• Home
• Canon Text
• Romanized
• śāstrapiṭaka
• kośa
• 11 cittavargaḥ

11 cittavargaḥ

Technical Details

atha dvitīyam udānam



(cittañca vāk tathā karma saṃyojanantu pāpakam |

naraka-preta-tiryak-kṣutkausīdyāni vidurdaśa || )



(11) cittavargaḥ

cittaṃ rājavat pravartate

agādhaṃ viṣamaṃ tīvraṃ sarvasattvagataṃ mahat |

cittaṃ sarvasya jagato rājavat sampravartate ||1||



cittadhāriṇastajjñāḥ paramāṃ gatiṃ prāpnuvanti

adṛśyaṃ samprati bhayaṃ karma nārakacañcalāḥ |

ye cittadhāriṇastajjñāste gatāḥ paramāṃ gatim ||2||



etannayati vyutthānametannayati durgatim |

tadevādyantamamalaṃ nirvāṇamadhigacchati ||3||



manaḥ pūrvamaṅgamā dharmā manaḥ śreṣṭhā manomayāḥ |

manasā suprasannena bhāṣate vā karoti vā ||4||



cittavaśagasya cittamanudhāvati

yo na cittasya vaśagaścittaṃ tasyāntagaṃ sadā |

sa nirṇāśayati kleśān tamaḥ sūryodayo yathā ||5||



cittadagdhāḥ nāśaṃ yānti

cittaṃ śatruḥ paraṃ śatrurna śatruraparaḥ smṛtaḥ |

cittadagdhāḥ sadā sattvāḥ kāladagdhā yathā jaḍāḥ ||6||



yaścittavaśamāpanno bālo mūḍho'jitendriyaḥ |

tena duḥkhe samo nāsti nirvāṇaṃ tasya dūrataḥ ||7||



cittavaśagaḥ naraḥ narakamadhigacchati

āvarjyaḥ śatruraparo na cittāni (nigūhate) |

eṣa badhnāti puruṣo nṛpateryamaśāsane ||8||



viṣayeṣu ratā nityaṃ na sa dharmaḥ kathañcana |

saddharmapathasammūḍho narakaṃ nayate mahat ||9||



durdamānāṃ paraṃ cittamanīnāmagniruttamaḥ |

durdāntaṃ śīghragantṛ ca narakaṃ nayate dhruvam ||10||



ye cittasya vaśaṃ yātā yātāste narakaṃ purā |

yaistu tad vāryate śīghraṃ na te duḥkhānugāminaḥ ||11||



cittānurūpaṃ sukhaṃ duḥkhañca bhavati

yathā yathā (nṛṇāṃ) cittaṃ pariṇāmastathā tathā |

kalpānāṃ śubhakarttuśca pāpakarttuśca pāpakam ||12||



cittāyattaṃ bhavet karma karmāyattaṃ mano bhavet |

cittakarma samutthāya saṃsāraḥ parikīrtitaḥ ||13||



duṣṭena cetasā karma yaḥ karoti pumāniha |

pacyate-narake tena jālinyā sa viḍambitaḥ ||14||



cittakarma evaṃ saṃsāraḥ

cittādhīnaṃ bhavet pāpaṃ saṃsāraḥ parikīrtitaḥ |

cittapratyayajaṃ hyetat hetupratyayasambhavam ||15||



cittena vañcitāḥ sattvā pāpasya vaśamāgatāḥ |

gacchanti narakaṃ pāpāt kāraṇāgramahābhayā(t) ||16||



na bhavet cittavaśago'pi tu dharmavaśo bhavet

na gacchet cittavaśatāṃ gacched dharmavaśe sadā |

dharmacārī sukhī nityaṃ pāpacārī na śarmabhāk ||17||



cittāyattaṃ sarva phalam

cittāyattā kriyā sarvā cittāyattaṃ phalaṃ smṛtam |

vicittaṃ hi phalaṃ cittaṃ tathā phalamadhismṛtam ||18||



cittena cintitaṃ sarva lokaścittabhavānugaḥ |

na hi tad vidyate sthānaṃ yanna cittavaśānugam ||19||



śubhasya nirvāṇasādhanatvam

mokṣa bandhanayormūlaṃ hetubhūtaṃ paraṃ matam |

śubhena mucyate janturaśubhenāśu badhyate ||20||



cittavaśagāḥ kadāpi nirvāṇaṃ nādhigacchanti

