• Home
• Canon Text
• Romanized
• śāstrapiṭaka
• kośa
• 4 parivartavargaḥ

4 parivartavargaḥ

Technical Details

(4) parivartavargaḥ



kasya kālaḥ parivartate

kāmairevāvitṛṣṇasya tṛṣṇayā tṛṣitasya ca |

cañcalendriyacittasya kālo'yaṃ parivartate ||1||



anityadhyeyatā yasya sukhasaktasya dehinaḥ |

strīdarśanena mattasya kālo'yaṃ parivartate ||2||



jātimaraṇavaśyasya mohitasya ca tṛṣṇayā |

bālasya tu janasyāsya kālo'yaṃ parivartate ||3||



gaticārakabaddhasya udvegavaśagasya ca |

pramādaviṣamūḍhasya kālo'yaṃ parivartate ||4||



auddhatyādiprasaktasya gātraśobhāratasya ca |

lābhairatṛptamanasaḥ kālo'yaṃ parivartate ||5||



pañcabandhanabaddhasya ṣaḍbhirvyāmohitasya ca |

trailokyavidhimūḍhasya kālo'yaṃ parivartate ||6||



vinipātānabhijñasya vitarkopahatasya ca |

janasya saktamanasaḥ kālo'yaṃ parivartate ||7||



tatkālaramaṇīyeṣu pariṇāmahiteṣu ca |

kāmeṣu saktamanasaḥ kālo'yaṃ parivartate ||8||



pūrvaduḥkhānabhijñasya divyasaukhyaratasya ca |

viprayogānabhijñasya kālo'yaṃ parivartate ||9||



karmajālena baddhasya manasyeva viceṣṭinaḥ |

satpathāt paribhraṣṭasya kālo'yaṃ parivartate ||10||



bhavadoṣānabhijñasya tṛṣṇayā mūḍhacetasaḥ |

mohāndhakāramagnasya kālo'yaṃ parivartate ||11||



kāmaikapāśabaddhasya niḥsahāyasya dehinaḥ |

devīgaṇavimūḍhasyaṃ kālo'yaṃ parivartate ||12||



indriyād vyapakṛṣṭasya satpathabhrāmitasya ca |

traidhātukarasajñasya kālo'yaṃ parivartate ||13||



saṃvarāsaṃvarajñasya vyāpādabahulasya ca |

naṣṭasambuddhamārgasya kālo'yaṃ parivartate ||14||



hitāhitavahirgasya kāryākāryajaḍasya ca |

krīḍābāla sadṛśasya kālo'yaṃ parivartate ||15||



nadīprastravaṇocceṣu vanopavanabhūmiṣu |

(saṃ)krīḍātatparasyāsya kālo'yaṃ parivartate ||16||



vimānagiripṛṣṭheṣu dharmākaravaneṣu ca |

ramataḥ kāmabhogeṣu kālo'yaṃ parivartate ||17||



karmadharma vipākeṣu nirāsaktasya dehinaḥ |

kevalāhārasaktasya kālo'yaṃ parivartate ||18||



śarīrasthitasyā'pi śarīrānabhijñatā

karmaṇāyuḥ pariśrāntaṃ traidhātukamidaṃ sadā |

bhramanti cakravannityaṃ na ca vindanti bāliśāḥ ||19||



jagataḥ doṣānabhijñatā

vinipātocchru yamayaṃ yo nāmārohate jagat |

na ca doṣāvadheyatvaṃ prakurvanti vimohitāḥ ||20||



dhīrasya kāmaparivarjanaṃ saukhyahetuḥ

etat (tu) paramaṃ saukhyaṃ yat kāmaparivarjanam |

vītakāṃkṣasya dhīrasya gataśokasya tāpinaḥ ||21||



munīnāṃ caramapadaprāptiphalam

tadādimadhyanidhane kalyāṇaṃ kṣemamuttamam |

