trātāraṃ nāvagacchāmi yo'smād duḥkhāt pramocayet ||92||



niḥśaktiravaśo duḥkhī vahninā paritāpitaḥ |

nīye'haṃ vivaśaḥ kvāpi bāhubandhanayantritaḥ ||93||



na vā'rthā nāpi mitrāṇi na putrā na ca yoṣitaḥ |

trāyante vyasanādasmāt kṛtaghnā bata te mama ||94||



adharmacāriṇo na kvāpi śaraṇam

nirānandasya na sukhaṃ duḥkhaṃ (gṛhṇāmi sarvaśaḥ) |

mṛtyupāśena baddhasya śaraṇaṃ nopalakṣyate ||95||



saṃkruddhā iva te, krūrā bhaviṣyanti samantataḥ |

nirānandā diśaḥ sarvā vyālaiśca parivāritā ||96||



narakaṃ pātakasyaiva pateyaṃ dhṛtibhāvataḥ |

yacca yaccehaṃ paśyāmi jaṅgamaṃ sthāvaraṃ tathā |

tat sarva vyākulaṃ caiva vahninā paridīpitam ||97||



nādhigacchāmi śaraṇaṃ niḥsahāyo'smi sarvataḥ |

ghore tamasi majjāsi sāgare ca hṛtaplavaḥ ||98||



gaganaṃ naiva paśyāmi nakṣatragrahatārakam |

viparītamidaṃ sarva tamasā parivāritam ||99||



pañcendriyāṇi sarvāṇi viratāni hi sarvataḥ |

krakacaistu tadā sarva śarīraṃ paripāṭayate ||100||



nādhigacchāmi śaraṇaṃ kāmaṃ bandho bhaviṣyati |

vardhante duḥkhanikarā sarvataḥ parivārataḥ ||101||



muhurmuhuśca vardhante vedanāñcitadehajāḥ |

duḥkhaiśca (parivardhante) nissahāyaṃ ca sarvataḥ ||102||



samīkṣya karmajaṃ nityaṃ dhyeyo hetuḥ punaḥ punaḥ |

kathayanti sukhaṃ vṛddhāḥ svakarmaphalajairdṛḍham ||103||



yat pūrva karaṇīyaṃ te tatpaścāt paricintyase |

mohena vañcitaḥ pūrvaṃ kimadya paritapyase |

kiṃ punaḥ pāpakartturyaḥ kaṭukaṃ paripacyate ||104||



anekaduḥkhahetūtthaṃ tava duḥkhaṃ bhaviṣyati |

trāṇaṃ naiva (ca) yatrāsti vinā karmaparikṣayāt ||105||



evaṃ satyasya nāśena yamadūtairanekaśaḥ |

nīyate narakaṃ ghoraṃ karmapāśavaśaṅgataḥ ||106||



catuṣkoṇaścaturdvāro vibhakto bhāgaśo mitaḥ |

pacyate yatra vivaśā nārakeyā hyanekaśaḥ ||107||



bhedaprāyeṇa bahuśo yattvayā kathitaṃ bahu |

kalmaṣaṃ bhūtadharmāṇāṃ tasyaitat phalamāgatam ||108||



paiśunyasevino narakaṃ yānti

bhasmībhavanti te nityaṃ mitrasvajanabāndhavaiḥ |

eṣāmabhimataṃ duṣṭaṃ paiśunyaṃ sadvigarhitam ||109||



tasmānna carito dharmaḥ paiśunyaṃ ca na varjitam |

paiśunyaṃ saphalaṃ bhuktvā kimadya paritapyase ||110||



jihvādhanavinirmuktaṃ tīkṣṇaṃ viṣamamucchritam |

pāruṣyamiti sandṛṣṭamaho! tatphalamīdṛśam ||111||



sattvaṃ pāruṣyaparamaṃ ghoraṃ narakamāgatam |

jihvāyātaṃ tavākṛtyai kimadya paridevase ||112||



sahastraguṇaparyantaḥ svato hṛdayasambhavaḥ |

kṣutpipāsāmayo vahniḥ samādahati mārutam ||113||



paruṣavāco narakasya cāntaram