jālinyā mohitāḥ sattvāścittasya vaśamāgatāḥ |

nirvāṇaṃ nāpi gacchanti jātyandhā iva satpatham ||21||



pañcendriyāṇi jitavān pāpaṃ bhuṅkte na karhicit |

ekacittaṃ tathā karma kurute vividhe bhave ||22||



pañcaraṅgojjvalaṃ cittaṃ yathā dṛśyaṃ praśasyate |

pañcendriyavicitraṃ hi tathā karma bhave bhavet ||23||



cittakarttā'nekadhā bhavati

cittakartā hi puruṣo dṛśyairbhavati naikadhā |

cittaṃ cittakaraṃ śūnyaṃ sarvathā naiva dṛśyate ||24||



cittaṃ śobhanamaśobhanaṃ ca karma karoti

śobhanā'śobhanaṃ citraṃ yathā bhittiḥ kṛtistathā |

śobhanā'śobhanaṃ karma tathā cittaṃ karoti hi ||25||



cittānugaṃ karma

divārātrau yathā cittaṃ sthitaṃ bhavati citragam |

divārātrau tathā karma bhave samanuvartate ||26||



akṛtvā sukṛtaṃ karma cittavṛttyanugā narāḥ |

patanti vivaśāḥ pāpe cittāriparivañcitāḥ ||27||



karmacittakaro hyeṣa yatra yatra niyujyate |

caracittena mahatā taccittaṃ ca karotyayam ||28||



pariṇāmaviśeṣeṇa yatra yatra niyokṣyate |

preṣyante tatra cittena tridhā tu gaticāriṇaḥ ||29||



cittasya damanaṃ sukhāvaham

cittādhināni vartante sarvakarmāṇi dehinām |

tasmāccittaṃ sadā dāntaṃ nayate padamacyutam ||30||



durviṣahyasya laghunā yatra yatra nipātinaḥ |

cittasya damanaṃ sādhu cittaṃ dāntaṃ sukhāvaham ||31||



yena cittaṃ sadā dāntaṃ tena doṣāḥ sadā jitāḥ |

jitadoṣasya dhīrasya duḥkhaṃ naiva prapadyate ||32||



cittasya laghuceṣṭitameva duḥkham

yacca svakaṃ bhaved duḥkhaṃ yacca duḥkhaṃ paratra ca |

tat sarvamaviṣahyasya cittasya laghuceṣṭitam ||33||



cittameva sarveṣāṃ prabhuḥ

sasurāsuranāgānāṃ piśācoragarakṣasām |

prabhurekaḥ paraṃ cittaṃ rājā(hi)tribhavasya tat ||34||



cittabhrāntaduḥkhamaśnute

cittaṃ nayati deveṣu cittañca narabhūmiṣu |

cittaṃ nayatyapāye(ṣu) cittaṃ bhrāmayati prajāḥ ||35||



cittād bhrāntasya naṣṭasya viṣayairmohitasya ca |

tṛṣṇayā dahyamānasya sthitaṃ duḥkhamanuttamam ||36||



cittasya damanāt sukhānubhūtirbhavati

ekacāri sadāmūḍhaṃ durviṣahyaṃ mahābalam |

sampradāri sadādṛśyaṃ capalaṃ śīghragāminam ||37||



evaṃ vidhaṃ hi ye cittaṃ damayanti manīṣiṇaḥ |

te mārabandhanātītāḥ pāraṃ prāptāḥ sukhodayam ||38||



capalaṃ cittaṃ narakāyopakalpyate

saṅkalpakuṭilaṃ tīvramagādhaṃ capalaṃ hi tat |

cittaṃ tamaḥśritaṃ śubhraṃ narakāyopakalpyate ||39||



doṣanirmukto'cyutaṃ padaṃ prāpnoti

tadevaṃ doṣanirmuktaṃ nendriyārthavaśānugam |

aliptaṃ pāpakairdharmairnayate padamacyutam ||40||



śuddhaṃ cittaṃ śuddhe karmaṇi pravartate

hetupratyayajaṃ cittaṃ yogavāhi paraṃ ca tat |

pariṇāmavaśācchīghraṃ tathā tat sampravartate ||41||



cittānadhīnatve karma cañcalaṃ bhavati

ekaṃ karoti karmāṇi vividhāni calaṃ ca tat |

ekānekaṃ caraṃ sūkṣmaṃ kṣaṇādūrdhva na tiṣṭhati ||42||