yad prāpyamunayaḥ śrāntāścaranti vigatajvarāḥ ||22||



duḥkhahetavaḥ kāmāḥ

satkāmajaṃ bhavet saukhyaṃ vinipātagataṃ tu tat |

na hi kāmaviśeṣaṃ ca kiñcid duḥkhavipākajam ||23||



tasmāt kāmeṣu matimān na lubhyet kathañcana |

te hi saṃsāraduḥkhānāṃ hetubhūtāḥ sudāruṇāḥ ||24||



vanopavanaśaileṣu padmākaravaneṣu ca |

vibhrāntāstṛṣṇayā bālāḥ patanti saha daivataiḥ ||25||



śubhakarmāsakteḥ upadeśaḥ



kāñcaneṣu (ca) śaileṣu vaidūryaśikhareṣu ca |

kṣīyate hi śubhaṃ karma yatasva saha daivataiḥ ||26||



kalpavṛkṣeṣu ramyeṣu nadīprastravaṇeṣu ca |

caratastaiḥ śubhaṃ kṣīṇaṃ yatasva saha daivataiḥ ||27||



bhūmibhāgeṣu ramyeṣu ratnākaravaneṣu ca |

na śubhaṃ te sadā cīrṇa yatasva saha daivataiḥ ||28||



pañcātmakena vīryeṇa manaḥprahalādakāriṇā |

hatasya gatakālasya yatasva saha daivataiḥ ||29||



devānāṃ hitānabhijñatā

kāmaṃ saṃsakta manasairnityaṃ viṣayatatparaiḥ |

na jñāyate hitaṃ devairyadamantrāhitaṃ bhavet ||30||



devanindā

alpaśiṣṭamidaṃ puṇyaṃ cyavanaṃ samupasthitam |

gantavyamanyatra suraiḥ sukarmaphalabhojibhiḥ ||31||



ye nityaṃ śubhasaṃsaktāḥ kurvanti vā śubhaṃ sadā |

teṣāṃ visadṛśo heturmūrkhāṇāṃ hi vivartate ||32||



ke mṛtyuṃ pratīkṣante

bhuktvā mṛtyuṃ pratīkṣante te janāḥ kāmamohitāḥ |

śubhaśīlatamo'jñānāḥ sarvadā na parāyaṇāḥ ||33||



bhuktvā mṛtyuṃ pratīkṣante te janāḥ kāmamohitāḥ |

ye na karmavipākasya jñānaṃ roṣavadhe ratāḥ ||34||



bhuktvā mṛtyuṃ pratīkṣante te janāḥ kāmamohitāḥ |

prajñāpayanti na samā stṛṣṇāgniparivāritāḥ ||35||



bhuktvā mṛtyuṃ pratīkṣante te janāḥ kāmamohitāḥ |

viprayogakṛtaṃ duḥkhaṃ ye na paśyanti dāruṇam ||36||



bhuktvā mṛtyuṃ pratīkṣante te janāḥ kāmamohitāḥ |

strījanāsaktahṛdayā na vindanti punarbhavam |37||



bhuktvā mṛtyuṃ pratīkṣante te janāḥ kāmamohitāḥ |

vipattivyādhiśokebhyo nodvijanti kathañcana ||38||



bhuktvā mṛtyuṃ pratīkṣante te janāḥ kāmamohitāḥ |

ye pāpamitrasaṃsarga prakurvanti mahārūṣam ||39||



bhuktvā mṛtyuṃ pratīkṣante te janāḥ kāmamohitāḥ |

bhāvitaṃ cetasā yairna na ca tattvapraveśitā ||40||



bhuktvā mṛtyuṃ pratīkṣante te janāḥ kāmamohitāḥ |

yena sarvāsvavasthāsu saṃsārabhayabhīravaḥ ||41||



bhuktvā mṛtyuṃ pratīkṣante te janāḥ kāmamohitāḥ |

kāryākāryeṣu ye nityaṃ na subhāṣitacetasaḥ ||42||



bhuktvā mṛtyuṃ pratīkṣante te janāḥ kāmamohitāḥ |

ye na tattvadhiyo nityaṃ sarvabhūtahite ratāḥ ||43||