yadantaraṃ himāgnyorhi merusarṣapayośca yat |

tadantaraṃ jihvayoktyā narake jvalanasya ca ||114||



narakaprabhavo vahnirna kvā'pyanyatra prāpyate |

kṣutpipāsāmayo vahnirdeveṣvapyupalabhyate ||115||



yo hyataḥ kāraṇāttīkṣṇo vahnirbhavati nārakaḥ |

na tathā sa prabhavati yathā vahnistadudbhavaḥ ||116||



pūrvottarā baddhapadaṃ nirarthakamasaṅgatam |

vistrabdha yattvayā proktaṃ tasyaitatphalamāgatam ||117||



pareṣāṃ sampadaṃ dṛṣṭvā mama syāditi cintitam |

tamo'bhikhyāsamutthasya viṣasya phalamāgatam ||118||



vyāpārānaladagdho'si mānuṣyaṃ puruṣādhama! |

dahanād dahanaṃ prāpto tapyase ca vikatthyase ||119||



vyāpāraparamohe tu narakāyopapattaye |

rajjvaitayaiva baddho'si puruṣaḥ parikrandase ||120||



vyāpādenākṛṣṭo'si ghoraṃ narakamāgataḥ |

karmakṣayād bhavenmokṣo narakācca vimokṣyase ||121||



adharmakathanaṃ dahatyeva

adharmo dharmarūpeṇa sādhurūpeṇa pāpakam |

yat tvayā kathitaṃ pūrva tat tvāṃ dahati nānalaḥ ||122||



kathaṃ tattvavinaṣṭānāṃ dharmādharmanicchatām |

deśitaṃ vivaraṃ pāpaṃ niyataṃ pāpagāmikam ||123||



(yas)tvayā varjito dharmaḥ sādhavaścāpi ninditāḥ |

yattvayopārjitaṃ kṛṣṭaṃ tattvayā'dya vipacyate ||124||



tṛṣṇāviṣayayuktena mohavegena sarvadā |

yataḥ sadharmavinayaiḥ kiṃ tathā paridevase ||125||



sa bhavet pāpakṛnnityaṃ mohapāśavaśaṅgataḥ |

ki tapyase rodiṣi ca karma kṛtvā sudāruṇam ||126||



hetupratyayamūḍhasya dharmādharmeṣu sarvadā |

prāpto'si narakaṃ ghoraṃ nārakāgraṃ sudāruṇam ||127||



kāmavaśānugā narakaṃ yānti

kāmaiḥ kramati saṃyuktairyanna bhavati ceṣṭitam |

sukṛtaṃ karmavirasaṃ phalametadupasthitam ||128||



kṣapayitvā pramādena sukhāsaktena cetasā |

sukṛta narakaṃ yānti devāḥ kāmavaśānugāḥ ||129||



āryāpavādakā narakaṃ yānti

āryāpavādakā ye ca ye ca karmaphaladviṣaḥ |

te mṛtvā narakaṃ yānti ye ca mithyāvinītakāḥ ||130||



dharmavañcakā eva narakagāminaḥ

jananīgṛhapāpīyā ye cānye dharmavañcakāḥ |

teṣāmiṣṭakarā loke narakasya ca gāminaḥ ||131||



pāparatā duḥkhamanubhavanti

ye cānye sukhasaṃsaktā nityaṃ pāparatā narāḥ |

duḥkhād duḥkhaṃ tu te yānti cittena parivañcitāḥ ||132||



avadyakāryāṇi narake pātayanti

tasmādavadyakārye na matiṃ (kuryāt kathañcana) |

hīnānyavadyakāryāṇi narake pātayanti ca ||133||



ataḥ kuśalakarmāṇi karttavyāni

(karmāṇi) kuryāt kuśalāni nityaṃ

parārthabaddhena manorathena |

(hitaḥ sadaivaṃ narakasya rodhī) |

sevyo'pavargo daśadharma eṣaḥ ||134||



||iti narakavargaḥ ṣoḍaśaḥ ||