saṃsārasya māyopamatvapratipādanam

durvijñeyaḥ sadā tasya niḥśarīrasya sarvadā |

ko'sau nayati lokāntamatha kena ca gacchati ||43||



gataśca tiṣṭhati kutra śarīrakarmakārakam |

dṛśyāni tasya karmāṇi sañcayo na ca dṛśyate ||44||



damanaṃ duṣkaraṃ tasya yasya bhūtirna vidyate |

sarvasattvagataṃ ghoraṃ laghukāri ca cākṣuṣam ||45||



pāpāt pāpataraṃ dṛṣṭaṃ māyopamamidaṃ bhavet |

puṇyāt puṇyataraṃ dṛṣṭaṃ samyagmārgasamāśritam ||46||



māyopamatvasamarthanam

na gatirjñāyate tasya gamanaṃ naiva dṛśyate |

nīyate ca kṣataṃ sarva jātyuttarasamāni ca |||47||



śastreṇa chidyate nedaṃ jvalanena ca dahayate |

chidyate dahyate caiva janaḥ sarvamacakṣuṣā ||48||



dṛḍhaṃ yat karmarajjvādi naraṃ badhnāti duḥkhitam |

jātyantarasahastrāṇi nayate na ca dṛśyate ||49||



dāntameva cittaṃ sukhāvaham

muhūrtena śubhaṃ bhūtaṃ muhūrtenāśubhaṃ ca tat |

śubhāśubhābhyāṃ racitaṃ(cittaṃ) dāntaṃ sukhāvaham ||50||



ṣaḍ bhirdvāraiḥ prasūteṣu viṣayeṣvatilolupam |

cittaṃ nayati lokāntaṃ vyasanaṃ na ca budhyate ||51||



viprasannacittasya śreyaskaratve'nuttamaṃ sukhaṃ bhavati

viprasannaṃ yathā toyaṃ viprasannaṃ yathā nabhaḥ |

viprasannaṃ tathā cittaṃ nīyate sukhamuttamam ||52||



janāḥ sātiśayā (dṛṣṭā) vitarkaviṣayodbhavāt |

pauravāścittarājñaste bhavanti sahacāriṇaḥ ||53||



cañcalaṃ manaḥ saṃsāre gatiṃ kārayati

dhāvati yatra ca manastatra dhāvantyajñāninaḥ |

parasparabalānnī (tā) bhramanti tribhavārṇa(va)m ||54||



viśeṣacittenottamā gatirbhavati

cittavaiśadya bhāvānāṃ viśeṣaḥ karmaṇāstathā |

na karmaguṇahīnasya viśeṣa upalabhyate ||55||



susamāhitacittasya praśaṃsā

susamāhitacittaḥ sa nityaṃ dharmānudarśakaḥ |

na doṣavaśamāyāti yathā divyastamonudaḥ ||56||



gṛhasthasya samyagdṛṣṭitve nirvāṇaprāptirbhavati

samyagdṛṣṭeścādhimātrā yasya cetasi vartate |

gṛhastho'pi sa me jñeyo muktaḥ saṃsārabandhanāt ||57||



vijñā devalokaṃ gacchanti

kalyāṇanirmalaṃ yacca tato doṣeṇa bādhyate |

vijño (na) malamāpnoti devaloke sa jāyate ||58||



vinītacittāḥ sukhagāmino bhavanti

viṣayadvāracapalaṃ nadīkuṭilagāminam |

yairvinītamidaṃ cittaṃ te surāḥ śubhabhāginaḥ ||59||



adharmamārgaḥ kalyāṇāya na bhavati

adharmapathamāśritya janāḥ pāpavaśānugāḥ |

ciraṃ bhramanti saṃsāre cittena parikheditāḥ ||60||



cittaṃ kṣaṇe kṣaṇe parivartate

kṣaṇe kṣaṇe cittamidaṃ naikaśaḥ parivartate |

laghusvabhāvacapalaṃ māyāgandharvasannibham ||61||



cañcalacitto baddho bhavati

tasya bandhanameveṣṭaṃ jñānavijñānasammatam |

dūravṛttirmahāvegaḥ paridhāvatyanekadhā ||62||



dhṛtyā cittadhāriṇaḥ sukhamaśnute

hriyamāṇaṃ sadā cittamindriyārthe durāsadam |

sandhārayati yo dhṛtyā sa dhīraḥ pāragāmikaḥ ||63||



dhṛtimajñānamohaṃ ca viṣayottānamānasam |

sandhārayati yo dhīmān sa loke paṇḍito naraḥ ||64||