bhuktvā mṛtyuṃ pratīkṣante te janāḥ kāmamohitāḥ |

ye śarīra sukhārthena dharma hiṃsanti mohitāḥ ||44||



paṇḍitalakṣaṇam

ekāntamanasā nityaṃ śubhaṃ kāryaṃ prayatnataḥ |

aśubhaṃ ca sadā varjyametat paṇḍitalakṣaṇam ||45||



vinipātasādhanāni

kṣayaṃ yātaṃ ca yat śīlaṃ spṛṣṭvā yaḥ samupāgataḥ |

pramādāvañcito'vaśyaṃ vinipāto bhaviṣyati ||46||



viṣayiṇaḥ parivartanaśīlatā na tu viṣayāṇām

gatā gacchanti yāsyanti deveśāścaiva sarvataḥ |

tiṣṭhanti śikhare ramye nānāratnavibhūṣite ||47||



vaidūryaśikharā ramyāstathānye vanamālinaḥ |

viṣayāstādṛśā eva janastu parivartate ||48||



vanopavanaramyāṇi bhūmibhāgāni sarvaśaḥ |

tiṣṭhantyavikalānyeva janastu parivartate ||49||



vaidūryamayanālāni kāñcanāni viśeṣataḥ |

padmākarāṇi tānyeva janastu parivartate ||50||



sarāṃsi sarito ramyāḥ pakṣisaṅghairnirantaram |

tathaivāvikalā hyete janastu parivartate ||51||



vimānāni rathāścaiva harmyāṇi ca tathaiva ca |

tiṣṭhantyavikalā hyete janastu parivartate ||52||



parivartanaṃ lokasya viṣayairvañcitasya ca |

tathāpi nāmalokasya nodvego hṛdi jāyate ||53||



abhyāsena kharī bhūtaṃ cittaṃ saṃsāracāriṇam |

yena manye mahad duḥkhaṃ hṛdaye naiva vartate ||54||



śūlikena yathā baddhāḥ paśavo gṛhapañjare |

ekaikaśo vinaśyanti śeṣāṇāṃ nāsti sambhramaḥ ||55||



sukhāya kāmināmeva iyaṃ bhūmiravasthitā |

cyutāścaivopapannāśca tathāmī bāliśāḥ surāḥ ||56||



viṣayonmukhānāṃ maraṇānabhijñatvam

pramādāya hatāḥ sattvā mṛtyuḥ kṣaṇikaduḥkhadaḥ |

nāvabuddhayanti maraṇaṃ paśuvad vītasambhramāḥ ||57||



te paścād dīrghamanasaḥ kālasya vaśamāgatāḥ |

paścāttāpamayo vahnirdhakṣyate niṣpratikṣayaḥ ||58||



dāruṇaṃ niṣpratīkāramavaśyaṃ rūpadehinām |

maraṇaṃ kālavaśagaṃ tad viditvā''gamaṃ caret ||59||



viprayogāntāḥ sarve saṃyogāḥ

samāgamāḥ priyāloke viyogāścāpriyāḥ sadā |

saṃyogo viprayogānto dharmateyaṃ sanātanā ||60||



kṣaṇe lave muhūrte ca divārātrau tathā'dhvani |

maraṇaṃ cintayed dhīrastasya nāsti pratikriyā ||61||



gatakalmaṣā eva śāntimadhigacchanti

smṛtimagnyāṃ praśaṃsanti yeṣāṃ maraṇasaṃbhavā |

śreyasaikaparāṃ śānti prayāntiṃ gatakalmaṣāḥ ||62||



mṛtyorarthamanusmṛtya doṣo'yaṃ kasya sammataḥ |

nirdoṣaṃ hi manaḥ sarvaṃ śāntaṃ bhavati nityaśaḥ ||63||



tathāgataiḥ apramādaparaṃ śreṣṭhamuktam

apramādaparaṃ śreṣṭhamidamuktaṃ tathāgataiḥ |

yanmṛtyoḥ smaraṇaṃ nityamaśubhānāṃ ca varjanam ||64||



||iti parivartavargaścaturthaḥ ||