śubhacittaṃ kāmāvarodhakaṃ bhavati

yo yathā kurute cittaṃ tathā kāmān sa paśyati |

śubhena kāmaśamanaṃ nāśubhena pravardhanam ||65||



apraśāntamatirduḥkhamāpnoti

śāntacittaṃmanāḥ kāmānasyatīha viṣāstravat |

apraśāntamatiḥ sarpamaṇivat tān sa paśyati ||66||



cittavaśago na śubhāṃ gatimāpnoti

indriyāṇīndriyārthāśca cittādhīnā bhavantyamī |

citta saṃśleṣayogena pariṇāmaḥ pravartate ||67||



dhīra-praśaṃsā

tasyaiva vyavadhānena dhīraśca pratibudhyate |

rūpasāmānyato dṛṣṭaṃ pariṇāmaḥ kathaṃ pṛthak ||68||



cittasvarūpa-nirūpaṇam

yathā rūpaṃ tathā sarva viṣayāścittahetavaḥ |

cittaṃ dāntaṃ sadā śāntaṃ doṣamiśravigarhitam ||69||



ekamekaṃ yathā śāli gandharūpe pṛthagvidhe |

saṃśleṣo yāti nānātvaṃ tathācittaṃ pravartate ||70||



kriyāṃ hi tatra kurute yatra (cittaṃ) pradhāvati |

cittasaṃvāhanaṃ tadvākyaṃ loko'yaṃ sampravartate ||71||



viṣayād bhrāntamanasaś(cā)tivego mahābalaḥ |

cittaṃ(śānta)karaṃ dāntaṃ śivaṃ bhavati dehinām ||72||



dāntena cetasā tattvadarśanaṃ bhavati

tenādāntena śīghreṇa sarvapāpavihāriṇā |

bhrāmyate tribhavaḥ sarvaḥ na ca tattvaṃ sa paśyati ||73||



samīraṇaraṇodbhrānto lokaḥ saṃsāre bhramati

samīraṇaraṇodbhrānto yathā bhramati sāgaraḥ |

citteśvarasamāyukto loko'yaṃ bhrāmyate sadā ||74||



cittaṃ śubhaṃ sukhamedhīta

śubhopanītaṃ cittaṃ(hi) śubheṣvevāpanīyate |

tathā śubhānucaritamaśnute teṣu dhāvati ||75||



yogavāhicittaṃ pratyayaṃ labhate

yogavāhi nṛṇāṃ cittaṃ vāyvambusamameva ca |

pratyayaśca yathā labhyastathā tat paridhāvati ||76||



cittaṃ pradhāvati parivartate ca

śīghraṃ pradhāvate cittaṃ śīghrañca parivartate |

śīghraṃ nayati deveśa (bhuvane) dāyabhūmiṣu ||77||



cittasya karttṛtvam

karttṛtvaṃ sarvadharmāṇāṃ bharttṛtvaṃ sarvakarmaṇām |

netṛtvaṃ sarvakarmāṇāṃ cittatvamiti lakṣyate ||78||



cittaṃ na viśvaset

na viśvaseddhi cittasya nityaṃ chidraprahāriṇaḥ |

durlabhasyāpi vaśyasya capalasya viśeṣataḥ ||79||



cittagativarṇanam

muhūrtena śubhaṃ yāti muhūrtena tathā'śubham |

bhavatyavyākṛtaṃ śīghraṃ gatirasya na vidyate ||80||



nāyatirjñāyate tasya gamanaṃ naiva vidyate |

abhūtaḥ sambhavastasya bhūtvā ca pratigacchati ||81||



rūparahitaṃ cittam

nākāro vidyate tasya sañcayo'pi na vidyate |

grahaṇaṃ tasya naivāsti niḥśarīrasya sarvataḥ ||82||



pratyayasādhanavarṇanam

hetupratyayasāmagrayā prāptaḥ sañjāyate punaḥ |

maṇi-somapratyayo (hi) pratyayo jñāyate'nalaḥ ||83||



cittamindriyarūpādīn prati dhāvati

tathaivendriyarūpādīn prativijñānasambhavaḥ |

naikasya jñāyate cittaṃ samavāyyanulakṣyate ||84||



cittaṃ durnivāryam

tadevaṃ viṣayaṃ matvā durnivārya ca sarvataḥ |

saddharmamatirāstheyā na kāmeṣu kathañcana ||85||



cittamati capalam

caṇḍāticapalaṃ tīvramaviṣahyaṃ mahāvalam |

cittaṃ karoti karmāṇi yanna paśyanti bāliśāḥ ||86||



duḥkhapravartakaṃ cittam

sarvasya karmaṇaścittaṃ hetubhūtaṃ bhave bhave |

bhavet pravartakaṃ duḥkhaṃ yena dhāvati bāliśaḥ ||87||



cittadoṣo mahādoṣa eva

vātādayo na doṣāḥ syurdoṣā rāgādayo matāḥ |

vātādibhirapāyeṣu mānavo nopapadyate ||88||



cittadoṣo mahādoṣo nityaṃ(pāpa) vidarśakaḥ |

tasmātteṣāṃ samāśreyo na vātādigamādiha ||89||



rāgānugaṃ cittaṃ duṣṭaṃ bhavati

vātādayaḥ praṇaśyanti dehanāśāccharīriṇām |

(rāgādayo) na tasya syurjanmāntaraśatairapi ||90||



tasmād rāgasya vaśagaṃ na vidheyaṃ kadācana |

ābhyantikaṃ paraṃ śreyaḥ prāpyate rāgasaṅkramāt ||91||



mana eva cikitsako bhavati

yaścittavaidyaḥ sa bhiṣag na śarīrabhiṣag bhṛśam |

manaścikitsako jñeyo na tathā laukiko mataḥ ||92||



svacittakarmaṇā dagdho narake patati

karmacintyaṃ samaṃ cintyaṃ na cittena prapadyate |

svacittakarmaṇā dagdho narakānupadhāvati ||93||



dhyānādeva cittaṃ śuddhaṃ bhavati

yacchreyaḥ samacittasya na tat (kvāpyupa)padyate |

saṃrakṣyaṃ hṛdayaṃ mūḍhaḥ prayātamanudhāvati ||94||



cittavaśago duḥkhamāpnoti

dhyānād dhyeyena kūṭena yaḥ pumān vanamāśritaḥ |

taṃ muktvā cittakaḥ so'yaṃ saṃprahṛṣyati bāliśaḥ ||95||



ye bālāścittapāśena cittakarmavicāriṇaḥ |

nīyante hyavaśā ghoraṃ narakaṃ karmamohitā ||96||



cittavaividhyanirūpaṇam

sucittamapi yaccitaṃ na taccittaṃ satāṃ matam |

karmacittaṃ mahācittaṃ tridhātugatacitritam ||97||



sattvā citrairupāyairhi bhramanti gatipañcake |

tat sarva karmasācivyaṃ citrakartṛ vicitritam ||98||



cittavaśago baddho bhavati

cittacitrakareṇedaṃ karmajātaṃ vicitritam |

yena sarvamidaṃ baddhaṃ jagad bhramati mohitam ||99||



varṣātaparajodhūmaiścittaṃ naśyati bhūbhujaiḥ |

kalpakoṭisahastreṇa citraṃ cittaṃ vinaśyati ||100||



nāśaṃ prayāti basudhā sāgaraścāpi śuṣyati |

cittenāpi kṛtaṃ citraṃ tasyānubhavane sthite ||101||



pramatte citte nānāgatirbhavati

nānāgatisamāvṛttā nānākarmasamānugāḥ |

nānācittavaśāḥ sattvā bhramanti gatipañcake ||102||



bāliśā (nāṃ)nṛṇāṃ cittaṃ viṣayaṃ(prati)dhāvati |

na cinotyaśubhaṃ karma yena dhāvati durgatim ||103||



cañcalaṃ cittaṃ sadā viṣamaṃ bhavati

tasmāccittaṃ sadā rakṣyaṃ cañcalaṃ viṣamaṃ kharam |

nityaṃ viṣayasaṃsaktaṃ tṛṣṇāviṣasamāvṛttam ||104||



viṣayānuraktaṃ cittaṃ vyasane pātayati

dhāvate viṣayaṃ caitad vyasanaṃ nāvabudhyate |

paścāttu vyasane prāpte phalaṃ vindati karmaṇaḥ ||105||





samāhitacittaḥ sukhamaśnute

apāyabhīrutā tasya tasya cittaṃ samāhitam |

samāhitena cittena sukhāt sukhamavāpnute ||106||



nirjitacittaḥ sukhamāpnoti

viṣamaṃ capalaṃ tīvramaviṣahyaṃ mahābalam |

yaiścittaṃ nirjitaṃ dhīraiste loke sukhino matāḥ ||107||



||iti cittavarga ekādaśaḥ ||